တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ၵူၼ်းဢမ်ႇႁူႉၾၢႆႇၵေႃႉၼိုင်ႈ လၢတ်ႈသွင်ၼၢႆးလၢၼ် ၽွင်းၸၢႆႇၵၢတ်ႇယူႇၼၼ်ႉဝႃႈ ၶႂ်ႈလူႇၶဝ်ႈသၢၼ်လႄႈ တေဢဝ်ရူတ်ႉၶိူင်ႈ သွင်ၼၢႆးလၢၼ်ၵႂႃႇတၢင်ႇမႃးပၼ်ၼႆသေ ၶီႇရူတ်ႉၶိူင်ႈၶႃၼၢႆးလၢၼ် ၵႂႃႇပႅတ်ႈၶဝ်ႈသၢၼ်ၵေႃႈဢမ်ႇလႆႈ ရူတ်ႉၶိူင်ႈၵေႃႈႁၢႆ။

ဝၼ်းတီႈ 05/04/2025 ယၢမ်းၵၢင်ၼႂ် 9 မူင်း ၽွင်းၼၢႆးလၢၼ်သွင်ၵေႃႉ ၵႂႃႇၸၢႆႇၵၢတ်ႇ တီႈပွၵ်ႉႁူင်းၾႆးမိၼ်ၼၼ်ႉ ၺႃးၵူၼ်းဢမ်ႇႁူႉၾၢႆႇ ၵေႃႉၼိုင်ႈ မႃးလႅၼ်ဢဝ်ရူတ်ႉၶိူင်ႈ ၶႃၼၢႆးလၢၼ်ၵႂႃႇ ဝႃႈၼႆ။

ၵူၼ်းၸမ်ၸႂ် သွင်ၵေႃႉၼၢႆးလၢၼ် ဢၼ်ထုၵ်ႇလၵ်ႉရူတ်ႈၶိူင်ႈၼၼ်ႉ လၢတ်ႈၽူႈတွႆႇႁွၵ်ႈဝႃႈ -“လၢတ်ႈဝႃႈ တေၵႂႃႇတၢင်ႇၶဝ်ႈသၢၼ်ၼႆသေ ဢဝ်ရူတ်ႉၶိူင်ႈၶႃၼၢႆးလၢၼ်ၵႂႃႇ၊ ႁွင်ႉဢဝ် လၢၼ်ၸၢႆးဢႃယု 13 ပီၼၼ်ႉ ၶီႇၵႂႃႇၸွမ်း၊ ၵူၺ်းၵႃႈ ၽိူဝ်ႇထိုင်ပွတ်းတၢင်း ၸၢႆးၵူၼ်းလႅၼ်ၼၼ်ႉ ဝႃႈႁင်းလုၵ်ႈဢွၼ်ႇ ၸဝ်ႈရူတ်ႉၶိူင်ႈ ၼၼ်ႉဝႃႈ ႁႂ်ႈလူင်းပႂ်ႉၵၢင်တၢင်း။ ၵူဝ်ဢမ်ႇပေႉထူင်ၶဝ်ႈသၢၼ်မႃးၼႆသေ ဢီးလုၵ်ႈဢွၼ်ႇ တူၵ်းရူတ်ႉၶိူင်ႈယဝ်ႉ ၶီႇလႅၼ်ႈပၢႆႈ။ လုၵ်ႈဢွၼ်ႇၸၢႆးၼၼ်ႉ တူၵ်းရူတ်ႉၶိူင်ႈၵွၵ်းႁူဝ်တႅၵ်ႇ”- ဝႃႈၼႆ။

ၵူၼ်းဢၼ် ၸူၼ်ရူတ်ႉၶိူင်ႈၵႂႃႇၼၼ်ႉ ဢႃယုတေမီးမွၵ်ႈ 30 ပီ၊ ၽွင်းမၼ်းၸၢႆးၶဝ်ႈမႃး လၢတ်ႈတေႃႇ ၼၢႆးလၢၼ်ၼႂ်းၵၢတ်ႇၼၼ်ႉ ဢမ်ႇႁူႉၸၵ်းၵၼ် ဢမ်ႇယၢမ်ႈႁၼ်ၵၼ်သေပွၵ်ႈသေတႃႉ ႁဵတ်းႁႂ်ႈၶႃၼၢႆးလၢၼ် မိုင်မဝ်းၵႂႃႇၵမ်းၼိုင်ႈသေ တူၵ်းလူင်းလႆႈၸႂ်ၽွမ်ႉပၼ်ဢဝ်ရူတ်ႉၶိူင်ႈၶႃ ၵႂႃႇလီလီငၢမ်းငၢမ်း။ 

ဢိင်ၼိူဝ် လွင်ႈယုမ်ႇယမ်ၵူၼ်းပိုၼ်ႉတီႈတႄႉလၢတ်ႈဝႃႈ – ၺႃးလုၺ်ႉယႃမိုင်ယူဝ်ႉ- ဝႃႈၼႆယူႇသေတႃႉ ဢမ်ႇၸၢင်ႈၼႄလၵ်းထၢၼ်သင်ၼင်ႇၵဝ်ႇ။

တီႈပွၵ်ႉပၢင်ႁူင်းၾႆးမိၼ် ဝဵင်းတူၼ်ႈတီးၼႆႉ ၽူႈလၵ်ႉၵူၼ်းၸူၼ်ၼမ်၊ ပေႃးပဵၼ်မႃးသေၸိူဝ်ႉသေပိူင်ႈ ဢမ်ႇမီးၽူႈလႂ်ၸုမ်းလႂ် ဢဝ်ပုၼ်ႈၽွၼ်းပၼ်လႄႈ ၶႂ်ႈႁႂ်ႈၾၢင်ႉၵႂႃႇမႃး – ၵူၼ်းပိုၼ်ႉတီႈလၢတ်ႈ။

“ငဝ်းလၢႆးဝၢၼ်ႈမိူင်းဢမ်ႇလီၸိူင်ႉၼႆ ၶႂ်ႈႁႂ်ႈပေႃႈမႄႈလုၵ်ႈဢွၼ်ႇၾၢင်ႉၵၼ်ၵူႈၵေႃႉ ၊ ယႃႇယုမ်ႇငၢႆႈ ၊ ယႃႇမီး ၸႂ်လေႃးၽ။ တေႃႈလဵဝ်ၼႆႉ ၵူၼ်းဢၼ်လွၵ်ႇလႅၼ်ၵိၼ်ၵေႃႈၼမ်လႄႈ ၶႂ်ႈႁႂ်ႈၾၢင်ႉတူဝ်ယူႇတႃႇသေႇ၊ ပေႃးပဵၼ်မႃး မၼ်းယၢပ်ႇၼႃႇ ၊ လႆႈႁၼ်လႆႈငိၼ်းၸိူင်ႉၼႆ ၸႂ်ဢမ်ႇလီ ၊ ယၢမ်းလဵဝ်ၼႆႉ ၵူၼ်းမိူင်းၵေႃႈယူႇသဝ်း ဢမ်ႇမီးလွင်ႈႁူမ်ႇလူမ်ႈသေဢိတ်းယဝ်ႉ”- ဝႃႈၼႆ။

မိူၼ်ၼင်ႇၼႆ ၼႂ်းဝၼ်းတီႈ 27/03/2025 ယၢမ်းၵၢင်ၶမ်ႈ 8 မူင်း ၵူၼ်းၸုမ်းဢမ်ႇႁူႉၾၢႆႇ ဢမ်ႇထၢမ်သင်သေ ပေႃႉထုပ်ႉၼုမ်ႇၸၢႆးၵေႃႉၼိုင်ႈ တီႈၼႂ်းပွၵ်ႉမျႃႉၵၼ်ႇတႃႇ (မြကန်သာ) – ၵူၼ်းပိုၼ်ႉတီႈလၢတ်ႈ။   

ဝၼ်းတီႈ 10/02/2025 ယၢမ်းၵၢင်ဝၼ်း ရူတ်ႉၶိူင်ႈမိၵ်ႈ Honda သႅၼ်းၵႃႈၶၼ်ယႂ်ႇ ႁၢႆလၢႆလၢႆလမ်း။ ဝၼ်းၼၼ်ႉၵူၺ်းၼင်ႇၵဝ်ႇ ရူတ်ႉၶိူင်ႈသႅၼ်း Honda Wave လမ်းၼိုင်ႈ ဢၼ်ၵိုတ်းဝႆႉ ၼႃႈႁူင်းယႃ ၸဝ်ႈၸၢမ်ႇ ထုၼ်းၵေႃႈ ၺႃးလၵ်ႉႁၢႆလမ်းၼိုင်ႈ။ ၼႂ်းဝၼ်းတီႈ 11 သမ်ႉ ရူတ်ႉၶိူင်ႈသႅၼ်း Click လမ်းၼိုင်ႈ ၽွင်းၵိုတ်း ဝႆႉၼႃႈႁူင်းသဝ်း ၵၢင်ဝဵင်းတူၼ်ႈတီးၼၼ်ႉ ၺႃးလၵ်ႉၵႂႃႇထႅင်ႈ။

ဝၢႆးလင် သိုၵ်းမၢၼ်ႈယိုတ်းမိူင်းမႃးၼႆႉ ၼွၵ်ႈလိူဝ်ဝဵင်းတူၼ်ႈတီး ၼႂ်းမိူင်းတႆးတၢင်ႇတီႈတၢင်ႇဝဵင်းၵေႃႈ မီးၽူႈလၵ်ႉၸၵ်ႉၶုတ်ႈ၊ ၵူၼ်းၸူၼ်လိူင်ႇၼမ်။ ယူႇတီႈ ၽူႈမီးပုၼ်ႈၽွၼ်း ပလိၵ်ႈသိုၵ်းမၢၼ်ႈၵေႃႈ ဢမ်ႇဢဝ်ပုၼ်ႈၽွၼ်း ၵႄႈလိတ်ႈပၼ်လႆႈႁႂ်ႈထိုင်တီႈ။ ရူတ်ႉၶိူင်ႈဢမ်ႇၵႃး သၢႆၾႆး၊ ပူင်းၼမ်ႉမၼ်း ၸိူဝ်းၼႆႉၵေႃႈ ႁၢႆတင်းၼမ် – ၵူၼ်းပိုၼ်ႉတီႈလၢတ်ႈ။