ယၢမ်းလဵဝ် သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇ ၵိုတ်းတိုၵ်းၸူဝ်ႈၶၢဝ်းသေတႃႉ တီႈဝဵင်းမိူင်းပၢႆးတႄႉ ၶဝ်တိုၵ်ႉၸႂ်ႉၶိူင်ႈမိၼ်တိုၵ်းလႄႈ တင်းၵွင်ႈလူင် မႃးပွႆႇမၢၵ်ႇသႂ်ႇ တိူဝ်ႉၺႃးၵူၼ်းမိူင်းလူႉတၢႆ 5 ၵေႃႉ။

တီႈလႅၼ်လိၼ်မိူင်းတႆး – မိူင်းယၢင်းလႅင် ဢၼ်မီးၼႂ်းၵႄႈဝဵင်းမိူင်းပၢႆးတင်း ဝဵင်းလွႆၶေႃ တီႈႁိမ်းဝၢၼ်ႈပီၵိၼ်းၵေႃးၶူၼၼ်ႉ ဢမ်ႇမီးပၢင်တိုၵ်းသင် သိုၵ်းမၢၼ်ႈတင်ႈၸႂ် ဢဝ်ၶိူင်ႈမိၼ်တိုၵ်း၊ ၸႂ်ႉၵွင်ႈလူင် ပွႆႇမၢၵ်ႇသႂ်ႇလႄႈ တိူဝ်ႉၺႃးၵူၼ်းမိူင်းပိုၼ်ႉတီႈ လူႉတၢႆ 5 ၵေႃႉၼႆ – တပ်ႉသိုၵ်း KNDF ပိုၼ်ၽၢဝ်ႇဝႆႉၼင်ႇၼႆ။

ၼႂ်းဝၼ်းတီႈ 04/04/2025 ၼႆႉ သိုၵ်းမၢၼ်ႈ တီႈဝဵင်းမိူင်းပၢႆး တပ်ႉၶမယ 422 ယိုဝ်းၵွင်ႈလူင် ပွႆႇမၢၵ်ႇသႂ်ႇ ၸွမ်းဝၢၼ်ႈၵူႈႁူးၵူႈတၢင်းလႄႈ ၵူၼ်းဝၢၼ်ႈပီၵိၼ်းၵေႃးၶူ လူႉတၢႆ 1 ၵေႃႉ။ လိူဝ်ၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇထႅင်ႈ 2 လုၵ်ႈ ၼႆႉၵေႃ ႁဵတ်းႁႂ်ႈၵူၼ်းဝၢၼ်ႈ လူႉတၢႆထင်တီႈ 4 ၵေႃႉ ၼႂ်းဝၼ်းလဵဝ်ၵူၺ်း မီးၵူၼ်းလူႉတၢႆ 5 ၵေႃႉ။

သိုၵ်းမၢၼ်ႈ ပိုၼ်ၽၢဝ်ႇ ၵိုတ်းတိုၵ်းၸူဝ်ႈၶၢဝ်း တႄႇဝၼ်းတီႈ 02/04/2025 ၵႂႃႇၼႆသေတႃႉ ၶဝ်တိုၵ်ႉၸႂ်ႉၶိူင်ႈ မိၼ်တိုၵ်း ပွႆႇမၢၵ်ႇယူႇၶိူဝ်းယႂ်း ၼွၵ်ႈလိူဝ်သေ တီႈဝဵင်းမိူင်းပၢႆးၼႆႉယဝ်ႉ မိူၼ်ၼင်ႇ ၼႂ်းမိူင်းယၢင်းလႅင်၊ မိူင်းၶၢင် ပွတ်းထုင်ႉၸႄႈဝဵင်းမၢၼ်ႈမေႃႇ၊ ၼွင်လူင် (အင်းတော်)၊ ဝဵင်းမႂ်ႇ ၸိူဝ်းၼၼ်ႉထႅင်ႈ။