ဝၼ်းတီႈ 02/04/2025 ၼႆႉ သိုၵ်းမၢၼ်ႈတင်း သိုၵ်းၶၢင် KIO ပိုၼ်ၽၢဝ်ႇ ၵိုတ်းတိုၵ်းၸူဝ်ႈၶၢဝ်း ႁင်းၽႂ်မၼ်း တင်ႈတႄႇဝၼ်းတီႈ 02-22 ၶၢဝ်းတၢင်းႁိုင် 20 ဝၼ်း ပိူဝ်ႈတႃႇႁဵတ်းသၢင်ႈလႆႈ ၵၢၼ်ၵမ်ႉၸွႆႈထႅမ် ၵူၼ်းမိူင်းၸိူဝ်းထူပ်းၽေးၽႅၼ်ႇလိၼ်ဝႆ (ဢိင်ႇသၼ်ႇ) ၼႆယဝ်ႉ။

သိုၵ်းတင်းသွင်ၾၢႆႇ ပိုၼ်ၽၢဝ်ႇၵိုတ်းပၢင်တိုၵ်းဝႆႉ ၸူဝ်ႈၶၢဝ်းဝႃႈၼႆသေတႃႉ မိူဝ်ႈၼႆႉ ဝၼ်းတီႈ 03/04/2025 ယၢမ်းၵၢင်ၼႂ် 8 မူင်းပၢႆ သိုၵ်းမၢၼ်ႈ မႃးပွႆႇမၢၵ်ႇသႂ်ႇ တီႈဝၢၼ်ႈလမျၢၼ်ႇ ၼႂ်းဝဵင်းမႂ်ႇ ၸႄႈမိူင်းၶၢင် ၼႆယဝ်ႉ။  

ၵူၼ်းပိုၼ်ႉတီႈ ၵေႃႉၼိုင်ႈ လၢတ်ႈတီႈသိုဝ်ႇၶၢဝ်ႇၶၢင် Kachin News Group ဝႃႈ -“သိုၵ်းမၢၼ်ႈၼႆႉ ၶဝ်ပိုၼ်ၽၢဝ်ႇ ၵိုတ်းပၢင်တိုၵ်းၼႆသေတႃႉ ပိုၼ်ႉတီႈၼႂ်းဝဵင်းမႂ်ႇတႄႉ သဵင်ၵွင်ႈလူင် သဵင်မၢၵ်ႇၸိူဝ်းၼႆႉ တိုၵ်ႉပၼ်းဝႆႉယူႇ ၸဵမ်မိူဝ်ႈၵၢင်ၼႂ်ၸဝ်ႉသေ ပၢင်တိုၵ်းၵေႃႈ တိုၵ်ႉသိုပ်ႇပဵၼ်ဝႆႉယူႇ။ ၾၢႆႇႁွင်ႇဝၢၼ်ႈလမျၢၼ်ႇၼႆႉသမ်ႉ ပဵၼ်ပိုၼ်ႉတီႈသိုၵ်းၶၢင်ၶဝ် တူင်ႉၼိုင်ၵႂႃႇမႃးဝႆႉ”- ဝႃႈၼႆ။

ဢၼ်သိုၵ်းမၢၼ်ႈ ပိုၼ်ၽၢဝ်ႇ ၵိုတ်းပၢင်တိုၵ်းၸူဝ်ႈၶၢဝ်းပွၵ်ႈၼႆႉ ၽွင်းၵိုတ်းတိုၵ်းယူႇၼႆႉ ၸုမ်းယိပ်းၵွင်ႈၵၢင်ႇၶဝ် တေဢမ်ႇလႆႈမႃးတိုၵ်းတေႃးယႃႉၵဝ်း ၸွမ်းပိုၼ်ႉတီႈတပ်ႉသိုၵ်းမၢၼ်ႈလႄႈ ပၢင်သဝ်းသိုၵ်းမၢၼ်ႈ ၸိူဝ်းၼႆႉ။ သိုၵ်းမၢၼ်ႈ ပၼ်ၾၢင်ႉဝႆႉၼင်ႇၼႆၵူၺ်းဢမ်ႇၵႃး ဢၼ်ၶႂၢၵ်ႈၼႃႈတီႈလႄႈ ၵဵပ်းသိုၵ်းၸိူဝ်းၼႆႉၵေႃႈ တေဢမ်ႇလႆႈႁဵတ်းၼႆ သိုၵ်းမၢၼ်ႈ ႁႄႉႁၢမ်ႈဝႆႉပႃးထႅင်ႈ ယဝ်ႉၵေႃႈ ယင်းပိုၼ်ၽၢဝ်ႇပႃးဝႃႈ သင်ဢမ်ႇႁဵတ်းၸွမ်း ၶေႃႈႁႄႉႁၢမ်ႈ ၸိူဝ်းၼႆႉၸိုင် တေတုမ်ႉတွပ်ႇဢဝ်လိူင်ႈႁႂ်ႈထိုင်တီႈ ဝႃႈၼႆ။

ၼွၵ်ႈလိူဝ် သိုၵ်းမၢၼ်ႈတင်း သိုၵ်းၶၢင်ယဝ်ႉ တႃႇလွင်ႈၵမ်ႉၸွႆႈၵူၼ်းမိူင်း ပေႃးတေမီးလွင်ႈငၢႆႈလူမ်ၸႂ် မႃးၼႆၼၼ်ႉ ၸုမ်းဢူၺ်းလီပွတ်းႁွင်ႇ သၢမ်ၸုမ်း ဢၼ်ပဵၼ်ပၢင်တိုၵ်းၵၼ်တင်း သိုၵ်းမၢၼ်ႈၼၼ်ႉၵေႃႈ ယင်းပိုၼ်ၽၢဝ်ႇ ၵိုတ်းတိုၵ်းဝႆႉ တႃႇၶၢဝ်းတၢင်း 1 လိူၼ် တႄႇဢဝ်ဝၼ်းတီႈ 01-30/04/2025 ၼႆယဝ်ႉ။