ၽႅၼ်ႇလိၼ်ဝႆ ဝၼ်းတီႈ 28/03/2025 ၼၼ်ႉ သုၼ်ၵၢင်မၼ်းပဵၼ်တီႈတိူင်းၸႄႈၵႅင်းသေတႃႉ ၶွၼ်းသၼ်ႇဝႆႁႅင်းထိုင် 7.7 မႅၵ်ႊၼီႊၵျုတ်ႉလႄႈ ဢမ်ႇၵွမ်ႉတီႈသုၼ်ၵၢင်မၼ်းၼၼ်ႉ ၵူၺ်း ယွၼ်ႈပတ်းပိုၼ်ႉ ၸိုင်ႈမိူင်း ယင်းပၢႆႁွတ်ႈထိုင်မိူင်းထႆး လူးၵွၼ်ႇ။   

ၵူၼ်းမိူင်းၼႂ်းၼွင်ႁၢႆးယႃႈ ၸိုင်ႈတႆးပွတ်းၸၢၼ်းၵေႃႈ ၺႃးၽွၼ်းယွၼ်ႈႁၢဝ်ႈႁႅင်းမိူၼ်ၵၼ်။ ဝၢႆးၽႅၼ်ႇလိၼ်ဝႆၼႆႉ ၵူၼ်းၼႂ်းၼွင် ယၢပ်ႇၽိုတ်ႇတႃႇပူၵ်းပွင်မႄးၵုမ်းလုမ်းလႃးၶိုၼ်းတီႈယူႇသဝ်းၸဝ်ႈၵဝ်ႇ ၵူၼ်းၼပ်ႉႁူဝ်ႁဵင်ၵပ်ႉၵိၼ်းလွင်ႈယူႇၵိၼ် ၼႆယဝ်ႉ။

ၼွင်ႁၢႆးယႃႈၼႆႉ ပဵၼ်ၼွင်ၼမ်ႉဢၼ်ႁၢင်ႈလီသုတ်းၼႂ်းမိူင်းႁူမ်ႈတုမ်ပတ်းပိုၼ်ႉ။ ပဵၼ်ပိုၼ်ႉတီႈ ၵူၼ်းၼွၵ်ႈမိူင်းၼႂ်းမိူင်းမႃးဢႅဝ်ႇယဵမ်ႈၼမ်။ ၽွင်းဝၢၼ်ႈမိူင်းလီ တၢင်းပဵၼ်ၶူဝ်ႊဝိတ်ႉ -19 ပႆႇၶဝ်ႈမႃးၵဝ်းၼၼ်ႉ ၼွင်ႁၢႆးယႃႈၼႆႉ ပဵၼ်ပိုၼ်ႉတီႈ ဢၼ်ႁဵတ်းႁႂ်ႈငိုၼ်းၶဝ်ႈၸိုင်ႈမိူင်းၼမ်သုတ်းထီႉၼိုင်ႈလူးၵွၼ်ႇ။ ၵူၺ်းၵႃႈ ယွၼ်ႉပိူဝ်ႈ တၢင်းပဵၼ်လၢမ်းၽႄႈ သေဢမ်ႇၵႃး သိုၵ်းမၢၼ်ႈသမ်ႉ မႃးယိုတ်းဢႃႇၼႃႇ ၸိုင်ႈမိူင်းထႅင်ႈလႄႈ ႁဵတ်းႁႂ်ႈၵူၼ်းဢမ်ႇမႃးဢႅဝ်ႇယဵမ်ႈထိုင် ၼွင်ႁၢႆးယႃႈ။ တုမ်ႉတိူဝ်ႉ ၵၢၼ်ႁႃၵိၼ်လဵင်ႉတွင်ႉၼႂ်းပိုၼ်ႉတီႈ။

ၶၢဝ်းတၢင်း သိုၵ်းမၢၼ်ႈယိုတ်းမိူင်း မႃး 4 ပီပၢႆၼႆႉ ၵူၼ်းၼႂ်းၼွင် ဢမ်ႇတွၼ်ႉလႆႈယူႇသႃႇမႃးသေပွၵ်ႈ။ လႆႈယူႇၸွမ်းလွင်ႈၵူဝ်ႁႄ။ ၺႃးၸုမ်းယိပ်းၵွင်ႈၵၢင်ႇ လွၵ်ႇငိုတ်ႈတဵၵ်းငႅၼ်းၶိူဝ်းယႂ်းလႄႈ ဢမ်ႇပဵၼ်ပူၵ်း ပွင်သင်ၼႂ်းပိုၼ်ႉတီႈ။

ၼႂ်းၵႄႈၼႆႉ သမ်ႉမႃးၺႃးၽေးၽႅၼ်ႇလိၼ်ဝႆလူင်ၼႆႉထႅင်ႈ။ ၵွၼ်ႇၼႃႈၽႅၼ်ႇလိၼ်ဝႆၼႆႉသမ်ႉ ထူပ်း ၽေးၼမ်ႉထူမ်ႈႁႅင်းယဝ်ႉၵမ်းၼိုင်ႈ။ ၸဵမ်ၵူၼ်းၸဵမ်တီႈယူႇတၼ်းသဝ်း ယင်းပႆႇမိူၼ် ပၵ်းၵဝ်ႇပိူင်ၵဝ်ႇ။

ၽွင်းၽႅၼ်ႇလိၼ်ဝႆၼႆႉ သမ်ႉၶႅၼ်းႁၢင်ႈႁၢႆႉ။ ႁိူၼ်းယေးၵူၼ်ႇပင်း ဝတ်ႉဝႃးၽႃသိူဝ်ႇလူႉၵွႆ ၵူၼ်းၼပ်ႉ ႁူဝ်မိုၼ်ႇ ထူပ်းၽေးတုၵ်ႉယၢၵ်ႈ။ ယၢမ်းလဵဝ် မီးၸုမ်းၸွႆႈတူင်ႇၵူၼ်း မႃးၵမ်ႉ ၸွႆႈၶဝ်ႈ ၼမ်ႉတၢင်းၵိၼ် ယူႇဝႃႈၼႆသေတႃႉ တႃႇပူၵ်းပွင်ၶိုၼ်းတီႈယူႇတၼ်းသဝ်းသေ ယူႇလႆႈၶိုၼ်းတႄႉ ပႆႇမီးတၢင်းလႂ်မႃးၸွႆႈၼႆ ၼၢင်းယိင်း ၵူၼ်းၼွင်ႁၢႆးယႃႈ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ဢၼ်မႃးၸွႆႈၶွင်ၵိၼ်ယႅမ်ႉတႄႉ မီးယူႇယဝ်ႉၼင်ႇၵဝ်ႇ။ ၵူၺ်းၵႃႈ ၵူၼ်းထူပ်းၽေးၸိူဝ်းဢၼ် ၸုမ်းၸွႆႈထႅမ် ပႆႇၶဝ်ႈထိုင်လႆႈၵေႃႈမီး။ ထႅင်ႈလွင်ႈၼိုင်ႈသမ်ႉ တႃႇတေၽဵဝ်ႈသၢၵ်ႈ ႁိူၼ်းယေး ဢၼ်လူႉၵွႆၵႂႃႇ ၸိူဝ်းၼၼ်ႉလႄႈသင် တႃႇပူၵ်းပွင်ၶိုၼ်းႁိူၼ်းယေးလႄႈ တႃႇယူႇသဝ်းၵႂႃႇၸူဝ်ႈၶၢဝ်း ၸိူဝ်းၼႆႉၵေႃႈ ပဵၼ်ယၢပ်ႇဝႆႉ။ ၵမ်ႈၽွင်ႈၵေႃႈ ၵင်ႈသုမ်ႉၵင်ႈသွင်းသေယူႇဝႆႉ ၵမ်ႈၽွင်ႈၵေႃႈ လႆႈၵႂႃႇသွၼ်ႈယူႇဝႆႉတီႈဝတ်ႉဝႃးၽႃႇသိူဝ်ႇ”- ဝႃႈၼႆ။

ၶၢႆႉယူႇတီႈလႂ်ၵေႃႈ ႁႂ်ႈမိူၼ်ႁိူၼ်းယေး ဢၼ်ယၢမ်ႈယူႇသဝ်းမႃးတႄႉ တေဢမ်ႇမီး။ ၵူၼ်းၵင်ႈသုမ်ႉသေယူႇၵေႃႈ ပေႃးထိုင်ၶၢဝ်းၾူၼ်တူၵ်းမႃးတႄႉတႄႉ တေဢမ်ႇၶၢမ်ႇလႆႈႁိုင်။ ၵူၼ်း ၸိူဝ်းသွၼ်ႈယူႇတီႈ ဝတ်ႉၵေႃႈ တႃႇၶၢဝ်းယၢဝ်းတႄႉ တေဢမ်ႇငၢႆႈ ယွၼ်ႉၼၼ် ၶႂ်ႈႁႂ်ႈမီးၸုမ်းမႃးၸွႆႈ လၢႆၾၢႆႇမႃးပူၵ်းပွင်ပၼ်ဝႆးဝႆးၼႆ – ၵူၼ်းၼွင်ႁၢႆးယႃ သိုပ်ႇလၢတ်ႈၼင်ႇၼႆ။

ၽွင်းတီႈယူႇတီႈသဝ်း ဢမ်ႇမီးၸိူင်ႉၼႆ ဢၼ်ယၢပ်ႇထႅင်ႈလၢႆပိူင်ၵေႃႈမႃးၸွမ်း မိူၼ်ၼင်ႇ ဢမ်ႇမီးႁွင်ႈၽၢႆႈ (ထၢင်) ၊ ယႃႈယႃလႄႈ ၶိူင်ႈၸႂ်ႉတိုဝ်း ၼႂ်းၼႃႈႁိူၼ်းၽႂ်မၼ်း ၸိူဝ်းၼႆႉၵေႃႈ ဢမ်ႇၸၢင်ႈႁႃဢဝ် တၢင်းလႂ်။

ၸွမ်းၼင်ႇ သဵၼ်ႈမၢႆ ဢၼ်ၸုမ်းၸွႆႈတူင်ႇၵူၼ်းၼႂ်းၼွင် ၵဵပ်းဝႆႉသဵၼ်ႈမၢႆ မိူဝ်ႈဝၼ်း 30/03/2025 ၼၼ်ႉ ၼႂ်းထုင်ႉၼွင်ႁၢႆးယႃႈၼႆႉ ႁိူၼ်းယေးလူႉၵွႆ 3,730 လင် ၊ 4,699 မုင်ႉႁေႃ ႁိူၼ်း။ ႁူဝ်ၼပ်ႉၵူၼ်း 16,947 ၵေႃႉ လူဝ်ႇၶဝ်ႈၼမ်ႉတၢင်းၵိၼ်လႄႈ တီႈယူႇတၼ်းသဝ်း ၼႆယဝ်ႉ။

ၼွင်ႁၢႆးယႃႈၼႆႉ ၵႂၢင်ႈ 44.9 လွၵ်းလၵ်းပၼ်ႇမူၼ်းလႄႈ မၢင်တီႈၵေႃႈလိုၵ်ႉ မၢင်တီႈၵေႃႈတိုၼ်ႈသေ ၸိူဝ်းလိုၵ်ႉထိုင် 12 ထတ်းၵေႃႈမီး။ တႃႇၵႂႃႇမႃးႁႃၵၼ် တီႈၼိုင်ႈလႄႈ တီႈၼိုင်ႈ ၵေႃႈ လႆႈၽၢႆးႁိူဝ်းသေ ၵႂႃႇသူႇၸႂ်းၵၼ်။ ၽႂ်ႁၼ်ၵေႃႈ မီးတၢင်းသိူဝ်းလႄႈ ၵတ်းယဵၼ်ၸႂ်ၸွမ်း။

ၵူၺ်းၵႃႈ ယၢမ်းလဵဝ်တႄႉ တူၺ်းတၢင်းလႂ်ၵေႃႈ မွင်သဝ်ႈ ၵူၼ်းမိူင်းထူပ်းၽေးတင်းၼမ်လႄႈ ႁႂ်ႈပေႃး ပဵၼ် တီႈမုင်ႈယဵမ်ႈယႃၸႂ်မိူၼ်ၵဝ်ႇတႄႉ ပႆႇပဵၼ်လႆႈ။ မိူၼ်ၼင်ႇ ၾၢႆႇတၢင်းဝၢၼ်ႈၼမ်ႉပၼ်ႇၼၼ်ႉ 18 ဝၢၼ်ႈ လင်ႁိူၼ်း 2,300 ပၢႆ လူႉၵွႆၵူၼ်ႇပင်းမူတ်း။

တီႈဝတ်ႉၽြႃးလူင်ၸၢမ်ၵဝ်ႈတွၼ်ႈ (ၽွင်ႇတေႃႇဢူး) ၼၼ်ႉၵေႃႈ မီးႁွႆးၸတ်ႉႁွႆးတႅၵ်ႇတဵမ်ၵႂႃႇမူတ်း။ ၸွမ်းၼင်ႇ ၸုမ်းၸွႆႈတူင်ႇၵူၼ်း ၼႂ်းၼွင်ႁၢႆးငၢၼ်းဝႆႉ မိူဝ်ႈလိူၼ်မၢတ်ႊၶျ် 30 ၼၼ်ႉတႄႉ ၵူၼ်းၼႂ်းၼွင် လူႉတၢႆယဝ်ႉ 89 ၵေႃႉ ၼႂ်းၼၼ်ႉ လုၵ်ႈဢွၼ်ႇလဵၵ်ႉ ဢႃယု 4 ၶူပ်ႇၵေႃႉၼိုင်ႈလႄႈ ၼၢင်းယိင်းဢႃယု 17 ၵေႃႉၼိုင်ႈလႄႈ ပႃးၵူၼ်းၶၢဝ်ႉ ၵူၼ်းဢႃယုယႂ်ႇ ၸိူဝ်းၼႆႉ။ ထိုင် 04/04/2025 ၼႆႉတႄႉ ႁူႉသဵၼ်ႈမၢႆၵူၼ်းလူႉတၢႆ 135 ၵေႃႉယဝ်ႉ ဝႃႈၼႆ။

ပဵၼ်ႁိူၼ်း ယူႇၼိူဝ်ၼႃႈၼမ်ႉၼွင်လႄႈ ၽွင်းၽႅၼ်ႇလိၼ်ဝႆၼၼ်ႉ ႁိူၼ်းယေးၵူၼ်ႇပင်းလူမ်ႉတဵင် သေတၢႆ။ ၵမ်ႈၽွင်ႈသမ်ႉ ၸူမ်ၼမ်ႉတၢႆ။ ၵမ်ႈၽွင်ႈသမ်ႉ ၺႃးၾႆးၾႃႉသျွတ်ႉတၢႆ။ ၶၢဝ်းၼႆႉ ပဵၼ်ၶၢဝ်း ၵူၼ်းၼႂ်းၼွင် ၽုၵ်ႇမၢၵ်ႇၶိူဝ်သူမ်ႈလႄႈ ၸိူဝ်းတိုၵ်ႉယူႇၸွမ်းၼႂ်းသူၼ်တႄႉ လွတ်ႈၽေးၽွင်ႈယူႇ – ၵူၼ်းပိုၼ်ႉတီႈလၢတ်ႈၼင်ႇၼႆ။

ဝၢႆးၽႅၼ်ႇလိၼ်ဝႆၼႆႉ သၼ်ယၢၼ်းၾူၼ်းၵေႃႈ ၶၢတ်ႇလႄႈ ၵပ်းသိုပ်ႇႁႃၵၼ်ယၢပ်ႇ။ ၼႂ်းၼွင်ၼႆႉ ၵမ်ႈၼမ်ၸႂ်ႉ MPT လႄႈ Mytel ၵူၺ်း။ ပေႃးသွင်ဢၼ်ၼႆႉ ဢမ်ႇလႆႈၵေႃႈ ဢမ်ႇမီးတၢင်းလိူၵ်ႈတၢင်ႇဢၼ်။

ၽႅၼ်ႇလိၼ်ဝႆယဵၼ်ၵႂႃႇယဝ်ႉသေတႃႉ ၵူၼ်းၼႂ်းၼွင် တိုၵ်ႉမီးလွင်ႈမႆႈၸႂ်ထႅင်ႈတင်းၼမ် လိူဝ်ၼၼ်ႉ သမ်ႉမီးၶၢဝ်ႇလိုဝ်းထႅင်ႈဝႃႈ တေမီးလူမ်းလႅင်ႉလူင် ပတ်ႉထႅင်ႈၼႆလႄႈ ယိင်ႈ ၶႅၼ်းထႅင်ႈႁႅင်းၸႂ်ၵူဝ်။

ၼႂ်းၵႄႈၼႆႉ ပဵၼ်ၶၢဝ်းဢၼ်ၸုမ်းလုၵ်ႉၽိုၼ်ႉၵူႈၾၢႆႇတိုၵ်းတေႃးသိုၵ်းမၢၼ်ႈယူႇလႄႈ ပၢင်တိုၵ်းၵေႃႈ မီးၵူႈဝၼ်း။ ၸႄႈဝဵင်းႁိမ်းႁွမ်းၼွင်ႁၢႆးယႃႈ မိူၼ်ၼင်ႇ ပၢင်လွင်း၊ ၸၢမ်ၵႃး၊ သီႇသႅင်ႇ ၸိူဝ်းၼႆႉၵေႃႈ မီးပၢင်တိုၵ်း ယူႇၵူႈလိူၼ်လႄႈ ၵူၼ်းမိူင်းဢမ်ႇထၢင်ႇႁၢင်ႈလိပ်းၶီးမီးၸႂ်။

တေႃႈၼင်ႇ ၶၢဝ်းၵူၼ်းမိူင်းတိုၵ်ႉထူပ်းၽေးၽႅၼ်ႇလိၼ်ဝႆယူႇၼႆႉ ဝၼ်းတီႈ 30/03/2025 ၼႆႉ ၸုမ်းပျီႇတူႉၸိတ်ႉပဢူဝ်း PNO ပွႆႇမၢၵ်ႇတိူဝ်ႉသႂ်ႇ ႁိူၼ်းၵူၼ်းဝၢၼ်ႈလွႆၽြႃး လူႉၵွႆၼိုင်ႈလင်ၼႆ ၸုမ်းတူင်ႉၼိုင်သုၼ်ႇလႆႈ ၼွင်ႁၢႆးယႃႈ (အင်းလေး ဒေသလူ့အခွင့်အရေး) ႁၢႆးငၢၼ်းဝႆႉ။

ၼႂ်းဝၼ်းတီႈ 03/04/2025 ဝၢႆးဝၼ်း 2 မူင်းၼႆႉၵေႃႈ ႁူင်းႁႅမ်းၸိုဝ်ႈယႂ်ႇၼႂ်းၼွင်ႁၢႆးယႃႈ Myanmar Treasure Resort ဢၼ်မီးၾၢႆႇႁွင်ႇ မိူင်းသွၵ်ႇၼၼ်ႉ သမ်ႉၺႃးၾႆးမႆႈလူႉသုမ်းထႅင်ႈ။ ၵူၼ်းပိုၼ်ႉတီႈ လၢတ်ႈဝႃႈ မႆႈယွၼ်ႉၾႆးပႃႇလၢမ်းထိုင် ႁူဝ်ၶမ်ႈ 6 ၵေႃႈ ၾႆးတိုၵ်ႉလုၵ်ႉမႆႈယူႇ ၼႆယဝ်ႉ။

မိူဝ်ႈၽႅၼ်ႇလိၼ်ဝႆၼၼ်ႉ ႁူင်းႁႅမ်း Myanmar Treasure Resort ၼႆႉ ဢမ်ႇလူႉသုမ်းသင်ၸွမ်း။ ၵူၺ်းၵႃႈ သမ်ႉမႃးၺႃးၾႆးမႆႈ။ လွင်ႈလူႉသုမ်းလႄႈ လွင်ႈမၢတ်ႇတိူဝ်ႉလူႉတၢႆတႄႉ ပႆႇႁူႉတႅတ်ႈတေႃး။

ဢိင်ၼိူဝ် ၵူၼ်းၼႂ်းၼွင် ထူပ်းၽေးႁၢႆႉၸႃႉလၢႆလွင်ႈမႃးၸိူဝ်းၼႆႉသေ ၼၢင်းယိင်းၵူၼ်းၼွင်ႁၢႆးယႃႈ ပိုတ်ႇဢူၵ်းပိုတ်ႇၸႂ်လၢတ်ႈၼႄဝႆႉၼင်ႇၼႆ –

“ၵူၼ်းၼွင်ႁဝ်းၶႃႈၼႆႉ ဢွၼ်တၢင်းသမ်ႉ ထူပ်းၽေးၼမ်ႉထူမ်ႈယဝ်ႉ။ ၵမ်းၼႆႉ မႃးၺႃးၽေးၽႅၼ်ႇ လိၼ်ဝႆထႅင်ႈ။ လိူဝ်ၼၼ်ႉသမ်ႉ လႆႈၵူဝ်ၽေးၾႆးထႅင်ႈ။ ၵူၼ်းမိူင်းႁဝ်းၼႆႉ ဢမ်ႇမီးလွင်ႈႁူမ်ႇလူမ်ႈသင် သေဢိတ်းယဝ်ႉ။ ၽေးသၽႃႇဝၼႆႉ ႁဝ်းႁႄႉႁၢမ်ႈသင် မၼ်းဢမ်ႇလႆႈၼႆၵေႃႈႁူႉယူႇ။ ၵူၺ်းၵႃႈ ဝၢႆးထူပ်းၽေးယဝ်ႉၵေႃႈ ၸုမ်းဢၼ်ၵဵဝ်ႇၶွင်ႈၸၼ်ႉၸိုင်ႈမိူင်း ၸိူဝ်းၼႆႉသမ်ႉ ဢမ်ႇမႃးၸွႆႈသင်ပၼ် လႆႈၵမ်းလဵဝ်။ မၼ်းမိူၼ်ၼင်ႇဝႃႈ ႁဝ်းပဵၼ်ၵေႃႈ ႁဝ်းၶၢမ်ႇၼႆၵႃႈၼၼ်ႉၵူၺ်း ဢမ်ႇမီးတီႈပိုင်ႈ။ ဢမ်ႇမီး ၸုမ်းလႂ်မႃးဢဝ်ပုၼ်ႈၽွၼ်းတူၺ်းထိုင်ပၼ်တႄႉတႄႉၶႃႈ”- ဝႃႈၼႆ။

ၽေးသၽႃႇဝပႆႇမႃးၵေႃႈ ဝၢၼ်ႈမိူင်းၼႂ်းမိူင်းႁူမ်ႈတုမ်ၼႆႉ ဢမ်ႇၼိမ်ဢမ်ႇသဝ်းယူႇယဝ်ႉလႄႈ မႃးထူပ်းၽေးၼမ်ႉထူမ်ႈ ၽႅၼ်ႇလိၼ်ဝႆ ၸိူဝ်းၼႆႉယဝ်ႉသမ်ႉ ၵူၼ်းမိူင်းယိင်ႈၶႅၼ်းလိူဝ်ၸႂ်။ သင်ပဵၼ်လႆႈတႄႉ ၶႂ်ႈႁႂ်ႈၸုမ်းၵဵဝ်ႇၶွင်ႈၶဝ်ၵူႈၾၢႆႇၾၢႆႇ လူင်းတူၺ်းထိုင်ပၼ် လွင်ႈယၢပ်ႇၵူၼ်းမိူင်း ဝႃႈၼႆ။

မၢင်ဢွင်ႈတီႈၵေႃႈ ဢမ်ႇမီးသၼ်ယၢၼ်းဢိၼ်ႊထိူဝ်ႊၼႅတ်ႊလႄႈ တႃႇႁႂ်ႈၵူႈတီႈၵူႈတၢင်း ႁူႉၸွမ်းလွင်ႈလူဝ်ႇၵူၼ်းမိူင်းၵေႃႈ ဢမ်ႇငၢႆႈ။ တေႃႈၼင်ႇ မိူင်းသွၵ်ႇ ဢၼ်ယူႇၼႂ်းၸႄႈဝဵင်းယွင်ႁူၺ်ႈ တိတ်းၸပ်းၼွင်ႁၢႆးယႃႈၼႆႉၵူၺ်းၵေႃႈ လွင်ႈၸွႆႈထႅမ်ပႆႇၶဝ်ႈထိုင်လႆႈသဵင်ႈ။

ၼႂ်းမိူင်းသွၵ်ႇၼႆႉၵူၺ်း လင်ႁိူၼ်းဢမ်ႇယွမ်း 800 လင် လူႉၵွႆၸွမ်းၽႅၼ်ႇလိၼ်ဝႆ။ ယၢမ်းလဵဝ် ၵူၼ်းထူပ်းၽေးၶဝ် လူဝ်ႇၶဝ်ႈၵိၼ်၊ ယႃႈယႃ၊ ၽႃႈယၢင်ႁႄႉလႅတ်ႇႁႄႉၾူၼ် ၼမ်ႉမၼ်းၸၢၵ်ႈ (တႃႇႁိူဝ်းၸၢၵ်ႈ) လႄႈ လူဝ်ႇငိုၼ်းၵမ်ႉၸွႆႈၼႆ – ၵူၼ်းပိုၼ်ႉတီႈလၢတ်ႈၼင်ႇၼႆ။