ဝၼ်းတီႈ 25/03/2025 ယၢမ်းတၢမ်းၶမ်ႈ သိုၵ်းမၢၼ်ႈ ႁႅၼ်းသိုၵ်းလေႃႇတိုၵ်းၶိုၼ်း တပ်ႉပၢင်သဝ်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA တီႈဝၢၼ်ႈမႆႉပူၵ်ႇ (မဲပုတ်) ၼႂ်းၸႄႈဝဵင်းၼွင်ၶဵဝ် ဢၼ်ယၢၼ်ၵႆၵၼ်တင်းဝဵင်း မွၵ်ႈ 17 လၵ်းၼၼ်ႉ ၼႆယဝ်ႉ။

တပ်ႉသိုၵ်းမၢၼ်ႈ ဢၼ်ၶဝ်ႈယိုတ်းဢဝ်ၶိုၼ်း ပိုၼ်ႉတီႈသိုၵ်းတဢၢင်းယူႇဝႆႉ တီႈသူၺ်ႇဢေႇယႃႇ ဢၼ်ပဵၼ်ဢွင်ႈတီႈ မုင်ႈယဵမ်ႈတူၺ်း တၢင်းႁၢင်ႈလီမွၵ်ႇၵုမ်ႈ (ရွှေဧရာ တိမ်ပင်လယ်) ဝၢၼ်ႈမႆႉပူၵ်ႇၼႆႉ ပဵၼ်တပ်ႉၵွင်ၶမယ 505 ၼမ်ႉလၼ်ႈတင်း ၶမယ 17 ၼွင်ၶဵဝ် ၼႆယဝ်ႉ။

တွၼ်ႈတႃႇ သိုၵ်းမၢၼ်ႈ တေၵုမ်းလႆႈၶိုၼ်း တပ်ႉပၢင်သဝ်းၸဝ်ႈၵဝ်ႇ ဢၼ်ၺႃးသိုၵ်းတဢၢင်း ၵုမ်းၵမ် လႆႈၵႂႃႇၽွင်းၽႅၼ်ယၼ်ႇသိုၵ်း 1027 ပွၵ်ႈၵမ်းသွင်ၼၼ်ႉ ၾၢႆႇသိုၵ်းမၢၼ်ႈ ၸႂ်ႉႁႅင်းသိုၵ်း ႁႅင်းၻရူၼ်ႊ ႁႅင်းၶိူင်ႈၵွင်ႈလူင်သေ ၶဝ်ႈလူမ်ႇတိုၵ်း သိုၵ်းတဢၢင်းမႃးၶိုၼ်း လၢႆလၢႆပွၵ်ႈယူႇ ၼႆယဝ်ႉ။

ၼႂ်းႁၢင်လိူၼ်မၢတ်ႊၶျ်ၼႆႉ သိုၵ်းမၢၼ်ႈတင်း သိုၵ်းတဢၢင်း ယင်းတိုၵ်ႉသိုပ်ႇပဵၼ်ပၢင်တိုၵ်းၵၼ် ႁၢဝ်ႈႁႅင်းသေ သိုၵ်းမၢၼ်ႈၸႂ်ႉတိုဝ်းၻရူၼ်ႊ ဢိၵ်ႇပႃး ၶိူင်ႈၵွင်ႈလူင် ၸိူဝ်းၼႆႉ လေႃႇတိုၵ်းလႄႈ ထိုင်တီႈသိုၵ်း တဢၢင်းပေႃးလႆႈ ထွႆပၼ်တပ်ႉပၢင်သဝ်း ၼႆယဝ်ႉ။

ၵဵဝ်ႇလူၺ်ႈ ပၢင်တိုၵ်း သိုၵ်းမၢၼ်ႈတင်း သိုၵ်းတဢၢင်း ၼႂ်းၸႄႈဝဵင်းၼွင်ၶဵဝ်ၼႆႉသေ ၽူႈၸမ်ၸႂ်ၼႂ်းတပ်ႉ သိုၵ်းတဢၢင်း ၵေႃႉၼိုင်ႈ တႅမ်ႈတၢင်ႇဝႆႉၼိူဝ် သိုဝ်ႇတူင်ႇဝူင်းၵူၼ်းမၼ်းဝႃႈ – “ၽႅၼ်ၵၢၼ်သိုၵ်းမၢၼ်ႈ ဢၼ်ႁႅၼ်းသိုၵ်း လေႃႇတိုၵ်းၵႂႃႇတၢင်း ဝၢၼ်ႈတွင်းၶမ်းၼႆႉ လႅၵ်ႈလၢႆႈၵႂႃႇ။ ယၢမ်းလဵဝ် ၾၢႆႇသိုၵ်းမၢၼ်ႈ ဢမ်ႇမုင်ႈၼႃႈတိုၵ်းဢဝ်ဝၢၼ်ႈတွင်းၶမ်းၵမ်းသိုဝ်ႈသေ လၢႆႈၽႅၼ်ၵၢၼ်သိုၵ်း ၶဝ်ႈလူမ်ႇတိုၵ်းဢဝ်တၢင်း ဝၢၼ်ႈမႆႉပူၵ်ႇလႄႈ ၾၢႆႇသိုၵ်းတဢၢင်း ၸင်ႇလႆႈထွႆပၼ်တပ်ႉပၢင်သဝ်း”- ဝႃႈၼႆ။

လႆႈႁူႉဝႃႈ ယၢမ်းလဵဝ် ၾၢႆႇသိုၵ်းမၢၼ်ႈတင်ႈဝႆႉ တပ်ႉပၢင်သဝ်း တၢင်းဝၢၼ်ႈသၢမ်သိူဝ် (ဆမ္မဆယ်) ၊ ဝၢၼ်ႈ ၵမ်ႉၵေႃႇ (ဂန့်ဂေါ) ယၢၼ်ၵႆၵၼ်တင်းဝဵင်းၼွင်ၶဵဝ် မွၵ်ႈ 11 ပၢႆလၵ်း၊ ထႅင်ႈ ၾၢႆႇၼိုင်ႈၵေႃႈ မိူဝ်ႈဝႃး ဝၼ်းတီႈ 25/03/2025 ၼၼ်ႉ သိုၵ်းမၢၼ်ႈသိုပ်ႇယိုတ်းလႆႈထႅင်ႈ တပ်ႉပၢင်သဝ်း သိုၵ်းတဢၢင်း တီႈဝၢၼ်ႈမႆႉပူၵ်ႇ ဢၼ်မီးၸဵင်ႇၸၢၼ်းဝၼ်းဢွၵ်ႇ ဝဵင်းၼွင်ၶဵဝ် ယၢၼ်ၵႆၵၼ်တင်းဝဵင်းမွၵ်ႈ 17 လၵ်းၼၼ်ႉ ၼႆယဝ်ႉ။

ယၢမ်းလဵဝ် သိုၵ်းတဢၢင်းတင်း သိုၵ်းမၢၼ်ႈ သိုပ်ႇၶဵင်ႈၶႅင်ၵၢၼ်သိုၵ်းလႄႈ ပဵၼ်ပၢင်တိုၵ်းၵၼ်ဝႆႉႁၢဝ်ႈႁႅင်း ႁိမ်းႁွမ်းဝၢၼ်ႈၺွင်ႇၼီႇ ဢၼ်တိတ်းၸပ်းၵၼ်တင်း ဝၢၼ်ႈတွင်းၶမ်း။ ဝၢၼ်ႈၺွင်ႇၼီႇၼႆႉ မီးၾၢႆႇဢွၵ်ႇ ဝၢၼ်ႈတွင်းၶမ်း ဢၼ်မီးတပ်ႉပၢင်သဝ်း သိုၵ်းတဢၢင်း TNLA သေ ယၢၼ်ၵႆၵၼ်ဝႆႉ မွၵ်ႈ 1 လၵ်းပၢႆ ၼႆယဝ်ႉ။

လိူဝ်ၼၼ်ႉ မိူဝ်ႈဝႃး ဝၼ်းတီႈ 25/03/2025 ၼႆႉၵူၺ်း ၾၢႆႇသိုၵ်းမၢၼ်ႈ ၸႂ်ႉတိုဝ်းၻရူၼ်ႊသေ ၵႂႃႇပွႆႇမၢၵ်ႇသႂ်ႇ တပ်ႉပၢင်သဝ်း တပ်ႉသိုၵ်းပူတ်းပွႆႇၵူၼ်းမိူင်း (ထၼု) DPLA  ဢၼ်ပၵ်းသဝ်းဝႆႉတီႈ ဝၢၼ်ႈၵျွၵ်ႉၵျၢမ်း (ကျောက်ကြမ်းရွာ) ၼၼ်ႉပႃးထႅင်ႈ ၼႆယဝ်ႉ။

ၼႂ်းၸႄႈဝဵင်းၼွင်ၶဵဝ်ၼႆႉ ပဵၼ်တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA တင်း တပ်ႉသိုၵ်းပူတ်းပွႆႇ ၵူၼ်းမိူင်း (ထၼု) DPLA ႁူမ်ႈၵၼ် တိုၵ်းတေႃးသိုၵ်းမၢၼ်ႈဝႆႉ ၼႆယဝ်ႉ။

တႅမ်ႈ – ၽူၺ်းၼုမ်ႇ