ႁူဝ်လိူၼ်ၵျူႊလၢႆႊၼႆႉ ၾႆးမႆႈပႃႇၼႂ်းပိုၼ်ႉတီႈဢိတ်ႊမီႊယႃႊ မိူင်းတူႊရၵီႊ ၵူၼ်းမိူင်းၼပ်ႉႁူဝ်ပၢၵ်ႇ လႆႈႁၢမ်းႁိူၼ်းယေးတီႈယူႇ ဝႃႈၼႆ။

ယွၼ်ႉၾႆးမႆႈပႃႇသေ မီးၵူၼ်းလူႉတၢႆ 1 ၵေႃႉ၊ မူႇဝၢၼ်ႈ 10 ပၢႆလႄႈ တူၼ်ႈမႆႉ ၼပ်ႉႁူဝ်လၢၼ်ႉ ၺႃးၾႆးမႆႈလူႉၵွႆ။ ဢွင်ႈတီႈၾႆးမႆႈၼႆႉ ပဵၼ်ၼိူဝ်လွႆလႄႈ ၽူႈမီးပုၼ်ႈၽွၼ်းၶဝ် လႆႈၸႂ်ႉ ႁိူဝ်းမိၼ်သေ ႁူတ်းၼမ်ႉၶႄၾႆး၊ ၼႂ်းဝူင်ႈပူၼ်ႉမႃးၼႆႉၵေႃႈ လႆႈၶၢႆႉၵူၼ်းမိူင်း တႃႇႁူဝ်ၼပ်ႉၵူၼ်း 5,000 ၵေႃႉ ၵႂႃႇယူႇသဝ်းဝႆႉ ဢွင်ႈတီႈလွတ်ႈၽေး ၼႆယဝ်ႉ။

ယွၼ်ႉႁႅင်းလူမ်းမႆႈၶိုၼ်ႈသုင်၊ လူမ်းၽတ်ႉထွင်းႁၢဝ်ႈႁႅင်းလႄႈ ႁဵတ်းႁႂ်ႈငဝ်းလၢႆးၾႆးမႆႈပႃႇ တိူဝ်းႁၢင်ႈႁၢႆႉႁႅင်းမႃး၊ ၼႂ်းဝၼ်းတီႈ 5 လိူၼ်ၵျူႊလၢႆႊၼႆႉ ၾႆးမႆႈပႃႇ လၢမ်းထိုင်ၾၢႆႇၼွၵ်ႈဝဵင်း ဢိတ်ႊသတၼ်ႊပူႊလ်။

ႁူဝ်ပီ ၽွင်းၶၢဝ်းမႆႈပူၼ်ႉမႃးၼႆႉ ႁႅင်းလူမ်းမႆႈ ၸဵဝ်းလတ်းၶဝ်ႈတီႈၼႂ်းၵုၼ်ယူႊရူပ်ႊ၊ ယွၼ်ႉႁႅင်းလူမ်းမႆႈၼႆႉသေ တေႃႇထိုင်ယၢမ်းလဵဝ် မီးၵူၼ်းလူႉတၢႆ ထိုင် 8 ၵေႃႉယဝ်ႉ ဝႃႈၼႆ။

မိူဝ်ႈပီၵၢႆပူၼ်ႉမႃးၼႆႉၵေႃႈ ႁႅင်းလူမ်းမႆႈ လတ်းၽၢၼ်ႇၶဝ်ႈတီႈၼႂ်းၵုၼ်ယူႊရူပ်ႊ ႁဵတ်းႁႂ်ႈၾႆးမႆႈပႃႇႁၢဝ်ႈႁႅင်း ၼႂ်းမိူင်းပေႃႊတူႊၵီႊလႄႈ မိူင်းၵရိ။

မိူင်းတူႊရၵီႊ၊ ဢီႊတလီႊ၊ သပဵၼ်ႊလႄႈ ရူဝ်ႊမေႊၼီႊယိူဝ်ႊ ၸိူဝ်းၼႆႉ ၵႆႉလႆႈႁူပ်ႉၺႃး ၽေးၾႆးမႆႈပႃႇႁၢဝ်ႈႁႅင်း။ ၽူႈလဵပ်ႈႁဵၼ်း လွင်ႈၾိင်ႈၾႃႉရႃႇသီႇၶဝ်လၢတ်ႈဝႃႈ – မိူဝ်ႈပီ 2024 ၼႆႉ ႁႅင်းလူမ်းမႆႈ ၼႂ်းလုမ်ႈၾႃႉ ၶိုၼ်ႈသုင်မႃးလိူဝ်သေ ၵွၼ်ႇပႆႇထိုင် ပီ 1970 ၵၢပ်ႈပၢၼ်ႁူင်းၸၢၵ်ႈၼၼ်ႉ 1.5 တီႊၵရီႊၸိၼ်ႊတီႊၵရိတ်ႊယဝ်ႉ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။