ၽူႈႁၢပ်ႇၵၢၼ် ၾၢႆႇၶႄႇၾႆး ၸိူဝ်းၶတ်းၸႂ်ၶႄၾႆးမႆႈပႃႇယူႇ ၼႂ်းၸႄႈတွၼ်ႈဢေႊဢီႊသေႊႁီႊယိူဝ်ႊ (Eskisehir) မိူင်းတူႊရၵီႊ (Turkey) ပွတ်းၵၢင် လႆႈလူႉတၢႆၵႂႃႇ 10 ၵေႃႉ မၢတ်ႇၸဵပ်း 14 ၵေႃႉၼႆ – ၽွင်းလူင် ၾၢႆႇၽုၵ်ႇသွမ်ႈလႄႈ ၾၢႆႇပႃႇမႆႉ မိူင်းတူႊရၵီႊ လၢတ်ႈၵႂႃႇၼႂ်းဝၼ်းတီႈ 23/07/2025 ၼႆႉၼင်ႇၼႆ။

ၸုမ်းၶႄၾႆးၼႆႉ လႆႈၶတ်းၸႂ်ႁူတ်းၶႄၾႆးမႆႈပႃႇ ၼႂ်းၸႄႈတွၼ်ႈဢေႊဢီႊသေႊႁီႊယိူဝ်ႊ ၸဵမ်မိူဝ်ႈဝၼ်းတီႈ 22 ပူၼ်ႉမႃးၼၼ်ႉသေ ၵူၺ်းၵႃႈ ထိုင်မႃးၼႂ်းဝၼ်းတီႈ 23 ၼႆႉ ၸွမ်းသဵၼ်ႈတၢင်း လူမ်းၽတ်ႉထွင်း ၵိုင်ႉၵၢင်ႉလႅၵ်ႈလၢႆႈၵႂႃႇလႄႈ ႁဵတ်းႁႂ်ႈၵူၼ်းၶႄၾႆးၶဝ် ၸိူဝ်းၶိုၼ်းၵႂႃႇႁူတ်းၾႆး တီႈၼိူဝ်လွႆၼၼ်ႉ ၶမ်ဝႆႉၼႂ်းၾႆး 24 ၵေႃႉ၊ လႆႈဢဝ်ၸိူဝ်းၶဝ် သူင်ႇယူတ်းယႃတူဝ်တီႈႁူင်းယႃ ယူႇသေတႃႉ လူႉတၢႆၵႂႃႇ 10 ၵေႃႉ ဢၼ်ၵိုတ်းလိူဝ်ထႅင်ႈ 14 ၵေႃႉတႄႉ တိုၵ်ႉသိုပ်ႇယူတ်းယႃတူဝ်ဝႆႉယူႇ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ၽူႈတၢင်ၼႃႈၸုမ်းလူင်ပွင်ၸိုင်ႈၶဝ် တေၵူတ်ႇထတ်းၵႂႃႇ ၸွမ်းၼင်ႇ ပၵ်းပိူင်မၢႆမီႈ မီးဝႆႉ ၼႆယဝ်ႉ။

ယၢမ်းလဵဝ် တီႈၸႄႈတွၼ်ႈ 5 ဢၼ် ၼႂ်းမိူင်းတူႊရၵီႊ ပွတ်းၵၢင်လႄႈ ပွတ်းတူၵ်းၼႆႉ ၾႆးမႆႈပႃႇ မီးဝႆႉ 7 တီႈသေ တိုၵ်ႉသိုပ်ႇမႆႈဝႆႉယူႇႁၢဝ်ႈႁႅင်း – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။