မိူဝ်ႈဝၼ်းတီႈ 07/04/2025 သိုၵ်းမၢၼ်ႈ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ ၵူၼ်းမိူင်းႁူမ်ႈတုမ်ပတ်းပိုၼ်ႉ ၸိူဝ်းၺႃးၽေးၽႅၼ်ႇလိၼ်ဝႆ(ဢိင်ႇသၼ်ႇ) လူႉတၢႆၵႂႃႇ မီး 3,600 ၵေႃႉ မၢတ်ႇၸဵပ်း 5,017 ၵေႃႉလႄႈ ၵူၼ်းၸိူဝ်းႁၢႆဝႆႉၼၼ်ႉ မီး 160 ၵေႃႉ ဝႃႈၼႆ။

လူင်ပွင်ၸိုင်ႈၼွၵ်ႈမိူင်း ၸိူဝ်းဢဝ်ၸၼ်ႉၸိုင်ႈမိူင်းသေၶဝ်ႈမႃးၸွႆႈထႅမ် ႁႅင်းငိုၼ်း၊ ႁႅင်းၵူၼ်း၊ ႁႅင်းၶိူင်ႈၶူဝ်းလႄႈ ယႃႈယႃၸိူဝ်းၼႆႉ မီးၵႂႃႇ 20 မိူင်းယဝ်ႉၼႆ ၽူႈၶၢၼ်ပၢၵ်ႇ သိုၵ်းမၢၼ်ႈ ၸွမ်သိုၵ်းလူင် ၸေႃႇမိၼ်းထုၼ်း ပိုၼ်ၽၢဝ်ႇဝႆႉၼင်ႇၼႆ။

“ယၢမ်းလဵဝ် ႁဝ်းလႆႈႁပ်ႉ လွင်ႈၸွႆႈထႅမ် ဢၼ်လုၵ်ႉၼွၵ်ႈမိူင်း ၶဝ်ႈမႃးၼႂ်းမိူင်းတႃႇၶိူင်ႈမိၼ် 94 ပွၵ်ႈ၊ ၵႃး ႁူၵ်းလမ်း၊ မႃးတၢင်းႁိူဝ်းသၢင်းၽေႃး 5 လမ်း။ လူင်ပွင်ၸိုင်ႈ ၼွၵ်ႈမိူင်း တႃႇ 20 ၸိုင်ႈမိူင်း ပွႆႇၵူၼ်းမႃး တႃႇၸွႆႈထႅမ် ၵူၼ်းထူပ်းၽေးၽႅၼ်ႇလိၼ်ဝႆ ၼႂ်းမိူင်းႁူမ်ႈတုမ်ၼႆႉ မီးၵႂႃႇ 1,738 ၵေႃႉၵူၺ်းဢမ်ႇၵႃး ၾၢႆႇ ႁဝ်းလႆႈႁပ်ႉဝႆႉပႃး ၶိူင်ႈၶူဝ်းၵမ်ႉထႅမ် (ထောက်ပံ့ရေးပစ္စည်း) 1,281 တၼ်ႊလႄႈ ၶိူင်ႈမိုဝ်းတႃႇၸႂ်ႉတိုဝ်း ၼႂ်းၵၢၼ်ၸွႆႈထႅမ်ၵူၼ်းမိူင်း (ကယ်ဆယ်ရေးပစ္စည်း) သမ်ႉ 844 တၼ်ႇပၢႆ”- ။

လႆႈႁူႉဝႃႈ ၾၢႆႇၸုမ်းၸွႆႈထႅမ်မိူင်းၼွၵ်ႈ၊ ၸုမ်းၶႄၾႆးမိူင်းမၢၼ်ႈ၊ ၸုမ်းမီးၼမ်ႉၸႂ်ၸွႆႈထႅမ် Volunteer ၶဝ် ႁူမ်ႈၵၼ်သေ ၸွႆႈထႅမ်ဢဝ်ၵူၼ်းၸိူဝ်းတိူဝ်ႉမၢတ်ႇၸဵပ်းဢွၵ်ႇမႃးလႆႈ ၼႂ်းၵႄႈ ႁိူၼ်းၵူၼ်ႇပင်းၼႆႉ ၵူၼ်းတိုၵ်ႉမီးသၢႆၸႂ်ယူႇ ၵူၼ်းၸၢႆးတႃႇ 338 ၵေႃႉ၊ ၼၢင်းယိင်း 315 ၵေႃႉ တင်းမူတ်းႁူမ်ႈၵၼ် မီးၵႂႃႇ 653 ၵေႃႉ။ ထူပ်းႁၼ်တူဝ်တၢႆသေ လႆႈဢဝ်ဢွၵ်ႇမႃးၼၼ်ႉသမ်ႉ ၵူၼ်းၸၢႆး 340 ၵေႃႉ၊ ၼၢင်းယိင်း 360 ၵေႃႉ တင်းမူတ်း 700 ၵေႃႉ။

ၸိုင်ႈမိူင်း 20 မိူင်း ဢၼ်လုၵ်ႉၼွၵ်ႈမိူင်း ၶဝ်ႈမႃးၸွႆႈထႅမ် တႃႇၽေးၽႅၼ်ႇလိၼ်ဝႆ ၼႂ်းမိူင်းႁူမ်ႈတုမ်ၼႆႉ ပဵၼ်မိူင်းရတ်ႉသျႃး၊ မိူင်းၶႄႇ၊ ႁွင်ႊၵွင်ႊ၊ ဢိၼ်ႊတီႊယိူဝ်ႊ၊ မိူင်းထႆး၊ သိင်ႊၵပူဝ်ႊ၊ မလေးသျႃး၊ ၿင်ႊၵလႃႊတဵတ်ႉၶျ်၊ မိူင်းဝႅတ်ႉၼၢမ်း၊ မိူင်းယူႊဢေႊဢီႊ၊ မိူင်းလၢဝ်း၊ မိူင်းပႄႊလႃႊလိတ်ႊ၊ ဢိၼ်ႊတူဝ်ႊၼီႊသျႃး၊ ပူႊတၼ်ႊ၊ ၾိလိပ်ႊပိၼ်း၊ ၵျပၼ်ႊ၊ ၼီႊပေႃႊ၊ ပႃႊၵိတ်ႊသတၢၼ်ႊ၊ တူႊရၵီႊ၊ ဢမေႊရိၵၼ်ႊ၊ သီႇရိလင်းၵႃ ၸဵမ်ၸိူဝ်းၼႆႉ။

တႅမ်ႈ – ၽူၺ်းၼုမ်ႇ