မီးၸုမ်းဢမ်ႇႁူႉၾၢႆႇ ၸုမ်းၼိုင်ႈ တီႉၺွပ်းဢဝ် ၽူႈယိင်းၵေႃႉၼိုင်ႈ ၶိုၼ်ႈၵႃးၵႂႃႇ ၽွင်းတိုၵ်ႉႁေႃႈရူတ်ႉၶိူင်ႈမႃး ဝႃႈၼႆ။
ဝၼ်းတီႈ 24/03/2025 ယၢမ်းၵၢင်ၼႂ်မွၵ်ႈ 10 မူင်း မီးၸုမ်းဢမ်ႇႁူႉၾၢႆႇ ၸုမ်းၼိုင်ႈ ၶီႇၵႃးသႅၼ်း Crown လမ်းၼိုင်ႈ မႃးၵိုတ်းႁႄႉ လၢၵ်ႈဢဝ်တူဝ်ၼၢင်းယိင်း ၵေႃႉၼိုင်ႈ ၶိုၼ်ႈၵႃးၵႂႃႇ ၽွင်းတိုၵ်ႉႁေႃႈရူတ်ႉၶိူင်ႈမႃး တီႈၼႂ်းပွၵ်ႉၵွင်းမူးလွႆ ဝဵင်းမူႇၸေႊ ၸိုင်ႈတႆးပွတ်းႁွင်ႇ ၼႆယဝ်ႉ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၸုမ်းလႂ် တီႉၺွပ်းၵႂႃႇတႄႉ ဢမ်ႇႁူႉၶႃႈ။ ဢၼ်ၺႃးတီႉၺွပ်းၵႂႃႇၼၼ်ႉ ပဵၼ်ၼၢင်းယိင်း ၼႂ်းမုင်ႉႁေႃႁိူၼ်း လုၵ်ႈၸုမ်းပျီႇတူႉၸိတ်ႉၼမေႃးပေႃးတီႉ ၼႆၶႃႈဝႃႇ။ ယဝ်ႉၵေႃႈ မၼ်းၼၢင်းပဵၼ်ၸၢဝ်းၶႄႇ။ ယူႇတီႈ ၵွင်းမူးလွႆၼႆႉၵူၺ်း။ ၵူၼ်းႁၢႆႉၼၼ်ႉ လၢၵ်ႈမၼ်းၼၢင်း ၶိုၼ်ႈၵႃးၵႂႃႇ ၸိူင်ႉၼၼ်ၶႃႈဢေႃႈ”- ဝႃႈၼႆ။
ၸုမ်းဢမ်ႇႁူႉၾၢႆႇ ဢၼ်တီႉၺွပ်းဢဝ်ၵႂႃႇ တူဝ်ၼၢင်းယိင်းၼၼ်ႉ ၶဝ်ၶီႇၵႃးသႅၼ်း Crown သီၶၢဝ်မႃး ယဝ်ႉၵေႃႈ ပဵၼ်ၽူႈၸၢႆး 3 ၵေႃႉ ပူၵ်ႉၼႃႈဝႆႉ ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 25/02/2025 ယၢမ်းႁူဝ်ၶမ်ႈ ၼၼ်ႉၵေႃႈ တီႈၼိူဝ်သဵၼ်ႈတၢင်းလူင်မူႇၸေႊ ၼႂ်းပွၵ်ႉၵၢတ်ႇ ၾၢႆႇၼႃႈႁူင်းႁႅမ်း သူၺ်ႇယႃႇၸု (ရွှေရာစု) ၵၢင်ဝဵင်းမူႇၸေႊ မိူဝ်ႈ ၽွင်းၼၼ်ႉ မီးၼၢင်းယိင်း 2 ၵေႃႉ သွၼ်ႉရူတ်ႉၶိူင်ႈမႃးၸွမ်းၵၼ်သေ ၺႃးၵူၼ်းၸၢႆး 2 ၵေႃႉ ၶီႇရူတ်ႉၶိူင်ႈ ၸွမ်းလင်မႃး ၸၵ်ႉႁိမ်ဢဝ်ထူင်ငိုၼ်းၵႂႃႇ ထိုင်တီႈရူတ်ႉၶိူင်ႈၶႃ ပိၼ်ႈၵႂႃႇၵၢင်တၢင်း ၼႆယဝ်ႉ။
ဝဵင်းမူႇၸေႊၼႆႉ ပဵၼ်ဝဵင်းတိတ်းၸပ်းလႅၼ်လိၼ်ၶႄႇ ပဵၼ်ဝဵင်းဢွင်ႈတီႈ ဢမ်ႇပဵၼ်ပၢင်တိုၵ်းသိုၵ်းသိူဝ်သင် ယၢမ်းလဵဝ် ႁွင်ႈၵၢၼ်လူင်ပွင်ၸိုင်ႈ တႂ်ႈသိုၵ်းမၢၼ်ႈ ၵုမ်းၵမ်ဝႆႉၼၼ်ႉ ပၼ်ႇၵၢၼ်ဝႆႉ ဝႃႈၼႆ။
ဝဵင်းမူႇၸေႊၼႆႉ ပဵၼ်ဝဵင်းလႅၼ်လိၼ် တိတ်းၸပ်းၶႄႇ ဝဵင်းၼိုင်ႈ ယဝ်ႉၵေႃႈ ပဵၼ်ဝဵင်းၵႃႉၶၢႆၵေႃႈၸႂ်ႈလႄႈ ၼွၵ်ႈလိူဝ်သိုၵ်းမၢၼ်ႈ ပလိၵ်ႈမၢၼ်ႈယဝ်ႉ ၸုမ်းပျီႇတူႉၸိတ်ႉလႄႈ ၸုမ်းယိပ်းၵွင်ႈၵၢင်ႇတူင်ႉ ၸိူဝ်းၼႆႉ ၵေႃႈ တူင်ႉၼိုင်ၵႂႃႇမႃးၼမ်။ ၾၢႆႇၼိုင်ႈၵေႃႈ ယႃႈမဝ်းၵမ်လႄႈ ပၢင်တေႃႇလွင်းလိူင်ႇၼမ်၊ ဢမ်ႇမီးၸုမ်းလႂ် ဢဝ်ပုၼ်ႈၽွၼ်းၽဵဝ်ႈပႅတ်ႈ၊ ႁဵတ်းႁႂ်ႈ ၵူၼ်းပိုၼ်ႉတီႈ လႆႈမႆႈၸႂ် ဢမ်ႇမီးလွင်ႈႁူမ်ႇလူမ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ