သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း ၻရူၼ်ႊ ပွႆႇမၢၵ်ႇတိူဝ်ႉၺႃးၵူၼ်းမိူင်းလူႉတၢႆ 5 ၵေႃႉ မၢတ်ႇၸဵပ်း 10 ၼႂ်း ၸႄႈဝဵင်းၼွင်ၶဵဝ် – ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF ဢွၵ်ႇဝႆႉ ၽိုၼ်တၢမ်းငဝ်းလၢႆး မိူဝ်ႈဝၼ်းတီႈ 03/04/2025 ၼႆႉၼင်ႇၼႆ။
တႄႇဝၼ်းတီႈ 21/03/2025 ၼၼ်ႉမႃး တေႃႇထိုင် ဝၼ်းတီႈ 01/04/2025 ၼႆႉ သိုၵ်းမၢၼ်ႈ ဢဝ်ၶိူင်ႈမိၼ်တိုၵ်းလႄႈ ၻရူၼ်ႊ ပွႆႇမၢၵ်ႇသႂ်ႇ တိူဝ်ႉၺႃးၵူၼ်းမိူင်းတၢႆ 5 ၵေႃႉ မၢတ်ႇၸဵပ်း 10 ၵေႃႉ ႁိူၼ်းယေးၵူၼ်း ဝၢၼ်ႈလူႉၵွႆၼပ်ႉသိပ်း ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ ၼႂ်းပိုၼ်ႉတီႈ တပ်ႉသိုၵ်းတဢၢင်း TNLA ၵုမ်းၵမ်ဝႆႉ ၸိူဝ်းၼၼ်ႉ ဝႃႈၼႆ။
ၼႂ်းၽိုၼ်တၢမ်းငဝ်းလၢႆးၼၼ်ႉ ဢွၵ်ႇဝႆႉဝႃႈ – ဢၼ်သိုၵ်းမၢၼ်ႈ ပိုတ်ႇၼႃႈသိုၵ်းၼႆႉ ပဵၼ်ဝၢႆးၽႅၼ်ႇလိၼ်ဝႆ (ဢိင်ႇသၼ်ႇ) မီးလွင်ႈလူႉသုမ်းယႂ်ႇလူင် မိူဝ်ႈဝၼ်းတီႈ 28/03/2025 ၼၼ်ႉသေ တိုၼ်းၼႄၼမ်ႉၸႂ် သိုၵ်းမၢၼ်ႈဝႃႈ ၶဝ်တိုၼ်းတင်ႈၸႂ် တႃႇႁႂ်ႈဢႃႇၼႃႇၶဝ် ယိုၼ်းယၢဝ်းၵူၺ်း ဢမ်ႇတူၺ်းႁၼ်တၢင်းတုၵ်ႉယၢၵ်ႈ ဢၼ်ၵူၼ်းမိူင်းႁူပ်ႉထူပ်းလႄႈ ၸွႆႈၵႅတ်ႇၶႄတူၺ်းထိုင်သင်ပၼ် – ဝႃႈၼႆ။
ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈလႆႈဢွၵ်ႇၼႆႉ ၶႂ်ႈႁႂ်ႈတူင်ႇဝူင်းလုမ်ႈၾႃႉ ႁူႉဝႃႈ သိုၵ်းမၢၼ်ႈၼႆႉ မၼ်းၵူၺ်းတူၺ်းပုၼ်ႈဢႃႇၼႃႇမၼ်း တေမၼ်ႈၵိုမ်းၵူၺ်း မၼ်းဢမ်ႇတူၺ်းထိုင်ၵူၼ်းမိူင်း ၼႂ်းၵႄႈၽေးဢိင်ႇသၼ်ႇလူင် ဢၼ်ႁဵတ်းႁႂ်ႈၵူၼ်းမိူင်း လူႉတၢႆ ႁိူၼ်းယေးၵူၼ်ႇပင်းလူႉသုမ်းၼမ် ၸိူဝ်းၼၼ်ႉ။ ယင်းပၢႆသိုပ်ႇဢဝ်ၶိူင်ႈမိၼ်တိုၵ်းလႄႈ ၻရူၼ်ႊၶဝ် ပွႆႇမၢၵ်ႇ ႁဵတ်းႁႂ်ႈဝၢၼ်ႈမိူင်းၵူၼ်းမိူင်း တၢႆႁၢႆလၢႆယူႇတိၵ်းတိၵ်းၼၼ်ႉၵူၺ်း။ ဝၢႆးဢိင်ႇသၼ်ႇယဝ်ႉ ၶဝ်ယင်းသိုပ်ႇဢဝ်ၶိူင်ႈမိၼ်တိုၵ်းပွႆႇမၢၵ်ႇယူႇ”- ဝႃႈၼႆ။
ဢိင်ၼိူဝ် လွင်ႈၼႆႉသေ မိူဝ်ႈဝၼ်းတီႈ 21/03/2025 ယၢမ်းၵၢင်ၼႂ် သိုၵ်းမၢၼ်ႈ ဢဝ်ၶိူင်ႈမိၼ် Jet Fighter သႅၼ်း Y – 12 ပွႆႇမၢၵ်ႇတီႈၼိူဝ်ဝၢၼ်ႈလွၵ်းၽၢၼ်း၊ ဢုမ်ႇတီး၊ ဢုမ်ႇၶႃးလႄႈ ၵျွၵ်ႉၵျၢၼ်းလႄႈ တိူဝ်ႉၺႃး ႁိူၼ်းယေးၵူၼ်းဝၢၼ်ႈ လူႉၵွႆလၢႆလၢႆလင်။
မိူဝ်ႈဝၼ်းတီႈ 22/03/2025 သိုၵ်းမၢၼ်ႈ ဢဝ်ၻရူၼ်ႊ ပွႆႇမၢၵ်ႇ 4 လုၵ်ႈ တီႈဝၢၼ်ႈဢုမ်ႇၶႃးသေ တိူဝ်ႉၺႃး ၵူၼ်းဝၢၼ်ႈၵေႃႉၼိုင်ႈ မၢတ်ႇၸဵပ်းလႄႈ ႁိူၼ်းယေးလူႉၵွႆၼိုင်ႈလင်။
မိူဝ်ႈဝၼ်းတီႈ 25/03/2025 သိုၵ်းမၢၼ်ႈ ၶိုၼ်းၶဝ်ႈၵုမ်းၵမ်လႆႈပိုၼ်ႉတီႈတွင်းၶမ်း ဢၼ်မီးတၢင်းၸၢၼ်း ၸႄႈဝဵင်းၼွင်ၶဵဝ်ၼၼ်ႉ ဝႃႈၼႆ။
ဝၼ်းတီႈ 26/03/2025 ယၢမ်းႁူဝ်ၶမ်ႈ 6 မူင်း သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း Jet Fighter ပွႆႇမၢၵ်ႇႁႃႈလုၵ်ႈ တီႈဝၢၼ်ႈဢုမ်ႇၶႃး၊ သၢမ်သိူဝ်လႄႈ ဝၢၼ်ႈသူၺ်ႇၺွင်ႇပိၼ်ႇ။ မၢၵ်ႇသွင်လုၵ်ႈ တူၵ်းတႅၵ်ႇၼႂ်းဝၢၼ်ႈသၢမ်သိူဝ် တိူဝ်ႉၺႃးၵူၼ်းဝၢၼ်ႈတၢႆ 4 ၵေႃႉ (ၸၢႆး 2 ၊ ယိင်း 2 ၵူၼ်းႁိူၼ်းလဵဝ်ၵၼ်) လႄႈ ႁိူၼ်းၵူၼ်းဝၢၼ်ႈ လူႉၵွႆပႃးထႅင်ႈ 4 လင်။ မၢၵ်ႇထႅင်ႈသွင်လုၵ်ႈတူၵ်းတႅၵ်ႇ တီႈဝၢၼ်ႈဢုမ်ႇၶႃး တိူဝ်ႉၺႃးၵူၼ်းဝၢၼ်ႈ 4 ၵေႃႉ မၢတ်ႇၸဵပ်းလႄႈ ႁိူၼ်းယေး လူႉၵွႆထႅင်ႈ 4 လင်။ မၢၵ်ႇထႅင်ႈလုၵ်ႈၼိုင်ႈ တူၵ်းတႅၵ်ႇ ၼႂ်းဝၢၼ်ႈတူၼ်ႈၺွင်ႇၶမ်း (သူၺ်ႇၺွင်ႇပိၼ်ႇ) တိူဝ်ႉၺႃးႁိူၼ်းၵူၼ်းဝၢၼ်ႈလူႉၵွႆသွင်လင်။
ဝၼ်းတီႈ 28/03/2025 ယၢမ်းဝၢႆးဝၼ်းမွၵ်ႈ 1 မူင်း ဝၢႆးဢိင်ႇသၼ်ႇယႂ်ႇလူင်ႁႅင်း 7.7 မႅၵ်ႊၼီႊၵျုတ်ႉ ႁိမ်းဝဵင်းလိူဝ်ႇယဝ်ႉ သိုၵ်းမၢၼ်ႈ ဢဝ်ၶိူင်ႈမိၼ်တိုၵ်းပွႆႇမၢၵ်ႇပႅတ်ႇလုၵ်ႈ တီႈဝၢၼ်ႈ ၼွင်လႅင်၊ ဝၢၼ်ႈၼွင်လူင် (ၵၢၼ်ႇၵျီး) တိူဝ်ႉၺႃးႁိူၼ်းယေး 10 လင်။
ဝၼ်းတီႈ 30/03/2025 ယၢမ်းၵၢင်ဝၼ်း 12 မူင်း သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း ပွႆႇမၢၵ်ႇၼမ်ႉၼၵ်း 250 ပွင်ႊ တီႈဝၢၼ်ႈဢုမ်ႇမႆႉတီး တိူဝ်ႉၺႃးႁိူၼ်းယေးလူႉၵွႆ လၢႆလၢႆလင်။
ဝၼ်းတီႈ 01/04/2025 ယၢမ်းၵၢင်ဝၼ်း 11 မူင်း သိုၵ်းမၢၼ်ႈ ဢဝ်ၻရူၼ်ႊ ပွႆႇမၢၵ်ႇတီႈဝၢၼ်ႈဢုမ်ႇမႆႉတီးလႄႈ ဝၢၼ်ႈသၢမ်သိူဝ် တိူဝ်ႉၺႃးၵူၼ်းဝၢၼ်ႈတၢႆၵေႃႉၼိုင်ႈသေ ႁိူၼ်းယေး လူႉၵွႆၸွမ်းၼိုင်ႈလင်။ ၶၢဝ်းယၢမ်း 11:24 မူင်း သိုၵ်းမၢၼ်ႈ ဢဝ်ၶိူင်ႈမိၼ်တိုၵ်းပွႆႇမၢၵ်ႇ တီႈဝၢၼ်ႈတွင်လႃႉ ႁိမ်းဝၢၼ်ႈတွင်းၶမ်း တိူဝ်ႉၺႃးၵူၼ်းဝၢၼ်ႈ 5 ၵေႃႉ မၢတ်ႇၸဵပ်း၊ ႁိူၼ်းယေးလူႉၵွႆ 2 လင်၊ မွၵ်ႈၶၢဝ်းယၢမ်းလဵဝ်ၵၼ် သိုၵ်းမၢၼ်ႈဢဝ် ၶိူင်ႈမိၼ်တိုၵ်း ပွႆႇမၢၵ်ႇတီႈဝၢၼ်ႈၶူၵ်ႉၼမ်ႉ (ယႄႇမွင်းတၢၼ်း) လႄႈ ဝၢၼ်ႈလွႆၶႂၢင် တိူဝ်ႉၺႃးႁိူၼ်းၵူၼ်း ဝၢၼ်ႈလၢႆလၢႆလင်လူႉၵွႆၼႆ – ယူႇတီႈ SHRF ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ