တႄႇႁူဝ်ပီ 2025 မႃး ၸုမ်းယိပ်းၵွင်ႈၵၢင်ႇ ၸိူဝ်းၵုမ်းၵမ်ဝႆႉ ၼိူဝ်သဵၼ်ႈတၢင်းလူင် ဝဵင်းလိူဝ်ႇ – မိူင်းၵုတ်ႈ – မူႇၸေႊ ယွၼ်းငိုၼ်း (ၵဵပ်းၶွၼ်ႇ) တီႈၸဝ်ႈရူတ်ႉၵႃး ၸိူဝ်းတေႃႉတၢင်ႇၶူဝ်းၵုၼ်ႇ သူင်ႇၶဝ်ႈၸူးမိူင်းတႆးပွတ်းႁွင်ႇ ၼမ်လူၼ်ႉႁႅင်းလႄႈ ႁဵတ်းႁႂ်ႈမီးတၢင်းယၢပ်ႇၵိၼ်း ၼႂ်းၵၢၼ်ဢွၵ်ႇၶၢဝ်းတၢင်း ၵႄႈၵၢင်ဝဵင်းလိူဝ်ႇ- မူႇၸေႊ။

ၼိူဝ်သဵၼ်ႈတၢင်း ဝဵင်းလိူဝ်ႇ – မိူင်းၵုတ်ႈ – မူႇၸေႊၼႆႉ ပဵၼ်သိုၵ်းမၢၼ်ႈ – ၸုမ်းၵႅတ်ႇၶႄၵူၼ်းမိူင်း PDF ၊ သိုၵ်းတဢၢင်းTNLA ၊ ပႃႇတီႇမႂ်ႇသုင်ၸိုင်ႈတႆး SSPP ၊ သိုၵ်းၵဝ်ႈၵၢင်ႉ MNDAA ၊ သိုၵ်းၶၢင် KIA ၶဝ် ပႂ်ႉၵဵပ်းၶွၼ်ႇယူႇၼႆ – ၸၢႆးၼွင်ႉ ၸဝ်ႈရူတ်ႉၵႃးတေႃႉတၢင်ႇၵုၼ်ႇ ဝဵင်းလိူဝ်ႇ – မူႇၸေႊ လၢတ်ႈတီႈၽူႈတွႆႇႁွၵ်ႈၼင်ႇၼႆ။

“ပေႃးပဵၼ်ၵႃးတၢင်ႇရူတ်ႉၶိူင်ႈၼႆ ရူတ်ႉၶိူင်ႈၼိုင်ႈၵၼ်းၼႆႉ ၶဝ်ဢဝ် 7 သႅၼ်တေႃႇထိုင် 10 သႅၼ်။ ပေႃးပဵၼ် ၶိူင်ႈၾႆးၾႃႉ လႆႈပၼ်ၼိုင်ႈတိူၵ်ႈ 5 မိုၼ်ႇ တေႃႇၼိုင်ႈသႅၼ်ၼႆႉ ဢေႇသုတ်းမၼ်းယဝ်ႉ။ ၶဝ်ၵဵပ်းၵူႈမဵဝ်းယဝ်ႉ။ တေႃႈၼင်ႇ ရူတ်ႉၶိူင်ႈ ၸိူဝ်းတၢင်ႇၵုၼ်ႇႁႄ ၵႂႃႇမႃးၵူၺ်းၵေႃႈ ၶဝ်ယင်းၵဵပ်း”- ။

လႆႈႁူႉဝႃႈ ပေႃးပဵၼ်ၵႃးတေႃႉတၢင်ႇၵုၼ်ႇ ဢၼ်လုၵ်ႉတၢင်းဝဵင်းလိူဝ်ႇ ၶိုၼ်ႈၵႂႃႇတၢင်း မိူင်းၵုတ်ႈၼၼ်ႉ ၾၢႆႇၸုမ်းယိပ်းၵွင်ႈၵၢင်ႇၶဝ် ၼပ်ႉဢဝ် တၢင်းၼမ်ၵႃႈၶၼ်ၵုၼ်ႇသေ ၵဵပ်းဢဝ်ၶွၼ်ႇၵႂႃႇ။ သင်ၵႃးၼိုင်ႈလမ်းၼႆႉ တၢင်ႇမႃးၵုၼ်ႇၵႃႈၶၼ် 100 သႅၼ်ၸိုင် ၸဝ်ႈရူတ်ႉၵႃး လႆႈပၼ်ငိုၼ်းတီႈလၢၼ်ႇၸုမ်းယိပ်းၵွင်ႈၵၢင်ႇ တႃႇ 7 သႅၼ်။

ယၢမ်းလဵဝ် သင်ၸဝ်ႈရူတ်ႉၵႃး ၸိူဝ်းတေတေႃႉၵုၼ်ႇတၢင်းဝဵင်းလိူဝ်ႇ ၶိုၼ်ႈၵႂႃႇတၢင်းမိူင်းတႆးပွတ်းႁွင်ႇၸိုင် ၼင်ႇႁိုဝ် တေဢမ်ႇလႆႈပၼ်ၶွၼ်ႇၼမ် တီႈၸုမ်းယိပ်းၵွင်ႈၵၢင်ႇၼၼ်ႉ လႆႈတေႃႉတၢင်ႇၵႂႃႇၼိုင်ႈဢိတ်းၵူၺ်း။ ပေႃးတၢင်ႇၵႂႃႇၼမ်ၸိုင် လႆႈပၼ်ၶွၼ်ႇၸွမ်းလၢၼ်ႇၵူတ်ႇထတ်း ၼိုင်ႈတီႈလႂ် ဢေႇသုတ်း 5 သႅၼ်ထိုင် 15 သႅၼ်ပျႃးလႄႈ ႁဵတ်းႁႂ်ႈၸဝ်ႈရူတ်ႉၵႃးၶဝ် ဢမ်ႇလိူဝ်ငိုၼ်းသင်။

ယွၼ်ႉၼၼ် ၼင်ႇႁိုဝ် ၵူၼ်းမိူင်းၸိူဝ်းဢွၵ်ႇၶၢဝ်းတၢင်း ဢမ်ႇမီးလွင်ႈတၢင်းယၢပ်ႇၵိၼ်းလႄႈ ႁႃၵိၼ်လဵင်ႉတွင်ႉ တႃႇမုင်ႉႁေႃႁိူၼ်းငၢႆႈလူမ်မႃးၼၼ်ႉ ယူႇတီႈၵူၼ်းမိူင်းသေ ၶႂ်ႈႁႂ်ႈၸုမ်းယိပ်းၵွင်ႈၵၢင်ႇၵူႈၸုမ်း ၸိူဝ်းပႂ်ႉဢဝ်ႁူမ်ႇလူမ်ႈ ၼိူဝ်သဵၼ်ႈတၢင်းလူင်ၵႂႃႇမႃးၼၼ်ႉ လူတ်းယွမ်းပၼ်ၶွၼ်ႇယူႇၼႆ ၸၢႆးၼွင်ႉ သိုပ်ႇတုၵ်းယွၼ်းဝႆႉၼင်ႇၼႆ။

“ၶႂ်ႈႁႂ်ႈၸုမ်းယိပ်းၵွင်ႈၵၢင်ႇၶဝ် လူတ်းယွၼ်ႇပၼ်ၶွၼ်ႇၶႃႈဢေႃႈ။ ပေႃးႁဝ်းတေႃႉၵုၼ်ႇလုၵ်ႉတၢင်း ဝဵင်းလိူဝ်ႇ တေႃႇထိုင်မူႇၸေႊၼႆႉ ၵႃႈၼမ်ႉမၼ်းႁႄ ၵႃႈၶွၼ်ႇႁႄ ႁဝ်းပေႃးလႆႈသဵင်ႈယူႇမွၵ်ႈ 70 – 80 သႅၼ်ယဝ်ႉ။ သင်ဢမ်ႇၸႂ်ႈၸိူင်ႉၼၼ် ႁဝ်းၵူၼ်းမိူင်းၼႆႉ တေၵိၼ်းယဝ်ႉၵိၼ်းထႅင်ႈ။ ပေႃးၸဝ်ႈၵုၼ်ႇ လႆႈပၼ်ၶွၼ်ႇၸွမ်းတၢင်းၼမ်ၵေႃႈ ၵူၼ်းမိူင်းၼႂ်းပိုၼ်ႉတီႈ ၵေႃႈ တေလႆႈသိုဝ်ႉၵိၼ် ၵႃႈၶၼ်သုင်ႁႅင်းၼၼ်ႉယဝ်ႉ”- ။

ၼႂ်းၶၢဝ်းတၢင်း ၽႅၼ်ယၼ်ႇသိုၵ်း 1027 လႄႈ ဝၢႆးလင် ပၢင်တိုၵ်းၼႆႉ ယွၼ်ႉၸုမ်းယိပ်းၵွင်ႈၵၢင်ႇ တင်ႈလၢၼ်ႇၵူတ်ႇထတ်း ၸွမ်းသဵၼ်ႈတၢင်း ၼမ်လိူဝ်မႃးႁႅင်းလႄႈ ၵူၼ်းမိူင်းႁႃၵိၼ်လဵင်ႉတွင်ႉ ယၢပ်ႇၵိၼ်းၸႂ်ႁၢဝ်ႈႁႅင်း။

ၼင်ႇႁိုဝ် ၵူၼ်းမိူင်းပေႃး တေမီးလွင်ႈလွတ်ႈလႅဝ်း ၵႂႃႇမႃးငၢႆႈလူမ် ႁဵတ်းႁႃၵိၼ်ထၢင်ႇႁၢင်ႈၼႆသေ ၸုမ်းယိပ်းၵွင်ႈၵၢင်ႇၸၢဝ်း ၶိူဝ်းလၢႆလၢႆၸုမ်း ယိုၼ်ယၼ်ၼိူဝ်ၶေႃႈတိုဝ်းၵမ်ၼႆႉသေ ႁူမ်ႈၵၼ်ႁဵတ်းၵၢၼ်လုၵ်ႉၽိုၼ်ႉ တိုၵ်းၸဝ်ႈဢႃႇၼႃႇ သိုၵ်းမၢၼ်ႈမႃးသေတႃႉ ႁၢၼ်ႉတေႃႇယၢမ်းလဵဝ်ၵေႃႈ ယင်းပႆႇႁၼ် ၸုမ်းယိပ်းၵွင်ႈၵၢင်ႇၸုမ်းလႂ် ၵႄႈလိတ်ႈပၼ်ႁႃတႃႇၵူၼ်းမိူင်းတႄႉတႄႉ။

တႅမ်ႈ – ၽူၺ်းၼုမ်ႇ