ၵၢတ်ႇၵၢင်ၶမ်ႈ ဝဵင်းတႃႈၶီႈလဵၵ်း ဢၼ်ၶၢႆတီႈႁိမ်းပၢင်ႇသျၢၼ်းယူဝ်းမ မႃးတင်းႁိုင်ၼၼ်ႉ ႁွင်ႈၵၢၼ်ၾၢႆႇလိူမ်ႈလႆႇ သိုၵ်းမၢၼ်ႈတဵၵ်းၸႂ်ႉၶၢႆႉတီႈ ၵႂႃႇၶၢႆတၢင်းၸွၵ်ႉႁႅင်းလႄႈဢမ်ႇမီးၵူၼ်းမႃးသိုဝ်ႉၵိၼ်၊ ပေႃႈၵႃႉမႄႈၵႃႉသုမ်းတိုၼ်းလၢင်း ယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉ။

ၵူၼ်းမိူင်းၼႂ်းပိုၼ်ႉတီႈၼႆႉ လႆႈပိုင်ႈဢိင်ၸႂ်ယႂ်ႇငိုၼ်းၶဝ်ႈတီႈၵၢတ်ႇၵၢင်ၶမ်ႈၼႆႉၵူၺ်းလႄႈ ၵၢတ်ႇလူႉၵၢတ်ႇဝၢႆးၼႆႉ ပဵၼ်ဢၼ်ယၢပ်ႇၽိုတ်ႇ တႄႉတႄႉၼႆ  – ၸဝ်ႉႁၢၼ်ႉတၢင်းၶၢႆ ၵူၼ်းဝဵင်းတႃႈၶီႈလဵၵ်းၵေႃႉၼိုင်ႈလၢတ်ႈၼင်ႇၼႆ။

“ ဢလူဝ်ႈ……မိူဝ်ႈလဵဝ်ၼႆႉ ႁၢႆႉၸႃႉ ယၢပ်ႇႁႅင်းၼႃႇယဝ်ႉဝႃႈ။ ၵူၼ်းသိုဝ်ႉၵေႃႈဢမ်ႇမီး။   မိူဝ်ႈၵူႈပွၵ်ႈၼႆႉ ၼိုင်ႈဝၼ်း ႁဝ်းၵႃႉၶၢႆလႆႈ 4000−5000 ထိုင် ၼိုင်ႈမိုၼ်ႇၸိူဝ်းၼႆႉဢိူဝ်ႈ။ မိူဝ်ႈလဵဝ်ၼႆႉ ပေႃးၶၢႆလႆႈ ဝၼ်း ႁဵင် သွင်ႁဵင် ၵေႃႈ ၵၢမ်ႇလီၼႃႇယဝ်ႉ။  ၶဝ်ၶၢႆႉၵၢတ်ႇမႃးဝႆႉတၢင်းပၢင်ႇပေႃႉၵွပ်ႉၾ် ၼႆႉမၼ်းဢမ်ႇတေႃႇတၢင်းပိူၼ်ႈ ပေႃးဢမ်ႇတင်ႈၸႂ်မႃးတႄႉ”- ဝႃႈၼႆ။

ၵၢတ်ႇၵၢင်ၶမ်ႈတီႈႁိမ်းပၢင်ႇ သျၢၼ်းယူဝ်းမၼႆႉ မီးမႃးၸဵမ်လႂ်။ မၼ်းပဵၼ် တီႈၵူၼ်းၵိုၼ်း ၵႂႃႇမႃးငၢႆႈ၊ မီးတၢင်းၶၢႆ ၶူဝ်းၵိၼ်ယမ်ႉဢၼ်ဢိမ်ႇတွင်ႉလႄႈ ဢၼ်ၵိၼ်လဵၼ်ႈ။ မီးသုမ်ႉတၢင်းၵိၼ် 400 ပၢႆ။ မီးတၢင်းၵိၼ်ဢၼ်ဝၢၼ်ဢၼ်ၶႅဝ်း ၶဝ်ႈသဵၼ်ႈၶဝ်ႈသွႆး ပိင်ႈယၢင်ႈမႃႇလႃႇၽဵတ်းႁိုၼ်း ၸိူဝ်းၼႆႉ ။ သိုဝ်ႉငၢႆႈၶၢႆလီလႄႈ ၵူၼ်းၵိုၼ်းငိုၼ်းၶွၼ်ႈယူႇတႃႇသေႇ။

 ၵူၺ်းၵႃႈ ထိုင်မႃးႁူဝ်ပီ 2025 ၼႆႉ ႁွင်ႈၵၢၼ်ၾၢႆႇၽွင်းငမ်းလႄႈႁွင်ႈၵၢၼ်ၾၢႆႇလိူမ်ႈလႆႇ  တႂ်ႈသိုၵ်းမၢၼ်ႈ  မႃးသေႃႇၼႂ်းပွၵ်ႉယွမ်ႇဝႃႈ –  ၼႂ်းဝၼ်းတီႈ 12/02/2025 ၼႆႉ   ၵူၼ်းၶၢႆၶူဝ်းၵၢတ်ႇၵၢင်ၶမ်ႈတင်းသဵင်ႈ ႁႂ်ႈၶၢႆႉၵႂႃႇၶၢႆတီႈပၢင်ႇပေႃႉၵွပ်ႉၾ် -ဝႃႈၼႆ  ။  ဝၢႆးလင်ၶၢႆႉတီႈၵၢတ်ႇၵၢင်ၶမ်ႈယဝ်ႉ ဢၼ်လႆႈၶၢႆလီၵေႃႈမီးမွၵ်ႈ 2 ဝၼ်းၵူၺ်း။  တင်ႈတႄႇၵၢင်လိူၼ်ၾႅပ်ႉပိဝ်ႊရီႊမႃး တေႃႇထိုင်ယၢမ်းလဵဝ် ဢမ်ႇပဵၼ်ၵၢၼ် ။  

ယွၼ်ႉပၢႆးမၢၵ်ႈမီးဢမ်ႇလီ၊ၵၢၼ်ႁႃၵိၼ်လဵင်ႉတွင်ႉယၢပ်ႇလႄႈ  ဢမ်ႇလိူဝ်သေ တၢင်းၵိၼ်တၢင်းယမ်ႉ ယင်းဢမ်ႇမီးၵူၼ်းမႃးသိုဝ်ႉၵိၼ်။  ႁဵတ်းႁႂ်ႈလႆႈပိၵ်ႉႁၢၼ်ႉၵႂႃႇၵေႃႈမီးတၢင်းၼမ်။

 ၼွၵ်ႈလိူဝ်ၶၢႆတၢင်းၵိၼ်ဢမ်ႇၶၢတ်ႇယဝ်ႉ  ၵၢၼ်တၢင်ႇမဵဝ်းၵေႃႈဢမ်ႇပေႃးလိူင်ႇ ၊ ၵၢၼ်သူၼ်ၵၢၼ်ႁိူၵ်ႈၵေႃႈ မၢၵ်ႇၶဝ်ႈတဝ်ႈၼမ်ႉဢမ်ႇလိူင်ႇလိူဝ်လႄႈ ၵူၼ်းတၢင်ႇတီႈသီႇလႅၼ် ၸိူဝ်းမႃးယူႇသဝ်းႁဵတ်းၵၢၼ် ႁႃၵိၼ်လဵင်ႉတွင်ႉ တီႈဝဵင်းတႃႈၶီႈလဵၵ်း ဢွၼ်ၵၼ်ၶၢႆႉၵႂႃႇႁႃၵိၼ်တၢင်ႇတီႈတၢင်ႇလႅၼ်ၵေႃႈမီး ။ ၵမ်ႈၽွင်ႈ ဢၼ်ပွၵ်ႈၶိုၼ်းဝၢၼ်ႈၽႂ်မိူင်းမၼ်းၵေႃႈမီး ဝႃႈၼႆ။

ၸဝ်ႈႁၢၼ်ႉတၢင်းၶၢႆ ၼႂ်းဝဵင်းတႃႈၶီႈလဵၵ်း ထႅင်ႈၵေႃႉၼိုင်ႈ ၵေႃႈလၢတ်ႈဝႃႈ-  “ မိူဝ်ႈလဵဝ်ၼႆႉၵၢၼ်ၵႃႉၶၢႆတၢင်ႇမဵဝ်းၵေႃႈ ဢမ်ႇလီ ။ တေဝႃႈၶၢႆမၢၵ်ႇၶိူဝ်သူမ်ႈၵေႃႈ ၶတ်းၸႂ်ႁဵတ်းမႃးပဵၼ်တိူၵ်ႇပဵၼ်သူၼ်။  ပေႃးလႆႈမၢၵ်ႇမၼ်းမႃးၵေႃႈ လႆႈၶၢႆ ၼိုင်ႈ ၵီႊလူဝ်ႊ 14−15 ဝၢတ်ႇငိုၼ်းထႆးၵူၺ်းၼႃႇ။ ၵႃႈၾုၼ်ႇၵႃႈၼမ်ႉၵူၺ်းၵေႃႈ ဢမ်ႇလႆႈၶိုၼ်း လူးၵွၼ်ႇ။ ၽၵ်းၶဵဝ် ၼႆတႄႉ ဢမ်ႇလႆႈတိုၼ်းလၢင်းၵေႃႈ ၵႃႈလႆႈၶၢႆယဝ်ႉ။ ၵၢၼ်ပၢႆးမၢၵ်ႈမီးၼႆႉ  တိုၼ်းဢမ်ႇပဵၼ်ၵၢၼ်ၼႆ ၵမ်းလဵဝ်ဢိူဝ်ႈ တီႈၼႆႈၼႆႉ ။ သုၼ်ႇၼမ်မၼ်းတႄႉ ၵူၼ်းတၢင်ႇတီႈတၢင်ႇဝဵင်းဢၼ်မႃးႁႃၵိၼ်ၶဝ် ဢမ်ႇပဵၼ်ၵၢၼ်လႄႈ ပိူၼ်ႈၵေႃႈမိူဝ်းၶိုၼ်းၵမ်ႈၽွင်ႈ ။”- ဝႃႈၼႆ။

ယွၼ်ႉၵၢၼ်ၵႃႉၶၢႆဢမ်ႇပဵၼ်လႄႈ ၵူၼ်းမိူင်း ႁႃၵိၼ်လဵင်ႉတွင်ႉယၢပ်ႇ၊     ၽူႈလၵ်ႉၸၵ်ႉၶုတ်ႈၵေႃႈလိူင်ႇၼမ်မႃး  ။ ပေႃးဢမ်ႇမီးၵူၼ်းပႂ်ႉႁိူၼ်းတႄႉ ဢမ်ႇၸၢင်ႈဢွၵ်ႇၵႂႃႇတၢင်းလႂ်။ ၽူႈလၵ်ႉၸိူဝ်းၼႆႉဢမ်ႇဝဵၼ်ႉဝၼ်းဝဵၼ်ႉၶိုၼ်း၊ ႁၼ်သင်ၶဝ်ႈလၵ်ႉမူတ်း။ ပေႃးၵႂႃႇၵၢင်တႃႈၵၢင်တၢင်းၵေႃႈဢမ်ႇဝႃႈယိင်း ဢမ်ႇဝႃႈၸၢႆး တိုၼ်းဢမ်ႇမီး လွင်ႈႁူမ်ႇလူမ်ႈသေဢိတ်းယဝ်ႉ – ၽူႈယိင်း ၵူၼ်းမိူင်းဝဵင်းတႃႈၶီႈလဵၵ်း ၵေႃႉၼိုင်ႈလၢတ်ႈၼင်ႇၼႆ။