ၽွင်းၵူၼ်းမိူင်းၼႂ်းမိူင်းႁူမ်ႈတုမ် ထူပ်းၽေးၽႅၼ်ႇလိၼ်ဝႆ (ဢိင်ႇသၼ်ႇ) ယူႇပတ်းပိုၼ်ႉမိူင်းၼႆႉ လူင်ပွင်ၸိုင်ႈ မိူင်း ထၢႆႊဝၼ်ႊ ႁၢင်ႈႁႅၼ်း ၶိူင်ႈၸႂ်ႉတိုဝ်း လႄႈ ၵူၼ်းၵတ်ႉလႅၼ်ႇ ၾၢႆႇၸွႆႈထႅမ်ၽေးၽႅၼ်ႇလိၼ်ဝႆသူင်ႇၸူးမိူင်းမၢၼ်ႈ တႃႇၸွႆႈထႅမ်ၵူၼ်းမိူင်းၸိူဝ်းထူပ်းၽေးၽႅၼ်ႇလိၼ်၊ ၾၢႆႇသိုၵ်း မၢၼ်ႈႁၢမ်ႈတၢပ်ႈ ဢမ်ႇပၼ်ၶဝ်ႈမိူင်းလႄႈ ၸုမ်းၸွႆႈထႅမ်လႆႈထွႆပွၵ်ႈမိူဝ်းၶိုၼ်း။
မိူဝ်ႈဝၼ်းတီႈ 31/3/2025 ႁွင်ႈၵၢၼ်ၶၢဝ်ႇ ၾၢႆႇမိူင်းထၢႆႊဝၼ်ႊ Central News Agency ဢွၵ်ႇၶၢဝ်ႇဝႆႉဝႃႈ ၽွင်းလူင်ၾၢႆႇ ၼႂ်းမိူင်း လူင်ပွင်ၸိုင်ႈမိူင်းထၢႆႊဝၼ်ႊ ၶိုၼ်းႁုပ်ႈယိုတ်းလွင်ႈတေၵႂႃႇၸွႆႈထႅမ်ၵူၼ်းမိူင်းမၢၼ်ႈ ၸိူဝ်းႁူပ်ႉၺႃးၽေး ၽႅၼ်ႇလိၼ်ဝႆ (ဢိင်ႇသၼ်ႇ) ယွၼ်ႉၸဝ်ႈၼႃႈတီႈၾၢႆႇသိုၵ်းမၢၼ်ႈ ဢမ်ႇပၼ်ၶဝ်ႈမိူင်းသေ ၵူတ်ႇထတ်းထဵတ်ႈထၢမ်ႁၢဝ်ႈႁႅင်း- ဝႃႈၼႆ။
ၽွင်းလူင်ၾၢႆႇၼႂ်းမိူင်း လူင်ပွင်ၸိုင်ႈမိူင်းထၢႆႊဝၼ်ႊလၢတ်ႈဝႃႈ “ၾၢႆႇသိုၵ်းမၢၼ်ႈ ဢမ်ႇႁပ်ႉဢဝ်ပုၼ်ႈၽွၼ်း လွင်ႈႁူမ်ႇ လူမ်ႈတႃႇ ၽူႈလူင်ႉလႅၼ်ႇႁဝ်း ၸိူဝ်းတေၵႂႃႇၸွႆႈထႅမ်ၵူၼ်းမိူင်းၶဝ်ၼၼ်ႉလႆႈၼႆလႄႈ ၸင်ႇလႆႈၵိုတ်းၵၢၼ်သူင်ႇၵူၼ်းသူင်ႇၶိူင်ႈၶူဝ်းၸွႆႈထႅမ် ” ဝႃႈၼႆ ။
ယွၼ်ႉၼၼ် ၸင်ႇလႆႈယႃႉပႅတ်ႈ ၽႅၼ်ၵၢၼ်ၶၢဝ်းတၢင်းတႃႇၶဝ်ႈမႃးၸွႆႈထႅမ် ၵူၼ်းမိူင်းမၢၼ်ႈသေ ႁႂ်ႈၽူႈလူင်ႉလႅၼ်ႇ မိူင်းထၢႆႊဝၼ်ႊ ၸိူဝ်းႁၢင်ႈႁႅၼ်းတူဝ်တူဝ်ႈတၼ်းဝႆႉၼၼ်ႉ ပွၵ်ႈႁဵတ်းၵၢၼ်ၶိုၼ်း ၼႃႈၵၢၼ်ၽႂ်မၼ်း ၸွမ်းၼင်ႇႁဵတ်းဝႆႉယူႇ ၼၼ်ႉ ၼႆယဝ်ႉ။
လႆႈႁူႉဝႃႈ ၾၢႆႇလူင်ပွင်ၸိုင်ႈ မိူင်းထၢႆႊဝၼ်ႊ ႁၢင်ႈႁႅၼ်းဝႆႉ ၵူၼ်းတႃႇမႃးၸွႆႈထႅမ် ၵူၼ်းထူပ်းၽေး ၽႅၼ်ႇလိၼ်ဝႆ တႃႇ 126 ၵေႃႉ။ ၼႂ်းၼၼ်ႉ ပႃးမေႃယႃလူင် 6 ၵေႃႉ၊ မေႃယႃဢွၼ်ႇ 7 ၵေႃႉ၊ မေႃယႃတူဝ်သတ်း 2 ၵေႃႉ၊ မႃဢၼ်မေႃသုတ်ႇၼူမ်တွင်းဢၢႆသေ သွၵ်ႈႁႃၵူၼ်းတၢႆ ဢိၵ်ႇၵူၼ်းမၢတ်ႇၸဵပ်းလႆႈၼၼ်ႉ 6 တူဝ်၊ ဢိၼ်ႊၵျိၼ်ႊၼီႊယႃႊ ၽူႈလူင်ႉလႅၼ်ႇ ၾၢႆႇႁူင်းၵေႃႇၵၢႆႇ 2 ၵေႃႉ ဢိၵ်ႇပႃး ၶိူင်ႈၸႂ်ႉတိုဝ်း ၼႂ်းၵၢၼ်ၸွႆႈထႅမ် ၽေးၽႅၼ်ႇလိၼ်ဝႆ (ဢိင်ႇသၼ်ႇ) 15 တၢၼ်ႇ ၼႆယဝ်ႉ။
ၸုမ်းၸွႆႈထႅမ် ၽေးၶဵၼ်ၽႅၼ်ႇလိၼ်ဝႆ ဢၼ်လုၵ်ႉတၢင်းမိူင်းၼွၵ်ႈ ၶဝ်ႈမႃးၸွႆႈထႅမ် ၼႂ်းမိူင်းႁူမ်ႈတုမ်ၼႆႉ တင်းသဵင်ႈ မီးၵႂႃႇ 13 ၸုမ်းယဝ်ႉ ၼႆသေတႃႉ ပဵၼ်ဝၢၼ်ႈမိူင်း ဢၼ်ထုၵ်ႇမႅၼ်ႈလူမ်းၵၼ်တင်းသိုၵ်းမၢၼ်ႈၵမ်ႈၼမ် ။
တႅမ်ႈ- ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ