ၽွင်းၵူၼ်းမိူင်းႁူမ်ႈတုမ် ပတ်းပိုၼ်ႉ လူဝ်ႇတၢင်းၸွႆႈထႅမ် တႃႇၽေးၽႅၼ်ႇလိၼ်ဝႆ ႁၢဝ်ႈႁႅင်းသေ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လၢႆလၢႆၸုမ်း တႅပ်းတတ်းပိုၼ်ၽၢဝ်ႇ ၵိုတ်းပၢင်တိုၵ်း ၸူဝ်ႈၶၢဝ်းယူႇၼႆႉ ၾၢႆႇသိုၵ်းမၢၼ်ႈ ထႅမ်ႁႅင်းသိုၵ်း ႁႅင်းၶိူင်ႈၵွင်ႈၵၢင်ႇ တႃႇႁၢင်ႈႁႅၼ်းလေႃႇတိုၵ်းဢဝ်ၶိုၼ်း ၼႂ်းၼႃႈတီႈ ၸိူဝ်းလႆႈသုမ်းပၼ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်းသၢမ်ၸုမ်း မိူၼ်ၼင်ႇ သိုၵ်း MNDAA ၊ TNLA ၊ AA ၸိူဝ်းၼၼ်ႉ။

တႄႇၼႂ်းႁူဝ်လိူၼ်ဢေႊပရိူဝ်ႊမႃး သိုၵ်းၵဝ်ႈၵၢင်ႉ MNDAA ၊ သိုၵ်းတဢၢင်းTNLA ၊ သိုၵ်းရၶႅင်ႇ AA ၊ သိုၵ်းၶၢင် KIO/KIA ပႃးၸဵမ် သိုၵ်းယၢင်းၽိူၵ်ႇ KNU လႄႈ ၸုမ်းၵႅတ်ႇၶႄၵူၼ်းမိူင်း PDF ၶဝ် ႁၼ်ထိုင်ၼိူဝ်ၵၢင်ၸႂ် ၵူၼ်းမိူင်းၸိူဝ်းႁူပ်ႉၽေးၽႅၼ်လိၼ်ဝႆသေ ပိုၼ်ၽၢဝ်ႇဝႆႉ ၵၢၼ်ၵိုတ်းတိုၵ်း တႃႇၶၢဝ်းတၢင်းၼိုင်ႈလိူၼ် ၼႆယဝ်ႉ။

တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်းတႄႉ ဢွၵ်ႇလိၵ်ႈပိုၼ်ၽၢဝ်ႇဝႆႉဝႃႈ -“ၼႂ်းၶၢဝ်းတၢင်းသိုၵ်းၸၢဝ်းၶိူဝ်း ပိုၼ်ၽၢဝ်ႇၵိုတ်းတိုၵ်းဝႆႉ မိူဝ်ႈဝၼ်းတီႈ 03/04/2025 ယၢမ်းၵၢင်ဝၼ်းမွၵ်ႈ 12 မူင်း သိုၵ်းမၢၼ်ႈ ဢဝ်ႁႅင်းသိုၵ်း ႁႅင်းၶိူင်ႈၵွင်ႈၵၢင်ႇ တၢင်ႇၵႃးၵႂႃႇမွၵ်ႈ 7 လမ်းသေ မုင်ႈၼႃႈၶိုၼ်ႈၵႂႃႇတၢင်း မိူင်းတႆးပွတ်းၸၢၼ်း။ ပိူဝ်ႈတႃႇၽိူမ်ႉဢဵၼ်ႁႅင်းပၼ် တပ်ႉၵွင်ႈလူင် 902 တီႈၵျွၵ်ႉၵူႇ၊ တွင်ႇၶျေႇ (တောင်ချေ) ၵိင်ႇၽႄၸႄႈဝဵင်းဢၢင်ႇတေႃး ၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း”- ဝႃႈၼႆ။

ၾၢႆႇၼိုင်ႈၵေႃႈ သိုၵ်းမၢၼ်ႈ ပိုၼ်ၽၢဝ်ႇပဵၼ်တၢင်းၵၢၼ်ဝႆႉဝႃႈ တႄႇဝၼ်းတီႈ 02/04/2025 တေႃႇထိုင် ဝၼ်းတီႈ 22/04/2025 ၼႆႉ တေၵိုတ်းဝႆႉပၢင်တိုၵ်းၵႂႃႇၸူဝ်ႈၶၢဝ်း။ သင်ၾၢႆႇၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၶဝ် ႁႅၼ်းသိုၵ်းလေႃႇတိုၵ်းမႃး ဢွၼ်တၢင်းၸိုင် ၾၢႆႇသိုၵ်းမၢၼ်ႈ တေတုမ်ႉတွပ်ႇဢဝ်လိူင်ႈႁႂ်ႈထိုင်တီႈ ဝႃႈၼႆ။

ၽွင်းၶၢဝ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လၢႆလၢႆၸုမ်း ပိုၼ်ၽၢဝ်ႇ ၵိုတ်းတိုၵ်းယဝ်ႉဢမ်ႇႁိုင် ၾၢႆႇသိုၵ်းမၢၼ်ႈၵေႃႈ သိုပ်ႇပိုၼ်ၽၢဝ်ႇ ၵိုတ်းပၢင်တိုၵ်းၵႂႃႇ ၸူဝ်ႈၶၢဝ်း ပဵၼ်တၢင်းၵၢၼ်မိူၼ်ၵၼ်။ ၵူၺ်းၵႃႈ ဝၢႆးလင်ၼၼ်ႉ ၾၢႆႇသိုၵ်းမၢၼ်ႈ ယင်းတိုၵ်ႉဢဝ်ၶိူင်ႈမိၼ်တိုၵ်း တင်းၻရူၼ်ႊ ဢိၵ်ႇပႃး ၶိူင်ႈၵွင်ႈလူင် ၸိူဝ်းၼႆႉသေ ပွႆႇမၢၵ်ႇသႂ်ႇၼႂ်းၼႃႈတီႈၵုမ်းၵမ် ၸုမ်းသိုၵ်း ၸၢဝ်းၶိူဝ်း လၢႆလၢႆၸုမ်း ဢမ်ႇယဝ်ႉဢမ်ႇဝၢႆးမႃး ႁၢၼ်ႉတေႃႇထိုင်ယၢမ်းလဵဝ် ၼႆယဝ်ႉ။

တႅမ်ႈ – ၽူၺ်းၼုမ်ႇ