ဝၼ်းတီႈ 31/03/2025 မီးၶလိပ်ႉ လုင်းပႃႈၵူႈၼိုင်ႈ ၵူၼ်းမူႇၸေႊ မႃးႁွင်ႉႁႆႈသႅၼ်ႇပၢဝ်ႇႁႃလုၵ်ႈယိင်း ၼႃႈႁိူၼ်းတိူၵ်ႈ Sky Villa Condo ၵူၼ်ႇယွၼ်ႉၽႅၼ်ႇလိၼ်ဝႆ။
ပဵၼ် လုင်းၸၢႆးဢၢႆႈလူႇ လႄႈ ပႃႈၼၢင်းမေႇ ယူႇဝဵင်းမူႇၸေႊ။ ဝၼ်းတီႈ 28/03/2025 ၽွင်းၽႅၼ်ႇလိၼ်ဝႆႁႅင်းၼၼ်ႉ ႁိူၼ်းတိူၵ်ႈ Sky Villa Condo တီႈဝဵင်းလိူဝ်ႇၵူၼ်ႇလူင်းလူႉၵွႆ ။ ၼႂ်းၼၼ်ႉပႃး ဢေယိင်းဢွၼ်ႇၵေႃႉၼိုင်ႈၸိုဝ်ႈႁွင်ႉ ၼၢင်းၶမ်းလႄႉ(ၼၢင်းဢေထေး) ဢႃယု 24 ပီ။ ၽွင်းၸုမ်းၸွႆႈထႅမ်ၼွၵ်ႈမိူင်းၼႂ်းမိူင်း မႃးၸွႆႈႁႃၵူၼ်းတႂ်ႈတိုၵ်းၵူၼ်ႇ ဝၼ်းထူၼ်ႈ 4 ၼၼ်ႉ ၼၢင်းဢေထေး ပႆႇပႃးဢွၵ်ႇမႃးလႄႈ ဢၼ်ပဵၼ် ဢူႈတၢင်းမႄႈ လုၵ်ႉဝဵင်းမူႇၸေႊ မႃးထိုင်ဝဵင်းလိူဝ်ႇ မႃးႁႃလုၵ်ႈယိင်းပႆႇႁၼ်။ ၸင်ႇမႃးယူႇၼႃႈတိုၵ်းၵူၼ်ႇၼၼ်ႉသေႁွင်ႉသႅၼ်ႇႁႆႈႁႃ ၵေႃႉပဵၼ်လုၵ်ႈ – ယႃႇႁႂ်ႈၸႂ်လဵၵ်ႉ ၊ မီးၸုမ်းၸွႆႈထႅမ် တိုၵ်ႉၸွႆႈထႅမ်ယူႇ – ဝႃႈၼႆ။
ၼၢင်းဢွမ်ၶမ်းႁွမ် ၵူၼ်းႁိူၼ်းလဵဝ်ၵၼ်တင်းၼၢင်းဢေထေး လၢတ်ႈၽူႈတွႆႇႁွၵ်ႈဝႃႈ- “ပႃႈႁဝ်းတင်းလုင်းႁဝ်း လုၵ်ႉမူႇၸေႊမႃး။ မိူဝ်ႈၼႆႉၵေႃႈ မႃးၸွႆႈႁႃယူႇတၢင်းဝၼ်းယဝ်ႉ။ မႃးယွၼ်းတၢင်းၸွႆႈထႅမ်ပႃးႁႂ်ႈၸုမ်းၸွႆႈထႅမ်ၶဝ် ၸွႆႈႁႃပၼ်ထႅင်ႈ။ ၶဝ်ၵေႃႈသႅၼ်ႇႁွင်ႉႁႃဢေထေးဝႃႈ – ယႃႇၽူမ်ႈၼွၼ်းလပ်းပႅတ်ႈ ၊ ယႃႇၸႂ်လဵၵ်ႉ ပိူၼ်ႈတိုၵ်ႉၸွႆႈယူႇ – ၼႆၸိူဝ်းၼႆႉ။ ဢေထေးၼႆႉ မၼ်းယူႇတီႈၸၼ်ႉ 10 တီႈႁိူၼ်းတိူၵ်ႈၼၼ်ႉ။ ၽွင်းၽႅၼ်ႇလိၼ်ဝႆ မၼ်းတင်းဢူၺ်းၵေႃႉမၼ်း ၼႅတ်ႈလႅၼ်ႈလူင်းႁိူၼ်း ဢမ်ႇတၼ်းပူၼ်ႉ။ ႁိူၼ်းတိူၵ်ႈၵူၼ်ႇလႄႈ ၶႃၶမ်ႈပႅတ်ႈတင်းသွင်ၵေႃႉ” – ဝႃႈၼႆ။
ၼၢင်းၶမ်းလႄႈ(ၼၢင်းဢေထေး) ၼႆႉ မႃးသိုဝ်ႉႁွင်ႈသေယူႇတီႈ Sky Villa Condo ၼႆႉ ဢမ်ႇပႆႇပေႃးႁိုင်။ ဢူၺ်းၵေႃႉမၼ်းၼၢင်းတႄႉ ၸုမ်းၸွႆႈထႅမ် ႁႃႁၼ်တူဝ်မိူဝ်ႈဝၼ်းသိုၼ်းသေ ဢဝ်ဢွၵ်ႇမႃးလႆႈယဝ်ႉသေတႃႉ ၽိူဝ်ႇထိုင်ႁူင်းယႃၵေႃႈ လူႉတၢႆပႅတ်ႈ- ဝႃႈၼႆ။
တီႈႁိူၼ်းတိူၵ်ႈ Sky Villa Condo ၼၼ်ႉ မီးၵူၼ်းၼွၵ်ႈမိူင်းၼႂ်းမိူင်း ၵူႈၸၼ်ႉထၢၼ်ႈမႃးသိုဝ်ႉယူႇ/ၶၢတ်ႈယူႇ။ ၵူၼ်းမိူင်းတႆးပွတ်းႁွင်ႇၸိူဝ်းထူပ်းၽေးသိုၵ်းသိူဝ်ၽွင်းပီၵၢႆၼႆႉ ဢွၼ်ၵၼ်ပၢႆႈလူင်းမႃးယူႇဝဵင်းလိူဝ်ႇ မႃးၶၢတ်ႈႁွင်ႈ/သိုဝ်ႉႁွင်ႈယူႇသဝ်းတီႈ ႁိူၼ်းတိူၵ်ႈၼႆႉၵေႃႈမီးတင်းၼမ်။ ၵူၺ်းၵႃႈႁူဝ်ၼပ်ႉတႅတ်ႈတေႃးတႄႉပႆႇႁူႉ။
Sky Villa Condo ၼႆႉ မီး 3 လင် တိတ်းၸပ်းၵၼ်ဝႆႉ။ၼိုင်ႈလင်ၼႆႉမီး 11 ၸၼ်ႉ။ ယၢမ်းလဵဝ် ၵူၼ်ႇပင်းလူႉလႅဝ် ပႅတ်ႈ 2 လင်။ ဢၼ်ၵိုတ်းလင်ၼိုင်ႈၼၼ်ႉသမ်ႉ ၵူၼ်ႇလူင်း ၵိုတ်းယူႇ 5 ၸၼ်ႉတၢင်းၼိူဝ် သုတ်းၵူၺ်း ဢမ်ႇလႅဝ်။
တီႈ Sky Villa Condo ၼႆႉမီးၵူၼ်းယူႇဝႆႉတင်းမူတ်းလၢႆၵေႃႉတႄႉဢမ်ႇႁူႉတႅတ်ႈတေႃးသေတႃႉ တေႃႇထိုင်ဝၼ်းတီႈ 31 /03/2025 ၼႆႉ ၸွႆႈထႅမ်ဢဝ်ဢွၵ်ႇမႃးလႆႈၵူၼ်းမွၵ်ႈ 50 ၵေႃႉယဝ်ႉ။ ၼႂ်းၼၼ်ႉ ဢၼ်တိုၵ်ႉမီးသၢႆၸႂ်ယူႇ 29 ၵေႃႉလႄႈ ဢၼ်တၢႆၵႂႃႇယဝ်ႉ 8 ၵေႃႉ ပဵၼ်ၼၢင်းယိင်း 5 ၵေႃႉလႄႈၵူၼ်းၸၢႆး 3 ၵေႃႉ။
ၵၢၼ်ၶူၼ်ႉႁႃၵူၼ်းၵိုတ်းၶမ်တႂ်ႈတိုၵ်း တီႈ Sky Villa Condo ၵေႃႈတေၵိုတ်းယင်ႉယဝ်ႉၼႆ – ၸုမ်းၸွႆႈထႅမ်လၢတ်ႈၵၼ်ၼင်ႇၼႆယူႇ။ ၵူၺ်းၵႃႈၼႆႉၵေႃႈပႆႇပိုၼ်ၽၢဝ်ႇပဵၼ်တၢင်းၵၢၼ်။
တႅမ်ႈ- ၸၢႆးဢၢႆႈလႅင်း
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ