သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း ၶိူင်ႈၵွင်ႈလူင် ယိုဝ်းတိုၵ်းသေ ၸၢၵ်ႇမၢၵ်ႇတိူဝ်ႉၺႃးသင်ၶၸဝ်ႈ လူႉလွၼ်ႇ 5 တူၼ် မၢတ်ႇၸဵပ်း 14 တူၼ် ၼႂ်းၸႄႈဝဵင်းၼွင်ၶဵဝ် – ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး ဢွၵ်ႇၽိုၼ်တၢမ်းငဝ်းလၢႆးဝႆႉ ၼႂ်းဝၼ်းတီႈ 21/03/2025 ၼႆႉၼင်ႇၼႆ။
တႄႇဢဝ် ဝၼ်းတီႈ 08-17/03/2025 ၼၼ်ႉမႃး သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း၊ ဢဝ်ၻရူၼ်ႊ၊ ဢဝ်ၵွင်ႈ လူင် ယိုဝ်းတိုၵ်းလႄႈ ႁဵတ်းႁႂ်ႈၵူၼ်းမိူင်းလူႉတၢႆ 14 ၵေႃႉ၊ မၢတ်ႇၸဵပ်း 22 ၵေႃႉ တင်းမူတ်း 36 တူၼ်/ ၵေႃႉ ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ ဢၼ်ၼႂ်းၼႃႈတီႈ သိုၵ်းတဢၢင်း TNLA ၵုမ်းၵမ်ဝႆႉ ၼႂ်းၵူၼ်းမိူင်း မၢတ်ႇၸဵပ်းလူႉတၢႆၼၼ်ႉ ၵမ်ႈၼမ် ပဵၼ်သင်ၶ ၸဝ်ႈသၢင်ႇဢွၼ်ႇ ယွၼ်ႉသိုၵ်းမၢၼ်ႈ တင်ႈၸႂ်ဢဝ်ၶိူင်ႈ မိၼ်ပွႆႇမၢၵ်ႇသႂ်ႇ ၸွမ်းဝတ်ႉဝႃးၽႃသိူဝ်ႇ တိူၵ်ႈသွၼ်လိၵ်ႈ ၸိူဝ်းၼႆႉ။
ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈၼႆႉ ႁဝ်းၶႃႈၶႂ်ႈပိုတ်ႇၼႄဝႃႈ သိုၵ်းမၢၼ်ႈၼႆႉ ၶဝ်ဝႃႈ ၶဝ်ပဵၼ်ၸၢဝ်းပုတ်ႉထသႃၽႃလႄႈ ၼပ်ႉယမ်ဝႆႉ ၼၵ်းၼႃႇ ၵႂၢမ်းသွၼ်ပုတ်ႉထၸဝ်ႈ။ ၵူၺ်းဢၼ်ၶဝ်ႁဵတ်းယူႇမိူဝ်ႈလဵဝ်သမ်ႉ ၶဝ်တင်ႈၸႂ်ယိုဝ်းသင်ၶ ၵူၼ်းမိူင်း ၸိူဝ်းဢမ်ႇမီးတၢင်းၽိတ်းသင်တၢႆၸိူင်ႉၼႆ မၼ်းမိူၼ်မႃလိၼ်ၵမ်သိလ်ၵႅၵ်းၵူၺ်း။ ၼႂ်းၸႂ်ၶဝ်တႄႉ မိူၵ်ႈလိူင်းတႄႉတႄႉ”- ဝႃႈၼႆ။
သိုပ်ႇလၢတ်ႈဝႃႈ – “ထႅင်ႈလွင်ႈၼိုင်ႈ ၸွမ်းၸိူဝ်းဢၼ်ၶဝ်ဢဝ်ၶိူင်ႈမိၼ် ဢဝ်ၻရူၼ်ႊပွႆႇမၢၵ်ႇယူႇ တေႃႈလဵဝ်ၼႆႉ မၼ်းၸမ်တေႃႈၵႅတ်ႊသ် ၼမ်ႉမၼ်းၶႄႇၼႃႇ ပေႃးတိူဝ်ႉၺႃးတေႃႈတႅၵ်ႇလုၵ်ႉပဵၼ်ၾႆးလၢမ်းၵႂၢင်ႈမႃး တေမီးလွင်ႈတုမ်ႉတိူဝ်ႉလူႉသုမ်းတေႃႇ တူင်ႇဝူင်းၵူၼ်းလႄႈ သၽႃႇဝတႄႉတႄႉ”- ဝႃႈၼႆ။
ဢိင်ၼိူဝ် လွင်ႈၼႆႉသေ ဝၼ်းတီႈ 08/03/2025 ယၢမ်းၵၢင်ၶမ်ႈ 7 မူင်း သိုၵ်းမၢၼ်ႈ ဢဝ်ၵွင်ႈလူင်ယိုဝ်းၶဝ်ႈၵႂႃႇ ၼႂ်းဝၢၼ်ႈၼႃးၵျွင်းၶမ်းသေ တိူဝ်ႉၺႃးလုၵ်ႈဢွၼ်ႇ ၵေႃႉၼိုင်ႈမၢတ်ႇၸဵပ်းလႄႈ ႁိူၼ်းယေးလူႉၵွႆၼိုင်ႈလင်။ ၵူၼ်းဝၢၼ်ႈ တူၵ်းၸႂ် ယွၼ်ႉမၢၵ်ႇလူင်သေ ဢွၼ်ၵၼ်ပၢႆႈၽေးၵႂႃႇတၢင်ႇဝၢၼ်ႈ။
ဝၼ်းတီႈ 14 ယၢမ်းၵၢင်ၼႂ် 10 မူင်း သိုၵ်းမၢၼ်ႈ ဢဝ်ၻရူၼ်ႊ ပွႆႇမၢၵ်ႇၸွမ်းသူၼ်ဢွႆႈ ႁိမ်းဝၢၼ်ႈယႃႇပိၼ်ႇ ၼႂ်းဢိူင်ႇၼွင်တေႃႇသေ တိူဝ်ႉၺႃးၼၢင်းယိင်းၼုမ်ႇသၢမ်ၵေႃႉတၢႆ။ ၵူၼ်းဝၢၼ်ႈမၢတ်ႇၸဵပ်းထႅင်ႈ ႁႃႈၵေႃႉ (ၸၢႆး 2 ယိင်း 3) ၽွင်းတိုၵ်ႉတႅပ်းဢွႆႈ။ ဝၢၼ်ႈယႃႇပိၼ်ႇၼႆႉ ပဵၼ်ဝၢၼ်ႈထၼု ဢၼ်ပိုင်ႈဢိင်သူၼ်ဢွႆႈသေ ႁဵတ်းၵၢၼ်ႁႃၵိၼ်လဵင်ႉတွင်ႉ။
ဝၼ်းတီႈ 16 ယၢမ်းႁူဝ်ၶမ်ႈ 5:30 မူင်း သိုၵ်းမၢၼ်ႈ ဢဝ်ၶိူင်ႈမိၼ် (Jet Fighter) မႃးပွႆႇမၢၵ်ႇၼမ်ႉၼၵ်း 250 ပွင်ႊ သီႇလုၵ်ႈယဝ်ႉ ဢဝ်ၵွင်ႈၸၢၵ်ႈယိုဝ်းသႂ်ႇဝတ်ႉတိူၵ်ႈသွၼ်လိၵ်ႈ သဵင်ႇရတၼႃႇ ဢၼ်မီးတၢင်း ၸဵင်ႇဢွၵ်ႇ ဝဵင်းၼွင်ၶဵဝ်။ လွင်ႈၼၼ်ႉ ႁဵတ်းႁႂ်ႈၵူၼ်းမိူင်း 11 ၵေႃႉ (ၸဝ်ႈၸၢင်း 2 တူၼ်၊ ၸဝ်ႈသၢင်ႇ 5 တူၼ်၊ ၵူၼ်းၸၢႆး 2 ၵေႃႉလႄႈ ၼၢင်းယိင်း 2 ၵေႃႉ) လူႉလွၼ်ႇ/ တၢႆသေ မၢတ်ႇၸဵပ်းထႅင်ႈ 18 ၵေႃႉ (ၸဝ်ႈသၢင်ႇ 14 တူၼ်၊ ၼၢင်းယိင်း 3 ၵေႃႉလႄႈ ၵူၼ်းၸၢႆး 1 ၵေႃႉ)။ မၢင်ၵေႃႉတၢႆထင်တီႈ ယွၼ်ႉမၢၵ်ႇၵမ်းသိုဝ်ႈ။ ၵူၺ်းၵႃႈ ၸဝ်ႈသၢင်ႇ 4 တူၼ် ၺႃးမၢၵ်ႇၵွင်ႈၸၢၵ်ႈ ၽွင်းတိုၵ်ႉႁႃတၢင်းပၢႆႈသေ လႆႈလူႉလွၼ်ႇၵႂႃႇ။ ၵွပ်ႈတိုၵ်ႉပဵၼ် ယၢမ်းဝၢႆးဝၼ်း တိုၵ်ႉလႅင်းယူႇလႄႈ ဢၼ်ၸဝ်ႈသၢင်ႇၶဝ်ၼုင်ႈသၢင်ႇၵၢၼ်းလႅင်သီၵမ်ႇ ၼၼ်ႉ သိုၵ်းမၢၼ်ႈ ဢၼ်ယူႇၼိူဝ်ၶိူင်ႈမိၼ်လႅပ်ႈႁၼ်ၸႅင်ႈယူႇ လွင်ႈၼႆႉ ယွၼ်ႉၶဝ်တိုၼ်းတင်ႈၸႂ်ယိုဝ်းသႂ်ႇ ၼၼ်ႉယဝ်ႉ။ ၸဝ်ႈသၢင်ႇ ဢၼ်မၢတ်ႇၸဵပ်းႁၢဝ်ႈႁႅင်းတူၼ်ၼိုင်ႈ လႆႈလွၼ်ႇၵႂႃႇတီႈႁူင်းယႃ မိူဝ်ႈဝၼ်းတီႈ 17/03/2025 ။
မၢၵ်ႇသိုၵ်းမၢၼ်ႈၼၼ်ႉ တိူဝ်ႉၺႃး တိူၵ်ႈဝတ်ႉသွၼ်လိၵ်ႈ သီႇလင်လူႉၵွႆပႃး တင်းႁူင်းထမ်ႇမရူင်ႇ၊ ႁူင်းၸဝ်ႈၸၢင်းၶဝ်ယူႇသဝ်းလႄႈ ႁူင်းၸဝ်ႈသၢင်ႇၶဝ် ယူႇသဝ်း။ ရူတ်ႉ/ ၵႃး သၢမ်လမ်းလႄႈ ႁိူၼ်းၵူၼ်းမိူင်း ဢၼ်ယူႇႁိမ်းၸမ်ၵေႃႈ လူႉၵွႆပႃးထႅင်ႈ။ တီႈတိူၵ်ႈသွၼ်လိၵ်ႈၼႆႉ မီးၸဝ်ႈၸၢင်း 5 တူၼ်လႄႈ ၸဝ်ႈသၢင်ႇ 60 တူၼ် (ဢႃယု 5 – 16 ၶူပ်ႇ) သေ မီးပႃးၵူၼ်းမိူင်း ၼႂ်းဝဵင်းၼွင်ၶဵဝ် ဢၼ်ပၢႆႈၽေးမႃးမီးတီႈဝတ်ႉ 200 ပၢႆ ၸိူဝ်းၶဝ်မႃးၼွၼ်းတီႈဝတ်ႉ ယၢမ်းၵၢင်ၶိုၼ်း ပိူဝ်ႈတႃႇလွင်ႈႁူမ်ႇလူမ်ႈ။ တီႈဝတ်ႉၼႆႉ ဢမ်ႇမီးၸုမ်းယိပ်းၵွင်ႈၵၢင်ႇ ၸုမ်းလႂ်ယူႇ။
ဝၼ်းတီႈ 17/03/2025 ယၢမ်းၵၢင်ဝၼ်း 11:45 မူင်း ၶိူင်ႈမိၼ်တိုၵ်း သိုၵ်းမၢၼ်ႈ မႃးပွႆႇမၢၵ်ႇသွင်လုၵ်ႈလႄႈ ဢဝ်ၵွင်ႈၸၢၵ်ႈယိုဝ်း ၶဝ်ႈတီႈဝၢၼ်ႈၵျွၵ်ႉၵျၢမ်း ဢၼ်ယူႇတၢင်းတူၵ်း ယၢၼ်ၵႆဝဵင်းၼွင်ၶဵဝ် 5 ၵီႊလူဝ်ႊမီႊတိူဝ်ႊ။ မၢၵ်ႇတူၵ်းၸမ်တေႃႈၵႅတ်ႊသ် ၼမ်ႉမၼ်းၶႄႇ ယၢၼ်ၵၼ်မွၵ်ႈ 700 မႄႈတိူဝ်ႊၵူၺ်း။ ႁိူၼ်းၵူၼ်းဝၢၼ်ႈလၢႆလၢႆလင် လူႉၵွႆၸွမ်း – ယူႇတီႈ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ