မိူဝ်ႈဝၼ်းတီႈ 01/04/2025 ယၢမ်းၵၢင်ၶမ်ႈ 9 မူင်းပၢႆ သိုၵ်းမၢၼ်ႈ ဢဝ်ၵွင်ႈၸၢၵ်ႈယိုဝ်းသႂ်ႇ ၵႃးလူင် 9 လမ်း ဢၼ်တေႃႉၶူဝ်းၵမ်ႉၸွႆႈ ၶွင်ၸုမ်းၶႂၢႆၶႃပေလႅင် မိူင်းၶႄႇ တႃႇၵူၼ်းထူပ်း ၽေးၽႅၼ်ႇလိၼ်ဝႆ (ဢိင်ႇသၼ်ႇ) တီႈဝၢၼ်ႈဢုမ်ႇတီး ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ ၼႆယဝ်ႉ။

လွင်ႈၼႆႉ ၾၢႆႇသိုၵ်းတဢၢင်း ပိုၼ်ၽၢဝ်ႇ ပဵၼ်တၢင်းၵၢၼ်ဝႆႉဝႃႈ – “ၽွင်းၵႃးလူင် 9 လမ်း ဢၼ်တေႃႉၶူဝ်း ၸုမ်းၶႂၢႆၶႃပေလႅင် မိူင်းၶႄႇ တေလတ်းၽၢၼ်ႇ ဝဵင်းၼွင်ၶဵဝ် ၵႂႃႇၸွႆႈၵူၼ်းထူပ်းၽေးၽႅၼ်ႇလိၼ်ဝႆ တီႈဝဵင်းလိူဝ်ႇ (မၢၼ်းတလေး) ၼၼ်ႉ လႆႈပွင်ႇၶၢဝ်ႇၸႅင်ႈဝႆႉထိုင်တီႈသိုၵ်းမၢၼ်ႈယူႇသေတႃႉ ၾၢႆႇသိုၵ်းမၢၼ်ႈ ယင်းတိုၵ်ႉဢဝ်ၵွင်ႈၸၢၵ်ႈယိုဝ်းသႂ်ႇလႄႈ ၵႃးလူင် ၸိူဝ်းၼၼ်ႉ ၸင်ႇလႆႈပွၵ်ႈဝၢႆႇႁူၼ်လင်ၵႂႃႇလိုဝ်ႈဝႆႉၶိုၼ်း ၼႂ်းဝဵင်းၼွင်ၶဵဝ်”- ဝႃႈၼႆ။

လႆႈႁူႉဝႃႈ ယၢမ်းလဵဝ် ၵႃးလူင် ဢၼ်တေႃႉၶူဝ်းၵမ်ႉၸွႆႈၵူၼ်းထူပ်းၽေးၽႅၼ်လိၼ်ဝႆမႃးၼၼ်ႉ ၾၢႆႇသိုၵ်းတဢၢင်း ၵုမ်းၵမ် ဢဝ်ႁူမ်ႇလူမ်ႈပၼ်ဝႆႉ တီႈၼႂ်းဝဵင်းၼွင်ၶဵဝ်သေ တေသိုပ်ႇ ၸွႆႈထႅမ်သူင်ႇၵႂႃႇ ၸွမ်းၼင်ႇ ၽႅၼ်ၵၢၼ်ၶၢဝ်းတၢင်းၶဝ်မီးဝႆႉၼၼ်ႉ ဝႃႈၼႆ။  

ယွၼ်ႉၽႅၼ်ႇလိၼ်ဝႆ ႁၢဝ်ႈႁႅင်းသေ တင်ႈတႄႇလိူၼ်မၢတ်ႊၶျ် ဝၼ်းတီႈ 28 ၼၼ်ႉမႃး တေႃႇထိုင်လိူၼ်ဢေႊပရိူဝ်ႊ ဝၼ်းတီႈ 1 ၼႆႉ သိုၵ်းမၢၼ်ႈ မိၼ်းဢွင်ႇလၢႆႇ ပိုၼ်ၽၢဝ်ႇဝႃႈ ၵူၼ်းမိူင်းၸိူဝ်းလူႉတၢႆၵႂႃႇ မီး 2,719 ၵေႃႉ၊ ၵူၼ်းမၢတ်ႇၸဵပ်း မီး 4,521 ၵေႃႉသေ ၸိူဝ်းတိုၵ်ႉႁၢႆဝႆႉ ႁႃတူဝ်ပႆႇႁၼ်ၼႆႉ မီးယူႇ 441 ၵေႃႉ ဝႃႈၼႆ။

တႅမ်ႈ – ၽူၺ်းၼုမ်ႇ