သိုၵ်းမၢၼ်ႈၾၢႆႇၽွင်းငမ်းၸႄႈတွၼ်ႈတူၼ်ႈတီး ဢွၵ်ႇလိၵ်ႈလပ်ႉ ၸီႉသင်ႇၵၼ်ဝႃႈႁႂ်ႈတီႉၺွပ်း ရူတ်ႉၵႃးဢမ်ႇမီးဝႂ်ၶွၼ်ႇ လၢႆႊသိၼ်ႊ ႁႂ်ႈၶဝ်ႈတီႉထိုင်ၼႂ်းႁိူၼ်းၼႂ်းယေး ၼႂ်းၸႄႈတွၼ်ႈတူၼ်ႈတီး ဝႃႈၼႆ။   

လွင်ႈၼႆႉ ၸုမ်းၸွႆႈထႅမ်ၵၢၼ်လုၵ်ႉၽိုၼ်ႉ TGI Support Revolution လၢတ်ႈတီႈၽူႈတွႆႇႁွၵ်ႈဝႃႈ – ပဵၼ်ယွၼ်ႉ သိုၵ်းမၢၼ်ႈလႆႈၶၢဝ်ႇဝႃႈ ၸုမ်းသိုၵ်းၽွမ်ႉႁူမ်ႈ PDF တေႃႉသူင်ႇၶိူင်ႈၵွင်ႈၵၢင်ႇ ၸွမ်းရူတ်ႉၵႃး ဢမ်ႇမီးဝႂ် လၢႆႊသိၼ်ႊ ၼႆလႄႈ ဢၼ်ပဵၼ်  ၽူႈၵွၼ်းႁွင်ႈၵၢၼ်ၾၢႆႇၽွင်းငမ်းၵူႈလွင်ႈလွင်ႈ  ၸႄႈတွၼ်ႈ တူၼ်ႈတီး  ဝိၼ်းၵူဝ်ႇၵူဝ်ႇ ( ဝင်းကိုကို )  လူင်းလၢႆးမိုဝ်း ဢွၵ်ႇလိၵ်ႈလပ်ႉ ၼႂ်းဝၼ်းတီႈ10/3/2025 ၸီႉသင်ႇႁႂ်ႈတီႉၺွပ်းရူတ်ႉၵႃး ဢမ်ႇမီးဝႂ်- ဝႃႈၼႆ ။

ဢၼ်လိုပ်ႈလမ်းတီႉၺွပ်း ရူတ်ႉၵႃး ဢမ်ႇမီးဝႂ်ၼႆႉ ယူႇတီႈ ပလိၵ်ႈမၢၼ်ႈသိုၵ်းမၢၼ်ႈ တေဢွၼ်ႁူဝ် ၊ တေမီး ၸုမ်းယွႆႈ 10 ၸုမ်းသေ တေၶဝ်ႈတီႉၺွပ်းထိုင် ၼႂ်းပွၵ်ႉၼႂ်းယွမ်ႇ ၊ ၼႂ်းဢိူင်ႇၼႂ်းဝၢၼ်ႈ ၸွမ်းၵိဝ်ႇ ၸွမ်း တၢင်း ၊ ၸၢင်ႈထိုင်ၼႂ်းဝၢင်းႁိူၼ်းယေးလႄႈ ႁၢၼ်ႉၶၢႆ / ႁၢၼ်ႉလၢင်ႉ ရူတ်ႉၵႃး   ၸိူဝ်းၼႆႉ ၼႆ ၵူၼ်းၸမ်ၸႂ် ၵၼ်တင်းၾၢႆႇၽွင်းငမ်း တီႈဝဵင်းတူၼ်ႈတီးလၢတ်ႈဝႆႉၼင်ႇၼႆ။  

ၼၢင်းယိင်းဢႃယု 27 ပီ ၵူၼ်းမိူင်းဝဵင်းတူၼ်ႈတီး လၢတ်ႈၽူႈတွႆႇႁွၵ်ႈဝႃႈ- “မိူဝ်ႈဝၼ်းတီႈ 16  ၵၢင်ဝၼ်း 3 မူင်း တီႈပွၵ်ႉ ၽြႃးၽိူၵ်ႇ ၶဵတ်ႇ 1  ပလိၵ်ႈသိုၵ်းမၢၼ်ႈ ၶဝ်မႃးၵူတ်ႇထတ်း ၼႂ်းႁိူၼ်း ၊ ၼႂ်းပွၵ်ႉ  ၼႂ်းယွမ်ႇၵေႃႈ ထတ်းပဵၼ်တီႈပဵၼ်တီႈ ။ ရူတ်ႉၵႃးဢၼ်တီႉၺွပ်းလႆႈၼၼ်ႉ ဢမ်ႇထုတ်ႇလႆႈၶိုၼ်း ၊ ၶဝ်ဢဝ်ပႅတ်ႈ သိမ်း ပႅတ်ႈ ၵူႈပိူင်ပိူင် ။ လႆႈငိၼ်းဝႃႈ ၶဝ်တေပၼ်ၵူၼ်းလူင်ၶဝ်ၼႂ်း ၶႃႈႁၢပ်ႇၵၢၼ်ၶုၼ်ၶဝ်ၸႂ်ႉၶိုၼ်းၼႆၶႃႈၼေႈ။ ပေႃးမီး လၢႆႊသိၼ်ႊၵေႃႈၶဝ်တီႉၵႂႃႇဢေႃႈ။ ၵူၺ်းၵႃႈၶဝ်တေမၢပ်ႇမႂ်သေလွင်ႈလွင်ႈသေ တေၸႂ်ႉ ထုတ်ႇ ဢဝ်ၶိုၼ်း။ ပေႃးပဵၼ်ရူတ်ႉၶိူင်ႈၼိုင်ႈလမ်း 5 မိုၼ်ႇပျႃး ၊ ပေႃးပဵၼ်ရူတ်ႉၵႃး 30 သႅၼ်ထိုင် 40 သႅၼ်ပျႃး ။ ပေႃးဢမ်ႇမီးဝႂ်တႄႉ ၶဝ်ဢမ်ႇပၼ်ထုတ်ႇဢဝ်ၶိုၼ်း ”- ဝႃႈၼႆ ။

ဢၼ်ပလိၵ်ႈတီႉၺွပ်းၼၼ်ႉ ယွၼ်ႉၵူၼ်းၶပ်းရူတ်ႉၶိူင်ႈ ဢမ်ႇတိုဝ်းမၢၵ်ႇႁူဝ်ႁႄႉၽေး ၊  မၢၵ်ႇႁူဝ်ႁႄႉၽေး ဢမ်ႇမီးမၢၼ်ႇႁႄႉတၢင်းၼႃႈ ၊ ၵူၼ်းၶပ်းရူတ်ႉဢမ်ႇမီးဝႂ်ၶပ်းရူတ်ႉ ဢမ်ႇၼၼ် ရူတ်ႉၶိူင်ႈ ဢမ်ႇမီး ဝတ်းဝႂ် လၢႆႊသိၼ်ႊ ၸိူဝ်းၼႆႉ  ။ ၵူၺ်းၵႃႈ ပေႃးပဵၼ်ရူတ်ႉၵႃး NON CDM (ၶႃႈႁၢပ်ႇၵၢၼ်ၶုၼ် ဢၼ်ဢမ်ႇႁဵတ်း CDM သေ သိုပ်ႇယွမ်းႁဵတ်းၵၢၼ်ၸွမ်းၶဝ်ယူႇ) ၸိူဝ်းၼၼ်ႉတႄႉ ၶဝ်ဢမ်ႇၺွပ်း  ၵူၼ်းပိုၼ်ႉတီႈ လၢတ်ႈ ၼင်ႇၼႆ။

“ ရူတ်ႉၵႃးဢမ်ႇမီးဝတ်းဝႂ်လၢႆသိၼ်ႊ ၼႂ်းၸႄႈတွၼ်ႈတူၼ်ႈတီးၼႆႉ တေႃႇထိုင်ယၢမ်းလဵဝ်  ၶဝ်တီႉဝႆႉမီး 500 ပၢႆယဝ်ႉ    ၊ ပေႃးပဵၼ်ရူတ်ႉၵႃး  ၶႃႈႁၢပ်ႇၵၢၼ်ၶုၼ် NON CDM ၸိူဝ်းၼႆႉတႄႉ ၶဝ်ဢမ်ႇတီႉဝႃႇ ၊ ၶဝ်ပဵၼ် ၶႃႈႁၢပ်ႇၵၢၼ်ၶုၼ်လႄႈ ႁႂ်ႈၶဝ်လႆႈၸႂ်ႉရူတ်ႉၵႃးလွတ်ႈလႅဝ်းၼႆ။ ယၢမ်းလဵဝ် ၵူၼ်းၸိူဝ်းၶၢႆ  ရူတ်ႉၵႃး Without   (ဢမ်ႇမီးဝႂ်ၶွၼ်ႇ) တီႈႁၢၼ်ႉလႄႈသင် တၢင်း Facebook ၊ Tiktok ဢွၼ်ႊလၢႆႊၸိူဝ်းၼႆႉလႄႈသင် လႆႈၵိုတ်းလိုဝ်ႈဝႆႉ  ” – ဝႃႈၼႆ ။

ယၢမ်းလဵဝ်ၵေႃႈ ယွၼ်ႉပိူဝ်ႈပလိၵ်ႈမၢၼ်ႈသိုၵ်းမၢၼ်ႈ ၵူတ်ႇထတ်းရူတ်ႉၵႃးဢမ်ႇမီးဝႂ်လၢႆႊသိၼ်ႊ ႁၢဝ်ႈႁႅင်းလႄႈ ၵူၼ်းၸိူဝ်းယူႇႁိမ်းႁွမ်းလႄႈၼႂ်းဝဵင်းတူၼ်ႈတီး ဢမ်ႇႁတ်းၸႂ်ႉရူတ်ႉၵႃးၵႂႃႇမႃး။ ပႆႇဝႃႈၵၢၼ်ႁႃၵိၼ်လဵင်ႉတွင်ႉ၊ သင်ဝႃႈယူႇဢမ်ႇလီၵိၼ်ဢမ်ႇဝၢၼ်မႃးၵေႃႈ ယင်းဢမ်ႇႁတ်းဢဝ်ၵၼ်ၵႂႃႇႁူင်းယႃ။ ပဵၼ်ဢၼ်ယၢပ်ႇၽိုတ်ႇတႃႇၵူၼ်းမိူင်းတႄႉတႄႉ- ၼႆၵူၼ်းပၢႆႈၽေးသိုၵ်းဢၼ်ႁွတ်ႈထိုင်ဝႆႉတီႈဝဵင်းလူင်တူၼ်ႈတီးၵေႃႉၼိုင်ႈလၢတ်ႈၼင်ႇၼႆ။  

“ယွၼ်ႉၶဝ်ၵူတ်ႇထတ်းၸိူင်ႉၼႆလႄႈ ပေႃးပဵၼ်ၵူၼ်းတင်းဝၢၼ်ႈ တေမႃးယႃတူဝ်ၼၼ်ႉ ယၢပ်ႇဢေႃႈ ၊ ပေႃးၵႃးၸဝ်ႈၵဝ်ႇ ဢမ်ႇမီးလၢႆႊသိၼ်ႊၵေႃႈ ၵႃႈလႆႈ ၸၢင်ႈ ၵႃးပိူၼ်ႈ ၊ ငိုၼ်းၵေႃႈ လႆႈသဵင်ႈထႅင်ႈၼမ် တႃႇမႃးယႃတူဝ် ၸိူဝ်းၼႆႉ”-ဝႃႈၼႆ ။

ၼႂ်းဝူင်ႈဝၢင်ႈၼႆႉ ပလိၵ်ႈမၢၼ်ႈသိုၵ်းမၢၼ်ႈ  ၸႅၵ်ႇလၢႆလၢႆၸုမ်းသေ ပႂ်ႉၵူတ်ႇထတ်းရူတ်ႉၵႃး ၸိူဝ်းဢမ်ႇမီးဝႂ်လၢႆႊသိၼ်ႊ မိူၼ်ၼင်ႇ တီႈ 4 လၵ်း သဵၼ်ႈတၢင်း လုၵ်ႉဝဵင်းႁူဝ်ပူင်း ၶဝ်ႈဝဵင်းတူၼ်ႈတီး၊ တၢင်းလူင်း ၽြႃးသူႇလႃႇမုၼိ၊ သဵၼ်ႈတၢင်းလဵပ်ႈဝဵင်း ၾၢႆႇဢွၵ်ႇ၊ တၢင်းငွၵ်း ႁိမ်းလုမ်းသၽႃး၊ ႁိမ်းလုမ်း ၶႂၢႆႇၶႃပႄလႅင် (ၵျႅတ်ႉၶျေႇၼီႇ)၊ ၼိူဝ်သဵၼ်ႈတၢင်းလူင်ၵၢင်ဝဵင်း ႁိမ်းၵၢတ်ႇ Ocean ၊ ႁိမ်းႁၢင်ႈၽႅၼ်ႇလိၼ်၊ ႁိမ်းပၢမ်ႉၼမ်ႉမၼ်းBOC လႄႈ ႁိမ်းပၢင်ႇပွႆႇႁူင်းၾႆးမိၼ် ၸဵမ်ၸိူဝ်းၼၼ်ႉ ဝႃႈၼႆ။

ၼႂ်းႁူဝ်လိူၼ်ၼႆႉ ပျီႇတူႉၸိတ်ႉပဢူဝ်း PNO ၵေႃႈ ဢွၵ်ႇလိၵ်ႈဝႆႉဝႃႈ ၼႂ်းၼႃႈတီႈ 6 ပျီႇတူႉၸိတ်ႉပဢူဝ်းၵုမ်းၵမ် မိူၼ်ၼင်ႇ ၼႂ်းၸႄႈဝဵင်း ႁူဝ်ပူင်း၊ ပၢင်လွင်း၊ သီႇသႅင်ႇ၊ တူၼ်ႈတီး လႄႈ ၵျွၵ်ႉတလူင်းၸိူဝ်းၼႆႉ တေဢမ်ႇလႆႈၸႂ်ႉ ရူတ်ႉၵႃး ဢၼ်ဢမ်ႇမီးဝႂ်လၢႆႊသိၼ်ႊ၊ သင်ၵူတ်ႇထတ်းႁၼ်ၸိုင်  တေတီႉၺွပ်း  ဝႃႈၼႆ။