မၢၵ်ႇတႅၵ်ႇ တီႈႁိမ်းၵဵတ်ႉ/လၢၼ်ႇ သိုၵ်းမၢၼ်ႈ တၢင်းဢွၵ်ႇဝဵင်းပၢင်လူင် ပလိၵ်ႈမၢၼ်ႈ မၢတ်ႇၸဵပ်း ၵေႃႉၼိုင်ႈ လႆႈႁၢမ်သူင်ႇႁူင်းယႃ ဝႃႈၼႆ။
ပူၼ်ႉမႃး ဝၼ်းတီႈ 16/03/2025 ယၢမ်းဝၢႆးဝၼ်း 1 မူင်းပၢႆ မၢၵ်ႇတႅၵ်ႇ ၽွင်းပလိၵ်ႈသိုၵ်းမၢၼ်ႈ ၵူတ်ႇထတ်းရူတ်ႉၵႃး ႁိမ်းပၢမ်ႉၼမ်ႉၼမ်း ပႃႇဝႃႇ (ပါဝါ စက်သုံးဆီဆိုင်) တီႈဝၢၼ်ႈပၢင်မူင်ႈ ၾၢႆႇတူၵ်းဝဵင်းပၢင်လူင် ၼိူဝ်သဵၼ်ႈတၢင်းပၢင်လူင် – ၵျွၵ်ႉတၢၼ်း – ႁူဝ်ပူင်း ၼႂ်းဝဵင်းပၢင်လူင် ၸိုင်ႈတႆးပွတ်းၸၢၼ်း ၸၢၵ်ႇမၢၵ်ႇတိူဝ်ႉသႂ်ႇ ပလိၵ်ႈမၢၼ်ႈ ၵေႃႉၼိုင်ႈ ဝႃႈၼႆ။
ၵူၼ်းပိုၼ်ႉတီႈ ဝဵင်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ – “ၽွင်းမၢၵ်ႇတႅၵ်ႇၼၼ်ႉ ၸၢၵ်ႇမၢၵ်ႇတႅၵ်ႇတိူဝ်ႉ ပႃးရူတ်ႉၵႃး ၵူၼ်းမိူင်းလၢႆလၢႆလမ်းထႅင်ႈ၊ ပဵၼ်ၼမ်ႉမိုဝ်းၽႂ် ၸုမ်းလႂ်ႁၢင်ႈၵၢင်ဝႆႉတႄႉ ပႆႇလႆႈႁူႉၸွမ်း။ ယၢမ်းလဵဝ် ပလိၵ်ႈမၢၼ်ႈ ဢၼ်တိူဝ်ႉမၢတ်ႇၸဵပ်းၼၼ်ႉ လႆႈသူင်ႇယူတ်းယႃတူဝ်ဝႆႉ တီႈႁူင်းယႃ ဝဵင်းဢွင်ႇပၢၼ်းယဝ်ႉ”- ဝႃႈၼႆ။
ႁိမ်းဢွင်ႈတီႈ မၢၵ်ႇတႅၵ်ႇၼၼ်ႉ မီးဝႆႉၵဵတ်ႉ ၸုမ်းပျီႇတူႉၸိတ်ႉပဢူဝ်း PNO/ PNA ဢၼ်ပႂ်ႉၵူတ်ႇထတ်း ရူတ်ႉၵႃးၼိူဝ်သဵၼ်ႈတၢင်းပၢင်လူင် – ၵျွၵ်ႉတၢၼ်း – ႁူဝ်ပူင်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ