တႄႇဝၼ်းတီႈ 03/04/2025 မႃး ပလိၵ်ႈမၢၼ်ႈ ဢဝ်ၶေႃႈဢၢင်ႈဝႃႈ တေတီႉၺွပ်းရူတ်ႉၵႃး ၸိူဝ်းဢမ်ႇမီးဝႂ် ပဵၼ်တၢင်းၵၢၼ် (လၢႆႇၸိၼ်ႇ) ၸိူဝ်းၼၼ်ႉၼႆသေ တဵၵ်းယွၼ်းငိုၼ်း တီႈၸဝ်ႈၵႃး ၸိူဝ်းတေၶဝ်ႈဢွၵ်ႇလတ်းၵႂႃႇမႃး ၼႂ်းၸႄႈဝဵင်းၵေးသီး တီႈႁိမ်းတူၼ်ႈမႆႉၺွင်ႇလူင် တၢင်းၶဝ်ႈဝဵင်းၵေးသီးၼၼ်ႉ ၼႆယဝ်ႉ။

ၸဝ်ႈၵႃး ဢၼ်လုၵ်ႉတၢင်းဝဵင်းတူၼ်ႈတီး ၵႂႃႇတၢင်းဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၸမ်ပွႆးသွၼ်းၼမ်ႉယဝ်ႉၼႃႇ ၶဝ်လူဝ်ႇႁႃငိုၼ်းၸၢႆႇၶဝ်ၵႃႈ။ တီႈတႄႉမၼ်း ဢၼ်လူဝ်ႇထတ်းဝႂ် ရူတ်ႉၵႃးၼႆႉ ပဵၼ်ၼႃႈတီႈပုၼ်ႈၽွၼ်း မေႃႇတေႃႇပီႇၵႄႇၵူၺ်း။ ၵူၺ်းၵႃႈ ပေႃးရူတ်ႉၵႃး ဢမ်ႇမီးဝႆႉဝႂ်တဵမ်ထူၼ်ႈၸိုင် လႆႈပၼ်ငိုၼ်းၶဝ်ၼၼ်ႉၼႃႇ။ မၢင်ၸိူဝ်း ၵေႃႈ ၶဝ်ယွၼ်းႁူဝ်မိုၼ်ႇမၼ်း။ မၢင်ၸိူဝ်းၵေႃႈ လႆႈပၼ်ႁူဝ်သႅၼ် မၼ်းၸိူဝ်းၼႆႉၵေႃႈမီးယူႇ”- ဝႃႈၼႆ။  

ဢၼ်တင်ႈလၢၼ်ႇ တီႈတၢင်းၶဝ်ႈဢွၵ်ႇဝဵင်းၵေးသီးသေ ၵဵပ်းငိုၼ်းၸဝ်ႈၵႃးယူႇၼႆႉ ပဵၼ်ပလိၵ်ႈမၢၼ်ႈ ပႂ်ႉၵူတ်ႇထတ်းဝႂ် ႁေႃႈရူတ်ႉၵႃးတင်း ဝႂ်ၶွၼ်ႇၵႃး (လၢႆႇၸိၼ်ႇၵႃး) ၸိူဝ်းဢွၵ်ႇၶၢဝ်းတၢင်းၵႂႃႇမႃး မိူင်းတႆးပွတ်းႁွင်ႇ ပွတ်းၸၢၼ်း ၸိူဝ်းၼႆႉ။

ၵူၼ်းပိုၼ်ႉတီႈ ၼႂ်းၸႄႈဝဵင်းၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢမ်ႇၸႂ်ႈဝႃႈ ၶဝ်ၶႂ်ႈၺွပ်း ရူတ်ႉၵႃးတႄႉတႄႉ။ ၶဝ်ႁဵတ်းၵိၼ်ၵူၺ်း။ ၵႃးဢွၼ်ႇ၊ ၵႃးလူင်၊ ၵႃးတေႃႉၵုၼ်ႇ တေႃႉၶူဝ်းၸိူဝ်းၼႆႉ ပိူၼ်ႈဢွၼ်ၵၼ်ၵႂႃႇမႃးယူႇ။ ထၢင်ႇတႄႉ ပေႃးဝၢႆးသွၼ်းၼမ်ႉယဝ်ႉ ၶဝ်တေဢမ်ႇထတ်းယဝ်ႉၼင်ႇၵဝ်ႇ”- ဝႃႈၼႆ။

လႆႈႁူႉဝႃႈ ပလိၵ်ႈမၢၼ်ႈ တင်ႈလၢၼ်ႇသေ ၵူတ်ႇထတ်းဝႂ်ရူတ်ႉၵႃး ၸွမ်းတၢင်းၶဝ်ႈဢွၵ်ႇ ၼႂ်းၸႄႈဝဵင်းၵေးသီးသေ တဵၵ်းယွၼ်းငိုၼ်းတီႈၸဝ်ႈၵႃးၶဝ်ၼႆႉ လႆႈဝႃႈပွၵ်ႈၼႆႉ ပဵၼ်ပွၵ်ႈၵမ်းႁႅၵ်ႈ ၼႆယဝ်ႉ။ 

ဝၢႆးလင် ၽႅၼ်ယၼ်ႇသိုၵ်း 1027 ယဝ်ႉသေ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၵုမ်းၵမ်လႆႈၸႄႈဝဵင်း ၼႂ်းမိူင်းတႆးပွတ်းႁွင်ႇ လၢႆလၢႆတီႈယဝ်ႉၼၼ်ႉ ၾၢႆႇသိုၵ်းမၢၼ်ႈတင်း ပလိၵ်ႈ ၵႆႉႁူမ်ႈ ၵၼ်သေ တင်ႈလၢၼ်ႇၵူတ်ႇထတ်းၵူၼ်း၊ ၶူဝ်းၶွင်လႄႈ ယွၼ်းၵိၼ်ငိုၼ်း တီႈၸဝ်ႈရူတ်ႉၸဝ်ႈၵႃး ၸိူဝ်းၵႂႃႇမႃး မိူင်းတႆးပွတ်းႁွင်ႇ ပွတ်းၸၢၼ်း ၸိူဝ်းၼႆႉၵေႃႈ လိူင်ႇၼမ်မႃး ၼႆယဝ်ႉ။

တႅမ်ႈ – ၽူၺ်းၼုမ်ႇ