သိုၵ်းမၢၼ်ႈတီႉၵူၼ်းၵျႃးၽႅၼ်ႉ ၼႂ်းဢိူင်ႇလၢႆးၶႃႈ ၊ ၵေးသီး ၊ ၼမ်ႉၸၢင် ၊ ၶူဝ်လမ် လၢႆလၢႆဝဵင်း ၼႂ်းၸိုင်ႈတႆး ပွတ်းၸၢၼ်သေ ဢဝ်မႃးဝႆႉတီႈဝဵင်းၼမ်ႉၸၢင် ႁူဝ်ၵူၼ်းမီး 723 ၵေႃႉ ၶၢၼ်းၵူၼ်းမိူင်းသူင်ႇ လဵင်ႉၶဝ်ႈၼမ်ႉတၢင်းၵိၼ် ဝႃႈၼႆ။
ဝၼ်းတီႈ 22/3/2025 သိုၵ်းမၢၼ်ႈ ဢဝ်ၵူၼ်းၵျႃးၽႅၼ်ႉဢၼ်ၺႃးတီႉၸိူဝ်းၼၼ်ႉမႃးဝႆႉတီႈ ႁူင်းလဵၼ်ႈဢဵၼ်ႁႅင်း ပွၵ်ႉ 5 ဝဵင်းၼမ်ႉၸၢင်။ ၼႂ်းၼၼ်ႉ ပႃးမႄႈမၢၼ်းၵေႃႉၼိုင်ႈပဵၼ်ၵူၼ်းၼမ်ႉၸၢင် ၊ မၼ်းၼၢင်းပဵၼ်ၵူၼ်းယူႇပွၵ်ႉၵုင်းၽဝ်ထၢၼ်ႇ(မီးတူၺ်းၵူင်း) ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ မႄႈမၢၼ်းၼမ်ႉၸၢင်ၼၼ်ႉတႄႉ ၶဝ်ပွႆႇၶိုၼ်းယဝ်ႉ ၊ယၢမ်းလဵဝ် ႁူဝ်ၵူၼ်းမီး 700 ပၢႆ။ လႆႈယိၼ်းဝႃႈ ၶဝ်တေဢဝ်မႃးထႅင်ႈၼႆ ၊ ပေႃးပဵၼ်ၵူၼ်းၸၢဝ်းၶႄႇ ၶဝ်တေသူင်ႇၶိုၼ်း မိူင်းၶႄႇၼႆဝႃႇ ။ ပေႃးတူၺ်း ဢၼ်ၶဝ်တီႉလႆႈၼႆႉၼမ်ထၢၼ်ႇၼႆႉ ၶိူင်ႈၸႂ်ႉၶူဝ်းသွႆၶဝ်ယိင်ႈၶႅၼ်းတေၼမ်ၵႃႈႁိုဝ်ၵေႃႈဢမ်ႇႁူႉၼႃ။ ပႆႇလႆႈႁူႉႁူဝ်ယွႆႈမၼ်း ”- ဝႃႈၼႆ ။
တွၼ်ႈတႃႇ ၵူၼ်းၵျႃးၽႅၼ်ႉ 700 ပၢႆဢၼ်မႃးမီးတီႈဝဵင်းၼမ်ႉၸၢင်ၼၼ်ႉၼႆသေ ယူႇတီႈၵၢင်ႉၵႄႇၼႂ်းပွၵ်ႉ ၶၢၼ်းႁေႃႇၶဝ်ႈ ၵူၼ်းမိူင်း ၊ ၼိုင်ႈပွၵ်ႉလႂ် 150 ႁေႃႇ ႁႂ်ႈသူင်ႇလဵင်ႉလူၸွႆႈ ဝႃႈၼႆထႅင်ႈ။ ၼႂ်းဝဵင်းၼမ်ႉၸၢင်ၼႆႉမီးယူႇ 5 ပွၵ်ႉ ။
ၼၢင်းယိင်းၵူၼ်းမိူင်းဝဵင်းၼမ်ႉၸၢင်လၢတ်ႈၽူႈတွႆႇႁွၵ်ႈဝႃႈ – “ ပဵၼ်ၵူၼ်းလွၵ်ႇလႅၼ်ၵိၼ်တီႈၵူၼ်းမိူင်း ၊ ၵမ်းၼႆႉသမ်ႉမႃးၸႂ်ႉ ၵူၼ်းမိူင်း လဵင်ႉၶဝ်ႈၶဝ်ထႅင်ႈ ၊ ၽႂ်တေမီးၼမ်ႉၸႂ်ၶႂ်ႈလဵင်ႉ။ မၢင်ႁိူၼ်းၵေႃႈပၼ်ယူႇ မၢင်ႁိူၼ်းၵေႃႈဢမ်ႇပၼ်။ ဢမ်ႇလိူဝ်လႆႈလႄႈပၼ်ၵေႃႈ ၽႂ်ႁိုဝ်တေမီးၼမ်ႉၸႂ် – ၼေႃႈ ”- ဝႃႈၼႆ ။
မိူၼ်ၼင်ႇၼႆ ဝၼ်းတီႈ 22/3/2025 ယၢမ်းဝၢႆးဝၼ်း 3 မူင်းၼၼ်ႉၵေႃႈ သိုၵ်းမၢၼ်ႈ ၶဝ်တီႉၺွပ်း ၵျႃးၽႅၼ်ႉ ႁိမ်းၸမ် ၼမ်ႉႁူး ၽြႃးထမ်ႈ ၼႂ်းဢိူင်ႇၼႃးပွႆး ၸႄႈဝဵင်းၼမ်ႉၸၢင် တီႉၺွပ်းလႆႈၵျႃႊၽႅၼ်ႉ 20 ၵေႃႉ ။
“တီႈၼႂ်းၸႄႈဝဵင်းၼမ်ႉၸၢင်ၼႆႉၵေႃႈ ၵႆႉလႆႈယိၼ်းလွင်ႈၵျႃးၽႅၼ်ႉမႃးယဝ်ႉၵမ်းၼႆႉ ၊လိူင်ႇမႃးၼႃႇယဝ်ႉ။ တီႈၼႃးပွႆးၵေႃႈ ၺႃးတီႉ 20 ၵေႃႉ ၊ ၵူၺ်းၵႃႈဢမ်ႇတၼ်းလႆႈသဵင်ႈ မၢင်ၸိူဝ်းပၢႆႈၼႆ ” – ဝႃႈၼႆ ။
ဝၼ်းတီႈ 23/03/2025 ယၢမ်းၵၢင်ၼႂ်ၸဝ်ႉၼၼ်ႉၵေႃႈ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/ SSA ပိုၼ်ၽၢဝ်ႇဝႃႈ တီႉၺွပ်းလႆႈ ၸုမ်းၵျႃးၽႅၼ်ႉ ဢၼ်မီးၾၢႆႇႁွင်ႇ လႄႈ ၾၢႆႇၸၢၼ်း ဝဵင်းမိူင်းသူႈ။ လႄႈ တၢင်းၸဵင်ႇၸၢၼ်းဝၼ်းဢွၵ်ႇဝဵင်းမိူင်းၼွင် ၼႂ်းၸႄႈဝဵင်းၵေးသီး ၸိုင်ႈတႆးပွတ်းၸၢၼ်းထႅင်ႈ ၼၼ်ႉ တီႉလႆႈထႅင်ႈ လႄႈ ၶွမ်ႊလႄႈၾူၼ်း ၶိူင်ႈၶူဝ်းၸႂ်ႉဢၼ်ၸႂ်ႉတိုဝ်းတီႈၼႂ်းၵျႃႊၽႅၼ်ႊ တင်းၼမ် ဝႃႈၼႆ ။
ၸွမ်းၼင်ႇ လူင်ပွင်ၸိုင်ႈၶႄႇ မိပ်ႇဢီးသေ တႄႇဢဝ် ႁူဝ်လိူၼ်သႅပ်ႊထႅမ်ႊပိူဝ်ႊ ပီ 2023 မႃး သိုၵ်းဝႃႉ ၵူတ်ႇထတ်း တီႉၺွပ်းၸၢဝ်းၶႄႇ ၸိူဝ်းႁဵတ်းၵၢၼ်လႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ ႁၢဝ်ႈႁႅင်း။ လိုပ်ႈလမ်းတီႉၺွပ်းၸိူဝ်းမီးၼႂ်းၼႃႈလိၼ်ဢၼ်သိုၵ်းဝႃႉတူင်ႉၼိုင်ၵုမ်းတူၺ်းၼၼ်ႉၶိူဝ်းယႂ်းသေ သူင်ႇၸူးတၢင်းၾင်ႇမိူင်းၶႄႇ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ