ဝၼ်းတီႈ 05/04/2025 ယၢမ်းၵၢင်ၼႂ်မွၵ်ႈ 10 မူင်း ၾႆးမႆႈႁိူၼ်း ၼၢႆးဢွင်ႇမိၼ်ႉ ဝၢၼ်ႈၵုၼ်လူင် ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၶူဝ်းႁိူၼ်းယေးဢမ်ႇတၼ်းလႆႈသင် လွင်ႈၵူၼ်းမၢတ်ႇ ၸဵပ်းလူႉတၢႆတႄႉ ဢမ်ႇမီး။  

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈယဝ်ႉၶႃႈ ၾႆးမႆႈႁိူၼ်းၵူၼ်းဝၢၼ်ႈၵုၼ်လူင် မိူဝ်ႈယၢမ်းၵၢင်ၼႂ်မွၵ်ႈ 10 မူင်းၼႆႉ။ မိူဝ်ႈၽွင်းၾႆးမႆႈၼၼ်ႉ ၸဝ်ႈႁိူၼ်းဢမ်ႇမီး ၵႂႃႇၵၢတ်ႇ။ ၵဵဝ်ႇလူၺ်ႈလွင်ႈ ၾႆးမႆႈၼႆႉသေ ယွၼ်ႉသင်လႄႈမႆႈဢၼ်ဝႃႈၼၼ်ႉ ႁဝ်းၶႃႈ ယင်းပႆႇႁူႉႁူဝ်ယွႆႈတႅတ်ႈတေႃး။ ၶူဝ်းၶွင် ၼႂ်းႁိူၼ်းယေးတႄႉ ဢမ်ႇတၼ်းလႆႈသင် မႆႈ ၵႂႃႇၸွမ်းၾႆးမူတ်းဢေႃႈ”- ဝႃႈၼႆ။

ဢိင်ၼိူဝ် လွင်ႈၾႆးမႆႈၼႆႉသေ တီႈသိုဝ်ႇၶၢဝ်ႇ သူၺ်ႇပျီႇမျေႇတႄႉ ဢွၵ်ႇဝႆႉဝႃႈ ယွၼ်းၾႆးၾႃႉသျွတ်ႉ ဝႃႈၼႆ။

မိူဝ်ႈဝၼ်းတီႈ 04/04/2025 ယၢမ်းၵၢင်ဝၼ်း 11 မူင်းၶိုင်ႈ ၾႆးမႆႈႁိူၼ်းယေး ၵူၼ်းဝၢၼ်ႈ တီႈပွၵ်ႉ 5 ဝဵင်းၵူတ်ႉၶၢႆ လင်ၼိုင်ႈ ၼၼ်ႉၵေႃႈ ၾႆးမႆႈပႅတ်ႈတင်းလင်။

ၼႂ်းၸိုင်ႈတႆးပွတ်းႁွင်ႇၼႆႉ ဝၢႆးၽႅၼ်ယၼ်ႇသိုၵ်း 1027 ၼၼ်ႉမႃး သိုၵ်းတဢၢင်း TNLA ၵုမ်းၵမ်ဝႆႉ မိူၼ် ၼင်ႇ ဝဵင်းၵူတ်ႉၶၢႆ ၊ မိူင်းမိတ်ႈ ၊ ၵျွၵ်ႉမႄး ၸိူဝ်းၼႆႉ ၼႂ်းလိူၼ်မၢတ်ႊၶျ်ၼၼ်ႉ ၾႆးမႆႈႁိူၼ်းယေးၵူၼ်းမိူင်း မီးၵႂႃႇ 6 ပွၵ်ႈယဝ်ႉ လူႉသုမ်းၶၼ်ငိုၼ်း 14,00 သႅၼ်ပျႃးပၢႆၼႆ ႁွင်ႈၵၢၼ် ပိုၼ်ၽၢဝ်ႇ တပ်ႉသိုၵ်းတဢၢင်း TNLA ဢွၵ်ႇဝႆႉၼင်ႇၼႆ။

မိူဝ်ႈဝၼ်းတီႈ 01/04/2025 ၾႆးမႆႈႁၢၼ်ႉၶၢႆသၢင်ႇၵၢၼ်း ပရိၵ်ႈၶရႃႇ တီႈဝဵင်းပၢင်လူင် ၸိုင်ႈတႆးပွတ်းၸၢၼ်း ၼၼ်ႉၵေႃႈ လူႉသုမ်းၶူဝ်းၶွင်းတင်းၼမ်သေဢမ်ႇၵႃး မီးၵူၼ်းလူႉတၢႆၸွမ်းထႅင်ႈ 4 ၵေႃႉ။

ၼႂ်းဝၼ်းတီႈ 03/04/2025 ဝၢႆးဝၼ်း 2 မူင်းၼႆႉၵေႃႈ ႁူင်းႁႅမ်းၸိုဝ်ႈယႂ်ႇၼႂ်းၼွင်ႁၢႆးယႃႈ Myanmar Treasure Resort ဢၼ်မီးၾၢႆႇႁွင်ႇ မိူင်းသွၵ်ႇၼၼ်ႉ သမ်ႉၺႃးၾႆးမႆႈလူႉသုမ်းတင်းၼမ်ၼၼ်ႉသမ်ႉ ယွၼ်ႉၾႆးပႃႇ လၢမ်းမႆႈ။

ယွၼ်ႉၼၼ် သင်တေဢွၵ်ႇႁိူၼ်း ၵႂႃႇတၢင်းၼွၵ်ႈၼႆၸိုင် ထုၵ်ႇလီၵူတ်ႇထတ်းတူၺ်း မုၵ်ႉၽိုၼ်းမုၵ်ႉၾႆး ၾႆးတဵၼ်းၼိူဝ်ၶဵင်ႇၽြႃးၸိူဝ်းၼႆႉ လီလီ။ ပေႃးပဵၼ်ၾႆးၾႃႉၵေႃႈ ထုၵ်ႇလီပိၵ်ႉဢိုတ်းဝႆႉ မဵင်းၾႆးၸိူဝ်းၼႆႉသေ ၸင်ႇဢွၵ်ႇတၢင်းၼွၵ်ႈၸိုင် တေၸၢင်ႈလွတ်ႈၽေး လွင်ႈၾႆးမႆႈႁိူၼ်းမႆႈယေး ၼႆယဝ်ႉ။