ငိၼ်းဝႃႈ မိူဝ်ႈဝၼ်းတီႈ 22 ၼႆႉ ၶွင်ႇသီႇသိုၵ်းမၢၼ်ႈလႄႈ တင်းၸုမ်းသိုၵ်းၵဝ်ႈၵၢင်ႉ တေဢုပ်ႇၵၼ်ထႅင်ႈၼႆလႄႈ မိူဝ်ႈဝၼ်းတီႈ 21 ၼၼ်ႉ ၵူၼ်းမိူင်းပိုၼ်ႉတီႈ ႁဵတ်းလိၵ်ႈပႃႉၸွမ်းႁူဝ်ႉ ၸွမ်းၽႃ ၼႄၵၢင်ၸႂ် ၶွမ်ႈၶတ်းဝႃႈ ယႃႇႁႂ်ႈမိူင်းၶႄႇ ၶဝ်ႈၵႅဝ်ၸွမ်းလိူင်ႈမိူင်းမၢၼ်ႈ၊ ပွင်ႇဝႃႈ ယႃႇႁႂ်ႈတပ်ႉသိုၵ်းၵဝ်ႈၵၢင်ႉ လႆႈထွႆဢွၵ်ႇဝဵင်းလႃႈသဵဝ်ႈ ၼႆဝႃႇ။
လွင်ႈၼႆႉ ၸွင်ႇၸႂ်ႈၵၢင်ၸႂ်ၵူၼ်းမိူင်းတႄႉယူႇႁႃႉၼႆ ၵူၼ်းၼမ်ၵူၼ်းလၢႆ ဢွၼ်ငမ်းငဝ်းႁၼ်တိုၼ်ႈပႅတ်ႈတႄႉယဝ်ႉ။ ပေႃးၸႂ်ႈ ၵူၼ်းမိူင်းႁဵတ်းဢွၵ်ႇတႄႉၼႆ သုတ်းတီႈပဵၼ်ၼႂ်းၼႃႈတီႈတပ်ႉသိုၵ်းၵဝ်ႈၵၢင်ႉ ၵုမ်းၵမ်ဝႆႉ ယႃႇယႃႇ ၵွမ်ႉတႃႇတေသၢၼ်ၶတ်းမိူင်းၶႄႇသေ ၵမ်ႉယၼ်ပၼ်ၸုမ်းၵဝ်ႈၵၢင်ႉၼႆႉ ယွၼ်ႉသင် လႆႈႁဵတ်းလၵ်ႉမူၵ်းလၵ်ႉသိူင်ႇ လူၺ်ႈဢမ်ႇႁတ်းၼႄၼႃႈ လူၺ်ႈဢမ်ႇႁတ်းဢွၵ်ႇၸိုဝ်ႈဢွၵ်ႇသဵင်။
ၵွပ်ႈၼႆ ၵူၼ်းမိူင်းပိုၼ်ႉတီႈ ဢၼ်ဝႃႈၼႆႉ တေလႆႈယုမ်ႇယမ်တႄႉႁႃႉ၊ ယဝ်ႉၵေႃႈ ၶေႃႈၵၢင်ၸႂ်ၵူၼ်းမိူင်း ဢၼ် ဝႃႈၼႆႉလူး ၸွင်ႇတေလႆႈယုမ်ႇယမ်တႄႉႁိုဝ်ၼႆ ပဵၼ်မႃးၶေႃႈထၢမ်ယူႇယဝ်ႉ။ ၼႂ်းဝဵင်းလႃႈသဵဝ်ႈ ဝၼ်းမိူဝ်ႈလဵဝ် ၵူၼ်းမိူင်းပိုၼ်ႉတီႈမီးၵႃႈႁိုဝ်၊ ၸိူဝ်းမူၵ်းသေႃႉယူႇ တၢင်ႇဝၢၼ်ႈတၢင်ႇဝဵင်း တိုၵ်ႉႁၼ်လူၼ်ႉႁူ လူၼ်ႉတႃယူႇ လႄႈ ၸိူဝ်းဢၼ်ၼႄၵၢင်ၸႂ်တေႃႇမိူင်းၶႄႇၼၼ်ႉ မီးလၢႆဝၢၵ်ႈလႂ်ႁူဝ်ပၢၵ်ႇလႄႈ တေၼပ်ႉဝႃႈ လႆႈတၢင်တူဝ် ၵူၼ်းပိုၼ်ႉတီႈလႃႈသဵဝ်ႈၶႃႈလႃႇ။
ယဝ်ႉသမ်ႉ တပ်ႉသိုၵ်းၵဝ်ႈၵၢင်ႉၼႆႉ ပဵၼ်တီႈၵူၼ်းမိူင်းလႆႈၸႂ်ယႂ်ႇၸႂ်ပိုင်ႈ တႃႇႁူမ်ႇလူမ်ႈ ၵတ်းယဵၼ်ပဵၼ်လီ လူမ်ၸႂ်ဝႆႉတႄႉတႄႉဝႃႈဝႃႈ ထိုင်ထၢၼ်ႈလီလႆႈၵမ်ႉယၼ်တႄႉယဝ်ႉႁႃႉ ၸဵမ်ၸိူဝ်းၼႆႉၽုတ်းၸွမ်းမႃးယူႇယဝ်ႉ။
ၸုမ်းသိုၵ်းၵဝ်ႈၵၢင်ႉၼႆႉ ဝၢႆးလင်ၶဝ်ယိုတ်းလႆႈ ဝဵင်းလႃႈသဵဝ်ႈလႄႈ ငဝ်ႈငုၼ်းတိူင်းသိုၵ်းၸဵင်ႇႁွင်ႇဝၼ်းဢွၵ်ႇ(ရမခ) ယဝ်ႉ ၸွမ်းလူၺ်ႈမိူင်းၶႄႇ မိပ်ႇဢီးသေ လႆႈယွမ်းယိုၼ်ႈဢွၵ်ႇၶေႃႈပိုၼ်ၽၢဝ်ႇဝႃႈ တေၵိုတ်းတိုၵ်းတေႃႇ ၶွင်ႇသီႇသိုၵ်းမၢၼ်ႈ၊ တေဢမ်ႇၵွင်ႉၵၢႆႇၸွမ်း NUG ၼႆမႃးလႄႈ မီးၶၢဝ်ႇႁူင်ဝႃႈ လိူၼ်မေႊ 30 ဝၼ်း ဝႆႉပဵၼ်လိုၼ်းသုတ်းသေ တေလႆႈထွႆ ဢွၵ်ႇဝဵင်းလႃႈသဵဝ်ႈ ၵမ်းၸုပ်ႈၸုပ်ႈ၊ ၼႂ်းၵႄႈၼႆႉ ၾၢႆႇၶွင်ႇသီႇသိုၵ်းမၢၼ်ႈၵေႃႈ ၸင်ႇယင်ႉဝႆႉလွင်ႈပိုတ်းတိုၵ်းတၢင်းသၢႆမိၼ်ၶဝ်ၼႆ ၵူၼ်းမိူင်းတင်းလၢႆၵေႃႈ ႁူႉထိုင်ၵၼ်ယူႇ။
ၸူဝ်ႈၶၢဝ်းၶိဝ်းၶဝ်သွင်ၾၢႆႇၵိုတ်းတိုၵ်းၵၼ်ၼႆႉ ဢမ်ႇငိၼ်းသဵင်ၵွင်ႈၵၢင်ႇတႄႉ ၸႂ်ႈယူႇ။ လွင်ႈၾိင်ႈမိူင်းသုမ်ႇ ငမ်းသမ်ႉ မီးၵႃႈႁိုဝ်။ ၽဝၵၼ်ၵူၼ်း ႁူမ်ႇလူမ်ႈတႄႉယူႇႁႃႉ၊ လွင်ႈၶုတ်း ၶႃႁႃၵိၼ် ၸွင်ႇငၢႆႈလူမ်မႃး၊ ၵၢၼ် သွၼ်ႁဵၼ်းလုၵ်ႈဢွၼ်ႇ ၵူၼ်းၼုမ်ႇၸွင်ႇထၢင်ႇႁၢင်ႈ ၸဵမ်ၸိူဝ်းၼႆႉ ၸွင်ႇလီပဵင်းပေႃးၸႂ်။
လွင်ႈၽူႈလၵ်ႉၸၵ်ႉၶုတ်ႈလိူင်ႇ၊ လွင်ႈယႃႈမဝ်းၵမ်ၽႄႈ၊ လွင်ႈဢွၼ်ႇယိင်းဢွၼ်ႇၸၢႆး ၾိင်ႈယၢမ်ႈလူႉ ႁၢမ်းဢၢႆ ႁၢမ်းၵူဝ် ၸိူဝ်းၼႆႉ ပဵၼ်မီးယူႇၼႆ ပဵၼ်ၶၢဝ်ႇပဵၼ်ငၢဝ်းဝႆႉၼၼ်ႉ ၸပ်းမႅၼ်ႈၸွမ်းၵၢင်ၸႂ် ၵူၼ်းမိူင်းပိုၼ်ႉတီႈယူႇႁိုဝ်။ လိူင်ႈလွင်ႈၸိူဝ်းၼၼ်ႉသမ်ႉ ဢမ်ႇဢွၵ်ႇၼႄၵၢင်ၸႂ်ၼႆႉ တေလႆႈမၢႆထိုင်ဝႃႈ ၵူၼ်းမိူင်းၵေႃႈ မိုတ်ႈသူင်မူၼ်ႈၼူဝ်ၸွမ်းယဝ်ႉႁိုဝ်ၼႆ တႃႉလီၶႆႈၸႂ်ၼပ်ႉသၢင်ႈယူႇတႄႉယဝ်ႉ။
ၵူၼ်းမိူင်းဢၼ်ဝႃႈၼႆႉ သိုၵ်းၸုမ်းလႂ်သုမ်ႇငုမ်းၵုမ်းၵမ်ၵေႃႈ တိုၼ်းတေဢမ်ႇႁၢၼ်ႉၸႂ်၊ ႁူႉသေဢမ်ႇႁူႉသေၵေႃႈ ၶႂ်ႈလွတ်ႈပၢၵ်ႇၵွင်ႈၸမ်ႈ၊ ၶႂ်ႈပူၼ်ႉပိူင်သိုၵ်းပူင် ၽႂ်ၵေႃႈတိုၼ်းမိုတ်ႈသူင် လၢႆးပၵ်းပိူင်ၾိင်ႈမိူင်း သုမ်ႇငမ်း လူၺ်ႈၵူၼ်းမိူင်းၶိုၼ်းၽွင်းငမ်းၵၼ်ၼၼ်ႉၵူၺ်းသႄႈ။ ၸင်ႇၼၼ် ၸဵမ်မိူဝ်ႈသိုၵ်းမၢၼ်ႈ ၶိုၼ်ႈ ယိုတ်ႈမိူင်းၵေႃႈ ပႃးၸဵမ်ၵူၼ်းမိူင်းပိုၼ်ႉတီႈလႃႈသဵဝ်ႈ ဢွၼ်ႁိုၼ်ႇႁွင်ႉၼႄၵၢင်ၸႂ်သၢၼ်ၶတ်းမႃးဢမ်ႇႁိုဝ်။ တပ်ႉသိုၵ်းၼႆႉ ၵႃႈပေႉၶႂ်ႈလီလႃႈ၊ ထႃႈမၼ်းဢမ်ႇႁဵတ်းၵၢၼ်ၵႅတ်ႇၶႄမၢၼ်ႈမိူင်းပိူင်လဵဝ်သေ ၶိၼ်ယုင်ႈၸွမ်း ၵၢၼ်ဢုပ်ႉပိူင်ႇ ၽွင်းငမ်းလႄႈ ၵၢၼ်ပၢၼ်ႇမၢၼ်ႈပွင်မိူင်းယူႇတႄႉ ၸူဝ်ႈၵႅပ်ႉၸိုင် ၵူၼ်းမိူင်း ၸၢင်ႈတေယိူၼ်ႉ ၵၼ်ႈယွမ်းႁပ်ႉယူႇ၊ ႁိုင်ၼၢၼ်းမႃးတႄႉ ၵူၼ်းမိူင်းၽၵ်းၵႃႇၼႆႉ တိုၼ်းတွင်းတႃႉလၢႆး ၵၢၼ်ၽွင်းငမ်းၵူၼ်းမိူင်း ၼၼ်ႉၶိုၼ်းယဝ်ႉ။ ဢၼ်ၼႆႉပဵၼ်ပိူင်မိူင်းလုမ်ႈၾႃႉ ႁူမ်ႈႁူႉႁၼ်ၸႂ်ႉတိုဝ်းၵၼ်လႄႈ ႁဵတ်းပိၼ်ႈၽူၼ်ဢမ်ႇ လႆႈသႄႈ။
ၼႂ်းဝၼ်းမိူဝ်ႈလဵဝ် ၼင်ႇၾၢႆႇယိုတ်းမိူင်းဢမ်ႇသိုဝ်ႈသႂ်တေႃႇၵူၼ်းမိူင်း ၾၢႆႇလုၵ်ႉၽိုၼ်ႉၵေႃႈလိင်ႉလွၵ်းၼိူဝ်ၵူၼ်းမိူင်းမႃးယူႇယဝ်ႉ။ ၼင်ႇမိူင်းတႂ်ႈပွတ်းၵၢင် မီးလွင်ႈမၢပ်ႇမႂ်ပူၼ်ႉပႅၼ်ငႅၼ်းႁိပ်ႇတေႃႇၵူၼ်းမိူင်း တီႈမိူင်းတႆးပွတ်းႁွင်ႇ ပႃးၸဵမ်မိူင်းၵုတ်ႈလႄႈ လၢႆလၢႆတီႈၵေႃႈ လႆႈငိၼ်းၸွမ်းလိူင်ႈၸုမ်းလုၵ်ႉၽိုၼ်ႉ ဢထမ်ႇမ လူလၢႆပေႉၵိၼ် တေႃႇၵူၼ်းမိူင်းၼႆႉ ၼမ်လိူဝ်မႃးတိၵ်းတိၵ်း။ ၽိူဝ်ႇတေပူတ်းပွႆႇပၼ်ၵူၼ်းမိူင်း ၼႄၶေႃႈဢၢင်ႈ တၢင်းလူဝ်ႇၵၢၼ်သိုၵ်းသေ ယွၼ်းၶဝ်ႈယွၼ်းၶွၼ်ႇ၊ ၵဵပ်းလုၵ်ႈဢွၼ်ႇႁဵတ်းသိုၵ်း။ ၽိူဝ်ႇတေပိုတ်ႇႁႂ်ႈၵူၼ်းမိူင်း လႆႈၵႃႉငၢႆႈၶၢႆလူမ် ၼႄၶေႃႈဢၢင်ႈၵၢၼ်တိုၵ်းသေ တၢမ်တူဝ်ၶဝ်ၶုတ်းႁႄႈၸူင်ၶမ်း၊ တႅပ်းမႆႉမူၺ်ႉထိူၼ်ႇသူင်ႇၶၢႆ။ လပ်းတႃၼူၵ်ႇႁူ ပွႆႇႁႂ်ႈၵၢၼ်လပ်းသိင်ႇ လိူင်ႇၽႄႈၸွမ်းပိုၼ်ႉတီႈ။
ၽိူဝ်ႇတေႁဵတ်းႁႂ်ႈၵူၼ်းမိူင်းၽၵ်းၵႃႇ ထုၵ်ႇမေႃပေႃးၵႂၢမ်းၵၼ်သမ်ႉ ယုၵ်ႉၾိင်ႈၶိူဝ်းလိၵ်ႈလၢႆး ၸိူဝ်ႉၶိူဝ်းတူဝ်ၵဝ်ႇသေ တဵၵ်းတဵင်ၾိင်ႈၶိူဝ်းလိၵ်ႈလၢႆးတၢင်ႇၸိူဝ်ႉၶိူဝ်း ယႃႇႁႂ်ႈၸၢင်ႈမုၼ်း ၸၢင်ႈၼေႃႇ။ ႁၢႆႉၸႃႉသုတ်းၸမ်း ၸုမ်းလုၵ်ႉၽိုၼ်ႉၼင်ႇၵၼ် ႁိမ်ၸိင်းၼႃႈတီႈလႄႈ သုၼ်ႇလႆႈၵၼ် ထၢၼ်ႈပေႃးငိၼ်းတူဝ်ႈလူၵ်ႈၸွတ်ႇမိူင်း ၸိူဝ်းၼႆႉ ၵွႆႈယူႇၵွႆႈငၢႆးလၢႆးၵၢၼ် ၸုမ်းသိုၵ်းယိုတ်းမိူင်းမႃးတိၵ်းတိၵ်းလႄႈ ပိူဝ်ႈတႃႇၵူၼ်းမိူင်း တေႁၼ်လီယွမ်းႁပ်ႉၵမ်ႉယၼ်ဢၼ်ဝႃႈၼၼ်ႉ တေလႆႈမူၼ်ႉမႄးပိၼ်ႇလႅၵ်ႈ ၾိင်ႈၸႂ် ဢိၵ်ႇပႃးပၵ်းပိူင်ၵွၼ်ႇ ၸင်ႇၸၢင်ႈသၢင်ႈလႆႈၶိုၼ်း လွင်ႈပိၼ်ႇပႆႇယုမ်ႇယမ်ၵၼ်ယဝ်ႉ။
ဝႃႈႁိုဝ်ၵေႃႈ ၶေႃႈၵၢင်ၸႂ်ၵူၼ်းမိူင်း ဢၼ်ဝႃႈၼႆႉ ဢမ်ႇၸႂ်ႈတႃႇၵဵပ်းလဵၼ်ႈၸွမ်း ၵဵမ်းၵၢၼ်မိူင်းၵၢၼ်သိုၵ်းလႄႈ ပေႃးဢမ်ႇမီးၵူၼ်းမိူင်း ၸုမ်းသိုၵ်းဢၼ်လႂ်ၵေႃႈ ဢမ်ႇၸၢင်ႈၸုၵ်းၸင်ႈမၼ်ႈတူဝ်လႆႈၼႆ ယွၼ်းပၢႆးၼႄမွၵ်ႈ ၼႆႉၵွၼ်ႇဢေႃႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ