ၵဵဝ်ႇလူၺ်ႈ လွင်ႈၾိင်ႈၾႃႉမႆႈႁႅင်းသေ မိူဝ်ႈပီၵၢႆ တီႈမိူင်းထႆးၼၼ်ႉ မီးၵူၼ်းလူႉတၢႆထိုင် 63 ၵေႃႉ ဝႃႈၼႆ။

ယၢမ်းလဵဝ် ၶၢဝ်းယၢမ်းၵၢင်ဝၼ်းတဵင်ႈ ပဵၼ်ၶၢဝ်းႁႅင်းလူမ်းမႆႈၶိုၼ်ႈသုင်လႄႈ မီးၽေးၼမ် ၸၢင်ႈပဵၼ်ႁႅင်းမႆႈ ၼႂ်းတူဝ်ၶိုၼ်ႈသုင် မိူၼ်ၼင်ႇ – မဝ်း၊ ထူၺ်ႈၸႂ်ဝႆး၊ ႁူဝ်ၸႂ်တွတ်ႇဢမ်ႇမၢၼ်ႇလႄႈ ပဵၼ်သျွတ်ႉ ၸိူဝ်းၼႆႉ ပိူင်လူင် ၵူၼ်းၸိူဝ်းဢွၵ်ႇႁဵတ်းၵၢၼ်တၢင်းၼွၵ်ႈ တေလႆႈတိူဝ်းၾၢင်ႉသတိၵၼ် ၼႆယဝ်ႉ။

ၸွမ်းၼင်ႇ ၶေႃႈမုလ်း ႁွင်ႈၵၢၼ် ၾၢႆႇၵုမ်းထိင်း တၢင်းပဵၼ် မိူင်းထႆး ဢွၵ်ႇဝႆႉဝႃႈ – ပီ 2024 ၼၼ်ႉ ၵူၼ်းလူႉ တၢႆယွၼ်ႉမႆႈႁႅင်းၼႆႉ မီး 63 ၵေႃႉ။ ပဵၼ်ၵူၼ်းမိူင်း ၼႂ်းၵႄႈဢႃယု 30 – 95 ပီ။ ၽတ်ႉၽဵင်ႇတႄႉ ပဵၼ်ဢႃယု 62 ပီ။ ၵူၼ်းလူႉတၢႆ ၵမ်ႈၼမ် ပဵၼ်ၵူၼ်းမီးတၢင်းပဵၼ်ၶၢဝ်းယၢဝ်း မိူၼ်ၼင်ႇ – တၢင်းပဵၼ်လိူတ်ႈသုင်၊ ယဵဝ်ႈဝၢၼ်လႄႈ တၢင်းပဵၼ်ႁူဝ်ၸႂ် ၸိူဝ်းၼႆႉ။ ယဝ်ႉၵေႃႈ ၵူၼ်းၵိၼ်လဝ်ႈ၊ ၵူၼ်းဢွၵ်ႇႁဵတ်းၵၢၼ်တၢင်းၼွၵ်ႈ ၸိူဝ်းၼႆႉၵေႃႈ ၸၢင်ႈပဵၼ်ၽေး ဝႃႈၼႆ။

ၼႂ်းၵူၼ်းၸိူဝ်းလူႉတၢႆၼၼ်ႉ တႃႇ 70% ပဵၼ်ၼႂ်းလိူၼ်ဢေႊပရိူဝ်ႊ ၽွင်းႁႅင်းလူမ်းမႆႈ မီးထိုင် 44 တီႊၵရီႊ ၸိၼ်ႊတီႊၵရိတ်ႊ။

တႃႇတေၵႅတ်ႇၶႄႁႄႉၵင်ႈ ၽေးလူမ်းမႆႈၼၼ်ႉ ႁႂ်ႈဢွၼ်ၵၼ်ၵိၼ်ၼမ်ႉၵုမ်ႇထူၼ်ႈ၊ ၼုင်ႈသိူဝ်ႈၶူဝ်း ဢၼ်မၢင်၊ ငိူင်ႉဝႄႈလွင်ႈၵိၼ်လဝ်ႈလႄႈ ၶိူင်ႈမဝ်း၊ လိုဝ်ႈႁိူဝ်ႉယူႇသဝ်းပၼ် ၼႂ်းႁူမ်ႈ ၸဵမ်ၸိူဝ်းၼႆႉ။

ႁွင်ႈၵၢၼ် ၾၢႆႇၾိင်ႈၾႃႉၾူၼ်လူမ်း မိူင်းထႆး ပိုၼ်ၽၢဝ်ႇဝႆႉဝႃႈ – တႄႇဢဝ်ဝၼ်းတီႈ 28 လိူၼ်ၾႅပ်ႊပိဝ်ႊရီႊ တေႃႇထိုင်ၵၢင်လိူၼ်မေႊၼႆႉ ပဵၼ်ၶၢဝ်းမႆႈ တီႈမိူင်းထႆး။

ၼႂ်းပီၼႆႉ မိူၼ်ၼင်ႇ ၵဵင်းမႆႇ၊ မႄႈႁွင်ႈသွၼ်၊ တၢၵ်ႇ၊ မိူင်းထႆး တွၼ်ႈႁွင်ႇလႄႈ တၢင်းၸဵင်ႇႁွင်ႇဝၼ်းဢွၵ်ႇ ၸိူဝ်းၼႆႉ ႁႅင်းလူမ်းမႆႈ ၼႂ်းလိူၼ်ဢေႊပရိူဝ်ႊ တေသုင်လိူဝ် 42 တီႊၵရီႊၸိၼ်ႊတီႊၵရိတ်ႊၼႆ လၢမ်းၶၢတ်ႈဝႆႉၼင်ႇၼႆ။

ဢၢင်ႈဢိင် – DVB