ၼႂ်းၼႃႈတီႈၸုမ်းယိပ်းၵွင်ႈၵၢင်ႇၵုမ်းၵမ် ၼႂ်းၸိုင်ႈတႆးလၢႆလၢႆတီႈ ပိုၼ်ၽၢဝ်ႇဝႃႈ တေဢမ်ႇၸတ်းပွႆး မူၼ်ႈၵျေႃႇသွၼ်းၼမ်ယဝ်ႉဝႃႈၼႆသေတႃႉ တီႈဝဵင်းတူၼ်ႈတီးတႄႉ သိုၵ်းမၢၼ်ႈပိုၼ်ၽၢဝ်ႇဝႃႈ တေၸတ်းပွႆး သွၼ်းၼမ်ႉယူႇၼႆသေ ဢွၵ်ႇလိၵ်ႈပိုၼ်ၽၢဝ်ႇ သၢင်ႈၶဵင်ႇလဵၼ်ႈၼမ်ႉယူႇ။
ၽူႈတူင်ႉၼိုင်တူင်ႇဝူင်းၵူၼ်း ဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ- “လႆႈႁၼ်ၶဝ်မႃးႁဵတ်းၶဵင်ႇဝႆႉ တီႈႁိမ်းလုမ်း လူင်ပွင်ၸိုင်ႈဝႆႉၼၼ်ႉၼႃႇ။ တီႈတူၼ်ႈတီးၼႆႉ ပွႆးသွၼ်းၼမ်ႉၼႆႉ လႅပ်ႈတေပဵၼ်ယူႇ။ တၢင်းၵႃႈဝႅၼ် ႁွင်ႉၵႂၢမ်းၸိူဝ်းၼႆႉ လႅပ်ႈတေဢမ်ႇပႃးယဝ်ႉ ၶဝ်တေႁဵတ်းပွႆးသွၼ်းၼမ်ႉယူဝ်းယူဝ်း ၵူၺ်း ”-ဝႃႈၼႆ ။
ၼႂ်းပွၵ်ႉၼႂ်းယွမ်ႇၵေႃႈ ၵၢင်ႉၵႄႇၼႂ်းပွၵ်ႉမႃးၵဵပ်းငိုၼ်း တႃႇႁဵတ်းပွႆးသွၼ်းၼမ်ႉ။ မိူၼ်ၼင်ႇ တီႈပွၵ်ႉ ၺွင်ႇၽိဝ်ႇ ( ညောင်ဖြူ) ၵဵပ်းၼိုင်ႈႁိူၼ်း 5000 ထိုင် 10000 ပျႃး ဝႃႈၼႆ ။
ၼၢင်းယိင်းၵူၼ်းမိူင်းၼႂ်းဝဵင်းတူၼ်ႈတီး ဢၼ်လႆႈပၼ်ငိုၼ်းတီႈၵၢင်ႉၵႄႇၵေႃႉၼိုင်ႈ လၢတ်ႈတီႈ ၽူႈတွႆႇႁွၵ်ႈဝႃႈ -“ၶဝ်မႃးၵဵပ်းငိုၼ်း တႃႇႁဵတ်းပွႆး မိူဝ်ႈဝၼ်းတီႈ 30 လိူၼ်မၢတ်ႉၶျ်ပူၼ်ႉမႃးၼႆႉဢေႃႈ။ လႆႈပၼ် 5000 ထိုင် 10000 မိုၼ်ႇ ၊ ၽိူဝ်ႇသႂ်ႇငိုၼ်းၵႂႃႇယဝ်ႉ သမ်ႉၶိုၼ်းမီးၶၢဝ်ႇဢွၵ်ႇမႃးဝႃႈ ၶဝ်တေ ႁဵတ်းလူဝ်လူဝ်ဢမ်ႇႁဵတ်းလူဝ်လူဝ်။ ၶဵင်ႇလဵၼ်ႈၼမ်ႉၵေႃႈၶဝ်ပႆႇယႃႉၶိုၼ်း ”- ဝႃႈၼႆ ။
ၵဵဝ်ႇလွင်ႈပွႆးသွၼ်းၼမ်ႉၼႆႉ ၵူၼ်းပိုၼ်ႉတီႈတိုၵ်းသူၼ်းဝႆႉဝႃႈ ပဵၼ်ၽွင်းၵူၼ်းမိူင်း ထူပ်းၽေး ၽႅၼ်ႇ လိၼ်ဝႆ ပၢင်တိုၵ်းသိုၵ်းသိူဝ်ၵေႃႈပႆႇယဵၼ် ဢၼ်ဢဝ်ၶိူင်ႈမိၼ်သေပွႆႇမၢၵ်ႇယူႇၵေႃႈပွႆႇယူႇၵူႈဝၼ်း။ ၵွပ်ႈၼႆၶၢဝ်းသွၼ်းၼမ်ႉပီၼႆႉ ဢမ်ႇၶႂ်ႈႁႂ်ႈၸတ်းပွႆးလမ်းမူၼ်ႈသိူဝ်းသင် ။ ပေႃးႁဵတ်းၸွမ်းထုင်းၾိင်ႈ သၢႆႇႁူဝ်သုၵ်ႈတိၼ်လၢင်ႉမိုဝ်းၵၼ်ႇတေႃးၵူၼ်းထဝ်ႈမွၵ်ႈၼၼ်ႉၵူၺ်းတႄႉ ဢမ်ႇပဵၼ်သင် ဝႃႈၼႆ ။
ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ-“တႄႇ covid မႃးၼႆႉ ပွႆးသွၼ်းၼမ်ႉၼႆႉၵူၼ်းဢမ်ႇပေႃးၵိုၼ်းယဝ်ႉ ၊ သိုၵ်းမၢၼ်ႈသမ်ႉၶိုင်ႁဵတ်းပွႆးတိၵ်းတိၵ်း။ လၢတ်ႈဝႃႈတေႁဵတ်းပွႆးလဵၵ်ႉလဵၵ်ႉၵူၺ်းၼႆသေတႃႉ ပေႃးထိုင်ၶၢဝ်းပွႆးမႃး ၸတ်းပွႆးယႂ်ႇလၢမ်းလူင် ”- ဝႃႈၼႆ ။
ယွၼ်ႉၽေးၽႅၼ်လိၼ်ဝႆမိူဝ်ႈဝၼ်းတီႈ 28/3/2025 ၼၼ်ႉလႄႈ ၵၢတ်ႇလူင် Ocean ဝဵင်းတူၼ်ႈတီးၸတ်ႉတႅၵ်ႇၵွၵ်းငၢၵ်ႈ ႁဵတ်းႁႂ်ႈၵူၼ်းမိူင်းတိုၼ်ႇသၢၼ်ႈတူၵ်းၸႂ် ။
ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ဢၼ်တီႈ ဢူဝ်ႊသႅၼ်ႊ Ocean ၼၼ်ႉ ယွၼ်ႉၽႅၼ်ႇလိၼ်ဝႆလႄႈ ၸတ်ႉၵႂႃႇၼမ်ဝႆႉ ၊ ၵူၺ်းၶဝ်ၸႂ်ႉၽူႈလူင်ႉလႅၼ်ႇမႃးၵူတ်ႇထတ်းတူၺ်းယူႇ။ ၵူၼ်ႇတႄႉဢမ်ႇၵူၼ်ႇၼင်ႇၵဝ်ႇ ၊ ဝၢႆးၼႆႉၶဝ် ၸႂ်ႉၵူၼ်းၶၢႆၶူဝ်းၼႂ်းၵၢတ်ႇ ၵႂႃႇၶၢႆၶူဝ်းၶိုၼ်း။ ၽႂ်ၵေႃႈဢမ်ႇႁတ်းၵႂႃႇ ၊ ႁၢၼ်ႉၶမ်း ၸၼ်ႉပႃႈတႂ်ႈၸိူဝ်းၼၼ်ႉတႄႉ ၵႂႃႇပိုတ်ႇၶၢႆၶိုၼ်းၽွင်ႈယဝ်ႉ ”- ဝႃႈၼႆ ။
ၼႂ်းႁၢင်လိူၼ် မတ်ႉၶျ် ၼႆႉၸွမ်းၼႃႈလိၼ်ၸုမ်းသိုၵ်းၸၢဝ်းၶိူဝ်းၵုမ်းၵမ် မိူၼ်ၼင်ႇၸုမ်းသိုၵ်းတဢၢင်း TNLA ၸုမ်းသိုၵ်းၵဝ်ႈၵၢင်ႉ MNDAAလႄႈ ၸုမ်းသိုၵ်းမိူင်းလႃး NDAA ၸိူဝ်းၼႆႉၵေႃႈ ဢွၼ်ပိုၼ်ၽၢဝ်ႇ တေဢမ်ႇၸတ်းပွႆးသွၼ်းၼမ်ႉဝႃႈၼႆမႃးႁင်းၽႂ်မၼ်း ။
ၵူၺ်းၵႃႈ သိုၵ်းမၢၼ်ႈတႄႉ ပိုၼ်ၽၢဝ်ႇ ၼႂ်းဝၼ်းတီႈ 1 /4/2025 ဝႃႈ ယွၼ်ႉၽႅၼ်ႇလိၼ်ဝႆၼႂ်းမိူင်းတႆးမိူင်းမၢၼ်ႈလႄႈ တေၸတ်းႁဵတ်း ၸွမ်းၼင်ႇၾိင်ႈထုင်း ၵႂႃႇယူႇဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ