မိူဝ်ႈၼႆႉ ဝၼ်းတီႈ 19/8/2025 ယၢမ်းၵၢင်ၼႂ် 11 မူင်း တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း သိုၵ်းမၢၼ်ႈၸီႉသင်ႁႂ်ႈၵူၼ်းမိူင်း ဢွၵ်ႇၼႄၵၢင်ၸႂ်သၢၼ်ၶတ်းၸုမ်သိုၵ်းၸၢဝ်းၶိူဝ်းသၢမ်ၸုမ်း ဢၼ်ပဵၼ်ပၢင်တိုၵ်းယူႇမိူင်းတႆးပွတ်းႁွင်ႇၼၼ်ႉ၊ သိုၵ်းမၢၼ်ႈႁႂ်ႈၵူၼ်းမိူင်း လုၵ်ႉတီႈပၢင်ႇသဝ်ႁိၼ်( ကျောက်တိုင်ကွင်း ) ပႆတၢင်းၼႄၵၢင်ၸႂ် ၵႂႃႇထိုင်တီႈၵွင်းမူးႁူဝ်ဝဵင်း သူႇလႃႇမုၼိ (စူဠာမုဏိ ) ဝႃႈၼႆ။
ၽူႈၶဝ်ႈၸုမ်း TGI Support Revolution လၢတ်ႈၽူႈတွႆႇႁွၵ်ႈဝႃႈ-“ ႁၼ်ဝႃႈ လွင်ႈၼႆႉတင်ႈၸႂ်ႈ သေႃႇသူၼ်း သၢင်ႈပၼ်ႁႃ ၼႂ်းၵႄႈၵၢင်ၸၢဝ်းၶိူဝ်းၵူၺ်း ၊ ၵူၼ်းဢၼ်တေၵႂႃႇၼႄၵၢင်ၸႂ်ၵေႃႈ တေပဵၼ်ၵူၼ်းဢၼ် လႆႈၵိၼ်ငိုၼ်းတီႈသိုၵ်းမၢၼ်ႈ ၵေႃႉ 5 ႁဵင်ပျႃးၸိူဝ်းၼၼ်ႉၵူၺ်း။ တေပဵၼ်ၵူၼ်းမိူင်းလုၵ်ႉတၢင်းဝဵင်း ဢေးတႃႇယႃႇၶိုၼ်ႈမႃး။ပဵၼ်ၵူၼ်း ၸိူဝ်းၵမ်ႉထႅမ်သိုၵ်းမၢၼ်ႈၼၼ်ႉၵူၺ်း ၊ ပေႃးၶဝ် (သိုၵ်းမၢၼ်ႈ ) ၸႂ်ႉၼႄၵၢင်ၸႂ်တႄႉလႆႈယူႇ ၊ ပေႃးၵူၼ်းမိူင်းၼႄၵၢင်ၸႂ်သၢၼ်ၶတ်းၶဝ်တႄႉဢမ်ႇလႆႈ။ ၶဝ်တေတီႉၺွပ်းပေႉၵိၼ် ”- ဝႃႈၼႆ ။
ၵူၼ်းၼႄၵၢင်ၸႂ်တီႈဝဵင်းတူၼ်းတီး တေမီးမွၵ်ႈ 200 ၵေႃႉ ၸိူဝ်းၶဝ်ယိပ်းပၢႆႉဝႆႉ၊ ၼႂ်းပၢႆႉၼၼ်ႉတႅမ်ႈဝႆႉဝႃႈ – တႃႇၵူၼ်းမိူင်းၼႂ်းပိုၼ်ႉတီႈ တေလႆႈယူႇသဝ်းၵတ်းယဵၼ်ၼၼ်ႉ TNLA / MNDAA / AA သၢမ်ၸုမ်း ႁႂ်ႈဢွၵ်ႇပိုၼ်ႉတီႈၵႂႃႇဝႆးဝႆး ဝဵင်းသီႇပေႃႉ – ၵျွၵ်ႉမႄး – သႅၼ်ဝီ ၸိူဝ်းၼၼ်ႉ ပဵၼ်မိူင်းတႆးႁဝ်းမူတ်းမူတ်း – ၸဵမ်ၸိူဝ်းၼႆႉ။
ၼႂ်းၵူၼ်းၼႄၵၢင်ၸႂ်ဝၼ်းမိူဝ်ႈၼႆႉၼႆႉ ပဵၼ်ၵူၼ်းလုၵ်ႉတၢင်းဝဵင်း ဢွင်ႇသပႄႇ( အောင်သပြေ) လႄႈ ဝဵင်းဢေးတႃႇယႃႇၶိုၼ်ႈမႃး။ ၵူၼ်းပိုၼ်ႉတီႈလၢတ်ႈဝႃႈ သိုၵ်းမၢၼ်ႈပၼ်ငိုၼ်းၶဝ် ၼိုင်ႈၵေႃႉ 1 မိုၼ်ပျႃး ၸႅၵ်ႇပႃးႁေႃႇၶဝ်ႈဝၼ်းလႄႈၼမ်ႉၵိၼ် – ဝႃႈၼႆ ။
ၵဵဝ်ၵပ်းလွင်ႈၼႆႉၸုမ်းၶွၼ်ႊၵရႅတ်ႉၵူၼ်းၼုမ်ႇတႆး Dai Youth Congress ပိုၼ်ၽၢဝ်ႇဝႆႉဝႃႈ – ပဵၼ်ၽႅၼ်ၵၢၼ်သိုၵ်းမၢၼ်ႈ တဵၵ်းႁႂ်ႈၵူၼ်းပိုၼ်ႉတီႈ ဢွၵ်ႇၼႄၵၢင်ၸႂ် ၼိုင်ႈႁိူၼ်းၼိုင်ႈၵေႃႉ။ လၢႆးႁဵတ်းၼႆႉ ၸႅၵ်ႇၽႄလွင်ႈၽွမ်ႉႁူမ်ႈၸၢဝ်းၶိူဝ်းၼႂ်းမိူင်းတႆး ႁႂ်ႈတႅၵ်ႇယၢႆႈၵၼ် ၵွပ်ႈၼၼ် ယူႇတီႈ DYC သေ သၢၼ်ၶတ်းႁၢဝ်ႈႁႅင်းဝႃႈၼႆ ။
ဝဵင်းဢၼ်ဢွၵ်ႇၼႄၵၢင်ၸႂ်သၢၼ်ၶတ်း သိုၵ်းၸၢဝ်းၶိူဝ်းသၢမ်ၸုမ်းၼႆႉ ၼႂ်းဝၼ်းတီႈ 18/8/2025 ဝဵင်းမိူင်းၼၢႆး ၊ မိူင်းပၼ်ႇ ၊ ၵုၼ်ႁိင်း ၊ ၶူဝ်လမ် ၼႂ်းဝၼ်းမိူဝ်ႈၼႆႉ ဝၼ်းတီႈ 19 /8/2025 တႄႉ ဝဵင်းပၢင်လူင် ၊ လၢႆးၶႃႈ ၊ ၼမ်ႉၸၢင် ၊ မွၵ်ႇမႆႇ ။ ၼႂ်းဝၼ်းတီႈ 20/8/2025 ၼၼ်ႉတႄႉ တေပဵၼ်ဝဵင်းမိူင်းယႆ လႄႈ ဝဵင်းၼမ်ႉလၼ်ႈ ၸိူဝ်းၼႆႉ ။
မိူၼ်ၼင်ႇၼႆ ဝၼ်းတီႈ 19/8/2025 ယၢမ်းၵၢင်ၼႂ် 9 မူင်းသိုၵ်းမၢၼ်ႈၸီႉသင်ႇ ၵူၼ်းမိူင်းၼႂ်း ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်းၵေႃႈ ႁွင်ႈၵၢၼ်ၾၢႆႇၽွင်းငမ်းတႂ်ႈသိုၵ်းမၢၼ်ႈ ႁူၺ်းသူၼ်း ၵူၼ်းပိုၼ်းတီႈၼိုင်ႈႁိူၼ်းၼိုင်ႈၵေႃႉ ယိပ်းပၢႆႉၼႄၵၢင်ၸႂ် ႁႂ်ႈၼုင်ႈၶူဝ်းၸၢဝ်းၶိူဝ်းၸဝ်ႈၵဝ် ၼႄၵၢင်ၸႂ် တေႃႇၸုမ်းသိုၵ်းၸၢဝ်းၶိူဝ်းသၢမ်ၸုမ်းဝႃႈၼႆ ။
ၼၢင်းယိင်းဢႃယု 30 ၵူၼ်းမိူင်းဝဵင်းၼမ်ႉၸၢင်လၢတ်ႈၽူႈတွႆႇႁွၵ်ႈဝႃႈ -“တီႈၵုၼ်ႁိင်း ၊ မိူင်းပၼ်ႇ ၸိူဝ်းၼႆႉ လႆႈႁဵတ်းယဝ်ႉ ၊ ၼမ်ႉၸၢင်ၼႆႉ ဢမ်ႇႁဵတ်းဢမ်ႇလႆႈ လူဝ်ႇလႆႈႁဵတ်းၼႆ လၢတ်ႈႁႂ်ႈၼုင်ႈၶူဝ်းတႆးတင်းၸုမ်ႇ မႃးတီႈႁူင်းႁေႃးၵၢင်ဝဵင်း (ခန်းမ) ၼႆ ၊ ႁႂ်ႈၶဝ်မႃးႁူၺ်းသူၼ်းတီႈႁိူၼ်းတႄႉဢမ်ႇၸႂ်ႈ ၊ ၶဝ်ႁူၺ်းသူၼ်းၵူၼ်းၸမ်ၸႂ်ၶဝ်ၸိူင်ႉၼၼ်”- ဝႃႈၼႆ ။
ၶွမ်ႊမသျိၼ်ႊသိုၵ်းမၢၼ်ႈၼႆႉ ႁၢင်ႈႁႅၼ်းဝႆႉ တေဢၢၼ်းၸတ်းႁဵတ်းပၢင်လိူၵ်ႈတင်ႈ ပတ်းပိုၼ်ႉၸိုင်ႈမိူင်း ႁႂ်ႈပေႃးလႆႈၼႂ်းႁၢင်ပီ 2025 ၼႆႉသေ ပိူဝ်ႈတႃႇတေၸတ်းႁဵတ်းလႆႈ ၵူႈၸႄႈဝဵင်း ၼႂ်းမိူင်းတႆးပွတ်းႁွင်ႇ ပႃးၼၼ်ႉ သိုၵ်းမၢၼ်ႈ ၶိုင်ပွင်ၵူႈလၢႆးတၢင်း ပိူဝ်ႈတႃႇၵုမ်းၵမ်ၶိုၼ်းလႆႈ ၸႄႈဝဵင်းၸိူဝ်းလႆႈသုမ်းပၼ် ၸုမ်းသိုၵ်းၸၢဝ်းၶိူဝ်းသၢမ်ၸုမ်း ၵုမ်းၵမ်ဝႆႉၼၼ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ