တႃႇႁၢပ်ႇၵၢၼ်သိုၵ်း ၸုပ်ႈ 12 ၼႆႉ ၵၢင်ႉၵႄႇၼႂ်းပွၵ်ႉ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ၸႂ်ႉၵူၼ်းမိူင်း ၸူၵ်းမႄး၊ ၽႂ်ၸူၵ်းလႆႈၵေႃႈ တၵ်းလႆႈၵႂႃႇၾိုၵ်းၵၢၼ်သိုၵ်း ငိူင်ႉဝႄႈဢမ်ႇလႆႈ ဝႃႈၼႆ။

ဝၼ်းတီႈ 07/04/2025 ယၢမ်းၵၢင်ၼႂ် ၵၢင်ႉၵႄႇၼႂ်းပွၵ်ႉ ရတၼႃႇသီႇရိ ၊ ၵျွင်းၵျီးၸူႉ ၊ ၸဵင်ႇပၢၼ်း ဝဵင်းတူၼ်ႈတီး ႁွင်ႉဢဝ် ၵူၼ်းၼုမ်ႇၸိူဝ်းပႃးၼႂ်းသဵၼ်ႈၸိုဝ်ႈ တႃႇႁၢပ်ႇၵၢၼ်သိုၵ်း ၼၼ်ႉသေ ႁႂ်ႈမႃးၸူၵ်းမႄး တႃႇၾိုၵ်းၵၢၼ်သိုၵ်းၸွမ်းသိုၵ်းမၢၼ်ႈ ၸုပ်ႈ 12 ဝႃႈၼႆ။

ၼၢင်းယိင်း ၵူၼ်းမိူင်းဝဵင်းတူၼ်ႈတီး လၢတ်ႈၽူႈတွႆႇႁွၵ်ႈဝႃႈ -“တွၼ်ႈတႃႇၸုပ်ႈ 12 ၼႆႉ ၵၢင်ႉၵႄႇၼႂ်းပွၵ်ႉ ႁွင်ႉဢဝ်ပေႃႈမႄႈၵူၼ်းၼုမ်ႇ ၸိူဝ်းမီးလုၵ်ႈ ဢၼ်ပႃးသဵၼ်ႈၸိုဝ်ႈဝႆႉ တႃႇႁၢပ်ႇၵၢၼ်သိုၵ်းၼၼ်ႉသေ ၸႂ်ႉၸူၵ်းမႄး။ ၸုပ်ႈဢၼ်ပူၼ်ႉၵႂႃႇၸိူဝ်းၼၼ်ႉ ဢမ်ႇလႆႈၸူၵ်းမႄးၶႃႈလူင်။ ၸင်ႇမႃးၸႂ်ႉၸူၵ်းမႄး ၸုပ်ႈၵမ်းၼႆႉ”- ဝႃႈၼႆ။

ဝၼ်းတီႈ 05/04/2025 ယၢမ်းၵၢင်ၼႂ်ၸဝ်ႉ ၼၼ်ႉၵေႃႈ ၵၢင်ႉၵႄႇၼႂ်းပွၵ်ႉရတၼႃႇသီႇရိ ႁွင်ႉပၢင်ၵုမ်တႃႇ ၸူၵ်းမႄး။ ၵူၼ်းပိုၼ်ႉတီႈ ဢွၼ်ၵၼ်သၢၼ်ၶတ်းလႄႈ ဢဝ်ၵၢတ်ႈၵႂႃႇပႅတ်ႈ  – ၵူၼ်းပိုၼ်ႉတီႈလၢတ်ႈ ၼင်ႇၼႆ။

မိူၼ်ၼႆၼင်ႇၵဝ်ႇ တီႈပွၵ်ႉၵၢၼ်ႇၵျီး ၼႆႉၵေႃႈ ၵၢင်ႉၵႄႇပၼ်ၾၢင်ႉၵူၼ်းၼႂ်းပွၵ်ႉလၢတ်ႈဝႃႈ ၸုပ်ႈ 12 ၼႆႉ တေလႆႈၸူၵ်းမႄးဢဝ် ဝႃႈၼႆ။

ၵူၼ်းၸၢႆး ဢႃယု 27 ပီ ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ဢၼ်ၸူၵ်းမႄးၼႆႉ ၶဝ်ႁွင်ႉၵူၼ်းဝၢၼ်ႈသေ လၢတ်ႈၼႄဝႆႉၵူၺ်း။ ၵွၼ်ႇၼႃႈ သွင်ပွၵ်ႈပူၼ်ႉမႃးၼၼ်ႉတႄႉ ၶဝ်သူင်ႇလိၵ်ႈဢဝ် ဝႃႈၽႂ်တေလႆႈၵႂႃႇၼႆ။ ၵူၼ်းၸိူဝ်းလႆႈလိၵ်ႈ ဢၼ်ၶဝ်သူင်ႇမႃးၼၼ်ႉၵေႃႈ ဢၼ်ပၢႆႈၵေႃႈပၢႆႈ။ မၢင်ၸိူဝ်းၵေႃႈ ၵႂႃႇဢုပ်ႇဢူဝ်းငူပ်ႉငီႉႁႃတၢင်းၵႄႈလိတ်ႈ တီႈၵၢင်ႉၵႄႇပွၵ်ႉၽႂ်မၼ်း။ တႃႇတေငိူင်ႉဝႄႈၼၼ်ႉ ၼိုင်ႈၵေႃႉၼႆႉ လႆႈပၼ်ငိုၼ်း မွၵ်ႈ 30 သႅၼ်ပျႃး၊ ငိုၼ်းတႄႉပၼ်ၵႂႃႇယဝ်ႉ ၵူၺ်းၸိုဝ်ႈတႄႉ ဢမ်ႇမွတ်ႇပၼ် တိုၵ်ႉမီးယူႇၼႂ်းသဵၼ်ႈမၢႆ။ ပွၵ်ႈၼႆႉတႄႉ တေၸူၵ်းမႄးဢဝ်ၼႆတႄႉ ၸွင်ႇတေၵႄႈလိတ်ႈလႆႈတႄႉဢမ်ႇႁူႉ”- ဝႃႈၼႆ။

တီႈပွၵ်ႉၵၢၼ်ႇၵျီးတႄႉ မၢင်လိူၼ်ၸႂ်ႉၸူၵ်းမႄး မၢင်လိူၼ်သူင်ႇလိၵ်ႈထိုင်ႁိူၼ်း။ ၵူၼ်းၸိူဝ်း ဢမ်ႇမီးလုၵ်ႈ ၸၢႆးသႅၼ်းပၢၼ်ႁၢပ်ႇၵၢၼ်သိုၵ်းၵေႃႈဢမ်ႇလွတ်ႈ – လႆႈပၼ်ငိုၼ်းတႃႇၵမ်ႉ ၸွႆႈၵူၼ်းႁၢပ်ႇၵၢၼ်သိုၵ်း၊ ၼိုင်ႈလိူၼ်လႆပၼ် 5 မိုၼ်ႇပျႃး၊ လႆႈပၼ်ၵူႈလိူၼ် – ၵူၼ်းပိုၼ်ႉတီႈလၢတ်ႈၼင်ႇၼႆ။

“ၼႂ်းပွၵ်ႉၵၢၼ်ႇၵျီးၼႆႉ မီး 4 ၶဵတ်ႇၼႃႈလိၼ် (နယ်မြေ) ။ ၶဝ်ႈသူင်ႇလိၵ်ႈႁွင်ႉ ၼိုင်ႈၶဵတ်ႇ 1 ၵေႃႉ တေပဵၼ် ၵူၼ်းၼုမ်ႇၸိူဝ်းမီးႁိမ်းၸမ် 35 ပီ ၸိူဝ်းၼႆႉ”- ဝႃႈၼႆ။

ၵူၼ်းမိူင်းပွၵ်ႉၵၢၼ်ႇၵျီးလၢတ်ႈထႅင်ႈဝႃႈ- ၸုပ်ႈယဝ်ႉၵႂႃႇၸိူဝ်းၼၼ်ႉ ၵူၼ်းၼုမ်ႇၸိူဝ်းၵႂႃႇၾိုၵ်း ၵၢၼ်သိုၵ်း ၸွမ်းသိုၵ်းမၢၼ်ႈ – ထုၵ်ႇသူင်ႇတူဝ်ၵႂႃႇၼႃႈသိုၵ်းသေ ၵႂႃႇတၢႆၼႃႈသိုၵ်းတင်းၼမ်။ ၵွပ်ႈၼႆလႄႈ ပေႃႈမႄႈ ၵူၼ်းၼုမ်ႇၼႂ်းပွၵ်ႉ ဢမ်ႇၶႂ်ႈသူင်ႇလုၵ်ႈလၢင်းၸဝ်ႈၵဝ်ႇၵႂႃႇၾိုၵ်းၵၢၼ်သိုၵ်း၊ ၸႂ်ႉလုၵ်ႈလၢင်းပၢႆႈ – ဝႃႈၼႆ။

ၽူႈၸၢႆး ဢႃယု သႅၼ်းပၢၼ်မွၵ်ႈ 35 ပီ ယူႇဝဵင်းတူၼ်ႈတီး လၢတ်ႈၽူႈတွႆႇႁွၵ်ႈဝႃႈ -“ပေႃးၵႂႃႇၾိုၵ်းၵၢၼ် သိုၵ်းယဝ်ႉ ယူႇတီႈ ပေႃႈမႄႈၵူၼ်းႁိူၼ်း ဢမ်ႇၵပ်းသိုပ်ႇလုၵ်ႈလၢင်းၶဝ်လႆႈ။ မၢင်ၸိူဝ်းၵူၺ်းလႆႈငိၼ်းၶၢဝ်ႇ ဝႃႈ ၵႂႃႇတၢႆၼႃႈသိုၵ်းယဝ်ႉၼႆ။ ယွၼ်ႉၼၼ်ၽႂ်ၵေႃႈဢမ်ႇႁတ်းၵႂႃႇ၊ ၵူၼ်းၸိူဝ်းသဵၼ်ႈၸိုဝ်ႈပႆႇလူင်းမႃးၵေႃႈ ဢွၼ်ၵၼ်မႆႈၸႂ်ယူႇၵူႈဝၼ်း ဝႃႈတေထုၵ်ႇႁွင်ႉမႃးဝၼ်းလႂ်ၼႆ။ ပေႃးလိၵ်ႈထိုင်မႃးတႄႉတႄႉ တေလႆႈႁဵတ်း ႁိုဝ်ပေႃးဢမ်ႇႁူႉယဝ်ႉ၊ ငဝ်းလၢႆးယၢမ်းလဵဝ်ၼႆႉသမ်ႉ ၵၢၼ်ႁႃၵိၼ်လဵင်ႉတွင်ႉၵေႃႈယၢပ်ႇ၊ ပေႃးၶဝ်ႁွင်ႉမႃး ၸိူင်ႉၼၼ်တႃႇ ၵႄႈလိတ်ႈၼၼ်ႉ ငိုၼ်းၵေႃႈဢမ်ႇမီး”- ဝႃႈၼႆ။

သိုၵ်းမၢၼ်ႈ ပိုၼ်ၽၢဝ်ႇပၵ်းပိူင်ႁၢပ်ႇၵၢၼ်သိုၵ်းသေ တဵၵ်းၶၢၼ်းတီႉၺွပ်း လၢၵ်ႈၸၼ် ၵူၼ်းၼုမ်ႇၵႂႃႇၾိုၵ်း ၵၢၼ်သိုၵ်းယဝ်ႉၵႂႃႇ ၸုပ်ႈ 11 ယဝ်ႉ။ ၵူၼ်းၸိူဝ်းထုၵ်ႇႁွင်ႉၵႂႃႇၼၼ်ႉ လႆႈ ၵႂႃႇၾိုၵ်းၵၢၼ်သိုၵ်းတီႈ ၼႂ်းတိူင်း သိုၵ်းၽွင်ႈ၊ ထုၵ်ႇသူင်ႇၵႂႃႇၾိုၵ်းတီႈ လွၵ်ႉၸွၵ်ႇၽွင်ႈ။ ဝၢႆးၾိုၵ်းၵၢၼ်သိုၵ်းယဝ်ႉ ၵမ်ႈၽွင်ႈထုၵ်ႇသူင်ႇၵႂႃႇ ႁဵတ်းၵၢၼ်လုမ်းၼႂ်းတိူင်းသိုၵ်း ၵမ်ႈၼမ်တႄႉထုၵ်ႇသူင်ႇၵႂႃႇၼႃႈသိုၵ်း။ ၵမ်ႈၼမ်တႄႉဢမ်ႇလႆႈပွၵ်ႈၶိုၼ်း ႁိူၼ်းယေး။