ၵူၼ်းမိူင်းမၢၼ်ႈ ပတ်းပိုၼ်ႉ ၸိူဝ်းၺႃးၽေးၽႅၼ်ႇလိၼ်ဝႆ (ဢိင်ႇသၼ်ႇ) သေ လူႉတၢႆၵႂႃႇၼႆႉ ၼမ်မႃးထိုင် 3,500 ပၢႆယဝ်ႉ ဝႃႈၼႆ။

ပူၼ်ႉမႃး ဝၼ်းတီႈ 28/04/2025 ၼၼ်ႉ ၽႅၼ်ႇလိၼ်ဝႆ ဢၼ်မီးႁႅင်း 7.7 မႅၵ်ႊၼီႊၵျုတ်ႉ တုမ်ႉယွၼ်ႈ ၼႂ်းမိူင်းမၢၼ်ႈပတ်းပိုၼ်ႉ ဢိၵ်ႇပႃးၼႂ်းမိူင်းတႆးလႄႈ မိူင်းထႆး ၸိူဝ်းၼႆႉ။

ယွၼ်ႉႁႅင်းဢိင်ႇသၼ်ႇၼၼ်ႉသေ ၵူၼ်းမိူင်းႁူမ်ႈတုမ် လူႉတၢႆ 3,564 ၵေႃႉ၊ မၢတ်ႇၸဵပ်း 5,012 ၵေႃႉ၊ ႁၢႆဝႆႉ 210 ၵေႃႉ၊ ႁိူၼ်းတိူၵ်ႈ 5,223 လင်၊ ႁူင်းႁဵၼ်း 1,824 လင်လႄႈ ဝတ်ႉ/ၵျွင်း 2,752 လင် ၺႃးတၢမ်ႇၽေးဢိင်ႇသၼ်ႇသေ လူႉၵွႆၵႂႃႇ ၼႆယဝ်ႉ။

လိူဝ်ၼၼ်ႉ ၵွင်းမူး 4,817 သူႇ၊ ႁူင်းယႃ – ႁွင်ႈယူတ်းယႃ 167 ဢၼ်၊ ၶူဝ် 169 လင်၊ ၾၢႆၼမ်ႉ 198 ဢၼ်ၵေႃႈ လူႉၵွႆ၊ သဵၼ်ႈတၢင်းရူတ်ႉၵႃးလႄႈ ရူတ်ႉၾႆး (ရူတ်ႉလဵၼ်း) တႃႈၵုင်ႈ – ဝဵင်းလိူဝ်ႇၵေႃႈ လူႉၵွႆၵႂႃႇတင်းၼမ်။ ၵူၺ်းၵႃႈ ၵျွင်းၽြႃးၶရိတ်ႉယၼ်ႇတင်း ပလီ လူႉၵွႆၵႂႃႇၵႃႈႁိုဝ်ဢၼ်ဝႃႈၼၼ်ႉတႄႉ ဢမ်ႇႁၼ်သိုၵ်းမၢၼ်ႈ ပိုၼ်ၽၢဝ်ႇပႃး။

ၼႂ်းမိူင်းတႆး ဢၼ်တုမ်ႉယွၼ်ႈၼမ်သုတ်းၼႆႉ ပဵၼ်တီႈထုင်ႉၼွင်ႁၢႆးယႃႈ ၸႄႈဝဵင်းယွင်ႁူၺ်ႈ၊ ႁိူၼ်းယေး လူႉၵွႆၼပ်ႉႁူဝ်ႁဵင်လင် ယၢပ်ႇၽိုတ်ႇတႃႇတေပူၵ်းပွင် မူၼ်ႉမႄးၶိုၼ်း – သိုဝ်ႇၶၢဝ်ႇ Myanmar Now ဢွၵ်ႇဝႆႉၼင်ႇၼႆ။