ဝၼ်းတီ 27/03/2025 ၼႆႉပဵၼ်ဝၼ်းတပ်ႉသိုၵ်းမၢၼ်ႈ ၸတ်းႁဵတ်းပၢင်ၵႅဝ်ႈယႂ်ႇ တီႈ ၼေႇပျီႇတေႃႇ  ၸွမ်ၸိၵ်းသိုၵ်းမၢၼ်ႈၵဝ်ႇၵႄႇ ပႃးၸဵမ် တူဝ်တႅၼ်းၸုမ်းၸၢဝ်းၶိူဝ်း ၸိူဝ်းလူင်းလၢႆးမိုဝ်းငမ်းယဵၼ် NCA ၸိူဝ်းၼႆႉၶဝ်ႈႁူမ်ႈ။

ဝၼ်းတပ်ႉသိုၵ်းမၢၼ်ႈၶွပ်ႈတဵမ် 80 ပီ ပီၼႆႉ လၢၵ်ႇလၢၵ်ႇလၢႆးလၢႆးသိုၵ်းမၢၼ်ႈ ၸတ်းႁဵတ်းပွႆးတီႈၼေႇပျီႇတေႃႇ ယၢမ်းၵၢင်ၶမ်ႈ။ ႁွင်ႈၵၢၼ်ၶၢဝ်ႇမၢၼ်ႈ BBC တႄႉတႅမ်ႈတၢင်ႇဝႆႉဝႃႈ – သိုၵ်းမၢၼ်ႈဢၢၼ်းႁဵတ်းပၢင်လိူၵ်ႈတင်ႈလႄႈ မၼ်းၸၢႆးယိူင်းဢၢၼ်းတႃႇပေႉပၢင်လိူၵ်ႈတင်ႈ။ ၵွပ်ႈၼႆ လႅပ်ႈမၼ်းၸၢႆးတေယိူင်းဢၢၼ်း ၶိုၼ်ႈၶဵင်ႇႁပ်ႉသိုၵ်းတၵ်ႉယမ် ပဵၼ်ၵမ်းလိုၼ်းသုတ်းၵေႃႈပဵၼ်လႆႈ- ဝႃႈၼႆ။

ပီၼႆႉ လၢၵ်ႇလၢၵ်ႇလၢႆးလၢႆး သမ်ႉႁဵတ်းပႃးပၢင်ၵိၼ်ၶဝ်ႈႁူမ်ႈမူႇ လူင်ႈၼႃႈ  မိူဝ်ႈၶမ်ႈသိုၼ်း ဝၼ်းတီႈ 26/03/2025  ။

ၼႂ်းၽိုၼ်ၶၢဝ်ႇမၢၼ်ႈ မျၢၼ်ႇမႃႉဢလိၼ်း တႅမ်ႈဝႆႉဝႃႈ – တီႈပၢင်ၵိၼ်ၶဝ်ႈႁူမ်ႈမူႇၼၼ်ႉ ၸွမ်ၸိၵ်းသိုၵ်းမၢၼ်ႈယိုတ်းမိူင်းမိၼ်းဢွင်ႇလၢႆႇ မွၵ်ႇလၢတ်ႈၶေႃႈၵႂၢမ်းဝႃႈ- သိုၵ်းမၢၼ်ႈၼႆႉ မီးတူဝ်ထူပ်းမႃးၸွမ်းပိုၼ်းမိူင်းမၢၼ်ႈ ပၢၼ်သိုပ်ႇပၢၼ် ။ လႆႈၵႅတ်ႇၶႄႁႄႉၵင်ႈ ၶဵၼ်ၼွၵ်ႈမိူင်းၼႂ်းမိူင်း၊ လႆႈၵႅတ်ႇၶႄပၼ်ပႃးၾိင်ႈငႄႈၾိင်ႈထုင်းလႄႈ ၽႃသႃ သႃသၼႃၸိူဝ်ႉၸၢတ်ႈ ၊ ပီၼႆႉသဵင်ႈၵေႃႈဢၢၼ်းတေၸတ်းပၢင်လိူၵ်ႈတင်ႈႁႂ်ႈလႆႈသေ တေဢဝ်ဢႃႇၼႃႇမွပ်ႈပၼ်ၼႂ်းမိုဝ်းပႃႇတီႇၵၢၼ်မိူင်းၸိူဝ်းပေႉပၢင်လိူၵ်ႈတင်ႈ – ဝႃႈၼႆ။

လိူဝ်ၼၼ်ႉၸွမ်ၸိၵ်းသိုၵ်းမၢၼ်ႈလၢတ်ႈပႃးဝႃႈ – ၶႂ်ႈၵၼ်ႇတေႃး ၸွမ်ၸိၵ်းသိုၵ်းမၢၼ်ႈၸိူဝ်းဢွၼ်ၼမ်း ၵၢၼ်သိုၵ်း ၵၢၼ်မိူင်းမၢၼ်ႈမႃးပၢၼ်သိုပ်ႇပၢၼ် ၼႆသေ ၵၼ်ႇတေႃးၸွမ်ၸိၵ်းသိုၵ်းမၢၼ်ႈဢူးတဵင်းၸဵင်ႇ (ၸွမ်ၸိုင်ႈမိူင်းမၢၼ်ႈၵေႃႉၵဝ်ႇၽွင်းပီ 2010 ထိုင် 2015 ) ၊ ၸွမ်သိုၵ်းဢွင်ႇထူၺ်း -ဢိၵ်ႇပႃးထႅင်ႈၸွမ်ၸိၵ်း သိုၵ်းမၢၼ်ႈၵႄႇထဝ်ႈ လႄႈမေးၼၢင်းၶဝ်ၸိူဝ်းမႃၶဝ်ႈႁူမ်ႈပၢင်  ။ ၸွမ်ၸိၵ်းသိုၵ်းမၢၼ်ႈဝႃႈ – ၸိူဝ်းၶဝ်ၼႆႉ ၵိုတ်းလိုဝ်ႈၵၢၼ်သိုၵ်းယဝ်ႉၵေႃႈယင်းတိုၵ်ႉၸွႆႈၵၢၼ်ၾၢႆႇၵၢၼ်သိုၵ်းလႄႈ ၵၢၼ်မိူင်းယူႇတေႃႇထိုင် ဝၼ်းမိူဝ်ႈၼႆႉ – ဝႃႈၼႆ။

လိူဝ်ၼၼ်ႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ယင်းပိုတ်ႇပၢၵ်ႇလၢတ်ႈ တၢင်ႇတၢင်းၽိတ်းၼိူဝ် ၵေႃပွင် ၵၢၼ်တႅၼ်း တၢင် သၽႃးမိူင်းႁူမ်ႈတုမ် CRPH ၊ လူင်ပွင်ၸိုင်ႈ မိူင်းႁူမ်ႈတုမ်ၸူဝ်ႈၶၢဝ်း NUG လႄႈ တပ်ႉသိုၵ်းၵႅတ်ႇၶႄၵူၼ်းမိူင်း မိူင်းမၢၼ်ႈ PDF ၸိူဝ်းၼႆႉၵႂႃႇ ဝႃႈၼင်ႇၼႆ။

“မိူဝ်ႈပၢင်လိူၵ်ႈတင်ႈ ပီ 2020 ၼၼ်ႉ မီးလွင်ႈမၢပ်ႇမႂ်ဢဝ်ၶႅပ်းၵၢင်ၸႂ်ၼိူဝ်ၵၼ်သေ ၾၢႆႇပႃႇတီႇၼူၵ်ႉယုင်း NLD ၶိုင်ၸတ်း တဵၵ်းႁိမ်ဢဝ်ဢႃႇၼႃႇဝၢၼ်ႈမိူင်းၵွႆးဢမ်ႇၵႃး ၸုမ်း CRPH ၊ NUG ၊ PDF ၶဝ်ၸိူဝ်းၼႆႉၵေႃႈ ယိပ်းၵွင်ႈၵၢင်ႇသေ ပႂ်ႉတဵၵ်းႁိမ် ဢႃႇၼႃႇယူႇ။ ယၢမ်းလဵဝ် ၸုမ်းယိပ်းၵွင်ႈၵၢင်ႇၸိူဝ်းၼႆႉ ၶဝ်ၸႂ်ႉပိူင်ႁေႃၶမ်းသိုၵ်း ၼိုင်ႈပိုၼ်ႉတီႈ လႅဝ်းၼိုင်ႈမၢၵ်ႈ နယ်တနယ် ဓါးတစင်း စစ်ဘုရင်ဝါဒ (ၵႆႇၼိုင်ႈတူဝ် ၶၼ်ၼိုင်ႈၵုင်း- တၢင်းႁဵတ်းၵဝ်ႉၼႄးၵႃ ၵႃၼႄးၵဝ်ႉ)” ၼႆယဝ်ႉ။

ထႅင်ႈလွင်ႈၼိုင်ႈၵေႃႈ ၸွမ်ၸိၵ်းသိုၵ်းမိၼ်းဢွင်ႇလၢႆႇ ယင်းတိုၵ်းသူၼ်းႁႂ်ႈ တပ်ႉသိုၵ်းၵႅတ်ႇၶႄၵူၼ်းမိူင်း မိူင်းမၢၼ်ႈ PDF  ႁႂ်ႈဝၢင်းၶိူင်ႈၵွင်ႈၵၢင်ႇသေ လိူၵ်ႈပႆၸွမ်းသဵၼ်ႈတၢင်း ပၢင်လိူၵ်ႈတင်ႈ ဢၼ်တေၸတ်းႁဵတ်းၵႂႃႇ ၼႂ်းႁၢင်ပီ 2025 ၼႆႉ ၼႆယဝ်ႉ။

ၾၢႆႇၼိုင်ႈတၢင်းၼိုင်ႈၵေႃႈ တွၼ်ႈတႃႇတေၵႄႈလိတ်ႈပၼ်ႁႃၵၢၼ်မိူင်းလႆႈၼႆႉ ပၢင်ႁူပ်ႉထူပ်းဢုပ်ႇဢူဝ်းၵၼ်ၵွႆး တေ ၸၢင်ႈပဵၼ်ၵၢၼ်။ ၼင်ႇႁိုဝ် တေၸတ်းလႆႈ ပၢင်ဢုပ်ႇဢူဝ်းလွင်ႈငမ်းယဵၼ်ၼၼ်ႉၵေႃႈ ယိၼ်းလီႁပ်ႉတွၼ်ႈ ပိုတ်ႇသဵၼ်ႈ တၢင်းပၼ်ဝႆႉယူႇ ၵူႈယၢမ်း ၼႆ တၢမ်တူဝ် ၸွမ်ၸိၵ်းသိုၵ်းမိၼ်းဢွင်ႇလၢႆႇ မွၵ်ႇလၢတ်ႈပိုၼ်ၽၢဝ်ႇၵႂႃႇ ၼႂ်းပၢင်ၵႅဝ်ႈ ဝၼ်း ၶွပ်ႈၶူပ်ႇ 80 ပီတဵမ်တပ်ႉသိုၵ်းမၢၼ်ႈ ၼင်ႇၼႆ။

ဢၢင်ႈဢိင်- မျၢၼ်ႇမႃႉဢလိၼ်း- BBC

တႅမ်ႈ-ၽူၺ်းၼုမ်ႇ