ၽႅၼ်ႇလိၼ်ဝႆ(ဢိင်ႇသၼ်ႇ) ႁႅင်း  ဝၼ်းတီႈ 28/03/2025 ၼႆႉသေ ၵူၼ်းမိူင်း ၼႂ်းတိူင်းၸႄႈၵႅင်း၊ ဝဵင်းလိူဝ်ႇ (မၼ်းလေး ) ၊ ၼေႇပျီႇတေႃႇ၊ တူၼ်ႈတီး၊ ၼွင်ႁၢႆးယႃႈ၊ ဢွင်ႇပၢၼ်း ဢိၵ်ႇထႅင်ႈလၢႆလၢႆဝဵင်း မီးလွင်ႈတုမ်ႉ တိူဝ်ႉ မၢတ်ႇၸဵပ်းၼမ် တေႃႇထိုင်ဝၼ်းမိူဝ်ႈၼႆႉ လူဝ်ႇတၢင်းၸွႆႈထႅမ် တင်းၼမ် ။

 သင်ႇၶၸဝ်ႈလႄႈ လုၵ်ႈႁဵၼ်း ႁဵင်ပၢႆ ဢၼ်မီးတီႈဝတ်ႉၵျွင်းၽွင်ႇတေႃႇဢူး ဝဵင်းတႃႈလိူဝ်ႇ (မၼ်းတလေး) ၵေႃႈ ယၢပ်ႇၽိုတ်ႇၵိၼ်းၸႂ်  လူဝ်ႇတၢင်းၸွႆႈထႅမ် ၶဝ်ႈၼမ်ႉတင်းၵိၼ် ။

ၸဝ်ႈၶူးဝိသုတ်ႉတ ၸဝ်ႈတူၼ်ၶူးၵုမ်းလုၵ်ႈႁဵၼ်းတီႈဝတ်ႉၵျွင်း ၽွင်ႇတေႃႇဢူး  လၢတ်ႈၽူႈတွႆႇႁွၵ်ႈဝႃႈ -“တေႃႇထိုင်မိူဝ်ႈဝႃး ၽႅၼ်ႇလိ ၼ်တိုၵ်ႉသၼ်ႇယူႇ ၊ ၵူၺ်းႁႅင်းမၼ်းတေမီးမွၵ်ႈ 4.3 မႅၵ်ႊၼီႊၵျုတ်ႉ ၸိူဝ်းၼႆႉၵူၺ်း ၊ ဢမ်ႇပေႃးသၼ်ႇႁႅင်း သေတႃႉ ပႆႇႁတ်းပၼ်လုၵ်ႈႁဵၼ်း  ၶဝ်ႈယူႇၼႂ်းၵျွင်းၶိုၼ်း ၵူဝ်ႇဢမ်ႇမီးလွင်ႈလွတ်ႈၽေး ၊ ယွၼ်ႉပိူဝ်ႈ ၵျွင်း သွၼ်လိၵ်ႈ ၊ဢွင်ႈတီႈယူႇသဝ်း ပဵၼ်ႁွႆးၸတ်ႉဝႆႉ ၊  ၾႆးၵေႃႈမွတ်ႇ ၊ ၼမ်ႉၵေႃႈ ဢမ်ႇမီး တလဵဝ်ၼႆႉ ၶၢၼ်ၸႂ်ၵူႈလွင်ႈလွင်ႈ ”- ဝႃႈၼႆ ။

တီႈၵျွင်းၽွင်ႇတေႃႇဢူး သင်ၶၸဝ်ႈ၊ လုၵ်ႈႁဵၼ်းလႄႈ မေႃသွၼ်  တင်းသဵင်ႈႁူမ်ႈၵၼ် မီး 1280 ၵေႃႉ ။ ၼႂ်းၼၼ်ႉ ပႃးလုၵ်ႈႁဵၼ်းမိူင်းတႆးမွၵ်ႈ 400 ၵေႃႉ။ မီးတင်းယိင်းလႄႈၸၢႆး ပႃးတင်းသင်ၶၸဝ်ႈ။  ႁူင်းသွၼ်လိၵ်ႈလုၵ်ႈဢွၼ် မီး 3 လင် ၼၼ်ႉ တႃႇလင်ၼိုင်ႈ လူႉသုမ်းၼမ် ၊ ၵျွင်းသွမ်း ၊ သိမ်ႇ လႄႈ ၵျွင်းသင်ၶၸဝ်ႈ ၊ လုမ်းၸိူဝ်းၼႆႉ မီးႁွႆးၸတ်ႉၼမ်လႄႈ လူႉသုမ်းတင်းၼမ်  ဝႃႈၼႆ ။

ၸဝ်ႈၶူးဝိသုတ်ႉတ လၢတ်ႈၽူႈတွႆႇႁွၵ်ႈဝႃႈ -“ တလဵဝ်တႃႇတေလဵင်ႉလုၵ်ႈဢွၼ်လႄႈ သင်ၶၸဝ်ႈ ၸိူဝ်းၼၼ်ႉ ၶဝ်ႈၼမ်ႉတင်းၵိၼ်ၵေႃႈ ဢမ်ႇမီး ၊ မီးငိုၼ်းယူႇၵေႃႈ ဢမ်ႇၸၢင်ႈၵႂႃႇႁႃသိုဝ်ႉတီႈလႂ် ၊ လုၵ်ႈႁဵၼ်းၵဝ်ႇၵမ်ႈၽွင်ႈမႃးၸွႆႈထႅမ်ဝႆႉယူႇသေတႃႉ  လုၵ်ႈႁဵၼ်းမီးၼမ်လႄႈ ဢမ်ႇၵုမ်ႇထူၼ်ႈ”- ဝႃႈၼႆ ။

 ဝတ်ႉၵျွင်းမုၼ်ၸဝ်ႈၽွင်ႇတေႃႇဢူးၼႆႉ  သွၼ်ပၼ် လုၵ်ႈႁဵၼ်းၵူႈသႅၼ်း ။  မီးလုၵ်ႈႁဵၼ်းၸၼ်ႉ KG ထိုင်  ၸၼ်ႉ တီႊပလူဝ်ႊမႃႊ ( Diploma )  ။ လူင်ပွင်ၸိုင်ႈမိူင်းမၢၼ်ႈ ပႆႇမၵ်းမၼ်ႈ လႄႈ ၸင်ႇၵွင်ႉၵၼ်ဝႆႉတင်း ၸၼ်ႉၸွမ် မိူင်းထႆး -ဝႃႈၼႆ ။  

“ဝတ်ႉၽွင်ႇတေႃႇဢူးၼႆႉ တႄႇမႃး မိူဝ်ႈပီႈ 1993 ၊ တႃႇၵမ်ႉထႅမ်ပၢႆးပၺ်ၺႃႇ  လုၵ်ႈဢွၼ်ႇယိင်းၸိူဝ်း ဢမ်ႇတဵမ်ထူၼ်ႈလႄႈ လုၵ်ႈဢွၼ်ႇၸိူဝ်းဢမ်ႇမီးၵူၼ်းႁပ်ႉပုၼ်ႈၽွၼ်းလဵင်ႉလူ လႄႈ သင်ၶၸဝ်ႈ ၸိူဝ်းၼၼ်ႉ ။ ၵူႈပီယၢမ်းၼႆႉပဵၼ်ၽွင်းလုၵ်ႈဢွၼ်ႇဢိုတ်းႁူင်းႁဵၼ်းတႄႉ လုၵ်ႈဢွၼ်ႇ တေဢမ်ႇ ပေႃးမီးၼမ် ၊ ၵူၺ်း တလဵဝ် ယွၼ်ႉငဝ်းလၢႆးဝၢၼ်ႈမိူင်းၵေႃႈ ဢမ်ႇလီ  ၊ လုၵ်ႈဢွၼ်သမ်ႉပဵၼ်ၵူၼ်းၸိူဝ်းပၢႆႈ ပၢင်တိုၵ်းလႄႈ ဢမ်ႇၸၢင်ႈပွၵ်ႈၶိုၼ်းႁိူၼ်း ။ ယွၼ်ႉၼၼ်လုၵ်ႈဢွၼ်ႇၵိုတ်းဝႆႉတီႈၵျွင်းၼႆႉၼမ်”- ဝႃႈၼႆ ။

ယၢမ်းလဵဝ် ၵူႈၾၢႆႇၵူႈတၢင်းပဵၼ်ဢၼ် ယၢပ်ႇၽိုတ်ႇၵိၼ်းၸႂ်ဝႆႉ၊ ဢမ်ႇမီးၼမ်ႉၵိၼ်ၼမ်ႉၸႂ်ႉ။ ၵူၺ်းၵႃႈ ဢမ်ႇၶႂ်ႈႁႂ်ႈလုၵ်ႈဢွၼ်ႇလႃႈလီႈၵိၼ်ၼမ်ႉ ။ ပေႃးၵိၼ်ၼမ်ႉဢမ်ႇသႅၼ်ႈသႂ်ၼႆ ၵူဝ်မီးပႃးထၢတ်ႈၵွင်ႉငူၼ်ႉၸွမ်းလႄႈၵူဝ်ပဵၼ်ၽေးတေႃႇပၢႆးယူႇလီ –   ၸဝ်ႈၶူးဝိသုတ်ႉတ ပၼ်ၾၢင်ႉဝႆႉၼင်ႇၼႆ။

လုၵ်ႈႁဵၼ်း ဢၼ်မႃးသွၼ်ႁဵၼ်းလိၵ်ႈတီႈဝတ်ႉၵျွင်း ၽွင်ႇတေႃႇဢူး ၸိူဝ်းပဵၼ်တႆး မွၵ်ႈ 400 ၵေႃႉၼႆႉ ၼၼ်ႉ ပဵၼ်လုၵ်ႈဢွၼ်ႇတၢင်း ဝဵင်းပၢင်ႇဢူႈ ၊ ၼွင်ၶဵဝ် ၊ ၵျွၵ်ႉမႄး ၊သီႇပေႃႉ ၊ ၵေးသီး ၊ တၢင်ႉယၢၼ်း ၊ၼမ်ႉလၼ်ႈ ၊ ဝၢၼ်ႈႁႆး ၊ မိူင်းၵိုင်  ၸိူဝ်းၼႆႉ။ ပဵၼ်လုၵ်ႈဢွၼ်ႇပၢႆႈၽေးသိုၵ်း ဢၼ်လုတ်ႈႁၢမ်းႁဵၼ်းလိၵ်ႈလၢႆး  ၸိူဝ်းၼႆႉ  မႃးႁဵၼ်းလိၵ်ႈဝႆႉ- ဝႃႈၼႆ။  

မိူၼ်ၼင်ႇၼႆ တီႈဝဵင်းလိူဝ်ႇ ဝတ်ႉၵျွင်း ၸဝ်ႈၶၢဝ် ( ဓမ္မဝါဒီကမ္ဘောဇသီလရှင်ကျောင်း ) ၼၼ်ႉၵေႃႈ လူႉပင်းယွၼ်ႉၽႅၼ်ႇလိၼ်ဝႆ ။  ၸဝ်ႈၶၢဝ် ပႃးၼိုင်ႈ လူႉလွၼ်ႇ ။ ၸဝ်ႈၶၢဝ်ထႅင်ႈပႃးၼိုင်ႈ မၢတ်ႇၸဵပ်းတီႈတိၼ်   ၊  လူဝ်ႇတၢင်းၸွႆႈထႅမ် တီႈယူႇတၼ်းသဝ်း လႄႈ ၶဝ်ႈၼမ်ႉတင်းၵိၼ်ဝႆႉ  ဝႃႈၼႆ ။