လူင်ပွင်ၸိုင်ႈ မိူင်းထႆး မိူင်းမၢၼ်ႈ မိူင်းၶႄႇ ဢိၵ်ႇလၢႆလၢႆၸိုင်ႈမိူင်း ႁူမ်ႈၵၼ်သေ ႁဵတ်းၵၢၼ်ၵႂၢတ်ႇလၢင်ႉ ၵူၼ်းႁဵတ်းၵၢၼ်ၵျႃးၽႅၼ်ႉ(ႁိုဝ်) ၵူၼ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတၢင်း ဢွၼ်ႊလၢႆႊ ၸွမ်းလႅၼ်လိၼ် ၸိူဝ်းတိတ်းၸပ်းၵၼ်ၼၼ်ႉယူႇသေတႃႉ ႁၢၼ်ႉတေႃႇယၢမ်းလဵဝ် ယင်းပႆႇႁၢႆမူတ်း ၼႆယဝ်ႉ။

ၼႂ်းမိူင်းမၢၼ်ႈၼႆႉ ၵူၼ်းၸိူဝ်း တိုၵ်ႉသိုပ်ႇႁဵတ်းၵၢၼ်ၵျႃးၽႅၼ်ႉၼႆႉ ယင်းတိုၵ်ႉမီးမွၵ်ႈၼိုင်ႈသႅၼ်ၵေႃႉ ယူႇ ၼႆ ၸဝ်ႈၼႃႈတီႈ ၸၼ်ႉသုင် ၼႂ်းႁွင်ႈၵၢၼ်ပလိၵ်ႈ ၾၢႆႇမိူင်းထႆးၵေႃႉၼိုင်ႈ လၢတ်ႈၼႄဝႆႉ ၼႂ်းသိုဝ်ႇၶၢဝ်ႇ Bangkok Post ၼင်ႇၼႆ။ 

“မိူဝ်ႈဝူင်ႈပူၼ်ႉမႃးၼႆႉ ၵူတ်ႇထတ်းၸႅတ်ႈထၢမ်တူၺ်း ၵူၼ်းႁဵတ်းၵၢၼ်ၵျႃးၽႅၼ်ႉ မွၵ်ႈ 5,000 ၵေႃႉ ၸိူဝ်းတီႉၺွပ်းလႆႈ မႃးၼၼ်ႉ ၵမ်ႈၼမ် ပဵၼ်ၵူၼ်းၺႃးထုၵ်ႇၶၢႆၵိၼ်လႄႈ တဵၵ်းတဵင် ႁႂ်ႈႁဵတ်းၵၢၼ်လွၵ်ႇလႅၼ်ၵိၼ်ငိုၼ်း။ ၼႂ်းၼၼ်ႉ ၵူၼ်းၸိူဝ်းပႃးၸႂ်သေ တင်ႈၸႂ်ၶဝ်ႈၵႂႃႇႁဵတ်းၵၢၼ် ၼႂ်းၸုမ်းၵျႃးၽႅၼ်ႉၵေႃႈ မီးၼပ်ႉႁူဝ်ပၢၵ်ႇမၼ်းယူႇ။ သွင်သႅၼ်ၼႆႉ ၶူၼ်းလေႃး ၵၼ် ဝႆႉယူႇ။ ဢိင်ၼိူဝ် ၵၢၼ်ၵူတ်ႇထတ်းၸႅတ်ႈထၢမ်ၼႆႉသေ ၵူၼ်းၸိူဝ်းတိုၵ်ႉႁဵတ်းၵၢၼ်ၵျႃးၽႅၼ်ႉၼႆႉ ယင်းတိုၵ်ႉၵိုတ်းယူႇ ၵႄႈၵၢင် 50,000 လႄႈ 100,000 ၵေႃႉ” – ဝႃႈၼႆ။

ၵၢၼ်ၵႂၢတ်ႇလၢင်ႉၽဵဝ်ႈမူၺ်ႉ ၵျႃးၽႅၼ်ႉ ၸွမ်းလႅၼ်လိၼ် မိူင်းထႆး – မိူင်းမၢၼ်ႈၼႆႉ ယင်းတိုၵ်ႉႁဵတ်းသၢင်ႈ ၵႂႃႇလႆႈဢိတ်းဢီႈၵူၺ်းသေ ၼႂ်းၸႄႈဝဵင်းမျႃႉဝတီႇၼၼ်ႉ ၵူၼ်းႁဵတ်းၵၢၼ် လွၵ်ႇလႅၼ်ၵိၼ်ငိုၼ်းတၢင်း ဢွၼ်ႊလၢႆႊ ယင်းတိုၵ်ႉၵိုတ်းၼမ်တႄႉတႄႉ ၼႆယဝ်ႉ။

ၸွမ်းၼင်ႇ ၾၢႆႇၸွပ်ႇၶၢဝ်ႇ မိူင်းၶႄႇၶဝ် လႆႈၶေႃႈမုလ်းဝႆႉတႄႉ ၵူၼ်းၸိူဝ်းႁဵတ်းၵၢၼ်လွၵ်ႇလႅၼ်လႄႈ ႁဵတ်းၵၢၼ်ၽိတ်း ပၵ်းပိူင်ဝၢၼ်ႈမိူင်းသေ ဢွၼ်ႁူဝ်ၼမ်းၼႃႈ ႁဵတ်းၵၢၼ်ၵျႃး ၽႅၼ်ႉယူႇၼႆႉ ယင်းတိုၵ်ႉမီးယူႇမွၵ်ႈ 3,700 ၵေႃႉ ၼႆယဝ်ႉ။

ၼင်ႇႁိုဝ် ၵူၼ်းႁဵတ်းၵၢၼ်ၽိတ်းပၵ်းပိူင်ဝၢၼ်ႈမိူင်း (ႁိုဝ်) ၸုမ်းၵျႃးၽႅၼ်ႉ ပေႃးတေဢမ်ႇၸၢင်ႈသိုပ်ႇႁဵတ်း ၵၢၼ်လႄႈ ၶႂၢၵ်ႈၼႃႈၵၢၼ်ၵႂႃႇထႅင်ႈၼၼ်ႉ ယိူင်းဢၢၼ်း ပိူဝ်ႈတႃႇၽဵဝ်ႈမူၺ်ႉ ၸုမ်းလွၵ်ႇလႅၼ်ၵိၼ်ငိုၼ်း ၼိူဝ်ဢွၼ်ႊလၢႆႊ ၼႂ်းၸႄႈဝဵင်းမျႃႉဝတီႇၼၼ်ႉသေ ၾၢႆႇလူင်ပွင် ၸိုင်ႈမိူင်းထႆး လႆႈတတ်းၶၢတ်ႇၾႆးၾႃႉ၊ ဢိၼ်ႊထိူဝ်ႊၼႅတ်ႊ မိူဝ်ႈလိူၼ်ၾႅပ်ႊပိဝ်ႊရီႊၼၼ်ႉမႃး ၼႆယဝ်ႉ။

လိူဝ်ၼၼ်ႉ ၾၢႆႇလူင်ပွင်ၸိုင်ႈမိူင်းထႆး ယူႇၼႂ်းၵႄႈၵၢင်သေ ႁပ်ႉဢဝ်ၵူၼ်းမိူင်းၶႄႇ၊ မိူင်းဢိၼ်ႊတီႊယိူဝ်ႊ၊ ဢိၼ်ႊတူဝ်ႊၼီႊသျႃႊ ၸိူဝ်းၺႃးတီႉၺွပ်း လူၺ်ႈႁဵတ်းၵၢၼ်ၵျႃးၽႅၼ်ႉယူႇ ၼႂ်းမိူင်းမၢၼ်ႈၼၼ်ႉ သူင်ႇပွၵ်ႈၶိုၼ်း မိူင်းၽႂ်ႇမိူင်းမၼ်း တႃႇ 3,500 ၵေႃႉယဝ်ႉၼႆ – သိုဝ်ႇၶၢဝ်ႇထႆး Bangkok Post ဢွၵ်ႇၶၢဝ်ႇဝႆႉၼင်ႇၼႆ။

တႅမ်ႈ – ၽူၺ်းၼုမ်ႇ