ယၢမ်းလဵဝ် တီႈတၢင်းၶဝ်ႈဢွၵ်ႇဝဵင်းၵေးသီးၼႆႉ ၾၢႆႇပလိၵ်ႈမၢၼ်ႈ ဢၼ်ယူႇတႂ်ႈသိုၵ်းမၢၼ်ႈၵုမ်းၵမ်ၼၼ်ႉ ၵူတ်ႇထတ်းၸႅတ်ႈထၢမ် ယွၼ်းငိုၼ်းၵူၼ်းမိူင်းလႄႈ ၸဝ်ႈရူတ်ႉၵႃး ႁၢဝ်ႈႁႅင်း။

တႄႇဢဝ် ဝၼ်းတီႈ 03/04/2025 ၼႆႉမႃး ႁၢၼ်ႉတေႃႇထိုင်ယၢမ်းလဵဝ် ပလိၵ်ႈမၢၼ်ႈ တင်ႈလၢၼ်ႇ တီႈႁိမ်းတူၼ်ႈမႆႉၺွင်ႇလူင် တၢင်းၶဝ်ႈဝဵင်းၵေးသီး ၵူတ်ႇထတ်းၵူၼ်းႁေႃႈရူတ်ႉၵႃး ၸဵမ်ဝႂ်ၵႃး (လၢႆႊသိၼ်ႊ)၊ ဝႂ်ႁေႃႈရူတ်ႉ၊ မၢႆၾၢင် ၸိူဝ်းၼႆႉၵူၺ်းဢမ်ႇၵႃး ပၢႆတဵၵ်းယွၼ်းငိုၼ်းၵူၼ်းမိူင်းပႃးထႅင်ႈ။

ၵူၼ်းႁေႃႈၵႃး ၵေးသီး – မိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ – “တီႈတၢင်းၶဝ်ႈတၢင်းဢွၵ်ႇၼၼ်ႉ ၵႃးဢၼ်ၵႂႃႇမႃးၼႆႉ ၺႃးယွၼ်းငိုၼ်းဢေႃႈ။ ဢၼ်ၸႅတ်ႈၵေႃႈ ၶဝ်ၸႅတ်ႈယူႇတိၵ်းတိၵ်းၼၼ်ႉယဝ်ႉ။ ယဝ်ႉၵေႃႈ ယွၼ်းတူၺ်းပႃးမၢႆၾၢင်၊ ဝႂ်ၵႃး ၸိူဝ်းၼႆႉထႅင်ႈ။ ၶဝ်ၵူတ်ႇထတ်းၵျၢမ်းၼႃႇၶႃႈ”- ဝႃႈၼႆ။

သိုပ်ႇလၢတ်ႈဝႃႈ – “ၸွမ်းတၢင်းၼႆႉ ၵဵတ်ႉၵေႃႈၼမ် လိူဝ်သေတီႈၵေးသီးၼႆႉယဝ်ႉ ၶဝ်ယွၼ်းငိုၼ်းၼႆႉ တၢင်ႇတီႈၵေႃႈၶဝ်ယွၼ်း ၼိုင်ႈတီႈလႂ်ၼိုင်ႈႁဵင်ၵူၺ်းၵေႃႈ ပေႃးဢမ်ႇငၢႆႈယဝ်ႉ။ မိူဝ်ႈဝႃး မိူဝ်ႈသိုၼ်းၼႆႉၵူၺ်း လႆႈငိၼ်းဝႃႈ တီႈတၢင်းၶဝ်ႈၵေးသီးၼႆႉၵူၺ်း ၶဝ်ဢဝ်ဝႆႉၵႃးပိူၼ်ႈၼိုင်ႈလမ်းၼႆဢိူဝ်ႈ”- ဝႃႈၼႆ။

ၸဝ်ႈၵႃး ၵမ်ႈၽွင်ႈ ဢၼ်လတ်းၽၢၼ်ႇတၢင်းၶဝ်ႈဢွၵ်ႇဝဵင်းၵေးသီးၼႆႉ လၢတ်ႈဝႃႈ ၾၢႆႇပလိၵ်ႈၶဝ် ၸႅတ်ႈထၢမ်ယွၼ်းငိုၼ်းႁၢဝ်ႈႁႅင်း ပွၵ်ႈၼႆႉ ရူတ်ႉၵႃး ၼိုင်းလမ်းယင်းလႆႈပၼ်ငိုၼ်း 5 မိုၼ်ႇထိုင် 1 သႅၼ်ပျႃးၵေႃႈမီး ဝႃႈၼႆ။

လိူဝ်ၼၼ်ႉ တႃႇတေႃႉၶူဝ်းလုၵ်ႉၵေးသီး ၵႂႃႇတၢင်းသဵၼ်ႈဝဵင်းမိူင်းယႆၼႆႉ သိုၵ်းမၢၼ်ႈႁႄႉႁၢမ်ႈ ဢမ်ႇပၼ်တေႃႉၶူဝ်းၵုၼ်ႇၶွင်ၵိၼ်ယႅမ်ႉလႄႈ ၶိူင်ႈၸၢၵ်ႈ ၸိူဝ်းၼႆႉ။ သင်ထူပ်းႁၼ်မႅၼ်ႈၸိုင် မီးလွင်ႈလွၵ်ႇငိုတ်ႈသေ မၢင်ပွၵ်ႈၵေႃႈ ယွၼ်းငိုၼ်း ၸဵမ်ၸိူဝ်းၼႆႉထႅင်ႈ။

ၼႂ်းၸႄႈဝဵင်းၵေးသီးၼႆႉ မီးဝႆႉသိုၵ်းမၢၼ်ႈ တိူင်းသိုၵ်းဝၼ်းဢွၵ်ႇၵၢင် (ယလၶ) ၵုမ်းဝႆႉသေ တပ်ႉၶလယ – 131၊ ၸၵၶ – 2 ၊ ၶလယ – 9 လႄႈ ၶလယ – 286 ပၵ်းသဝ်းဝႆႉၵူၺ်းဢမ်ႇၵႃး ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/ SSA ငဝ်ႈငုၼ်းတပ်ႉသိုၵ်းဝၢၼ်ႈႁႆးၵေႃႈ မီးဝႆႉၼႂ်းထုင်ႉၼၼ်ႉမိူၼ်ၵၼ်။