ၾႆးမႆႈပႃႇ လၢမ်းမႆႈပႃးၼႂ်းပွၵ်ႉၵူၼ်းယူႇသဝ်းႁၢဝ်ႈႁႅင်း တီႈမိူင်းၶျီႊလီႊ (Chile) မီးၵူၼ်းလူႉတၢႆ ဢမ်ႇယွမ်း 18 ၵေႃႉ ဝႃႈၼႆ။

ဢွင်ႈတီႈၾႆးမႆႈၼႆႉ ပဵၼ်ၼႂ်းပိုၼ်ႉတီႈ ပၢႆႊဢူဝ်ႊ လႄႈ ၼူႊပႄႊလ် ယၢၼ်ၵႆၵၼ်တင်း ငဝ်ႈၸိုင်ႈဝဵင်းလူင် သၢၼ်ႊတီႊယေႊၵူဝ်ႊ (Santiago) မိူင်းၶျီႊလီႊ၊ ၾႆးမႆႈ ႁိုင်ၶၢဝ်းတၢင်း 2 ဝၼ်းသေ ၵူၼ်းမိူင်း 50000 ပၢႆ လႆႈငိူင်ႉပၢႆႈၽေးၾႆးဝႆႉ။ ယွၼ်ႉၾိင်ႈၾႃႉႁႅင်ႈႁွင်၊ လူမ်းၽတ်ႉထွင်းႁၢဝ်ႈႁႅင်းလႄႈ ႁဵတ်းႁႂ်ႈၾႆး လၢမ်းမႆႈၵႂႃႇလၢႆလၢႆတီႈ ဝႃႈၼႆ။

ယၢမ်းလဵဝ် ၼႂ်းပိုၼ်ႉတီႈၼၼ်ႉ လူင်ပွင်ၸိုင်ႈမိူင်းၶျီႊလီႊ ပိုၼ်ၽၢဝ်ႇ ပဵၼ်ငဝ်းလၢႆးၶိုၵ်ႉၶၵ်ႉဝႆႉ၊ လႆႈၸႂ်ႉႁႅင်းၵူၼ်း ၽူႈႁၢပ်ႇၵၢၼ်ၾၢႆႇၶႄၾႆး မွၵ်ႈ 4000 ၵေႃႉသေ ႁူတ်းၾႆးၶႄၾႆး၊ လႆႈဢဝ်ပႃးႁႅင်းတပ်ႉသိုၵ်း ၸွႆႈထႅမ်ဝႆႉထႅင်ႈ ဝႃႈၼႆ။

မိူၼ်ၼႆ ၼႂ်းဝၼ်းတီႈ 17 ယၢမ်းၵၢင်ၶမ်ႈၼၼ်ႉၵေႃႈ ၾႆးမႆႈၵၢတ်ႇလူင်ဢၼ်ၼိုင်ႈ တီႈဝဵင်း ၵရႃႊၶျီႊ၊ မိူင်းပႃႊၵိတ်ႊသတၼ်ႊ၊ မီးၵူၼ်းလူႉတၢႆ 8 ၵေႃႉ၊ ႁၢႆလၢႆဝႆႉ 58 ၵေႃႉ။ တီႈၵၢတ်ႇလူင်ၼၼ်ႉ မီးႁွင်ႈၶၢႆ 1200 ပၢႆ၊ ၾႆးမႆႈ ႁိုင်ၶၢဝ်းတၢင်း 24 ၸူဝ်ႈမူင်းလႄႈ မီးလွင်ႈလူႉသုမ်းယႂ်ႇၼမ် ဝႃႈၼႆ။

လိူဝ်ၼၼ်ႉ မိူဝ်ႈၼႆႉၵၢင်ၼႂ် 10မူင်းၶိုင်ႈ ၾႆးမႆႈ ႁိမ်းၵၢတ်ႇလူင် ပလႃႇသႃႇ ၼႂ်းၸႄႈဝဵင်း မင်ႇၵလႃႇတွင်ႇၺုၼ်ႉ တိူင်းယၢၼ်ႇၵုင်ႇ၊ မႆႈပႃးၵႂႃႇၶူဝ်းၶွင်ၼႂ်းႁိူၼ်းယေးတင်းၼမ် ဝႃႈၼႆ။