ဝၼ်းတီႈ 07/04/2025 ၼႆႉ သိုၵ်းမၢၼ်ႈ ယိုတ်းမိူင်း ပိုတ်ႇၶူဝ်ၶၢမ်ႈၼမ်ႉၶူင်းလင်မႂ်ႇ တီႈတႃႈၵေႃႈ ဢၼ်မီးၼႂ်းၵႄႈဝဵင်းၵႃလီႉ – ဝဵင်းမိူင်းပဵင်းၼၼ်ႉ မီးၸွမ်သိုၵ်းလူင် ဢွင်ႇလိၼ်းတူၺ်းလႄႈ ၽွင်းလူင်မိူင်းတႆး ဢၼ်ယူႇတႂ်ႈသိုၵ်းမၢၼ်ႈၵုမ်းၵမ် ဢူးဢွင်ႇဢွင်ႇ၊ ၽူႈၵွၼ်းတိူင်းသိုၵ်းဝၼ်းဢွၵ်ႇၵၢင်လႄႈ ၸဝ်ႈလႅင်းသႂ် ႁူဝ်ၼႃႈ ပျီႇတူႉၸိတ်ႉပၢင်ႇလႅင်းသႂ် ပႃးၸဵမ် ၵူၼ်းမိူင်းပိုၼ်ႉတီႈ မႃးၶဝ်ႈႁူမ်ႈတင်းၼမ်။

ၵူၼ်းမိူင်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ -“ပၢင်ပိုတ်ႇၶူဝ်မႂ်ႇၼႆႉ လႆႈၸတ်းႁဵတ်းတီႈၼိူဝ်ၶူဝ်ၼၼ်ႉ ၵမ်းသိုဝ်ႈသေ မီးသိုၵ်းမၢၼ်ႈမႃးၶဝ်ႈႁူမ်ႈတင်းၼမ် ပႃးၸဵမ်ၽူႈမီးၸၼ်ႉ ၸိူဝ်းၼႆႉၵေႃႈ မႃးၼမ်တႄႉတႄႉ။ လိူဝ်ၼၼ်ႉ ၸုမ်းပျီႇတူႉၸိတ်ႉၵေႃႈ ႁၼ်မႃးၶဝ်ႈႁူမ်ႈမိူၼ်ၵၼ်”- ဝႃႈၼႆ။

ဢၼ်သိုၵ်းမၢၼ်ႈ မႃးပိုတ်ႇၶူဝ်မႂ်ႇၼႆႉ ၸဝ်ႈရူတ်ႉၵႃးလႄႈ ၵူၼ်းၵႂႃႇတႃႈပၢႆတၢင်းတေလီမႃး လိူဝ်ၵဝ်ႇၼႆသေတႃႉ။ ၵူၺ်းၵႃႈ ယင်းလႆႈမႆႈၸႂ် ၵူဝ်သိုၵ်းမၢၼ်ႈ ၵဵပ်းၶွၼ်ႇၼမ်မႃးထႅင်ႈ ဝႃႈၼႆ။

ၸဝ်ႈၵႃး တူၼ်ႈတီး – တႃႈၶီႈလဵၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶူဝ်ၼႆႉ ႁဵတ်းမႃးႁိုင်ယဝ်ႉလႄႈ ပေႃးလႆႈတႆႇၶူဝ်ၼႆႉ တေပဵၼ်တၢင်းငၢႆႈလူမ် တႃႇၵႂႃႇတႃႈပႆတၢင်းတႄႉတႄႉ။ ၵူၺ်းၵႃႈ ၾင်ႇၶူဝ်တင်းသွင်ၾၢႆႇတႄႉ တိုၵ်ႉမီးၵဵတ်ႉလၢၼ်ႇတင်းၼမ်လႄႈ လႆႈမႆႈၸႂ်ၵူဝ်သိုၵ်းမၢၼ်ႈ၊ ပလိၵ်ႈမၢၼ်ႈၶဝ် ၵဵပ်းငိုၼ်းၼမ်မႃးလိူဝ်ၵဝ်ႇ။ ဢၼ်ၶဝ်ၵဵပ်းယူႇ မိူဝ်ႈလဵဝ်ၼႆႉ ပေႃးဢွၵ်ႇတၢင်းၼိုင်ႈပွၵ်ႈၼႆ တီႈၶူဝ်တႃႈၵေႃႈၼႆႉၵူၺ်း လႆႈပၼ်ငိုၼ်းဢမ်ႇယွမ်းမိုၼ်ႇ”- ဝႃႈၼႆ။

ၶူဝ်တႃႈၵေႃႈၼႆႉ တႄႇႁဵတ်းမႃး မိူဝ်ႈလိူၼ်ဢေႊပရိူဝ်ႊ ပီ 2018 ၽွင်းပၢၼ်လူင်ပွင်ၸိုင်ႈၼူၵ်ႉယုင်း NLD သေ ဝၢႆးသိုၵ်းမၢၼ်ႈ ယိုတ်းမိူင်းမႃးၸမ်ႉ ၶဝ်ၸင်ႇမႃးသိုပ်ႇႁဵတ်းထႅင်ႈ လႆႈၸႂ်ႉၶၢဝ်းယၢမ်းႁိုင် 7 ပီ ၸင်ႇယဝ်ႉတူဝ်ႈ။ ယၢမ်းလဵဝ် ၶူဝ်လင်မႂ်ႇၼႆႉ တၢင်းယၢဝ်းမီး 1,151 ထတ်း၊ မီးႁႅင်းႁပ်ႉၶၢမ်ႇတင်းၼၵ်း 60 တၼ်ႊ။ ၶူဝ်မႂ်ႇၼႆႉ မီးၾၢႆႇၼိူဝ်ၶူဝ်ၵဝ်ႇဝႆႉ။

မိူၼ်ၼၼ်ၼင်ႇၵဝ်ႇ ၶူဝ်ၶၢမ်ႈၼမ်ႉၶူင်း တီႈတႃႈသၢင်း ဢၼ်မီးၼႂ်းၵႄႈမိူင်းတူၼ် – မိူင်းပၼ်ႇ ၼၼ်ႉၵေႃႈ သိုၵ်းမၢၼ်ႈႁဵတ်းဝႆႉၶူဝ်မႂ်ႇထႅင်ႈလင်ၼိုင်ႈ။ လိူဝ်ၼၼ်ႉ ၼႂ်းၸႄႈဝဵင်းလၢင်းၶိူဝ်းၵေႃႈ ယင်းႁဵတ်းၶူဝ်မႂ်ႇဝႆႉထႅင်ႈ တီႈတႃႈသူပ်းတဵင်း ၼႆယဝ်ႉ။