ဝၼ်းတီႈ 22/03/2025 ၼႆႉ ၾႆးမႆႈပႃႇထိူၼ်ႇ 20 တီႈပၢႆ ၼႂ်းမိူင်းၵူဝ်ႊရီႊယိူဝ်ႊၸၢၼ်း ၽူႈႁၢပ်ႇၵၢၼ်ၾၢႆႇၶႄၾႆး လူႉတၢႆ 2 ၵေႃႉ မၢတ်ႇၸဵပ်း 2 ၵေႃႉ ဝႃႈၼႆ။

ၾႆးတႄႇမႆႈမႃး ၼႂ်းဝၼ်းတီႈ 21 လိူၼ်မၢတ်ႊၶျ် ၸွမ်းသၼ်လွႆ ဢၼ်မီးၼႂ်းသၢၼ်းၶျူင်းၵွင်ႇတီႇ ၸႄႈတွၼ်ႈၵျွင်ႇသၢၼ်းတူဝ်ႊ မိူင်းၵူဝ်ႊရီႊယိူဝ်ႊၸၢၼ်း။

ယွၼ်ႉလူမ်းထွင်းႁႅင်းလႄႈ ႁဵတ်းႁႂ်ႈၾႆးမႆႈပႃႇ ၽႄႈလၢမ်းမႆႈဝႆး။ တေႃႇထိုင်ၼႂ်းဝၼ်းသဝ် ယၢမ်းႁူဝ်ၶမ်ႈၼၼ်ႉ ၾႆးမႆႈပႃႇထိူၼ်ႇ လူႉသုမ်းၵႂႃႇ 680 ဢေႊၶိူဝ်ႊ၊ လႆႈၸွႆႈထႅမ်ၵူၼ်းမိူင်းၼႂ်းပိုၼ်ႉတီႈ 200 ပၢႆ ၶၢႆႉပၢႆႈ ၵႂႃႇယူႇသဝ်းဝႆႉ တီႈလွတ်ႈၽေး ဝႃႈၼႆ။

မိူၼ်ၼႆ ၼႂ်းဝၼ်းတီႈ 23 လိူၼ်မၢတ်ႊၶျ် ယၢမ်းၵၢင်ၶမ်ႈ မွၵ်ႈ 3 မူင်းၼႆႉ ၾႆးမႆႈပႃႇ တီႈၼိူဝ်သၼ်လွႆၸွႆး ၵပိၼ်ႇ (ဇွဲကပင်တောင်) ဝဵင်းၽႃဢၢင်ႇ၊ ပဵၼ်လွႆၸိုဝ်ႈသဵင်လိုဝ်းလင် ၼႂ်းမိူင်းယၢင်းၽိူၵ်ႇ ဝႃႈၼႆ။

လွႆၸွႆးၵပိၼ်ႇၼႆႉ တၢင်းသုင်မီး 2,372 ထတ်း၊ ပဵၼ်ဢွင်ႈတီႈ မီးၵူၼ်းၵႂႃႇဢႅဝ်ႇလႄႇတွင်ႈတဵဝ်းၼမ်။ တီႈၼၼ်ႈ ၵႆႉပဵၼ် လွင်ႈၾႆးမႆႈပႃႇယူႇၵူႈပီသေတႃႉ ပီၼႆႉ ပဵၼ်ဢၼ်မႆႈႁၢဝ်ႈႁႅင်းဝႆႉ။ လိူဝ်ၼၼ်ႉ တီႈၼိူဝ်လွႆၵေႃႈ မီးၵူၼ်းၶိုၼ်ႈလွႆဝႆႉ ၵမ်ႈၽွင်ႈ – ၵူၼ်းပိုၼ်ႉတီႈၵေႃႉၼိုင်ႈ လၢတ်ႈၼင်ႇၼႆ။

ၼႂ်းဝၼ်းတီႈ 24 ယၢမ်းၵၢင်ၼႂ်ၼႆႉ ယူႇတီႈ ၵူၼ်းပိုၼ်ႉတီႈလႄႈ ၸုမ်းၶႄၾႆးၶဝ် ၵုမ်းလႆႈ လွင်ႈၾႆးမႆႈပႃႇယဝ်ႉ ဝႃႈၼႆ။

ဢၢင်ႈဢၢင် – People’s Spring / DVB