ၾၢႆႇၽွင်းငမ်းၵူႈလွင်ႈလွင်ႈဝဵင်းၼမ်ႉၸၢင် ၶၢၼ်းႁေႃႇၶဝ်ႈၵူၼ်းမိူင်း ဝႃႈတႃႇလဵင်ႉၸုမ်းၵျႃးၽႅၼ်ႉ ၸိူဝ်းၺႃးတီႉၸိူဝ်းၼၼ်ႉ ၼႆသေ    ၽိူဝ်ႇလႆႈႁေႃႇၶဝ်မႃး သမ်ႉၶိုၼ်းၶၢႆၵိၼ်။ 

 ဝၼ်းတီႈ 22/3/2025 သိုၵ်းမၢၼ်ႈတီႉၵူၼ်းၵျႃးၽႅၼ်ႉ ၼႂ်းဢိူင်ႇလၢႆးၶႃႈ ၊ ၵေးသီး ၊ ၼမ်ႉၸၢင်  ၊ ၶူဝ်လမ် လၢႆလၢႆဝဵင်း ၼႂ်းၸိုင်ႈတႆး ပွတ်းၸၢၼ်းသေ ဢဝ်မႃးဝႆႉတီႈ ႁူင်းလဵၼ်ႈဢဵၼ်ႁႅင်း ပွၵ်ႉ 5 ဝဵင်းၼမ်ႉၸၢင်     ႁူဝ်ၵူၼ်းမီး 723 ၵေႃႉ ၊ ၾၢႆႇၽွင်းငမ်း သင်ႇၵၢင်ႉၵႄႇႁႂ်ႈ ၶၢၼ်းၵူၼ်းမိူင်းပိုၼ်ႉတီႈ ၼိုင်ႈပွၵ်ႉလႂ် ႁႂ်ႈသူင်ႇပၼ်ႁေႃႇၶဝ်ႈ 150 ႁေႃႇ     ဝႃႈၼႆဝႆႉ ။

ႁေႃႇၶဝ်ႈဢၼ်လႆႈမႃးတီႈၵူၼ်းမိူင်း ၸိူဝ်းၼၼ်ႉ ႁွင်ႈၵၢၼ် ၾၢႆႇၽွင်းငမ်းၵူႈလွင်ႈလွင်ႈ ၶိုၼ်းဢဝ်ၵႂႃႇၶၢႆပၼ် ၸုမ်း ၵျႃးၽႅၼ်ႉၺႃးတီႉၸိူဝ်းၼၼ်ႉ  ၼိုင်ႈႁေႃႇလႂ် 2 ထိုင် 3 မိုၼ်ႇပျႃး ၵူၼ်းပိုၼ်ႉတီႈလၢတ်ႈၼင်ႇၼႆ။  

ၼၢင်းယိင်းဢႃယုမွၵ်ႈ 30 ပီ ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ ႁွင်ႈၵၢၼ်ၾၢႆႇ ၽွင်းငမ်း ၵူႈလွင်ႈ လွင်ႈ ယွၼ်းႁေႃႇၶဝ်ႈတီႈႁဝ်းၶႃႈ ဝႃႈတူၺ်းလူၸွႆႈထႅမ်ၵူၼ်းတေႃႇၵူၼ်းၼႆ။ ၽိူဝ်ႇသူင်ႇပၼ်ၶဝ်ယဝ်ႉ ၶဝ်ဢဝ်ၵႂႃႇၶၢႆပၼ်ၸုမ်းၵျႃးၽႅၼ်ႉၸိူဝ်းၼၼ်ႉ။ ႁေႃႇၶဝ်ႈ ၼိုင်ႈႁေႃႇ 2-3 မိုၼ်ႇ။ ၼမ်ႉၵိၼ်ၵေႃႈၼိုင်ႈၽႅၵ်ႉ 2 မိုၼ်ႇပျႃး။  ၶဝ်လႆႈငိုၼ်းၵႂႃႇၼမ်တၢၼ်ႇတၢၼ်ႇမၼ်းယူႇဢေႃႈ။ ၵူၼ်းဢၼ်လႆႈႁပ်ႉသိုဝ်ႉၾူၼ်းၶဝ် ၵေႃႈဝႃႈ သိုၵ်းမၢၼ်ႈယိုတ်းဢဝ်ၾူၼ်းလႄႈ ၶွမ်ႊ တီႈၸုမ်းၵျႃးၽႅၼ်ႉၸိူဝ်းၼၼ်ႉသေ ၶိုၼ်းဢဝ်ၵႂႃႇၶၢႆၵိၼ် ၵေႃႈမီးၼႆလူးၵွၼ်ႇ ”- ဝႃႈၼႆ။

 သိုၵ်းမၢၼ်ႈဢဝ်ၸုမ်းၵျႃးၽႅၼ်ႉမႃးဝႆႉတီႈဝဵင်းၼမ်ႉၸၢင်ပေႃးတေမီးဝူင်ႈယဝ်ႉၵေႃႈ ပႆႇသူင်ႇၶိုၼ်းၼႆႉပဵၼ်ယွၼ်ႉသင်  ၶဝ်ပႂ်ႉသင်ဢမ်ႇႁူႉယဝ်ႉၼႆ ၵူၼ်းမိူင်းဝဵင်းၼမ်ႉၸၢင်လၢတ်ႈၼင်ႇၼႆ။

“ႁွင်ႈၵၢၼ်ၾၢႆႇၽွင်းငမ်းၵူႈလွင်ႈၼႆႉ ၶႆႈဝႃႈ ပဵၼ် ၵျႃးၽႅၼ်ႉ ထီႉသွင်ယဝ်ႉ ၊ လႅၼ်ၵူၼ်းမိူင်းၵမ်းသိုဝ်ႈ ၊     ယွၼ်ႉသင်လႄႈၶဝ်ပႆႇသူင်ႇၵူၼ်းၵျႃးၽႅၼ်ႉပွၵ်ႈၶိုၼ်းၵေႃႈဢမ်ႇႁူႉ။ ဝႃႈတေသူင်ႇၶိုၼ်း ဝၢၼ်ႈၽႂ် ဝဵင်းမၼ်းၼႆ ၊ ၶႆႈႁႂ်ႈ ၶဝ်မိူဝ်းၽႂ်းၽႂ်းယဝ်ႉ  ”- ဝႃႈၼႆ ။

ယွၼ်ႉဝၢၼ်ႈမိူင်းဢမ်ႇၼိမ်သဝ်း ပၢႆးမၢၵ်ႇမီးလူမ်ႉလႄႈ ၵူၼ်းၼုမ်ႇ ၼႂ်းဝၢၼ်ႈ ၼႂ်းမိူင်းဢမ်ႇမီးၵၢၼ်၊ ၸင်ႇလႆႈဢွၼ်ၵၼ်ၵႂႃႇႁဵတ်းၵၢၼ်ၵျႃးၽႅၼ်ႉ (လွၵ်ႇလႅၼ်ၵိၼ်ငိုၼ်းၵၼ်) ၼႆႉပဵၼ်ဢၼ်လီသေးလၢႆလူင်လၢင် ၼႆ  ၵူၼ်းပိုၼ်ႉတီႈၵေႃႉၼိုင်ႈ တိုၵ်းသူၼ်းပႃးဝႆႉ ၼင်ၼႆ ။

ၸွမ်းၼင်ႇ လူင်ပွင်ၸိုင်ႈၶႄႇ မိပ်ႇဢီးသေ တႄႇဢဝ် ႁူဝ်လိူၼ်သႅပ်ႊထႅမ်ႊပိူဝ်ႊ ပီ 2023  မႃး  သိုၵ်းဝႃႉ ၵူတ်ႇထတ်း တီႉၺွပ်းၸၢဝ်းၶႄႇ ၸိူဝ်းႁဵတ်းၵၢၼ်လႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ ႁၢဝ်ႈႁႅင်း။ လိုပ်ႈလမ်းတီႉၺွပ်းၸိူဝ်းမီးၼႂ်းၼႃႈလိၼ်ဢၼ်သိုၵ်းဝႃႉတူင်ႉၼိုင်ၵုမ်းတူၺ်းၼၼ်ႉၶိူဝ်းယႂ်းသေ သူင်ႇၸူးတၢင်းၾင်ႇမိူင်းၶႄႇ ။

ၸုမ်းလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊၼႆႉ ၸင်ႇလုၵ်ႉတၢင်းၼႂ်းၼႃႈလိၼ်ၽွင်းငမ်းတူဝ်ၵဝ်ႇ တပ်ႉသိုၵ်းၵဝ်ႈၵၢင်ႉ တၢင်းဝဵင်းလၢဝ်ႇၵၢႆး၊ ဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ) ၸိူဝ်းၼၼ်ႉလႄႈ ၼႂ်းၼႃႈလိၼ်ၽွင်းငမ်းတူဝ်ၵဝ်ႇ တပ်ႉသိုၵ်းဝႃႉ ၼႂ်းဝဵင်းပၢင်သၢင်း ၸိူဝ်းၼႆႉသေ ပၢႆႈလူင်းမႃးသွၼ်ႈဝႆႉ တၢင်းမိူင်းယႆ – တၢင်ႉယၢၼ်း ၼႂ်းၼႃႈတီႈပျီႇတူႉၸိတ်ႉၵုမ်းၵမ်။  ယၢမ်းလဵဝ် ၶၢႆႉပၢႆႈမႃးသွၼ်ႈယူႇဝႆႉ ၼႂ်းၸိုင်ႈတႆး ပွတ်းၸၢၼ်း ၸိူဝ်းၼႆႉထႅင်ႈ  ။