ၼမ်ႉၼွင်သွမ်ႇ ဢၼ်မီးတီႈၸႄႈဝဵင်းယႂႃႇငၢၼ်ႇၸိုင်ႈတႆးပွတ်းၸၢၼ်းၼၼ်ႉ ယွၼ်ႉပိူဝ်ႈၽႅၼ်ႇလိၼ်ဝႆသေ ဢဝ်ၼမ်ႉၶုၼ်ႇပႅတ်ႈတေႃႇထိုင်ဝၼ်းမိူဝ်ႈၼႆႉ ဢမ်ႇသႂ်ၶိုၼ်း။
တင်ႈတႄႇၽႅၼ်ႇလိၼ်ဝႆ ဝၼ်းတီႈ 28/03/2025 မႃး ၼမ်ႉၼွင် ၼမ်ႉလၼ်ႈ ၼမ်ႉပုင်ႇ ပႃးၸဵမ်ၼမ်ႉၼွင်သွမ်ႇ ၸိူဝ်းမီးၼႂ်းၸႄႈဝဵင်းယႂႃႇငၢၼ်ႇၼၼ်ႉၶုၼ်ႇဢူၼ်ပႅတ်ႈမူတ်း ၊ လႆႈ 3-4 ဝၼ်းယဝ်ႉယင်းပႆႇသႂ်ၶိုၼ်းလႄႈၵူၼ်းပိုၼ်ႉတီႈပဵၼ်ဢၼ်ၸႂ်ဢမ်ႇလီဝႃႈၼႆ။
ၵူၼ်းမိူင်းဝဵင်းယႂႃႇငၢၼ်ႇၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ-“မိူဝ်ႈၼမ်ႉထူမ်ႈပီၵၢႆၼႆႉၵေႃႈ ၼမ်ႉၼွင်သွမ်ႇၼႆႉ မၼ်းၶုၼ်ႇယူႇ။ ၵူၺ်းၵႃႈမၼ်းၶိုၼ်းသႂ်ယူႇၼႃ။ ယၢမ်းလဵဝ် မၼ်းၶုၼ်ႇယွၼ်ႉၽႅၼ်ႇလိၼ်ဝႆၼႆႉ ၸွင်ႇမၼ်းတေၶိုၼ်းသႂ်တႄႉဢမ်ႇႁူႉ။ တူၺ်းငဝ်းလၢႆးမၼ်းတႄႉၵူဝ်မၼ်းဢမ်ႇၶိုၼ်းသႂ်ၵူၺ်းယဝ်ႉၶႃႈ ”- ဝႃႈၼႆ။
တီႈၼမ်ႉမုတ်းႁူဝ်ပူင်း(ႁူဝ်ပူင်းယေႇထွႆႉ)ၼၼ်ႉၵေႃႈ တေႃႈၼင်ႇၼၼ်။ ဝၢႆးလင်ၽႅၼ်ႇလိၼ်ဝႆယဝ်ႉ ၼမ်ႉသႂ်ၼၼ်ႉယဵၼ်းပဵၼ်သီလႅင်ၼမ်ႉတွင်းၵႂႃႇ။ မိူဝ်ႈၵွၼ်ႇဢမ်ႇတွၼ်ႉယၢမ်ႈႁၼ်ၸိူင်ႉၼႆသေပွၵ်ႈၼႆ ၵူၼ်းၸၢႆးယူႇဝဵင်းႁူဝ်ပူင်းၵေႃႉၼိုင်ႈလၢတ်ႈၼင်ႇၼႆ။
“တီႈၼမ်ႉမုတ်းဢွၵ်ႇမႃးတီႈႁူဝ်ပူင်းၼႆႉ ၼမ်ႉဢမ်ႇတွၼ်ႉၶုၼ်ႇသေပွၵ်ႈ။ ၶၢဝ်းၾူၼ် ၼမ်ႉၶႂ်ႈၼွင်းၼွင်း တိုၼ်းဢမ်ႇၶုၼ်ႇ။ ပီၵၢႆ မိူဝ်ႈၼမ်ႉထူမ်ႈတၢင်းမိူင်းၼၼ်ႉ ၵေႃႈ ၼမ်ႉယင်းဢမ်ႇၶုၼ်ႇ။ တလဵဝ်ၼႆႉတႄႉ ဝၢႆးလင်ၽႅၼ်ႇလိၼ်ဝႆၼႆႉ ၼမ်ႉမုတ်းၵေႃႈၶုၼ်ႇဢူၼ်ယဝ်ႉ ။ ႁဝ်းၶႃႈ ဢဝ်ၼမ်ႉဢၼ်ၼႆႉၵိၼ်ၸႂ်ႉၵူၺ်းလႄႈ ပေႃးမၼ်းၶုၼ်ႇၸိူင်ႉၼႆ ၸွင်ႇတေမီးၽေးတေႃႇႁဝ်းဢမ်ႇႁူႉ”- ဝႃႈၼႆ။
ၽႅၼ်ႇလိၼ်ဝႆ ၵမ်းၼႆႉၼႂ်းမိူင်းတႆး ဢၼ်တုမ်ႉတိူဝ်ႉၼမ်သုတ်းပဵၼ်ဝဵင်းဢွင်ႇပၢၼ်း။ ၵူၼ်းတၢႆ 9 ၵေႃႉ ပဵၼ် ၼၢင်းယိင်း 5 ၵေႃႉ ၵူၼ်းၸၢႆး 2 ၵေႃႉလႄႈ လုၵ်ႈဢွၼ်ႇ 2 ၵေႃႉ။ ၵူၼ်းမၢတ်ႇၸဵပ်းသမ်ႉ 25 ၵေႃႉ။
ၽႅၼ်ႇလိၼ်ဝႆယဝ်ႉၼႂ်းၶၢဝ်းတၢင်း 4 ဝၼ်းၼႆႉ ၵူၼ်းမိူင်းမၢၼ်ႈပတ်းပိုၼ်ႉ တၢႆ 3034 ၵေႃႉ။ မၢတ်ႇၸဵပ်း 3517 ၵေႃႉ၊ ႁၢႆဝႆႉ 498 ၵေႃႉ ၶၢဝ်ႇ DVB ဢၢင်ႈဢိင်ၶၢဝ်ႇတီႈၸုမ်းၸွႆႈထႅမ်ၼႂ်းပိုၼ်ႉတီႈသေ ဢွၵ်ႇဝႆႉၼင်ႇၼႆ။
တႅမ်ႈ- ၼၢင်းၶမ်းၵူႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ