ဝၼ်းတီႈ 26/03/2025 ယၢမ်းႁူဝ်ၶမ်ႈၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း Jet fighter သွင်လမ်း မႃးပွႆႇမၢၵ်ႇသႂ်ႇ ၸွမ်းဝၢၼ်ႈ ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ တင်းမူတ်း 5 လုၵ်ႈ ၸၢၵ်ႇမၢၵ်ႇတိူဝ်ႉၺႃးၵူၼ်းမိူင်းလူႉတၢႆ 4 ၵေႃႉ မၢတ်ႇၸဵပ်း 4 ၵေႃႉ ၼႆယဝ်ႉ။

ၶိူင်ႈမိၼ်သိုၵ်းမၢၼ်ႈ ဢၼ်မႃးပွႆႇမၢၵ်ႇ တီႈၸႄႈဝဵင်းၼွင်ၶဵဝ်ၼႆႉ တူၵ်းသႂ်ႇတီႈဝၢၼ်ႈဢုမ်းမၶႃး 2 လုၵ်ႈ၊ ဝၢၼ်ႈသၢမ်သိူဝ် 2 လုၵ်ႈလႄႈ ဝၢၼ်ႈသူၺ်ႇၺွင်ႇပိၼ်ႇ 1 လုၵ်ႈ တင်းမူတ်း 5 လုၵ်ႈ ၼႆယဝ်ႉ။

ယွၼ်ႉသိုၵ်းမၢၼ်ႈ ပွႆႇမၢၵ်ႇၼႆႉသေ ၵူၼ်းဝၢၼ်ႈဢုမ်းမၶႃး လူႉတၢႆ 4 ၵေႃႉ မၢတ်ႇၸဵပ်း 4 ၵေႃႉ ၵူၼ်းဝၢၼ်ႈ ဢၼ်လႆႈလူႉတၢႆၵႂႃႇၼၼ်ႉ ပဵၼ်ၵူၼ်းၸၢႆးသွင်ၵေႃႉလႄႈ ၵူၼ်းယိင်းသွင် ၵေႃႉ ဝႃႈၼႆ။

ၼႂ်းလိူၼ်မၢတ်ႊၶျ်ၼႆႉၵူၺ်း သိုၵ်းမၢၼ်ႈ ပွႆႇမၢၵ်ႇသႂ်ႇ ၸွမ်းဝၢၼ်ႈၼႃးၵျွင်းၶမ်း၊ ဝၢၼ်ႈယႃႇပိၼ်ႇ ဢိူင်ႇၼွင်ႇတေႃႇ၊ ဝတ်ႉတိူၵ်ႈသွၼ်လိၵ်ႈ သဵင်ႇရတၼႃႇ ဢၼ်မီးတၢင်းၾၢႆႇဢွၵ်ႇ ဝဵင်းၼွင်ၶဵဝ် ပႃးၸဵမ်ဝၢၼ်ႈ ၵျွၵ်ႉၵျၢၼ်း၊ တီႈဝၢၼ်ႈဢုမ်းမၶႃး၊ ဝၢၼ်ႈသၢမ်သိူဝ်လႄႈ ဝၢၼ်ႈၺွင်ႇလေးပိၼ်ႇ ၸိူဝ်းၼႆႉ။

သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ပွႆႇမၢၵ်ႇသႂ်ႇ ၼႂ်းၸႄႈဝဵင်းၼွင်ၶဵဝ်ၼႆႉ ဢမ်ႇယွမ်း 5 ပွၵ်ႈယဝ်ႉ။ လိူဝ်ၼၼ်ႉ မၢၵ်ႇလူင်တူၵ်းသႂ်ႇ ၼႂ်းဝၢၼ်ႈလႄႈ ၸွမ်းဝတ်ႉဝႃးၽႃသိူဝ်ႇ ၸိူဝ်းၼႆႉ လႆႈလူႉၵွႆတင်းၼမ် ၵူၺ်းဢမ်ႇၵႃး ႁဵတ်းႁႂ်ႈၵူၼ်းမိူင်း သင်ၶၸဝ်ႈ လႆႈလူႉလွၼ်ႇၵႂႃႇ 18 တူၼ်/ ၵေႃႉ မၢတ်ႇၸဵပ်း 26 တူၼ်/ ၵေႃႉ ႁူမ်ႈၵၼ် တင်းမူတ်း 44 တူၼ်/ ၵေႃႉ – ၸွမ်းၼင်ႇ ၸုမ်းၶၢဝ်ႇၽူႈတွႆႇႁွၵ်ႈ ယိုၼ်းထိုင်သေ လႆႈၵဵပ်းၶေႃႈမုလ်းဝႆႉ။