တႄႇဝၼ်းတီႈ 03/04/2025  မႃးသိုၵ်းၵဝ်ႈၵၢင်ႉ ဢဝ်ႁႅင်းၵူၼ်း ဢိၵ်ႇ ၶိူင်ႈၶူဝ်းၸႂ်ႉတိုဝ်း တီႈႁူင်းယႃလူင်ၵူၼ်းမိူင်း တင်း သဵင်ႈ ထွႆဢွၵ်ႇၵႂႃႇ ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ  ၵူၼ်းပိုၼ်ႉတီႈလၢတ်ႈၼင်ႇၼႆ။

ၵူၼ်းၸမ်ၸႂ်တင်းသွင်ၾၢႆႇလၢတ်ႈဝႃႈ – သိုၵ်းၵဝ်ႈၵၢင်ႉလႄႈသိုၵ်းမၢၼ်ႈ တူၵ်းလူင်းၵၼ်ဝႆႉဝႃႈ ဝၼ်းတီႈ 17/04/2025 ၼႆႉဝႆႉပဵၼ်ဝၼ်းလိုၼ်းသုတ်းသေ ႁႂ်ႈဢွၵ်ႇဝဵင်းလႃႈသဵဝ်ႈယဝ်ႉ၊ ယွၼ်ႉပိူဝ်ႈဝႃႈ ဝၢႆးလင်ဝၼ်းတီႈ 20/04/2025 ၼႆႉသိုၵ်းမၢၼ်ႈတေယိုတ်းဢဝ်ၶိုၼ်း ၼႂ်းဝဵင်းလႃႈသဵဝ်ႈ 12 ပွၵ်ႉ  ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၽူႈမီးၸၼ်ႉၼႂ်းတပ်ႉသိုၵ်းတဢၢင်း ၵေႃႉၼိုင်ႈ ဢၼ်ပဵၼ်ဢူၺ်းလီ လႄႈ ၸမ်ၸႂ်ၵၼ်တင်း သိုၵ်းၵဝ်ႈၵၢင်ႉ – ပိုၼ်ၽၢဝ်ႇဝႆႉၼိူဝ် သိုဝ်ႇၼႅင်ႈသၢၼ် ဢၵွင်ႉသုၼ်ႇတူဝ်မၼ်းဝႃႈ “ဢမ်ႇၸႂ်ႈဝႃႈ သိုၵ်းမၢၼ်ႈ တေမႃး ၵုမ်းၵမ်ၶိုၼ်း ၸႄႈဝဵင်းလႃႈသဵဝ်ႈ တင်းမူတ်း။ ၶဝ်တေၵုမ်းၵမ် ၼႂ်းဝဵင်းလႃႈသဵဝ်ႈ တႃႇ 12 ပွၵ်ႉၼၼ်ႉၵွႆး။ ၼွၵ်ႈဝဵင်း လႃႈသဵဝ်ႈ တင်း ဝဵင်းသႅၼ်ဝီၼႆႉ တေပဵၼ်တပ်ႉသိုၵ်းၵဝ်ႈၵၢင်ႉၵုမ်းၵမ်” -ဝႃႈၼႆဝႆႉ။

ပိုၼ်ႉတီႈၼွၵ်ႈဝဵင်းလႃႈသဵဝ်ႈၼႆႉ ၾၢႆႇသိုၵ်းၵဝ်ႈၵၢင်ႉ တေသိုပ်ႇၵုမ်းၵႂႃႇသေ ၸွမ်းဝၢၼ်ႈလႄႈၶွပ်ႇဝဵင်းလႃႈသဵဝ်ႈၼႆႉ တေပဵၼ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၵုမ်းၵမ်။  ၵူၼ်းမိူင်းၼႂ်းပိုၼ်ႉတီႈ ဢွၼ်ၵၼ်မႆႈၸႂ် ၵူဝ်သိုၵ်းမၢၼ်ႈ တင်း သိုၵ်းၵဝ်ႈၵၢင်ႉယိုဝ်းၵၼ်ၶိုၼ်းၵူၺ်းယဝ်ႉဝႃႈၼႆ။

ၵူၼ်းမိူင်းၵေႃႉဢၼ်ယူႇသဝ်း ၼႂ်းဝဵင်းလႃႈသဵဝ်ႈၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ၸႂ်ႈယဝ်ႉဝႃႈ။ ၵဝ်ႈၵၢင်ႉ ၶဝ်တေႃႉဢဝ် ၶူဝ်းလဵင်းၶဝ် ဢွၵ်ႇၵႂႃႇယဝ်ႉဢိူဝ်ႈ။ တိုၼ်းယိုၼ်ယၼ်လႆႈႁူဝ်ပၢၵ်ႇတဵမ်ယဝ်ႉ။ တႄႇၸဵမ်မိူဝ်ႈဝႃးယဝ်ႉ။ လႃႈသဵဝ်ႈၼႆႉတႄႉ ၶဝ်တိုၼ်းဢမ်ႇဝႆႉသင်ယဝ်ႉ။ ဢဝ်ရူတ်ႉၵႃး 22 လေႃႉ၊ ၵႃးဢွၼ်ႇ၊ ၵႃးလူင် ၸိူဝ်းၼႆႉ မႃးတေႃႉဢဝ် ၶူဝ်း ၼႂ်းႁူင်းယႃလူင်ၵူၼ်းမိူင်းလႃႈသဵဝ်ႈၼႆႉၵႂႃႇၸွမ်း။ ဢမ်ႇလိူဝ်သေ မွၵ်ႇပွမ်ၵူၺ်းၵေႃႈ ယင်းတေႃႉဢဝ်ၵႂႃႇမူတ်း ဢိူဝ်ႈ။ ပႅတ်ႈလၢႆဝႃႈ ပႅတ်ႈလၢႆယဝ် ၶႄႇ(သိုၵ်းၵဝ်ႈၵၢင်ႉ)ၼႆႉ” ဝႃႈၼႆ။

လႆႈႁူႉဝႃႈ ၵဵဝ်ႇၵပ်းသိုၵ်းၵဝ်ႈၵၢင်ႉၶဝ် တေႃႉဢဝ်ၶူဝ်းၶွင် ၵူၼ်းမိူင်း ၼႂ်းဝဵင်းလႃႈသဵဝ်ႈဢွၵ်ႇၵႂႃႇၼၼ်ႉသေ မိူဝ်ႈဝၼ်းတီႈ 03/04/2025 ၵူၼ်းမိူင်းလႃႈသဵဝ်ႈ ၸိူဝ်းလႆႈၶဝ်ႈႁဵတ်းသိုၵ်းၵဝ်ႉၵၢင်ႉ တင်း သိုၵ်းၵဝ်ႈၵၢင်ႉ ဢၼ်လုၵ်ႉတၢင်း လၢဝ်ႇၵၢႆး (လဝ်ႉၵႆႇ) မႃးၸိူဝ်းၼၼ်ႉသေ ၽိတ်းမေႃးထဵင်ၵၼ် တီႈလုမ်းၾႆးၾႃႉ (EPC) ဝဵင်းလႃႈသဵဝ်ႈ ၼႆယဝ်ႉ။

ယွၼ်ႉဝႃႈ သိုၵ်းၵဝ်ႈၵၢင်ႉၶဝ် တေႃႉဢဝ် မီႇတႃႇပွၵ်ႉ (မေႃႈၾႆး) တင်း သၢႆၾႆး ဢၼ်မႂ်ႇဢၼ်ၵဝ်ႇပွၵ်ႈမိူဝ်းၵႂႃႇ တင်းသဵင်ႈ ဝႃႈၼႆ။

တွၼ်ႈတႃႇသိုၵ်းမၢၼ်ႈ တေၶဝ်ႈမႃးၵုမ်းၵမ်ၶိုၼ်းလႆႈ ၼႂ်းဝဵင်းလႃႈသဵဝ်ႈၼႆႉ မီးၶၢဝ်ႇႁူင်လိုဝ်းဝႃႈ ၾၢႆႇသိုၵ်းၵဝ်ႈၵၢင်ႉ တေ ၵႂႃႇႁပ်ႉဢဝ် သိုၵ်းမၢၼ်ႈ တင်း သိုၵ်းဝ တီႈၼမ်ႉပွင်ႈၼႆယဝ်ႉ။

 ၵဵဝ်ႇၵပ်းလွင်ႈၼႆႉသေ ၸုမ်းၶၢဝ်ႇၽူႈတွႆႇႁွၵ်ႈလႆႈၵပ်း သိုပ်ႇ တွင်ႈထၢမ်တီႈ ၽူႈၶၢၼ်ပၢၵ်ႇသိုၵ်းဝႃႉ ဢူးၺီႇရၢၼ်းဝႆႉဝႃႈ “ၸုမ်းႁဝ်းၶႃႈတႄႉ တိုၵ်ႉယူႇမိူၼ်ပၵ်းၵဝ်ႇ ပိူင်ၵဝ်ႇၵွႆး” ၼႆယဝ်ႉ။

ဢၼ်သိုၵ်းၵဝ်ႈၵၢင်ႉ ၵိုင်ႉၵၢင်ႉလႆႈထွႆပၼ်ၶိုၼ်း တီႈဝဵင်းလႃႈသဵဝ်ႈၼႆႉ ပဵၼ်ၾၢႆႇမိူင်းၶႄႇ ပၼ်ႁႅင်းဢီး မိပ်ႇငႅၼ်းမႃး ႁၢဝ်ႈ ႁႅင်းၵေႃႈပႃး။ ယွၼ်ႉၼၼ် ၸၢင်ႈမီးလွင်ႈတုမ်ႉတိူဝ်ႉၼိူဝ် ၵူၼ်းမိူင်းၸိူဝ်းယူႇသဝ်းၼႂ်းဝဵင်းလႃႈသဵဝ်ႈလႄႈ ၶႂ်ႈႁႂ်ႈၵူၼ်းမိူင်း ၾၢင်ႉယူႇၾၢင်ႉၵိၼ်ၵၼ်ၵႂႃႇၼႆ ၽူႈၸမ်ၸႂ်ၼႂ်းတပ်ႉသိုၵ်း ၵဝ်ႈၵၢင်ႉၵေႃႉၼိုင်ႈ တႅမ်ႈတၢင်ႇဝႆႉၼိူဝ် သိုဝ်ႇတူင်ႇဝူင်းၵူၼ်း မၼ်းၸၢႆး ၼႆယဝ်ႉ။

ၾၢႆႇၼိုင်ႈတၢင်းၼိုင်ႈၵေႃႈ ၼင်ႇႁိုဝ် တေၵုမ်းၵမ်လႆႈၶိုၼ်း တပ်ႉပၢင်သဝ်း တီႈဝၢၼ်ႈတွင်းၶမ်း ၸႄႈဝဵင်းၼွင်ၶဵဝ် ဢွင်ႈ တီႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်းၵုမ်းၵမ်ဝႆႉၸူဝ်ႈၶၢဝ်းၼၼ်ႉၵေႃႈ ယၢမ်းလဵဝ် ၾၢႆႇသိုၵ်းမၢၼ်ႈ ၶတ်းၸႂ် ထႅမ် ႁႅင်းသိုၵ်း ႁႅၼ်းတႃႇလေႃႇတိုၵ်းၶိုၼ်းယူႇလႄႈ သိုၵ်းမၢၼ်ႈတင်း သိုၵ်းတဢၢင်းၵေႃႈ ၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉ ႁၢဝ်ႈ ႁႅင်းတေႉတေႉ ၼႆယဝ်ႉ။

ၽူႈလဵပ်ႈႁဵၼ်းၵၢၼ်မိူင်းၵေႃႉၼိုင်ႈ ထတ်းသၢင်ၼႄဝႆႉဝႃႈ “သင်သိုၵ်းၵဝ်ႈၵၢင်ႉ ထွႆပၼ်တီႈဝဵင်းလႃႈသဵဝ်ႈတေႉတေႉ ၸိုင် ၸၢင်ႈမီးလွင်ႈတုမ်ႉယွၼ်ႈထိုင်ပႃး ၸုမ်းသိုၵ်းတၢင်ႇၸုမ်း ဢၼ်ပဵၼ်ဢူၺ်းလီၵၼ်တင်းၶဝ်ၼၼ်ႉ ႁၢဝ်ႈႁႅင်းတေႉတေႉ” ဝႃႈၼႆ။

လွင်ႈသိုၵ်းၵဝ်ႈၵၢင်ႉ တေထွႆဢွၵ်ႇ၊ လွင်ႈသိုၵ်းမၢၼ်ႈ တေၶိုၼ်းၶဝ်ႈမႃး ၵုမ်းၵမ် ၼႂ်းဝဵင်းလႃႈသဵဝ်ႈၼႆႉ ယင်းပႆႇမီးၸုမ်း သိုၵ်းၸုမ်းလႂ် ယိုၼ်ယၼ် ဢွၵ်ႇလိၵ်ႈမႃး ပဵၼ်တၢင်းၵၢၼ်သေတႃႉ ၵူၼ်းဢၼ်ႁဵတ်းၵၢၼ် ၵဵဝ်ႇၵပ်းၵၢၼ်ဢုပ်ႉပိူင်ႇၽွင်း ငမ်း ၼႂ်းဝဵင်းလႃႈသဵဝ်ႈယူႇၼၼ်ႉတႄႉ လၢတ်ႈပိူင်းၼႄငဝ်းလၢႆးဝႆႉၼင်ႇၼႆ။

“ဢွၼ်တၢင်းသုတ်းတႄႉ ႁွင်ႈၵၢၼ်ၾၢႆႇၵူတ်ႇထတ်းၵူၼ်းၶဝ်ႈဢွၵ်ႇ (လဝက) ၊ ၾၢႆႇပၢႆးပၺ်ႇၺႃႇ၊ ၾၢႆႇပၢႆးယူႇလီ ၸိူဝ်းၼႆႉ တေၶဝ်ႈမႃးဢွၼ်တၢင်း။ တေႃႇထိုင် ဝၼ်းတီႈ 22 လိူၼ်ဢေႊပရႄႊၼႆႉ” ဝႃႈၼႆ။

ၵူၼ်းဢၼ်ၸမ်ၸႂ်ၵၼ်တင်း သိုၵ်းၵဝ်ႈၵၢင်ႉၵေႃႉၼိုင်ႈတႄႉ လၢတ်ႈၼႄဝႆႉဝႃႈ “မိူဝ်ႈပၢင်ၵုမ်ပွၵ်ႈပူၼ်ႉ ဝၼ်းထူၼ်ႈ 2 ၼၼ်ႉ ၾၢႆႇသိုၵ်းမၢၼ်ႈ မိပ်ႇငႅၼ်းပၼ်ႁႅင်းဢီးဝႆႉဝႃႈ ပေႃးဢမ်ႇထွႆပၼ် ၾၢႆႇသိုၵ်းမၢၼ်ႈ တေဢဝ် ၶိူင်ႈမိၼ်မႃးပွႆႇမၢၵ်ႇ ၶိုၼ်း။ ၾၢႆႇမိူင်းၶႄႇၵေႃႈ တေဢမ်ႇပိုတ်ႇပၼ် သဵၼ်ႈတၢင်းၵၢၼ်ၵႃႉၶၢႆ ၸွမ်းလႅၼ်လိၼ်” ၼႆယဝ်ႉ။

ယွၼ်ႉတေလႆႈထွႆဢွၵ်ႇပၼ်ၶိုၼ်း ၼႂ်းဝဵင်းလႃႈသဵဝ်ႈလႄႈ သိုၵ်းၵဝ်ႈၵၢင်ႉ ၼႅတ်ႈႁွင်ႉပၢင်ၵုမ် ၵူၼ်းၸိူဝ်းယူႇၸွမ်း သၢပ်ႇ ဝဵင်းလႃႈသဵဝ်ႈသေ ယွၼ်းၵူၼ်းမိူင်း ႁႂ်ႈၶဝ်ႈႁၢပ်ႇထၢမ်းၵၢၼ်သိုၵ်း (ၵဵပ်းသိုၵ်း) ထႅင်ႈ ၼႆယဝ်ႉ။

ၼၢင်းယိင်းၵေႃႉယူႇသဝ်း ၾၢႆႇၼွၵ်ႈဝဵင်းလႃႈသဵဝ်ႈ လၢတ်ႈၼႄဝႃႈ “ၶဝ်လၢတ်ႈၼႄႁဝ်းဝႃႈ ၾၢႆႇၼွၵ်ႈဝဵင်းလႃႈသဵဝ်ႈၼႆႉ တိုၵ်ႉတေပဵၼ်တႂ်ႈသိုၵ်းၵဝ်ႈၵၢင်ႉၵုမ်းၵမ်” ဝႃႈၼႆ။

လႆႈႁူႉဝႃႈ ၵူၼ်းသိုၵ်းၵဝ်ႈၵၢင်ႉ ၸိူဝ်းယူႇသဝ်းၸွမ်း တပ်ႉပၢင်သဝ်း သႅၼ်ဝီ၊ ၼမ်ႉၸလၢပ်ႈ၊ ၵျွင်းၶမ်း၊ ၼႃးတီး ၸိူဝ်းၼႆႉ လူင်းမႃးတၢင်းဝဵင်းလႃႈသဵဝ်ႈၶိုၼ်း ။

ၵူၼ်းမိူင်း ၵေႃႉယူႇဝႆႉတီႈဝဵင်းသႅၼ်ဝီ လၢတ်ႈၼႄတီႈၽူႈတွႆႇႁွၵ်ႈဝႃႈ “ၼႂ်းၶၢဝ်းတၢင်း ဝူင်ႈဝၢင်ႈၼႆႉ သိုၵ်းၵဝ်ႈၵၢင်ႉ ဢဝ်ၵူၼ်းၶဝ်တၢင်ႇၵႃးႁႄ လူင်းၵႂႃႇတၢင်းလႃႈသဵဝ်ႈ ၼမ်ၵျႃႉ။ ငိၼ်းဝႃႈ ငဝ်းလၢႆးဢမ်ႇပေႃးလီၼႆၼေႈ။ ႁဝ်းတႄႉ မႆႈၸႂ် ဝႆႉယူႇဢိူဝ်ႈၼႆႉ ပေႃးသိုၵ်းၶႄႇ(ၵဝ်ႈၵၢင်ႉ) ၸိူဝ်းၼႆႉထွႆၼႆ မိူဝ်ႈလဵဝ်ႁမ်ႉ သိုၵ်းမၢၼ်ႈၵေႃႈ ပေႃးသိမ်းလႆႈ တီႈဝဵင်းၼွင်ၶဵဝ် ၵမ်ႈၽွင်ႈယဝ်ႉ။ ပေႃးသိုၵ်းမၢၼ်ႈသိမ်းလႆႈဝဵင်းၼွင်ၶဵဝ်၊ သီႇပေႃႉ မူတ်းတႄႉ လီလႆႈမႆႈၸႂ်တႃႇလႃႈသဵဝ်ႈတေႉတေႉဢိူဝ်ႈ” ဝႃႈၼႆ။

လႆႈႁူႉဝႃႈ သိုၵ်းၵဝ်ႈၵၢင်ႉ တႄႇၵဵပ်းသိုၵ်းမႂ်ႇၶိုၼ်း ၼႂ်းၸႄႈဝဵင်းၵုၼ်လူင်၊ လဝ်ႉၵႆႇ၊ သႅၼ်ဝီၸိူဝ်းၼႆႉဝႆႉသေ ၵူၼ်းမိူင်းမႆႈၸႂ် ၵူဝ်သိုၵ်းမၢၼ်ႈ တင်း သိုၵ်းၵႅတ်ႇၶႄၵူၼ်းမိူင်း PDF ၸိူဝ်းမီးဝႆႉယူႇတီႈဝဵင်းလႃႈသဵဝ်ႈၼၼ်ႉ ပဵၼ်ပၢင်တိုၵ်းၵၼ်ထႅင်ႈ ၼႆယဝ်ႉ။

“ၶဝ်ၸုမ်းလဵဝ် ႁဵတ်းၼႆ တႅပ်းတတ်းၵႂႃႇဢမ်ႇလႆႈၼႃႇ။ တီႈလႃႈသဵဝ်ႈၼႆႉ မီးဝႆႉပႃး သိုၵ်းမၢၼ်ႈ PDF ၸိူဝ်းၼႆႉႁႄလူး” ဝႃႈၼႆ။

ၼႃႈတီႈဢၼ်သိုၵ်းၵဝ်ႈၵၢင်ႉ ၵုမ်းၵမ်ဝႆႉ ၸႄႈတွၼ်ႈ 4 တီႈ ဢၼ်ပဵၼ် မိူင်းၵူဝ်း၊ သႅၼ်ဝီ၊ လဝ်ႉၵႆႇ၊ ၵူတ်ႉၶၢႆၼႆႉ ၾၢႆႇသိုၵ်း ၵဝ်ႈၵၢင်ႉ မၵ်းမၼ်ႈပဵၼ် ၼႃႈလိၼ်ၶိုၵ်ႉတွၼ်း မၢႆ 1 တင်းမူတ်းသေ ၼွၵ်ႈဝဵင်းလႃႈသဵဝ်ႈ ထႅင်ႈၾၢၵ်ႇၼိုင်ႈ ၶူဝ်ဢေႇတီႇ AD ၼၼ်ႉၵေႃႈ တေၸၼ်ၶဝ်ႈယူႇ ၼႂ်းၸႄႈတွၼ်ႈသႅၼ်ဝီၵႂႃႇ ဝႃႈၼႆ။

ၵဵဝ်ႇလူၺ်ႈလွင်ႈသိုၵ်းၵဝ်ႈၵၢင်ႉတေထွႆဢွၵ်ႇဝဵင်းလႃႈသဵဝ်ႈသေ ပၼ်သိုၵ်းမၢၼ်ႈၵုမ်းၵမ်ၶိုၼ်း ၼႂ်းဝဵင်းလႃႈသဵဝ်ႈ တႃႇ 12 ပွၵ်ႉၼၼ်ႉသေ ၽူႈထတ်းသၢင်ၵၢၼ်မိူင်းတႆးၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ၵွမ်ႉၵႃႈ လႆႈၵုမ်းၵမ်ၵၢင်ဝဵင်း လႃႈသဵဝ်ႈၵွၺ်းတႄႉ သိုၵ်းမၢၼ်ႈၸွင်ႇတေမႃးႁႃႉၼႆ လီပႂ်ႉတူၺ်းၵွၼ်ႇ၊ သဵၼ်ႈတၢင်းလူင် ၼွင်ၶဵဝ် ၵျွၵ်ႉမႄး သီႇပေႃႉ ၸိူဝ်းၼႆႉ ဢမ်ႇၵႂႃႇဢမ်ႇမႃးလႆႈ။ သဵၼ်ႈတၢင်းသႅၼ်ဝီ ၵူတ်ႉၶၢႆၵေႃႈ ဢမ်ႇၸၢင်ႈၸႂ်ႉ ပေႃးၼႆ ၵုမ်းဝႆႉလႃႈသဵဝ်ႈဢၼ်လဵဝ်ၵွႆး ၸွင်ႇၶဝ်တေမီး လွင်ႈႁူမ်ႇလူမ်ႈၼႄႇ။ သင်ဝႃႈ သဵၼ်ႈတၢင်းပႃႉထူး ၼွင်ဝူဝ်း ၼမ်ႉလၼ်ႈ ဢမ်ႇၼၼ် ၼမ်ႉပွင်ႈ ပွင်ႇပဵဝ် တႄႉ ယင်းၶႅၼ်းဢေႃႈ။ ပဵၼ်ႁိုဝ်ၵေႃႈ ပေႃးထွႆပၼ်ဝဵင်းလႃႈသဵဝ်ႈပိူင်လဵဝ်ၵွႆးတႄႉ ဢမ်ႇၸၢင်ႈႈပဵၼ်ၵၢၼ်လႆႈ၊ ဢမ်ႇငမ်း ယဵၼ်လႆႈသႄႈ” ဝႃႈၼႆ။

မိူဝ်ႈပူၼ်ႉမႃး 15/01/2025 ၼၼ်ႉ သိုၵ်းၵဝ်ႈၵၢင်ႉ တင်း သိုၵ်းမၢၼ်ႈ ႁူပ်ႉဢုပ်ႇၵၼ် လွင်ႈၵၢၼ်သိုၵ်း ၵၢၼ်မိူင်း ၵၢၼ်ငမ်းယဵၼ် တီႈဝဵင်းၶုၼ်ႊမိင်ႊ ၸိုင်ႈမိူင်းၶႄႇ။ ဝၢႆးလင်ၼၼ်ႉ တႄႇဝၼ်းတီႈ 18 ဝၼ်းသေ တင်းသွင် ၾၢႆႇပိုၼ်ၽၢဝ်ႇလူင်းလၢႆးမိုဝ်း ၵိုတ်းတိုၵ်းၵၼ်ပဵၼ်တၢင်းၵၢၼ်မႃး။

ယွၼ်ႉၼၼ် ၾၢႆႇသိုၵ်းမၢၼ်ႈ ၸင်ႇၵိုတ်းပႅတ်ႈ လွင်ႈဢဝ်ၶိူင်ႈမိၼ် ပွႆႇမၢၵ်ႇသႂ်ႇ ၼႂ်းၸႄႈဝဵင်းလႃႈသဵဝ်ႈ လႄႈ ၼႃႈတီႈ ၵုမ်းၵမ် သိုၵ်းၵဝ်ႈၵၢင်ႉ ၼႆယဝ်ႉ။

ၽူႈလူင်ႉလႅၼ်ႇၵၢၼ်မိူင်းၸဝ်ႈၼိုင်ႈၵေႃႈထတ်းသၢင်ထႅင်ႈဝႃႈ -“ၸူဝ်ႈၵႃႈပႆႇၼိမ်တဵင်ႈတႄႉ ​​တေလႆႈၾၢင်ႉယူႇၾၢင်ႉၵိၼ်ၵွၼ်ႇ၊ ​​တေပႆႇထၢင်ႇႁၢင်ႊ ၵႃႉၶၢႆတူင်ႉၼိုင်ၵွၼ်ႇ။ ၽွင်းတိုၵ်ႉပဵၼ်ပၢၼ်သိုၵ်းၽွင်းငမ်းၼႆႉ သိုၵ်းၸုမ်းလႂ်​​ၵေႃႈယဝ်ႉ တၵ်း​​တေႁဵတ်းၸွမ်း ပိူင်သိုၵ်းလၢႆးသိုၵ်းၵွၺ်းလႄႈ ၵူၼ်းမိူင်းၼႆႉ ​​ႁေႈၸွမ်းၵိူင်းၸွမ်းၽၢႆႇလႂ်​​ၵေႃႈ ​​တေဢမ်ႇလူမ်ၸႂ်လႆႈၶၢဝ်းယၢဝ်း။ လူဝ်ႇမုင်ႈၼႃႈၸူး ၵၢၼ်ၽွင်းငမ်းၵူၼ်းမိူင်း​​သေ ​​မေႃၵိၼ်​​မေႃယူႇၵႂႃႇၵွၺ်းၶႃႈယဝ်ႉ။” – ဝႃႈၼႆ။

မိူၼ်ၼၼ်ၼင်ႇၵဝ်ႇ မိူဝ်ႈလိူၼ်မၢတ်ႉၶျ် 22 ဝၼ်းၼၼ်ႉၵေႃႈ သိုၵ်းၵဝ်ႈၵၢင်ႉ တင်း သိုၵ်းမၢၼ်ႈ ႁူပ်ႉၵၼ်တီႈ ဝဵင်းၶုၼ်ႊမိင်ႊ ၸိုင်ႈမိူင်းၶႄႇ ထႅင်ႈၵမ်းၼိုင်ႈသေ ဢုပ်ႇဢူဝ်းၵၼ် လွင်ႈၸႅၵ်ႇၼႃႈတီႈၵုမ်းၵမ်လႄႈ ပၢင်ဢုပ်ႇဢူဝ်း ဢမ်ႇဢွင်ႇမၢၼ် လႆႈလူႉၵွႆၵႂႃႇ ၶၢဝ်းတၢင်း ဝၼ်းလဵဝ် ၼႆယဝ်ႉ။ 

တႅမ်ႈ-ၽူၺ်းၼုမ်ႇ