ၸုမ်းၵူၼ်းၼုမ်ႇတႆး 17 ၸုမ်း ႁူမ်ႈၵၼ်တုၵ်းယွၼ်း ႁႂ်ႈဢဝ်လိူင်ႈ ၽူႈမီးတၢင်းၽိတ်း ၵဵဝ်ႇလူၺ်ႈလွင်ႈ ၶႃႈ ႁႅမ်တၢႆ ၸဝ်ႈတူၼ်ၶူး ထမ်ႇမသႃႇရလႄႈ တၵ်ႉၵႃႇ ၸၢႆးပီးၼၼ်ႉ ႁႂ်ႈၽဵင်ႇပဵင်းပဵၼ်ထမ်း ဝႃႈၼႆ။
ဝၼ်းတီႈ 23/03/2025 ၼႆႉ ယူႇတီႈ ၸုမ်းၵူၼ်းၼုမ်ႇတႆး 17 ၸုမ်းသေ ဢွၵ်ႇၶေႃႈပိုၼ်ၽၢဝ်ႇ ႁႂ်ႈဢဝ်လိူင်ႈ တၢင်းၽိတ်းပၼ် ၼႂ်းတပ်ႉသိုၵ်းပျႃး ဢၼ်ပဵၼ်တပ်ႉၵႅတ်ႇၶႄၵူၼ်းမိူင်းၼၼ်ႉ ယွၼ်ႉၶဝ်ယွမ်းႁပ်ႉဝႃႈ လႆႈၶႃႈႁႅမ်တၢႆ ၸဝ်ႈတူၼ်ၶူး ထမ်ႇမသႃႇရ (ႁွင်ႉ) ဢူးၸိၼ်ႇပဵင်းလႄႈ တၵ်ႉၵႃႇၸၢႆးပီး တီႈဝၢၼ်ႈဢုမ်ႇတိုင်း ၸႄႈဝဵင်းၾၢႆၶုၼ် ၸိုင်ႈတႆးပွတ်း ၸၢၼ်း မိူဝ်ႈဝၼ်းတီႈ 4 ပူၼ်ႉမႃးၼၼ်ႉ ဝႃႈၼႆ။
ၽူႈၶၢၼ်ပၢၵ်ႇ ၸုမ်းၵူၼ်းၼုမ်ႇတႆး 17 ၸုမ်း လၢတ်ႈတီႈၽူႈတွႆႇႁွၵ်ႈဝႃႈ – “ၾၢႆႇသိုၵ်းပျႃးၼႆႉ ၶဝ်ပႆႇပိုၼ် ၽၢဝ်ႇဢွၵ်ႇမႃး ပဵၼ်တၢင်းၵၢၼ် လွင်ႈၶဝ်ၶႃႈႁႅမ်တၢႆ ၸဝ်ႈၶူးလႄႈ ၸၢႆးပီး ၼၼ်ႉ။ ၶဝ်ဝႃႈ တေပိုတ်ႇၽၢဝ်ႇ ႁူဝ်လိူၼ်ၼႃႈ ၵွၼ်ႇပႆႇထိုင် ဝၼ်းတီႈ 4 ၼႆလႄႈ လွင်ႈၶဝ်တေပိုၼ်ၽၢဝ်ႇဢွၵ်ႇမႃးၼၼ်ႉ ၶဝ်တေမီးလွင်ႈ သၵ်ႈသေႇလၵ်းထၢၼ်သင်ၼႄၵူၼ်းမိူင်း ၶဝ်တေပၼ်တၢင်းၽိတ်းၵူၼ်းၶဝ် ၸိူင်ႉႁိုဝ် မိူဝ်ႈလဵဝ်ၼႆႉ ႁဝ်းၶႃႈ ၵူၼ်းမိူင်းပႂ်ႉမုင်ႈမွင်း ၶေႃႈပိုၼ်ၽၢဝ်ႇၶဝ်ယူႇ။ ႁဝ်းၶႃႈ ၵူၼ်းၼုမ်ႇတႄႉ တုၵ်းယွၼ်းႁႂ်ႈပဵၼ်လွင်ႈမၢၼ်ႇမႅၼ်ႈၽဵင်ႇပဵင်းပဵၼ်ထမ်းၶႃႈဢေႃႈ”- ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇ ၸုမ်းၵူၼ်းၼုမ်ႇတႆး 17 ၸုမ်းၼၼ်ႉ တုၵ်းယွၼ်းထိုင်ဝႃႈ – တႃႇပိုတ်ႇၼႄလွင်ႈတၢင်းတႄႉ၊ တႃႇတေပေႃႇဢွၵ်ႇမႃးလွင်ႈတႄႉၼၼ်ႉ တေလႆႈပၼ်လွင်ႈၵႅတ်ႇ ၶႄႁႄႉၵင်ႈ လွင်ႈႁူမ်ႇလူမ်ႈ ၵူၼ်းၼႂ်းပိုၼ်ႉတီႈ ၵဵဝ်ႇၵပ်းလွင်ႈၼႆႉလႄႈ ၵူၼ်းၸိူဝ်းပၢႆႈၽေးသိုၵ်း ၼႂ်းပိုၼ်ႉတီႈ။
ဢမ်ႇဝႃႈ လွင်ႈတၢင်းသင်ၵေႃႈယဝ်ႉ ဢၼ်တပ်ႉသိုၵ်းၵူၼ်းယိပ်းၵွင်ႈၵၢင်ႇ ဢမ်ႇၼၼ် ၵူၼ်းၵေႃႉလႂ်ၵေႃႈယဝ်ႉ လွင်ႈၶႃႈႁႅမ်တၢႆ ၵူၼ်းမိူင်းၸိူဝ်းဢမ်ႇမီးၵွင်ႈၵၢင်ႇၼၼ်ႉ ပဵၼ်လွင်ႈပူၼ်ႉပႅၼ်ၵၢၼ်သိုၵ်းလႄႈ တေလႆႈဢဝ်လိူင်ႈၵူၼ်းႁဵတ်းၽိတ်းၼၼ်ႉ တေဢမ်ႇလႆႈမီးလွင်ႈယွမ်းႁပ်ႉသင် ယွၼ်ႉဝႃႈ လွင်ႈၼႆႉ ပဵၼ်လိူင်ႈသိုၵ်းလႄႈ ၽူႈမီးပုၼ်ႈၽွၼ်း ၾၢႆႇတႂ်ႈပၵ်းပိူင်သိုၵ်း တေလႆႈဢဝ်ပုၼ်ႈၽွၼ်းပၼ်။
သင်ၸိူဝ်ႉဝႃႈ ဢမ်ႇပိုတ်ႇၼႄ ဢမ်ႇလႆႈႁူႉ လွင်ႈတႄႉမၼ်းၸိုင် ႁႂ်ႈၽူႈမီးပုၼ်ႈၽွၼ်း ၼႂ်းပိုၼ်ႉတီႈ ဢဝ် ပုၼ်ႈၽွၼ်းပၼ် တႃႇလွင်ႈႁူမ်ႇလူမ်ႈၵူၼ်းမိူင်း ၼႂ်းပိုၼ်ႉတီႈလႄႈ ႁႂ်ႈမီးလွင်ႈၽဵင်ႇပဵင်း။
လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ (NUG) ထုၵ်ႇလီၵုမ်းၵမ် လွင်ႈႁဵတ်းသၢင်ႈ တပ်ႉၸုမ်းပႃႈတႂ်ႈမၼ်း ႁႂ်ႈပေႃးဢမ်ႇပဵၼ်မႃး ပၼ်ႁႃလွင်ႈၸၢဝ်းၶိူဝ်းလႄႈသႃၼႃ ဢၼ်ဢမ်ႇပဵၼ် ၶႂ်ႈလႆႈၶႂ်ႈပဵၼ်ၼၼ်ႉ ဝႃႈၼႆ။
ပိူင်ပဵၼ် လွင်ႈၵၢၼ်တၢႆ ၸဝ်ႈတူၼ်ၶူး ဢူးထမ်ႇမသႃႇရ ဢႃယု 47 ပီ ဝႃႇသႃ 27 ဝႃႇ တင်း တၵ်ႉၵႃႇ ၸၢႆးပီး ဢႃယု 40 ပၢႆၼႆႉ ၺႃးယိုဝ်းတၢႆ တီႈဝတ်ႉဝၢၼ်ႈဢုမ်ႇတိုင်း ၸႄႈဝဵင်း ၾၢႆၶုၼ်။ ၸဝ်ႈတူၼ်ၶူး ဢူးထမ်ႇမ သႃႇရၼႆႉ ၺႃးယိုဝ်းတီႈတူဝ် 8 ၵမ်း။ ၸၢႆးပီးသမ်ႉ ၺႃးယိုဝ်း တီႈတူဝ် 2 ၵမ်းသေ လႆႈလွၼ်ႇတၢႆထင်တီႈ တင်းသွင် ၼႆယဝ်ႉ။
ၸဝ်ႈသြႃႇဢူးပဵင်ႇၼႆႉ ပဵၼ်ၸဝ်ႈဢၼ် ပူၵ်းပွင်သႃသၼႃ ၼႂ်းၸႄႈဝဵင်းၾၢႆၶုၼ် ၊ ၸုင်ၸၼ်ပႃး မေႃသွၼ် လုၵ်ႈႁဵၼ်း ၵူၼ်းၼုမ်ႇ၊ ၵမ်ႉၸွႆႈထႅမ်ပၼ်ၵူၼ်းပၢႆႈၽေးသိုၵ်း။ တၵ်ႉၵႃႇ ၸၢႆးပီးသမ်ႉ ပဵၼ်ပေႃႈဢွၵ်ႇ လူႇ တၢၼ်းဝတ်ႉဝႃးၽႃသိူဝ်ႇတႃႇမၼ်းၸဝ်ႈ။ ပဵၼ်ၵေႃႉဢၼ်မၼ်းၸဝ်ႈ လႆႈၸႂ်ယႂ်ႇပိုင်ႈဢိင် လူလွမ်တူၺ်း ထိုင်ၵၼ် ႁူမ်ႈၵၼ်ပူၵ်းပွင်ပၢႆးပၺ်ႇၺႃႇလႄႈ သႃသၼႃၼႆ – ၵူၼ်းပိုၼ်ႉတီႈလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ