ၽႅၼ်ႇလိၼ်ဝႆ (ဢိင်ႇသၼ်ႇ) ႁၢဝ်ႈႁႅင်း တီႈမိူင်းမၢၼ်ႈပွတ်းၵၢင် မိူဝ်ႈဝၼ်းတီႈ 28/03/2025 ပူၼ်ႉမႃးၼႆႉသေ တုမ်ႉယွၼ်ႈထိုင် ၼႂ်းမိူင်းထႆးၵမ်ႈၽွင်ႈလႄႈ လွင်ႈၼႆႉ ႁဵတ်းႁႂ်ႈၶႅၵ်ႇဢႅဝ်ႇလႄႇတွင်ႈတဵဝ်း ၸိူဝ်းတေမႃးဢႅဝ်ႇပွႆးသွၼ်းၼမ်ႉ တီႈမိူင်းထႆးၼၼ်ႉ မီးလွင်ႈမႆႈၸႂ်ဝႆႉ ဝႃႈၼႆ။

ယွၼ်ႉၽႅၼ်ႇလိၼ်ဝႆ ၼႂ်းဝၼ်းၼၼ်ႉသေ ၶႅၵ်ႇၼွၵ်ႈမိူင်း ၸိူဝ်းလိုဝ်ႈသဝ်းဝႆႉတီႈႁူင်းႁႅမ်း 1,100 ႁွင်ႈပၢႆၼၼ်ႉ ဢွၼ်ၵၼ် Check Out သေ ပွၵ်ႈမိူဝ်းၵႂႃႇၶိုၼ်း။ ၶႅၵ်ႇၼွၵ်ႈမိူင်း ၸိူဝ်းဢဝ်ႁွင်ႈလိုဝ်ႈဝႆႉထႃႈလူင်ႈၼႃႈၼၼ်ႉၵေႃႈ ၶိုၼ်းယုၵ်ႉလိူၵ်ႈပႅတ်ႈ တႃႇ 30% ၼႆယဝ်ႉ။

ၵူႈပီပူၼ်ႉမႃး ၵွၼ်ႇၼႃႈပွႆးသွၼ်းၼမ်ႉၼႆႉ ၶႅၵ်ႇၼွၵ်ႈမိူင်း ၸိူဝ်းၶၢတ်ႈႁွင်ႈလိုဝ်ႈသဝ်း တီႈႁူင်းႁႅမ်းတဵမ်ဝႆႉမူတ်း။ ပီၼႆႉ ပဵၼ်ဢၼ်ယွမ်းလူင်းၵႂႃႇႁႅင်း။ ပိူင်လူင်မၼ်း ပဵၼ်ၶႅၵ်ႇမိူင်းၶႄႇ။ မိူဝ်ႈပီၵၢႆၼႆႉ ၶႅၵ်ႇၼွၵ်ႈမိူင်း ၵႂႃႇဢႅဝ်ႇလႄႇမိူင်းထႆး မီး 30 လၢၼ်ႉထိုင် 40 လၢၼ်ႉ။ ၼႂ်းပီၼႆႉ ၶႅၵ်ႇဢႅဝ်ႇလႄႇ ၸၢင်ႈယွမ်းလူင်းၵႂႃႇ 10% ထိုင် 20% ၼႆ လၢမ်းၶၢတ်ႈဝႆႉၼင်ႇၼႆ။

ၶၢဝ်ႇ Dailynews ႁၢႆးငၢၼ်းဝႆႉဝႃႈ – တႄႇဢဝ်ဝၼ်းတီႈ 1 ထိုင် ဝၼ်းတီႈ 23 လိူၼ်မၢတ်ႊၶျ်ၼႆႉ ၶႅၵ်ႇၼွၵ်ႈမိူင်း ၸိူဝ်းၵႂႃႇဢႅဝ်ႇလႄႇမိူင်းထႆး မီး 8.89 လၢၼ်ႉ လႆႈငိုၼ်းၶဝ်ႈ 434,662 ဝၢတ်ႇ။ ၼႂ်းၼၼ်ႉ ၶႅၵ်ႇဢၼ်လုၵ်ႉမိူင်းၶႄႇၵႂႃႇ မီးၼမ်လိူဝ်ပိူၼ်ႈ 1,259,391 ၵေႃႉ၊ ၵူၼ်းမိူင်းမလေးသျႃး 1,057,438 ၵေႃႉ၊ မိူင်းရတ်ႉသျႃး 667,905 ၵေႃႉ၊ မိူင်းဢိၼ်ႊတီႊယိူဝ်ႊ 498,341 ၵေႃႉလႄႈ မိူင်းၵူဝ်ႊရီႊယိူဝ်ႊၸၢၼ်း 475,124 ၵေႃႉၼႆ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။