မိူဝ်ႈၼႆႉ ဝၼ်းတီႈ 24/03/2025 ယၢမ်းၵၢင်ၼႂ် သိုၵ်းမၢၼ်ႈ ႁွင်ႉဢဝ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်းတင်း ပႃႇတီႇၵၢၼ်မိူင်း ၵမ်ႈၽွင်ႈ ၶဝ်ႈႁူမ်ႈပၢင်ဢုပ်ႇဢူဝ်း လွင်ႈငမ်းယဵၼ် တီႈႁူင်း ႁေႃး MICC2 ဝဵင်းလူင်ၼေႇပျီႇတေႃႇ ၼႆယဝ်ႉ။
ပၢင်ဢုပ်ႇဢူဝ်း လွင်ႈငမ်းယဵၼ်ၼႆႉ သိုၵ်းမၢၼ်ႈ ပဵၼ်ၾၢႆႇဢွၼ်ႁူဝ်သေ တေၸတ်းႁဵတ်းၵႂႃႇ ဝၼ်းတီႈ 24-26/03/2025 ႁိုင်သၢမ်ဝၼ်း၊ ႁူဝ်ပဝ်ႈ ၶွမ်ႊမတီႊ ဢုပ်ႇဢူဝ်းလွင်ႈငမ်းယဵၼ် ၶွင်ၸုမ်းသိုၵ်းမၢၼ်ႈ NSPNC သမ်ႉ ပဵၼ်ၵႅမ်ၸွမ်သိုၵ်းလူင် ယႃႇပျေႉ ဢွၼ်ႁူဝ်ဢုပ်ႇဢူဝ်းၵႂႃႇ ၼႆယဝ်ႉ။
ၼႂ်းပၢင်ဢုပ်ႇဢူဝ်း လွင်ႈငမ်းယဵၼ်ပွၵ်ႈၼႆႉ ယိူင်းဢၢၼ်း တႃႇလူတ်းယွမ်း ပၼ်ႁႃပၢင်တိုၵ်းသိုၵ်းသိူဝ် ၼႂ်းမိူင်းသေ ႁဵတ်းႁႂ်ႈၶၵ်ႉတွၼ်ႈၵၢၼ်မၢၵ်ႈမီးၼႂ်းမိူင်း ၶိုၼ်ႈၸၼ်ႉမႃးၼႆ ၵႅမ်ၸွမ်သိုၵ်းလူင် ယႃႇပျေႉ လၢတ်ႈၵႂႃႇၼင်ႇၼႆ။
“တွၼ်ႈတႃႇဝၢၼ်ႈမိူင်း တေမီးလွင်ႈၵတ်းယဵၼ် ၵႂႃႇၶၢဝ်းယၢဝ်းၼႆႉ ၸႂ်ႉတိုဝ်းလၢႆးတၢင်း လွင်ႈႁုၵ်းႁၢႆႉသေ ႁဵတ်းၵႂႃႇဢမ်ႇလႆႈ”- ဝႃႈၼႆ။
ၽွင်းသိုၵ်းမၢၼ်ႈ ၸတ်းပၢင်ဢုပ်ႇဢူဝ်းလွင်ႈငမ်းယဵၼ်ယူႇၼႆႉ ၾၢႆႇတၢင်းမိူင်းၶၢင်၊ မိူင်းယၢင်းလႅင်၊ မိူင်းယၢင်းၽိူၵ်ႇ၊ တိူင်းမၵူၺ်း၊ တိူင်းၸႄႈၵႅင်း၊ တိူင်းပႃႇၵိူဝ်လႄႈ တိူင်းဝဵင်းလိူဝ်ႇ ၸိူဝ်းၼႆႉ ယင်းတိုၵ်ႉပဵၼ်ပၢင်တိုၵ်းၵၼ်ႁၢဝ်ႈႁႅင်းယူႇၼႆ ၽူႈလဵပ်ႈႁဵၼ်းၵၢၼ်မိူင်း/ၵၢၼ်သိုၵ်း ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈၼင်ႇၼႆ။
“ပၢင်ဢုပ်ႇဢူဝ်းၼႆႉ တေဢမ်ႇမီးၼမ်ႉတွၼ်းသင် တႃႇၸုမ်းသိုၵ်းၸၢဝ်းၶိူဝ်းတႄႉတႄႉ။ ပဵၼ်ပၢင် ဢုပ်ႇဢူဝ်းဢၼ်ၸတ်းႁဵတ်းမႃး တႃႇလွၵ်ႇလႅၼ်ၼႄလုမ်ႈၾႃႉၵူၺ်း”- ဝႃႈၼႆ။
လႆႈႁူႉဝႃႈ ၼႂ်းပၢင်တိုၵ်းဢၼ်ပဵၼ်ယူႇ ၼႂ်းၸႄႈမိူင်းလႄႈ တိူင်း လၢႆလၢႆတီႈၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်းသေ ပွႆႇမၢၵ်ႇသႂ်ႇၸွမ်းဝၢၼ်ႈ ဢၼ်မီးၵူၼ်းမိူင်းယူႇသဝ်းၼၼ်ႉယူႇ ဝႃႈ ၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ