ယၢမ်းလဵဝ် တီႈၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ဢၼ်သိုၵ်းတဢၢင်း TNLA ယိုတ်းၵုမ်းဝႆႉၼႆႉ တႄႇပိုတ်ႇပၢင်သွၼ် လိၵ်ႈတႆး ၶၢဝ်းမႆႈမႃးယဝ်ႉ ဝႃႈၼႆ။

တႄႇဢဝ် ၵၢင်လိူၼ်မၢတ်ႊၶျ် ပီ 2025 ၼႆႉမႃး တီႈပွၵ်ႉဝဵင်းသႃႇ၊ ပွၵ်ႉႁူဝ်ၵၢတ်ႇ၊ မၢၼ်ႈႁွင်းလူင် ၼႂ်းဝဵင်း ၼမ်ႉၶမ်း ၸိူဝ်းၼႆႉ တႄႇပိုတ်ႇပၢင်သွၼ်လိၵ်ႈတႆး ၶၢဝ်းမႆႈမႃးယဝ်ႉ မိူၼ်ၼင်ႇ တီႈဝၢၼ်ႈၵုၼ်ၵႅင်း၊ ဝၢၼ်ႈ ၵွင်းၼွင်လႄႈ ဝၢၼ်ႈသွၼ်း ၸိူဝ်းၼႆႉသမ်ႉ တိုၵ်ႉႁၢင်ႈႁႅၼ်း တေပိုတ်ႇသွၼ်ယဝ်ႉ ပေႃးႁုပ်ႈၵၼ် တင်းမူတ်းၸိုင် ပၢင်သွၼ်လိၵ်ႈတႆး ပီၼႆႉ တေမီးမွၵ်ႈ 10 ပၢင် ၼႆယဝ်ႉ။

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “တႄႇၵၢင်လိူၼ်ၼႆႉမႃး တီႈဝဵင်းၼမ်ႉၶမ်းၼႆႉ ဢွၼ်ၵၼ်ပိုတ်ႇပၢင်သွၼ်လိၵ်ႈတႆးမႃးယဝ်ႉ။ မၢင်ပွၵ်ႉမၢင်ဝၢၼ်ႈၵေႃႈ တိုၵ်ႉ ႁၢင်ႈႁႅၼ်း တေပိုတ်ႇမႃးယဝ်ႉ။ ဢၼ်လႆႈႁူႉသဵၼ်ႈမၢႆဝႆႉတႄႉ ပီၼႆႉ တင်းမူတ်းတေမီးမွၵ်ႈ 10 ပၢင်ၼႆႉ”- ဝႃႈၼႆ။

မိူဝ်ႈပီ 2024 ၼၼ်ႉ တီႈဝဵင်းၼမ်ႉၶမ်းၼႆႉ လႆႈပိုတ်ႇမႃး ပၢင်သွၼ်လိၵ်ႈတႆး ၶၢဝ်းမႆႈ မီးမွၵ်ႈ 2 ပၢင်ၼႆႉၵူၺ်း  ယွၼ်ႉငဝ်းလၢႆးပၢင်တိုၵ်းလႄႈ ႁဵတ်းႁႂ်ႈလုၵ်ႈဢွၼ်ႇ ႁၢမ်းသုၼ်ႇလႆႈႁဵၼ်းလိၵ်ႈတႆးၼမ်။ ၵူႈပီပူၼ်ႉမႃး မိူဝ်ႈၽွင်းဝၢၼ်ႈမိူင်း ဢမ်ႇသုၵ်ႉၼၼ်ႉတႄႉ တီႈဝဵင်းၼမ်ႉၶမ်းၼႆႉ ပၢင်သွၼ်လိၵ်ႈတႆးမီး ဢမ်ႇယွမ်း 20 ပၢင် ၼႆယဝ်ႉ။

ပၢင်သွၼ်လိၵ်ႈတႆး ၶၢဝ်းမႆႈ တီႈဝဵင်းၼမ်ႉၶမ်း ပီၼႆႉသမ်ႉ ၶၢဝ်းယၢမ်း သွၼ်ႁဵၼ်း တီႈၼိုင်ႈလႄႈတီႈၼိုင်ႈ တေဢမ်ႇမိူၼ်ၵၼ် ဢဝ်ၸွမ်းငဝ်းလၢႆးၼႂ်းပိုၼ်ႉတီႈဝႃႈၵူၺ်း မၢင်တီႈ တႄႇပူင်သွၼ်ဝၢႆးဝၼ်း 1 မူင်းထိုင် 3 မူင်း – 4 မူင်း။ မၢင်တီႈသမ်ႉ ယၢမ်းႁူဝ်ၶမ်ႈ 6 မူင်းထိုင် 7 မူင်းၶိုင်ႈ၊ မၢင်တီႈ ယၢမ်းၵၢင်ၶမ်ႈ 7 မူင်းထိုင် 8 မူင်း ၶိုင်ႈ ၸိူဝ်းၼႆႉ။ လုၵ်ႈႁဵၼ်းသမ်ႉ တႄႇ ဢႃယု 5 ၶူပ်ႇ ထိုင် 13 ပီ ဢမ်ႇၼၼ် 14 ပီ ၼႆယဝ်ႉ။

လိူဝ်ၼၼ်ႉ မိူၼ်ၼင်ႇ တၢင်းထုင်ႉလွႆႁူဝ်သိူဝ်ၼၼ်ႉၵေႃႈ ပီၼႆႉ ပၢင်သွၼ်လိၵ်ႈတႆး ၶၢဝ်းမႆႈမီးမွၵ်ႈ 10 ပၢင် ပေႃးႁူမ်ႈၵၼ်တင်း ၼႂ်းၸႄႈဝဵင်းၼမ်ႉၶမ်းၼႆႉၸိုင် တင်းမူတ်း တေမီးမွၵ်ႈ 20 ပၢင် ၼႆယဝ်ႉ။

ယွၼ်ႉၽႅၼ်ယၼ်ႇသိုၵ်း 1027 ယူႇတီႈ ၸုမ်းဢူၺ်းလီပွတ်းႁွင်ႇ 3 ၸုမ်း ႁႅၼ်းသိုၵ်းလေႃႇတိုၵ်း တပ်ႉ သိုၵ်းမၢၼ်ႈ ယိုတ်းမိူင်း မႃးႁၢဝ်ႈႁႅင်းသေ ႁဵတ်းႁႂ်ႈတုမ်ႉတိူဝ်ႉ ၵူၼ်းမိူင်းၼမ်ႉၶမ်းပၢႆႈၽေးသိုၵ်း ၼပ်ႉႁူဝ်မိုၼ်ႇ လိူဝ်ၼၼ်ႉ တုမ်ႉတိူဝ်ႉပႃးလုၵ်ႈဢွၼ်ႇ ႁၢမ်းသုၼ်ႇၶိုၼ်ႈႁူင်းႁဵၼ်းလူင်ပွင်ၸိုင်ႈ ၸိူဝ်းၼႆႉထႅင်ႈ တင်း ၼမ် ၼႆယဝ်ႉ။