ၶၢဝ်းၵူၼ်းမိူင်း ႁူပ်ႉၽေးၽႅၼ်ႇလိၼ်ဝႆ (ဢိင်ႇသၼ်ႇ) ယူႇၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လၢႆလၢႆၸုမ်း ယုၵ်ႉလိူၵ်ႈ/ ယႃႉပႅတ်ႈၽႅၼ်ၵၢၼ်ပွႆးသွၼ်းၼမ်ႉ ဢၼ်တေၸတ်းယႂ်ႇလူင် ၼႂ်းပိုၼ်ႉတီႈၽႂ်မၼ်းၼၼ်ႉ ဝႃႈၼႆ။
မိူဝ်ႈဝၼ်းတီႈ 28/03/2025 ၼၼ်ႉ ၵူၼ်းမိူင်းႁူမ်ႈတုမ် ၼႂ်းမိူင်းမၢၼ်ႈ ၵိုင်ႉၵၢင်ႉႁူပ်ႉၺႃးၽေးၽႅၼ်ႇလိၼ်ဝႆ တင်းႁႅင်း 7.7 မႅၵ်ႊၼီႊၵျုတ်ႉ ႁဵတ်းႁႂ်ႈႁူင်းၵေႃႇၵၢႆႇယႂ်ႇလူင်၊ သဵၼ်ႈတၢင်းလၢႆလၢႆတီႈ လူႉၵွႆၵႂႃႇႁၢဝ်ႈႁႅင်းသေ ၵူၼ်းမိူင်းလႆႈလူႉတၢႆ မၢတ်ႇၸဵပ်းၼပ်ႉႁူဝ်ႁဵင်ၵေႃႉလႄႈ ၾၢႆႇၸုမ်းယိပ်းၵွင်ႈၵၢင်ႇၸၢဝ်းၶိူဝ်းလၢႆလၢႆၸုမ်း ၸင်ႇတႅပ်းတတ်း ယႃႉပႅတ်ႈၽႅၼ်ၵၢၼ်ပွႆးလၢမ်းယႂ်ႇလူင် ဢၼ်တေၸတ်းႁဵတ်းၼႂ်းၶၢဝ်းသွၼ်းၼမ်ႉၼႆႉ ၼႆယဝ်ႉ။
မိူဝ်ႈဝၼ်းတီႈ 31/03/2025 တပ်ႉသိုၵ်းမိူင်းလႃး NDAA/ ESS ပိုၼ်ၽၢဝ်ႇဢွၵ်ႇဝႃႈ ပၢင်ပွႆးသွၼ်းၼမ်ႉ ဢၼ်တေၸတ်းႁဵတ်း ၼႂ်းၼႃႈလိၼ်ၶိုၵ်ႉတွၼ်း မၢႆ 4 ၶွင်တပ်ႉသိုၵ်းမိူင်းလႃး ၸိုင်ႈတႆးပွတ်းဢွၵ်ႇၶူင်းၼၼ်ႉ တေယုၵ်ႉလိူၵ်ႈပႅတ်ႈ ၽႅၼ်ၵၢၼ်တင်းသဵင်ႈ တင်ႈတႄႇဝၼ်းတီႈ 11/04/2025 တေႃႇထိုင် 17/04/2025 ၼႆယဝ်ႉ။
ၼႂ်းလိၵ်ႈပိုၼ်ၽၢဝ်ႇၼၼ်ႉ တႅမ်ႈပႃးဝႆႉဝႃႈ -“ႁဝ်းၶႃႈႁူႉဝႃႈ ပၢင်ပွႆးႁူတ်းၼမ်ႉၼႆႉ မၼ်းမီးတီႈပွင်ႇ ဢၼ်ယႂ်ႇလူင် ၶွင်ပေႃႈမႄႈၵူၼ်းမိူင်းတင်းလၢႆသေ မၼ်းပဵၼ်ဝတ်ႉထၼထမ်းလႄႈ တၢင်းႁၢင်ႈလီ ပဵၼ်တီႈမၢႆတွင်း ၵိုၵ်းပိုၼ်းမႃးသေတႃႉၵေႃႈ ၽွင်းထူပ်းၽေးယူႇတေႃႇၼႃႈၼႆႉ ႁဝ်းၶႃႈ ထုၵ်ႇလီဢဝ်ၼမ်ႉၸႂ်ၽွမ်ႉႁူမ်ႈ ၸွႆႈထႅမ်ၵၼ်၊ ႁူမ်ႈပွင်းပႃးၵၼ် ၶၢမ်ႈပူၼ်ႉ လွင်ႈယၢပ်ႇၽိုတ်ႇၵႂႃႇသေ ဢဝ်ၸႂ်သႂ်ႇၵၢၼ်ၸွႆႈထႅမ်ၽေး ၽႅၼ်ႇလိၼ်ဝႆလႄႈ ပွၵ်ႈဝၢႆႇၵေႃႇသၢင်ႈၶိုၼ်း ဝၢႆးၽေးၼႆႉၵႂႃႇယူႇယဝ်ႉ”- ဝႃႈၼႆ။
မိူၼ်ၼၼ်ၼင်ႇၵဝ်ႇ ၾၢႆႇတပ်ႉသိုၵ်းၵဝ်ႈၵၢင်ႉ MNDAA ၵေႃႈ ပိုၼ်ၽၢဝ်ႇဢွၵ်ႇဝႆႉဝႃႈ ၽႅၼ်ၵၢၼ်ဢၼ်ႁၢင်ႈႁႅၼ်းဝႆႉ တႃႇၸတ်းႁဵတ်းပၢင်ပွႆးသွၼ်းၼမ်ႉၶိုၵ်ႉယႂ်ႇလူင်ၼၼ်ႉ လႆႈထုၵ်ႇယုၵ်ႉလိူၵ်ႈသေ ယၢမ်းလဵဝ် ဢွၼ်ၵၼ်တိုၵ်းသူၼ်း ႁႂ်ႈၵူၼ်းမိူင်းဢိၵ်ႇ ၵူၼ်းသိုၵ်း ၸိူဝ်းယူႇသဝ်းၼႂ်းပိုၼ်ႉတီႈၼႃႈလိၼ် တပ်ႉသိုၵ်းၵဝ်ႈၵၢင်ႉ ၵုမ်းၵမ်ဝႆႉၼၼ်ႉ ႁူမ်ႈၵၼ် ၸွႆႈထႅမ်ပၼ် ၵူၼ်းမိူင်းၸိူဝ်းႁူပ်ႉၽေးၽႅၼ်ႇလိၼ်ဝႆ ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ