ၵူၼ်းမိူင်းတႆးပွတ်းႁွင်ႇ ၸိူဝ်းပၢႆႈၽေးသိုၵ်း ၵႂႃႇသွၼ်ႈယူႇဝႆႉ တီႈႁိူၼ်းတိူၵ်ႈလူင် Sky Villa Condo ၼၼ်ႉ ထူပ်းၽေးၽႅၼ်ႇလိၼ်ဝႆ (ဢိင်ႇသၼ်ႇ) သေ လႆႈလူႉတၢႆႁၢႆၵႂႃႇတင်းမုင်ႉႁေႃႁိူၼ်း ၼႆယဝ်ႉ။
ပူၼ်ႉမႃး မိူဝ်ႈဝၼ်းတီႈ 28/03/2025 ၼၼ်ႉ ၽႅၼ်ႇလိၼ်ဝႆႁႅင်းသေ ႁဵတ်းႁႂ်ႈႁိူၼ်းတိူၵ်ႈလူင် Sky Villa Condo ဢၼ်မီး 11 ၸၼ်ႉ တီႈဝဵင်းလိူဝ်ႇ (မၼ်းတလေး) ၼၼ်ႉ ၵူၼ်ႇပင်းလၼ်ႇလူင်းၸူမ်ၵႂႃႇၼႂ်းလိၼ်တႃႇ 5 ၸၼ်ႉ ၼႂ်းၼၼ်ႉ ပႃးၵႂႃႇမုင်ႉႁေႃႁိူၼ်း ၵူၼ်းပၢႆႈၽေးသိုၵ်း ၼႂ်းမိူင်းတႆးပွတ်းႁွင်ႇ လူႉတၢႆႁၢႆၵႂႃႇၽွမ်ႉၵၼ် 10 ၵေႃႉ ၼႆယဝ်ႉ။
ၵူၼ်းမိူင်းတႆးပွတ်းႁွင်ႇ 10 ၵေႃႉ ဢၼ်လူႉတၢႆႁၢႆၵႂႃႇ ယွၼ်ႉၽႅၼ်ႇလိၼ်ဝႆ တီႈႁိူၼ်းတိူၵ်ႈလူင် Sky Villa Condo ၵူၼ်ႇပင်းၼၼ်ႉ ပဵၼ်လုၵ်ႈလၢၼ်ၼႂ်းမုင်ႉႁေႃႁိူၼ်း ၸဝ်ႈလွႆမၢဝ်း ၽူႈၼမ်းၼႃႈ 2 ၵေႃႁူမ်ႈသၢင်ႈ ၸိုင်ႈတႆး။ ၼႂ်းၼၼ်ႉ ၵူၼ်းၸိူဝ်းလူႉတၢႆၵႂႃႇသမ်ႉ ပဵၼ်ၼၢႆးလွင် ၸိုဝ်ႈႁွင်ႉ ပႃႈၼၢင်းသူၺ်ႇသႃႇ၊ ၼၢင်းမဵဝ်းမႅတ်ႉတူႇ လၢၼ်ပႂ်ႉ၊ ၼၢင်းသႅင်မူဝ်ႁိူင်း (ႁွင်ႉ) ၼၢင်းထူၺ်းလိုၼ်း လၢၼ်ယိင်း။
ယဝ်ႉၵေႃႈ ၸၢႆးလႃႉ လၢၼ်ၶူၺ်၊ ၼၢင်းၶမ်းႁွမ်လႅင်း ပဵၼ်လိၼ်၊ ၸၢႆးပိူင်ၾႃႉ ပဵၼ်လိၼ်၊ ၼၢင်းမွၵ်ႇၵွၼ်ၶမ်း ပဵၼ်လၢၼ်၊ ၸၢႆးၼေႃႇသႅင်လၢဝ် ပဵၼ်လိၼ်၊ ၼၢင်းၸၢမ် ၵူၼ်းလုမ်းလႃးလုၵ်ႈဢွၼ်ႇ ၸိူဝ်းၼႆႉတႄႉ ႁၢႆဝႆႉလႄႈ ႁၢၼ်ႉတေႃႇယၢမ်းလဵဝ် ယင်းပႆႇထူပ်းႁၼ်တူဝ်ၶိုၼ်း ၼႆယဝ်ႉ။
ၵူၼ်းၸမ်ၸႂ် ၼႂ်းမုင်ႉႁေႃႁိူၼ်း ၸဝ်ႈလွႆမၢဝ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၼႂ်းမုင်ႉႁေႃႁိူၼ်းၶဝ်ၼၼ်ႉ ဢၼ်လွတ်ႈဢွၵ်ႇမႃးလႆႈၼႆႉ မီးလၢၼ်ပႂ်ႉမၼ်း ၵေႃႉၼိုင်ႈၵူၺ်း။ တႃႇၵေႃႉၼိုင်ႈတႄႉ မၢတ်ႇၸဵပ်းသေ ၵႂႃႇတၢႆတီႈႁူင်းယႃ။ ဢၼ်တၢႆၵႂႃႇၼႆႉ ပဵၼ်ၼၢႆးလွင်။ ယၢမ်းလဵဝ် လုၵ်ႈလၢၼ်ၼၢႆးလွင်ၼၼ်ႉ ၵမ်ႈၽွင်ႈၵေႃႈ ႁႃတူဝ်ယင်းပႆႇႁၼ်”- ဝႃႈၼႆ။
ပီႈၼွင်ႉၸိူဝ်ႉၶိူဝ်း ၼႂ်းမုင်ႉႁေႃႁိူၼ်း ၸဝ်ႈလွႆမၢဝ်း ၽူႈၼမ်းၼႃႈ 2 ၵေႃႁူမ်ႈသၢင်ႈ ၸိုင်ႈတႆးၼႆႉ ဢၼ်လႆႈ လူႉတၢႆႁၢႆၵႂႃႇ ၸွမ်းႁိူၼ်းတိူၵ်ႈလူင် Sky Villa Condo ၼၼ်ႉ ယူႇတီႈ ပီႈၼွင်ႉၸိူဝ်းၵိုတ်းတင်းလင် လႆႈႁႅၼ်းသွမ်း ႁဵတ်းတၢင်းလီၵုသူလ်ပၼ် ၸိူဝ်းလူႉတၢႆႁၢႆဝႆႉၼၼ်ႉ မိူဝ်ႈဝၼ်းတီႈ 01/04/2025 ၼႆယဝ်ႉ။
ႁိူၼ်းတိူၵ်ႈလူင် Sky Villa Condo ၼႆႉ တင်းမူတ်းမီးသၢမ်တိူၵ်ႈ။ တိူၵ်ႈလူင်ၼိုင်ႈတိူၵ်ႈၼႆႉ မီးယူႇ 11 ၸၼ်ႉ။ ယွၼ်ႉၽႅၼ်ႇလိၼ်ဝႆသေ ႁိူၼ်းတိူၵ်ႈလူင် လူႉၵွႆၵူၼ်ႇပင်းယွၵ်းယွႆၵႂႃႇ တႃႇ 2 တိူၵ်ႈ၊ တႃႇတိူၵ်ႈၼိုင်ႈတႄႉ လၼ်ႇလူင်းၸူမ်ၵႂႃႇတႂ်ႈလိၼ်တႃႇ 5 ၸၼ်ႉသေ ပွတ်းၼိူဝ်တႃႇ 6 ၸၼ်ႉတႄႉ ၸတ်ႉငၢၵ်ႈမီးႁွႆးတႅၵ်ႇၵႂႃႇသဵင်ႈသေ ၵိူင်းဝႆႉ ၼႆယဝ်ႉ။
လႆႈႁူႉဝႃႈ တီႈႁိူၼ်းတိူၵ်ႈလူင် Sky Villa Condo ၼႆႉ မီးၵူၼ်းမိူင်းတႆးပွတ်းႁွင်ႇ ၵမ်ႈၽွင်ႈ ပၢႆႈၽေးသိုၵ်း မိူဝ်ႈပၢင်တိုၵ်း 1027 ၼၼ်ႉသေ ၵႂႃႇသိုဝ်ႉယူႇဝႆႉ။ ပဵၼ်ၽူႈမၢၵ်ႈမီး ၼႂ်းၸႄႈဝဵင်းမူႇၸေႊ၊ ၼမ်ႉၶမ်း၊ လႃႈသဵဝ်ႈ၊ သီႇပေႃႉ ၸိူဝ်းၼႆႉ။
တႄႇဢဝ် ဝၼ်းတီႈ 28/03/2025 ၼၼ်ႉမႃး တေႃႇထိုင် ဝၼ်းတီႈ 03/04/2025 ယၢမ်းၵၢင်ၼႂ် 8 မူင်းၼႆႉ ၾၢႆႇသိုၵ်းမၢၼ်ႈ ပိုၼ်ၽၢဝ်ႇဢွၵ်ႇဝႆႉ ၵူၼ်းမိူင်းၸိူဝ်းတၢႆၵႂႃႇယွၼ်ႉၽႅၼ်ႇလိၼ်ဝႆ မီး 3,085 ၵေႃႉ၊ မၢတ်ႇၸဵပ်း 4,715 ၵေႃႉ၊ ႁၢႆဝႆႉ 341 ၵေႃႉ ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ