မိူဝ်ႈၼႆႉ ဝၼ်းတီႈ 03/04/2025 ယၢမ်းၵၢင်ၼႂ်ၸဝ်ႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လႆႈၶီႇၶိူင်ႈမိၼ် ၶိုၵ်ႉတွၼ်း ၶွင်တပ်ႉသိုၵ်းမၢၼ်ႈသေ ႁွတ်ႈၽႅဝ်ဝႆႉတီႈ မိူင်းၵွၵ်ႇ (ၵုင်းထဵပ်ႈ) ၸိုင်ႈထႆးယဝ်ႉ တွၼ်ႈတႃႇတေၶဝ်ႈႁူမ်ႈၸွမ်း ပၢင်ၵုမ်လူင် လွင်ႈႁူမ်ႈမိုဝ်း ပၢႆးပၺ်ႇၺႃႇလႄႈ ပၢႆးမၢၵ်ႈမီး ဢၢဝ်ႇၿင်းၵလႃး ဝႃႈၼႆ။

ပၢင်ၵုမ်လူင်ၼႆႉ ၾၢႆႇလူင်ပွင်ၸိုင်ႈမိူင်းထႆး ႁပ်ႉႁဵတ်းပဵၼ်ၸဝ်ႈႁိူၼ်းဝႆႉသေ ၸွမ်ၽွင်းလူင် ၼၢင်းသၢဝ် ၽႄးထွင်းထၢၼ်း သျိၼ်ႊၼဝတ်း ၵေႃႉတေၼမ်းၼႃႈ ဢွၼ်ႁူဝ်ၸတ်းႁဵတ်းၵႂႃႇ ၶၢဝ်းတၢင်းႁိုင် 2 ဝၼ်း ၼႂ်းဝၼ်းတီႈ 03-04/04/2025 ၼႆယဝ်ႉ။

လႆႈႁူႉဝႃႈ ၾၢႆႇၸွမ်ၸိၵ်းသိုၵ်း မိၼ်းဢွင်ႇလၢႆႇ လႆႈႁၢင်ႈႁႅၼ်း လွင်ႈငဝ်းလၢႆး ဢၼ်လႆႈႁူပ်ႉၽေးၽႅၼ်ႇလိၼ်ဝႆသေ ၼင်ႇႁိုဝ် တေလႆႈတၢင်းၵမ်ႉၸွႆႈ တီႈၸိုင်ႈမိူင်းဢူၺ်းလီမိူင်းမၢၼ်ႈ လၢႆလၢႆမိူင်း တွၼ်ႈတႃႇ ၵၢၼ်မူၼ်ႉမႄးပူၵ်းပွင်ၶိုၼ်းၼၼ်ႉ တေဢုပ်ႇဢူဝ်းၵႂႃႇၼႂ်းပၢင်ၵုမ်လူင်ၼႆႉ ၼႆယဝ်ႉ။

ၼင်ႇႁိုဝ် ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ဢၼ်ပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်း၊ ၶီႇၼဵၵ်းတဵၵ်းတဵင် မိပ်ႇငႅၼ်း ပေႉၵိၼ်လူလၢႆတေႃႇၵူၼ်းမိူင်းႁူမ်ႈတုမ် ဢမ်ႇမီးသုၼ်ႇၶဝ်ႈႁူမ်ႈၸွမ်း ပၢင်ၵုမ်လူင် လွင်ႈႁူမ်ႈမိုဝ်း ပၢႆးပၺ်ႇၺႃႇလႄႈ ပၢႆးမၢၵ်ႈမီး ဢၢဝ်ႇၿင်းၵလႃး (ၵူတ်ႉၼမ်ႉပၢင်ႇလၢႆႇ ၿင်းၵလႃး) BIMSTEC ပွၵ်ႈၵမ်း 6 ဢၼ်တေၸတ်းႁဵတ်း တီႈမိူင်းၵွၵ်ႇ ၸိုင်ႈထႆးၼၼ်ႉ ၸုမ်းတူင်ႉၼိုင်ၾၢႆႇၵၢၼ်ၾႅတ်ႊတရႄႊ 300 ပၢႆ လႆႈသူင်ႇလိၵ်ႈသၢၼ်ၶတ်း ယိုၼ်ႈၸူးဝႆႉတီႈ လူင်ပွင်ၸိုင်ႈမိူင်းထႆး ၼႆယဝ်ႉ။

မိူဝ်ႈဝၼ်းတီႈ 02/04/2025 ၼၼ်ႉၵေႃႈ ၸုမ်းတႅၼ်းၽွင်းဢႃႇသီႊယႅၼ်ႊ ၵဵဝ်ႇလူၺ်ႈ သုၼ်ႇလႆႈသုၼ်ႇပဵၼ်ၵူၼ်း (APHR) ၶဝ် ထတ်းသၢင်လွင်ႈ ၸွမ်ၸိၵ်းသိုၵ်းမိၼ်းဢွင်ႇလၢႆႇ မီးသုၼ်ႇၶဝ်ႈႁူမ်ႈၸွမ်းပၢင်ၵုမ်လူင်ၼၼ်ႉဝႃႈ –“တႅၼ်းတီႈထုၵ်ႇလီၵမ်ႉထႅမ်ပၼ်ႁႅင်း ပဵၼ်ၾၢႆႇၵူၼ်းမိူင်း ၸိူဝ်းသၢၼ်ၶတ်း ဢႃႇၼႃႇသိုၵ်းယူႇၼၼ်ႉ သမ်ႉပၼ်တိုဝ်ႉတၢင်း ႁႂ်ႈလူင်ပွင် ၸိုင်ႈသိုၵ်း မီးဢွင်ႈတီႈယူႇ ၼႂ်းပၢင်ၵုမ်လူင်ၼႆႉ ဢမ်ႇထုၵ်ႇလီပဵၼ်”- ဝႃႈၼႆ။

လိူဝ်ၼၼ်ႉ တီႈၼႂ်းၶေႃႈပိုၼ်ၽၢဝ်ႇ ၸုမ်းတႅၼ်းၽွင်း ဢႃႇသီႊယႅၼ်ႊ သုၼ်ႇလႆႈသုၼ်ႇပဵၼ်ၵူၼ်းၼၼ်ႉ ယင်းပိူင်းၼႄလၢတ်ႈပႃးဝႆႉ လွင်ႈၵၢၼ်ပၼ်ဢွင်ႈတီႈၼင်ႈ တီႈယူႇႁႂ်ႈသိုၵ်းမၢၼ်ႈ မိၼ်းဢွင်ႇလၢႆႇ မီးတိုဝ်ႉတၢင်းၶဝ်ႈႁူမ်ႈၸွမ်း ပၢင်ၵုမ်လူင်ၼႆႉ ၸၢင်ႈႁဵတ်းႁႂ်ႈ လွင်ႈႁဵတ်းသၢင်ႈဢၼ်မိူၵ်ႈမႂ်ႈ ၵၢၼ်ပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်း မိၼ်းဢွင်ႇလၢႆႇ မႃးတုမ်ႉတိူဝ်ႉ လွင်ႈၵၢၼ်ငမ်းယဵၼ်လႄႈ ၵၢၼ်ႁုၼ်ႈမုၼ်းၶိုၼ်ႈယႂ်ႇ BIMSTEC ၵူၺ်းဢမ်ႇၵႃး ၸၢင်ႈႁဵတ်းႁႂ်ႈလွင်ႈယုမ်ႇယမ် ၼိူဝ် BIMSTEC ထႅင်ႈၵွၼ်ႇ ၼႆယဝ်ႉ။

ပၢင်ၵုမ်လူင် လွင်ႈႁူမ်ႈမိုဝ်း ပၢႆးပၺ်ႇၺႃႇလႄႈ ပၢႆးမၢၵ်ႈမီး ဢၢဝ်ႇၿင်းၵလႃး BIMSTEC ၼႆႉ မီးမိူင်းၿင်းၵလႃးတဵတ်ႉၶျ်၊ ပူႊတၢၼ်ႊ၊ ဢိၼ်ႊတီႊယိူဝ်ႊ၊ ၼီႊပေႃႊ၊ သီႇရိလင်းၵႃ တင်း မိူင်းမၢၼ်ႈ ၸိူဝ်းၼႆႉ ၶဝ်ႈပဵၼ်လုၵ်ႈၸုမ်းဝႆႉ ဝႃႈၼႆ။

တႅမ်ႈ – ၽူၺ်းၼုမ်ႇ