ၶမ်ႈဝႃးယၢမ်းတဵင်ႈၶိုၼ်းၸၢႆႉသေ တူၵ်းမႅၼ်ႈၼႂ်ၼႆႉ 1/4/2025 ယၢမ်းၵၢင်ၼႂ်  1 မူင်းပၢႆၼႆႉ ၾႆးမႆႈႁိူၼ်းၶၢႆၶူဝ်းသၢင်ႇၵၢၼ်းတီႈ ပွၵ်ႉ 1  ၾၢႆႇဢွၵ်ႇၵၢတ်ႇ  ဝဵင်းပၢင်လူင် ၾႆးလုၵ်ႉမႆႈလၢမ်းဝႆးလႄႈၸဝ်ႈႁိူၼ်းဢမ်ႇတၼ်းပူၼ်ႉလွတ်ႈ မီးၵူၼ်းလူႉတၢႆ 4 ၵေႃႉ ပဵၼ်ၼၢင်းယိင်း 3 ၵေႃႉ ၵူၼ်းၸၢႆးၵေႃႉၼိုင်ႈ ။

ၵဵဝ်ႇလူၺ်ႈလွင်ႈၼႆႉ  ၵႅမ်ၽူႈၵွၼ်းႁွင်ႈၵၢၼ်ၾၢႆႇၶႄၾႆး ဝဵင်းပၢင်လူင် ဢူးယႄးဢွင်ႇ လၢတ်ႈတီႈၽူႈတွႆႇႁွၵ်ႈဝႃႈ − “ ၾႆးၼႆႉ တႄႉမႆႈယၢမ်းၵၢင်ၼႂ် မွၵ်ႈ 1 မူင်းပၢႆ ယွၼ်ႉပဵၼ်ၶၢဝ်းမႆႈလႄႈ လူမ်းၵေႃႈပတ်ႉႁႅင်း ႁိူၼ်းၼႆႉသမ်ႉပိုတ်ႇဝႆႉႁၢၼ်ႉတၢင်းၶၢႆ သၢင်ႇၵၢၼ်း၊ ၶိူင်ႈလူႇၶူဝ်းတၢၼ်းလႄႈ ၶိူင်ႈၸႂ်ႉတိုဝ်းပပ်ႉလိၵ်ႈပပ်ႉလၢႆးၸိူဝ်းၼႆႉ။  ပဵၼ်ၶိူင်ႈၶူဝ်းဢၼ်ၾႆးမႆႈငၢႆႈ။ ယွၼ်ႉၾႆးမႆႈၼႆႉသေ ၵူၼ်းၼႂ်းမုင်ႉႁေႃႁိူၼ်းၶဝ် ဢၼ်မီး 5 ၵေႃႉၼႆႉ  လူႉတၢႆ 4 ၵေႃႉ လွတ်ႈ ၵေႃႉလဵဝ်ၵူၺ်း ” -ဝႃႈၼႆ။

ၸဝ်ႈႁိူၼ်းဢၼ်တၢႆၸွမ်းၼႂ်းၾႆးၼႆႉပဵၼ် ပႃႈၼၢင်းၶိၼ်ႇတၢၼ်း ဢႃယု 68 ပီ၊ ပႃႈၼၢင်းၶိၼ်ႇမျႃႉ ဢႃယု 66 ပီ၊ လုင်ူၺူဝ်ႇမျိၼ်ႉ 58 ပီ၊ ပႃႈၶိၼ်ႇၼိၼ်းဝေႇ 54 ပီ ။ ပဵၼ်ယွၼ်ႉတႆႈၾႆးတဵၼ်းဝႆႉ ႁိမ်းတီႈၼွၼ်း သေၼွၼ်းလပ်းၵႂႃႇလႄႈ ၾႆးၸင်ႇမႆႈ ၼႆ ၼၢင်းယိင်း ဢႃယု မွၵ်ႈ 50 ပၢႆ ၵူၼ်းႁိူၼ်းၵေႃႉဢၼ်လွတ်ႈသၢႆၸႂ်မႃးၼၼ်ႉ လၢတ်ႈၼင်ႇၼႆ။

ဝၢႆးလင်ၽႅၼ်ႇလိၼ်ဝႆၼႆႉ သိုၵ်းမၢၼ်ႈတတ်းၾႆးၾႃႉဝႆႉၼႂ်းမိူင်းတႆးပွတ်းၸၢၼ်း လႆႈမႃးၶၢဝ်းတၢင်း 4 ဝၼ်းယဝ်ႉ။ ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇၵိၼ်းၸႂ်ၼႂ်းၵၢၼ်ယူႇၵၢၼ်ၵိၼ်။ လႆႈၸႂ်ႉၾႆးၽိုၼ်းၾႆးထၢၼ်ႇႁုင် ၊ ၸႂ်ႉၾႆးတဵၼ်းတႃႇႁၼ်လႅင်းယၢမ်းၵၢင်ၶိုၼ်း။

ၾႆးမႆႈႁိူၼ်းပွၵ်ႈၼႆႉ ၼွၵ်ႈလိူဝ်လူႉသုမ်းႁိူၼ်းယေးတင်းလင်ယဝ်ႉ ၶူဝ်းၶွင်ၼႂ်းႁိူၼ်း လူႉသုမ်းဢမ်ႇယွမ်း 92 သႅၼ်။  ၾႆးၼႆႉလၢမ်းမႆႈပႃး ႁိူၼ်းႁိမ်းၶၢင်ႈလႄႈ လူႉသုမ်းတင်းလင်ၼင်ႇၵဝ်ႇ။ ၵူၺ်းၵႃႈ ၵူၼ်းတႄႉလွတ်ႈၽေး။

ၵူၼ်းၼႂ်းပွၵ်ႉၼႂ်းယွမ်ႇလႄႈ ရူတ်ႉၶႄၾႆး ဝဵင်းပၢင်လူင်၊ ဝဵင်းလွႆလႅမ် ဝဵင်းၼမ်ႉၸၢင် ႁူမ်ႈၵၼ်မွၵ်ႈ 5-6 လမ်းၸွႆႈၶႄလႄႈ ၾႆးၸင်ႇမွတ်ႇၵႂႃႇယၢမ်းၵၢင်ၼႂ်ၸဝ်ႉမွၵ်ႈ 5  မူင်းပၢႆၼႆႉ။ ႁိူၼ်းတႄႉ ယဵၼ်းပဵၼ်တဝ်ႈၽဝ်ႇၵႂႃႇတင်းမူတ်း။

ယၢမ်းလဵဝ်တူဝ်တၢႆၸဝ်ႈႁိူၼ်းတင်း  4 ၵေႃႉၼႆႉ ၽူႈမီးပုၼ်ႈၽွၼ်း ဢဝ်တူဝ်သူင်ႇဝႆႉတီႈ ႁွင်ႈၵူတ်ႇထတ်း တီႈႁူင်းယႃ ဝဵင်းပၢင်လူင်ဝႆႉယဝ်ႉဝႃႈၼႆ။

ၼႂ်းလိူၼ်ၼႆႉ ၾိင်ႈၾႃႉမႆႈႁႅင်းမႃး၊ လူမ်းၵေႃႈသမ်ႉၽတ်ႉပဝ်ႇႁႅင်း လႄႈ လွင်ႈၸႂ်ႉတိုဝ်းၽိုၼ်းၾႆးလႄႈ ၾႆးတဵၼ်းႁႂ်ႈဢွၼ်ၵၼ်ၾၢင်ႉ ၵူဝ်ထူပ်းၽေးၾႆး။ ၾၢႆႇၼိုင်ႈ ၾႆးၾႃႉၵေႃႈဢမ်ႇမႃးမၢၼ်ႇ။ မႃးမႃးၶၢတ်ႇၶၢတ်ႇလႄႈ ၸိူဝ်းၸႂ်ႉသၢႆၾႆးဢၼ်လဵၵ်ႉၼၼ်ႉ ႁႂ်ႈၾၢင်ႉၼၵ်းၼႃ ။ ၵူဝ်ၾႆးၾႃႉသျွတ်ႉသေ လၢမ်းမႆႈပႃးႁိူၼ်းယေး  ။ ႁႂ်ႈမီးသတိ ဝိရိယသေ ၵႆႉၵူတ်ႇထတ်းတူၺ်းၵၢၼ်ၸႂ်ႉၽိုၼ်းၸႂ်ႉၾႆးၸွမ်းတႃႇသေႇ တႃႇႁႂ်ႈလွတ်ႈၽေးၾႆးမႆႈ – ၸုမ်းၶႄၾႆး မွၵ်ႇလၢတ်ႈပၼ်ၾၢင်ႉၼင်ႇၼႆ။