ဝၼ်းတီႈ 19/03/2025 ယၢမ်းၵၢင်ၶမ်ႈ 7 မူင်းၶိုင်ႈ ႁူဝ်ပဝ်ႈၵဝ်ႇ သၽႃးမိူင်းတႆး လုင်းၸၢႆးလူင်းသႅင် လူႉသဵင်ႈၵႂႃႇ လူၺ်းတၢင်းပဵၼ်မလဵင်း (ၶႅၼ်ႊသိူဝ်ႊ) ၽွင်းဢႃယု 78 ပီ တီႈႁူင်းယႃလူင် ၵဵင်းတုင်သေ ယၢမ်းလဵဝ် လႆႈဢဝ်ၶၢပ်ႈတူဝ် မႃးၸတ်းပၢင်ၸႃႇပၼဝႆႉ တီႈႁိူၼ်းယေး ပွၵ်ႉ 4 ဝဵင်းၵဵင်းတုင် ၸိုင်ႈတႆးပွတ်းဢွၵ်ႇ ၼႆယဝ်ႉ။  

ၵူၼ်းပိုၼ်ႉတီႈ ဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “လုင်းၸၢႆးလူင်းသႅင်ၼႆႉ ပဵၼ်ၶႅၼ်ႊသိူဝ်ႊသေ လႆႈလူႉသဵင်ႈၵႂႃႇ တီႈႁူင်းယႃလူင် ၵဵင်းတုင်ၼႆႉ။ မၼ်းၸဝ်ႈၼႆႉ ယွၼ်ႉပၢႆးယူႇလီ ဢမ်ႇၶႅမ်ႉသေ လႆႈထွၼ် တူဝ်ဢွၵ်ႇမႃး တၼ်းႁဵင်းလူင်ပွင်ၸိုင်ႈ တႂ်ႈသိုၵ်းမၢၼ်ႈ ၵုမ်းၵမ်ၼၼ်ႉသေ လႆႈမႃးယင်ႉလိုဝ်ႈ တီႈႁိူၼ်းၼႆႉ မိူဝ်ႈလိူၼ်ၵျႅၼ်ႊၼိဝ်ႊရီႊၼၼ်ႉ။ မၼ်း ၸဝ်ႈၼႆႉ ပဵၼ်ၵူၼ်းၵေႃႉလဵဝ် ဢမ်ႇမီးၼႃႈႁိူၼ်း။ ပီႈၼွင်ႉတႄႉ မီးယူႇ”- ဝႃႈၼႆ။

လုင်းၸၢႆးလူင်းသႅင်ၼႆႉ ၸဵမ်မိူဝ်ႈပၢၼ် ၶွင်ႇသီႇၵူၼ်းမိူင်းၼၼ်ႉမႃး ပဵၼ်ၽူႈၶဝ်ႈၸုမ်း ၼႂ်းၸႄႈဝဵင်းၵဵင်းတုင်သေ ပဵၼ်ၽူႈၶဝ်ႈၸုမ်း ပႃႇတီႇသၢင်ႇသီႈမႃး။ ၼႂ်းပီ 2010 တေႃႇထိုင် ပီ 2020 ပဵၼ်ႁူဝ်ပဝ်ႈ သၽႃးမိူင်းတႆး လူင်ပွင်ၸိုင်ႈ 2 ပၢၼ်။

ဝၢႆးသိုၵ်းမၢၼ်ႈ ယိုတ်းမိူင်း တႄႇဢဝ်ပီ 2021 တေႃႇထိုင် 2023 ပဵၼ်ၽူႈၶဝ်ႈၸုမ်းငဝ်ႈငုၼ်းတႂ်ႈသိုၵ်းမၢၼ်ႈမႃး။ ၼႂ်းဝၼ်းတီႈ 01/02/2023 ၼၼ်ႉ ပဵၼ်မႃးထႅင်ႈ ၽူႈၶဝ်ႈၸုမ်း ၼႂ်း ၸုမ်းၾၢႆႇၵိူဝ်းၵုမ် ငဝ်ႈငုၼ်းသိုၵ်းမၢၼ်ႈ ၼႆယဝ်ႉ။

ဝၢႆးၼၼ်ႉ ၼႂ်းဝၼ်းတီႈ 08/01/2025 ၼႆႉ ယွၼ်ႉပၢႆးယူႇလီသေ ၺႃးသိုၵ်းမၢၼ်ႈ ပူတ်းတၼ်းႁဵင်းပႅတ်ႈ ဝႃႈၼႆ။

မိူဝ်ႈၽွင်းပၢင်လိူၵ်ႈတင်ႈ 2015 ၼၼ်ႉ လုင်ႈၸၢႆးလူင်းသႅင် တၢင်တူဝ်ပႃႇတီႇသၢင်ႇသီႈသေ ၶဝ်ႈၶႅင်ႇတီႈဝဵင်းၵဵင်းတုင် မိူင်းတႆးပွတ်းဢွၵ်ႇယဝ်ႉ ဢွင်ႇပေႉပၢင်လိူၵ်ႈတင်ႈသေတႃႉ ထိုင်မႃး ပၢင်လိူၵ်ႈတင်ႈ ပီ 2020 ၼၼ်ႉ မၼ်းၸၢႆးဢမ်ႇၶဝ်ႈၶႅင်ႇသေတီႈ ၼႆယဝ်ႉ။

လုင်းၸၢႆးလူင်းသႅင်ၼႆႉ ယၢမ်ႈပဵၼ်ၶူးသွၼ်မႃး တီႈႁူင်းႁဵၼ်းၸၼ်ႉသုင်မၢႆ 2 ဝဵင်းၵဵင်းတုင်။ ယဝ်ႉၵေႃႈ ပဵၼ်ႁူဝ်ပဝ်ႈ ၾၢႆႇၾိင်ႈငႄႈ 8 ၸုမ်း ၼႂ်းဝဵင်းၵဵင်းတုင် မိူၼ်ၼင်ႇ – တႆးလူင်၊ တႆးၶိုၼ်၊ တႆးၼိူဝ်၊ တႆးလိုဝ်ႉ၊ လွႆ၊ ဝႃႉ၊ ဢႃးၶႃႇလႄႈ လႃးႁူႇ ၸိူဝ်းၼႆႉ။