ၽႅၼ်ႇလိၼ်ဝႆ မိူဝ်ႈဝၼ်းတီႈ 28/03/2025 ၼၼ်ႉ တီႈဝဵင်းပၢင်လွင်း ၸိုင်ႈတႆးပွတ်းၸၢၼ်းၵေႃႈ မီးလွင်ႈတုမ်ႉတိူဝ်ႉၼမ် ႁိူၼ်းယေးၵူၼ်ႇပင်း လုၵ်ႈဢွၼ်ႇတၢႆ 2 ၵေႃႉ။
ဢၼ်ထူပ်းၽေးၽႅၼ်ႇလိၼ်ဝႆသေ လူႉသုမ်းၼမ်သုတ်းၼႆႉ ပဵၼ်ၼႂ်းဢိူင်ႇတွင်ႇထီႇပႂႃႇ (ဝၢၼ်ႈပဢူဝ်း) ဢၼ်မီးၾၢႆႇတူၵ်းဝဵင်းပၢင်လွင်းမွၵ်ႈ 8 လၵ်း။ ဝၢၼ်ႈၼၼ်ႉ မီးလင်ႁိူၼ်းမွၵ်ႈ 150 ။ လူႉၵွႆၵူၼ်ႇပင်းၵႂႃႇ မွၵ်ႈ 100 လင်။ လုၵ်ႈဢွၼ်ႇတၢႆ 2 ၵေႃႉ။ ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်လႄႈ ယႃႈယႃ။ ၵူၼ်းဝၢၼ်ႈၵူၼ်းမိူင်း ပႃးၸဵမ် ၶႃႈႁၢပ်ႇၵၢၼ် ၶုၼ်ၵေႃႈ ပႆႇလႆႈတၢင်းၸွႆႈထႅမ်သင် ဝႃႈၼႆ။
ၵူၼ်းဝၢၼ်ႈၼမ်ႉပၼ်း လၢတ်ႈတီႈၽူႈတွႆႇႁွၵ်ႈဝႃႈ -“လုၵ်ႈဢွၼ်ႇတၢႆ 2 ၵေႃႉ။ ဢႃယုတိုၵ်ႉလဵၵ်ႉယူႇ တိုၵ်ႉမီးမွၵ်ႈ 3 ၶူပ်ႇ ၵေႃႉၼိုင်ႈ 10 ၶူပ်ႇ ၵေႃႉၼိုင်ႈ။ ၾၢႆႇလႂ်ၵေႃႈပႆႇမႃးၸွႆႈၶႃႈၼႆႉ – တိုၵ်ႉလူဝ်ႇတၢင်းၸွႆႈထႅမ် ႁၢဝ်ႈႁႅင်း။ တီႈႁဝ်းၶႃႈၼႆႉ မီးၸုမ်းပျီႇတူႉၸိတ်ႉ PNA ၵူၺ်း။ ၵၢၼ်ၵပ်းသိုပ်ႇၵေႃႈယၢပ်ႇလႄႈ ပႆႇလႆႈတၢင်း ၸွႆႈထႅမ်တီႈလႂ်”- ဝႃႈၼႆ။
ၼႂ်းဢိူင်ႇတွင်ႇထီႇပႂႃႇၼၼ်ႉ ဢၼ်လူႉသုမ်းပဵၼ် ဝၢၼ်ႈၼမ်ႉပၼ်းလူင်ပႅၼ်ႈ 20 လင်၊ ၼမ်ႉပၼ်းဝၢၼ်ႈၸၢၼ်း 20 လင်၊ ၼမ်ႉပၼ်းဝၢၼ်ႈႁွင်ႇ 40 လင်၊ ဝၢၼ်ႈပူးဝႃး 27 လင်၊ ဝၢၼ်ႈမႆႉၺွင်ႇသမ်ႉ 30 လင်။ ၵူၼ်းဝၢၼ်ႈပဵၼ်ၸၢဝ်းပဢူဝ်းလႄႈ တႆး ယူႇႁူမ်ႈၵၼ်။
ယၢမ်းလဵဝ် မီးၸုမ်းၵူၼ်းၼုမ်ႇၸွႆႈထႅမ် တူင်ႇဝူင်းၵူၼ်းၼႂ်းပိုၼ်ႉတီႈၵူၺ်း ဢၼ်လူင်းၸွႆႈထႅမ်ယူႇၵူႈဝၼ်း။ လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ် ပႃးၸဵမ်လွင်ႈၸွႆႈထႅမ်ပူၵ်းပွင် ႁိူၼ်းယေး။ ၵွပ်ႈၼႆ မွၵ်ႇထိုင်ၸဝ်ႈ ၽူႈမီးၼမ်ႉၸႂ်ၸေႇတႃႇၼ တီႈၸမ်ၵႆ ႁႂ်ႈႁူမ်ႈၸွႆႈထႅမ်ပၼ်သေၵမ်း ဝႃႈၼႆ။
ယွၼ်ႉပိူဝ်ႈ ၽႅၼ်ႇလိၼ်ဝႆႁႅင်း 7.7 မႅၵ်ႊၼီႊၵျုတ်ႉသေ မိူင်းမၢၼ်ႈပတ်းပိုၼ်ႉ မီးၵူၼ်းတၢႆယဝ်ႉ 3,085 ၵေႃႉ၊ မၢတ်ႇၸဵပ်း 4,715 ၵေႃႉလႄႈ ႁၢႆဝႆႉ 341 ၵေႃႉ။ ၼႂ်းၼၼ်ႉ ၵူၼ်းမိူင်းတႆးသမ်ႉ ၵူၼ်းဝဵင်းဢွင်ႇပၢၼ်း (ဢုမ်ႇပဝ်း) 12 ၵေႃႉ၊ ၼႂ်းၸႄႈဝဵင်းယွင်ႁူၺ်ႈ ၵူၼ်းထုင်ႉၼွင်ႁၢႆးယႃႈ ဢမ်ႇယွမ်း 90 ၵေႃႉ – လႆႈႁူႉၼင်ႇၼႆ။
သင်ၸိူဝ်ႉဝႃႈ ပီႈၼွင်ႉၽူႈမီးၼမ်ႉၸႂ် တီႈၸမ်ၵႆ ၶႂ်ႈႁူမ်ႈလူႇတၢၼ်းၵမ်ႉၸွႆႈၸိုင် တိတ်းတေႃႇလူႇတၢၼ်း လႆႈတီႈမၢႆၾူၼ်း ၶုၼ်ႇဢွင်ႇမဵဝ်းတၢၼ်ႉ – 09679829210 (မိူင်းတႆး) လႄႈ ၸၢႆးၸၢႆး(ပၢင်လွင်း) 0618841626 (မိူင်းထႆး) လႆႈၵမ်းသိုဝ်ႈ။
တႅမ်ႈ – ၸၢႆးႁၢၼ်မၢဝ်း (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ