လူင်ပွင်ၸိုင်ႈထႆးလၢတ်ႈဝႃႈ တေပၼ်ငိုၼ်း ၵႃႈသၢႆႈတႅၼ်း ၵူၼ်းႁဵတ်းၵၢၼ်ၵေႃႇသၢင်ႈ ၸိူဝ်းလူႉႁၢႆတၢႆၵႂႃႇ တီႈႁိူၼ်းတိူၵ်ႈလူင် ဢၼ်တိုၵ်ႉၵေႃႇသၢင်ႈဝႆႉၼၼ်ႉ လႆႈၵူၼ်ႇပင်းၵႂႃႇ ယွၼ်ႉၽႅၼ်ႇလိၼ်ဝႆ (ဢိင်ႇသၼ်ႇ) တီႈမိူင်းၵွၵ်ႇ ၸိုင်ႈထႆးၼၼ်ႉ ဝႃႈၼႆ။  

လုမ်းထတ်းသဵၼ်ႈမၢႆ ၶွင်လူင်ပွင်ၸိုင်ႈထႆး ပိုၼ်ၽၢဝ်ႇဢွၵ်ႇဝႆႉ တေႃႇထိုင်ဝၼ်းတီႈ 01/04/2025 ယၢမ်းၵၢင်ၶမ်ႈၼႆႉ ထူပ်းႁၼ်တူဝ်တၢႆ ၵူၼ်းထႆး 11 ၵေႃႉလႄႈ ႁႅင်းၵၢၼ်မိူင်းမၢၼ်ႈ 3 ၵေႃႉ ႁူမ်ႈတင်းမူတ်း 14 ၵေႃႉ ဝႃႈၼႆ။

ၼႂ်းၵူၼ်းၸိူဝ်းလူႉတၢႆၼၼ်ႉ သင်ပဵၼ်ၵူၼ်းမီးဝတ်းဝႂ်တဵမ်ထူၼ်ႈၸိုင် တေပၼ်ငိုၼ်းၵႃႈသၢႆႈတႅၼ်း 1 ၵေႃႉလႂ် 17 သႅၼ်ဝၢတ်ႇ ငိုၼ်းထႆး (ၼိုင်ႈလၢၼ်ႉ ၸဵတ်းသႅၼ်ဝၢတ်ႇ) ၼႆ – ၵူဝ်ႇမူင်ႇတၢႆး ၸုမ်းၸွႆႈထႅမ်ႁႅင်းၵၢၼ် မိူင်းမၢၼ်ႈ Worker Alliance (WAG) လၢတ်ႈၼင်ႇၼႆ။

ၵူၺ်းၵႃႈ ၼႂ်းၼၼ်ႉ ႁႅင်းၵၢၼ်ၸိူဝ်းဢမ်ႇမီးဝတ်းဝႂ်ၵေႃႈမီး တွၼ်ႈတႃႇ ႁႅင်းၵၢၼ်ၸိူဝ်းၼၼ်ႉသမ်ႉ ယူႇတီႈ ပေႃးလဵင်ႉသထေး (ၼၢႆးၸၢင်ႈ) ၵူၼ်းထႆးၶဝ် တေလႆႈဢဝ်ပုၼ်ႈၽွၼ်းသၢႆႈတႅၼ်းပၼ် ဝႃႈၼႆ။

ယၢမ်းလဵဝ် တေသိုပ်ႇသွၵ်ႈႁႃႁႅင်းၵၢၼ် ၸိူဝ်းၶမ်ဝႆႉ တႂ်ႈႁိူၼ်းတိူၵ်ႈၼၼ်ႉထႅင်ႈ 83 ၵေႃႉ။ ၼႂ်းၼၼ်ႉပဵၼ် ၵူၼ်းမိူင်းထႆး 55 ၵေႃႉ၊ ႁႅင်းၵၢၼ်မိူင်းမၢၼ်ႈ 24 ၵေႃႉ၊ မိူင်းၵမ်ႇပူးၶျႃး 3 ၵေႃႉလႄႈ မိူင်းလၢဝ်း 1 ၵေႃႉ – ႁွင်ႈၵၢၼ် ၽွင်းလူင် ၾၢႆႇႁႅင်းၵၢၼ် မိူင်းထႆး ပိုၼ်ၽၢဝ်ႇဝႆႉၼင်ႇၼႆ။

ဝၢႆးလင် ၽွင်းလူင် ၾၢႆႇႁႅင်းၵၢၼ် မိူင်းထႆး ထိုင်ၵႂႃႇတီႈ Chatuchat တီႈႁိူၼ်းတိူၵ်ႈၵူၼ်ႇပင်းၼၼ်ႉယဝ်ႉ ၸင်ႇၶိုၼ်းပိုၼ်ၽၢဝ်ႇဢွၵ်ႇမႃး သဵၼ်ႈၸိုဝ်ႈႁႅင်းၵၢၼ် ၸိူဝ်းႁၢႆလၢႆဝႆႉ။ ၼႂ်းၼၼ်ႉပႃး ႁႅင်းၵၢၼ် မိူင်းမၢၼ်ႈ တင်းမူတ်း 27 ၵေႃႉ။

ႁူဝ်ၼပ်ႉႁႅင်းၵၢၼ်ယၢၼ်မိူင်း ၸိူဝ်းထုၵ်ႇမႅၼ်ႈၸွမ်းပၵ်းပိူင်မၢႆမီႈလႄႈ ဢမ်ႇမႅၼ်ႈၸွမ်းပၵ်းပိူင်မၢႆမီႈ မီးလၢႆၵေႃႉဢၼ်ဝႃႈၼၼ်ႉတႄႉ ပႆႇလႆႈႁူႉတႅတ်ႈတေႃး။

မိူဝ်ႈၽွင်းဢဝ်ၶိူင်ႈၸၢၵ်ႈ Scan တူၺ်းလႆႈႁၼ်ႁႅင်းၵၢၼ် ၸိူဝ်းတိုၵ်ႉၶမ်ဝႆႉတႂ်ႈႁိူၼ်းတိူၵ်ႈလူင်ၼၼ်ႉ မီး 70 ၵေႃႉ။ ၸိူဝ်းၶဝ်ၶမ်ဝႆႉ တၢင်းလိုၵ်ႉ မီးမွၵ်ႈၵႃႈႁိုဝ်ဢၼ်ဝႃႈၼၼ်ႉတႄႉ ပႆႇၸၢင်ႈယိုၼ်ယၼ် – သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇၼႆ။